美食沙漠現綠州?馬鞍山食肆推介
2016-06-17
是咁的,之前網上有個投票話選出香港呢個美食之都嘅沙漠,居然有巴打話「馬鞍山輸嘅機會係零」!平心而論,馬鞍山嘅食肆選擇的確唔算特別多,唔想幫襯大財團一式一樣嘅連鎖店,但又唔想去烏溪沙咁遠,有咩選擇?利申,以下推介未必好味到一定要跨區過嚟試,但如果入馬鞍山做嘢或者探朋友,應該都幫到手嘅。

快靚正擔擔麵菜飯  三哥廚房擔擔麵菜飯專門店


Photos by Grace Chan 食好野 & 美奈子

邊個話三哥剩係有米線?其實三哥擔擔麵一樣掂!雖然唔知係咪同一位三哥,不過可以肯定嘅係,唔少馬鞍山街坊都會嚟呢度開飯。擔擔麵上枱先聞到湯底嘅香濃花生味,飲落仲帶蝦米同雞嘅香味。而上海菜飯就勝在有酸酸地嘅鎮江汁,撈飯食夠開胃,而排骨亦夠大塊有肉汁。人多嘅話仲可以嗌埋小菜Share。

寫意舒適泳池Cafe  CJ Cafe


Photos by 為食友 3

或者呢個可以話係馬鞍山呢個美食沙漠嘅嘅真·清泉,因為間Cafe就開喺馬鞍山泳池隔離...Sorry唔講爛Gag,呢間悠閒Cafe主要係食西餐,沙律意粉扒餐意大利飯等任君選擇。炭燒紐西蘭草飼牛眼扒真係有炭燒香味,加埋肉味濃郁嘅牛扒一樂也。紐西蘭青口意大利飯嘅青口大大隻又唔韌,意大利飯夠Creamy,收貨有餘啦。

高CP值意大利菜  P.R.C. Ristorante & Caffe


Photos by 野蠻妹 & herbert

想再有情調一啲嘅,仲有呢間抵食嘅意菜餐廳。招牌菜香煎帶子蟹肉紅花意大利飯勝在Creamy得嚟有正宗Risotto米芯有少少硬嘅特色,加埋三粒爽口帶子同芝士,邪惡誘人。香煎肉眼扒配紅酒汁塊牛扒雖然係薄身,但食落肉味唔錯又無筋,加上惹味紅酒汁同熱辣辣嘅香脆薯條,好味飽肚。其他Pizza同意粉都唔錯,聚餐之選。

Go Green新派素菜  大自然素食


Photos by 食cin & Liz's taste

農曆初一十五或者星期一想食素菜嘅話,可以一試呢間連鎖店嘅新派出品。士多啤梨骨有清新酸甜嘅士多啤梨配素肉,素肉咬落真係有肉絲嘅口感,可以以假亂真。而素菜館嘅基本芋頭魚係即炸,所以外皮特別鬆化,配埋粉糯嘅芋蓉同酸甜汁,啱哂送飯。記得嗌埋法式牛油果焗多士,用健康軟滑嘅牛油果同邪惡芝士代替蒜蓉嚟焗法包,香口得嚟又健康。

文青系心機西餐  Cafe 1950歐陸餐廳


Photos by savvy.li & Szekaijessica

餐廳裝修懷舊別緻,加埋木枱特別有文青Cafe Feel。不過呢間係食平民西餐嘅,連鵝肝多士同生蠔都有!質素唔算眼前一亮,但鵝肝煎到香脆,生蠔又新鮮食到海水味,高分通過。其他西餐亦相當有板有眼,燒豬仔骨分量大,加埋調味得宜嘅燒烤醬,唔係食肉獸都大愛。德國式咸豬手上枱前先切片夠細心,食落亦皮脆肉嫩。

呃Like列日窩夫  甜匠


Photos by changing & hoichi10

食甜品其實除咗要好味獎賞一下自己嘅味蕾之外,最好有埋精緻得意嘅賣相,見到靚嘢一樣開心之餘仲可以相機食先嚟呃Like嘛!呢間甜品店唔少出品都非常有呃Like潛質㗎,包括最多人叫嘅窩夫,窩夫係比利時式嘅列日窩夫,咬落甜而不膩而且口感較扎實。窩夫有五種口味,首推海鹽牛奶拖肥伴香蕉。另外用鐵板上嘅玉桂蘋果金寶亦有水準。

點心小菜皆宜  天澄閣


Photos by 亦一康 & 單吊張

星期六日想同屋企人飲餐茶或者嚟個中菜宴?麻煩行多兩步嚟呢間酒店嘅中菜館啦。酒店餐廳當然環境舒適,雖然價錢唔算平,但出品亦Keep到唔錯嘅水準。點心走新派傳統兼具路線,鮮蝦長春卷吸睛而且香脆,帶子鳳眼餃皮薄餡靚,雙杏球外脆內糯仲要有杏仁軟心。晚市小菜,無論海鮮定燒味都唔錯,小炒有火候。

輕食甜品Cafe  Bro & Sis Yogurt Café


Photos by hkfoodtalk & Grace Chan 食好野

非常適合小情侶一齊去嘅Cafe,因為有齊輕食例如意粉、迷你Pizza同All Day Breakfast,同時亦有Frozen Yogurt、心太軟同窩夫等甜品。男朋友唔驚食唔飽之餘,女朋友亦可以繼續甜品當正餐。嗌得Yogurt Café,Frozen Yogurt就係佢地嘅招牌菜,入口香滑冰涼,而且帶少少乳酪酸味唔太膩,無論搭流心嘅心太軟,定大塊香脆嘅窩夫都咁夾。

隨時接收最新資訊
讚好OpenRice專頁!
關鍵字
馬鞍山
Cafe
窩夫
擔擔麵
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
打卡必去!姐妹聚會7大餐廳精選
2017-03-22
【新店直擊】粉色系Café潮聖打卡必到
2017-03-03
3月份好評餐廳十強
2017-04-06
踩過界!鞋店尖沙咀開高CP值Café
2017-04-12
【開飯熱店入圍名單巡禮】新晉美食集中地 荃葵青區餓虎藏龍
2017-03-07
【Pinkoi好設計好生活】咖啡迷必到:4 大來自不同地方的特色咖啡館
2017-02-24
餐廳資料
更多
收起
本月熱門
【隨時更新】便利店尋寶 每周新品速報
2019-11-29
秋風起!5間大閘蟹放題食店集合
2019-11-19
【2019聖誕】年尾叉電 聖誕下午茶集合推介
2019-11-19
【2019聖誕】約會之選 聖誕市集推介
3天前
主打海鮮+龍蝦 免費芝士鬆餅 美國Red Lobster登陸銅鑼灣
2019-11-26