米芝蓮一星拉麵進駐尖沙咀 新店限定味噌拉麵(有片)
2017-09-23

喺【過江龍登陸!海港城3大新店預告】提及過,日本首間獲得米芝蓮星級肯定嘅拉麵店終於嚟到尖沙咀開香港第二分店,推出新店限定嘅味噌拉麵,用正宗德島縣八丁味噌配合熬煮接近九個鐘嘅高湯,同醬油或者鹽味拉麵最大嘅分別喺邊度?即睇開飯仔率先試食報告!
 

「蔦」(Tsuta) 今次選址於尖沙咀海港城港威商場地舖,雖然無咗部拉麵機,但爐頭就多咗一組,座位亦由銅鑼灣店嘅21個增加至新店嘅35個。而餐牌方面就增加咗尖沙咀店限定嘅味噌拉麵同兩款小皿 (Side Dishes)。
 

味噌拉麵用嘅麵條一樣糅合蕎麥粉及三種唔同麵粉,但比醬油或者鹽味拉麵用嘅較為粗身。皆因味噌味道較濃,用比較粗身嘅麵條就唔會發生比湯底味道蓋過麵條味道嘅情況。
 

而味噌拉麵嘅配料亦有唔同,為咗配合鹹香嘅味噌,配料都係味道比較清淡嘅粟米、芽菜同西洋菜。而特別醬料就係自家製嘅辣醬。叉燒、味玉就可以按自己喜好選擇要唔要追加。
 

味噌味玉叉燒拉麵一上枱就聞得到味噌獨特經過發酵嘅味道,湯底飲落的確係比另外兩款口味更鹹,適合鐘意偏重口味嘅拉麵迷。雖然睇落好似幾多油,但唔會有油膩嘅感覺。
 

以八丁味噌再加上牛肝菌蘑菇油,就比較難飲到原本以全雞、海蜆、魚乾同蔬菜等每日熬煮近九小時嘅高湯原味。所以開飯仔嘅建議係鐘意淡雅系嘅話可以點鹽味拉麵,想濃少少或者想食到黑松露香味嘅就點醬油拉麵,而喜歡濃郁湯底嘅當然就要點味噌拉麵。
 

更多【新店直擊】:
1. 獨霸270°海景!米蘭意菜新店3大睇頭
2. 麻瓜們集合!旺角魔法主題Cafe新登場(有片)
3. 溫哥華過江龍 人氣法式Crepe專門店剛登陸 招牌款式搶先試(有片)


麵條粗幼適中,同湯底味道平衡。配料方面,辣油嘅辣度適中,唔會搶去味噌鹹香又做到點綴同增加味道層次嘅作用。粟米同芽菜嘅清甜可以減低味噌膩度。叉燒亦係一貫嘅高水準,口感柔嫩有脂香而唔會覺得肥膩。
 

不過今次開飯仔食到嘅味玉就有少少失準,流心程度唔及之前喺銅鑼灣店食到嘅吸引。不過蛋香依然濃郁,補返數啦。
 

而尖沙咀店新增嘅兩款Side Dishes炙燒骰子肉同燒烤梅花肉,其實係將尖沙咀都有嘅炙燒骰子丼同燒烤梅花丼「走飯」,最啱「食肉獸」加點。炙燒骰子肉用火槍燒至微脆,入口先食到洋蔥醬香味之後再到肉味。不過因為用嘅係比較瘦嘅豬肉,部分無肥膏嘅肉粒就略嫌太乾。
 

尖沙咀將會喺聽日(24/9)朝早11點正式開幕,以後新界同九龍嘅拉麵迷唔洗過海都食到米芝蓮星級拉麵喇。
 



蔦 Tsuta
尖沙咀廣東道17號海港城港威商場地下G111號舖



文、相、片:Cathy

關鍵字
拉麵
東京米芝蓮
味噌拉麵
尖沙咀
海港城
日本菜
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
3天前
【2021生日優惠】持續更新!5月食日本直送海鮮送西班牙紅/白酒
2021-05-07
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
4月份好評餐廳十強
2021-05-06