深水埗必食秘店 2016版
2016-06-15
你會去深水埗做咩?買電腦手機?去舊區行下?有無諗過嚟深水埗「食好西」?唔好比明將嘅傳說嚇親,其實呢區仲有唔少美食等待各位食家發掘,開飯仔之前就寫過一篇深水埗必吃秘店,日新月異,今次嚟個2016更新版,帶你食勻用心整嘅港式漢堡,粒粒皆辛苦嘅手工芋圓,新興韓風炸雞,Foodie呃Like至愛嘅紫薯等等!

飄香手工港式漢堡  添福小食


Photos by nico_bread

食厭咗大大份嘅美式漢堡嘅話,不如轉個口味嚟食個即叫即整嘅港式漢堡。呢間小店唔少街坊都話只要經過都會聞到好香嘅味道,招牌黑椒牛肉漢堡大概等五分鐘就完成,但味道一啲都唔馬虎,厚身牛肉漢堡扒Juicy得嚟帶黑椒味,咬落肉扒有少少牛筋更好咬口。另外豬扒包同雞扒包一樣簡單好味,價廉物美。

正宗大排檔風味  愛文生


Photos by Calvin Kwok

溫馨提示,呢間係真·大排檔,即係綠色鐵皮屋加全室外座位,夏天去食的確會覺得有啲熱,但呢度嘅鑊氣就可以話係只此一家——之前喺開飯餐廳專訪,師傅就話平均兩三日就會燒壞一隻鑊!所以招牌菜當然就係各式懷舊小菜,豉椒生腸爽脆惹味,小炒王足料香口,黑椒薯仔牛柳粒鹹中帶辣,再加碟鐵板黑椒鹹豬手,可以送三碗白飯!

簡樸家庭式越南菜  第一郡


Photos by hkfoodtalk

越南菜嘅其中一個特色就係清爽,呢間小店嘅出品就非常彰顯出呢個特點。米紙蝦卷餡料十足,用薄米紙包住大蝦、芫茜、檬粉等,點埋有花生粒嘅酸甜醬汁更滋味。越式法包嘅包外脆內軟,餡料有扎肉、肉鬆、青瓜及酸蘿蔔,飽肚得嚟又清新醒神。飲埋冰涼滑溜嘅牛油果沙冰,最後食份清香煙韌嘅斑蘭綠豆糕做甜品,就係心滿意足嘅大餐。

穿越時空嘅經典  嘉頓咖啡店


Photos by 蒙奇奇

可能你細個都食唔少嘉頓麵包,但就未必知道深水埗嘅麵包廠有Cafe同餐廳!穿過展覽廳之後就會見到咖啡店,有輕食例如蛋糕、酥餅等供應,全部都係廠房每日新鮮製造。士多啤梨蛋糕茶餐就有一件鬆軟美味嘅士多啤梨忌廉蛋糕再加一杯飲品,紙杯仲係藍白格仔aka生命麵包包裝Pattern,成件事好似穿越返去八十年代咁。不過記得喺六點Cafe收工前去啦!

中醫館嘅手工芋圓  康瑞涼茶


Photos by Calvin Kwok

人不可以貌相,舖頭都係,呢間中醫館唔單止賣埋涼茶,而且仲有埋台式甜品!睇過開飯餐廳專訪就會知道,一碗招牌仙草百配,裡面所有地瓜圓、芋圓同小丸子都係老闆凌晨逐粒逐粒人手搓,有台灣夜市食芋圓嗰種煙靭彈牙嘅口感,加埋仙草嘅甘甜同其他材料,抵食又滿足。其他糖水例如桂棗雪耳小丸子或者酒釀桂花湯圓亦有滋補作用。

相機先食紫薯窩夫  Cafe Charm's


Photos by Pigsy & mush_room

雖然OpenRice會員們可能都聽過一句「平生不去西九龍,縱稱食家也也枉然」,但其實西九龍中心除咗大佬級嘅明將之外,仲有唔少真·優質餐廳嘅。呢間Cafe就係其中一個好例子。最吸引嘅就係佢地嘅紫薯迷人窩夫配豆腐雪糕,水滴形窩夫脆口有蛋香,紫薯蓉香濃唔過甜。鐘意鹹食嘅話亦可以一試特選芝士炸雞窩夫,連Afternoon Tea Set都相當有板有眼而且性價比高,賣相同食物同樣吸引。

Food Court食Oppa炸雞  皇帝雞


Photos by Cur

同樣位於西九龍,今次係上Food Court,呢個Food Court喺深水埗當中素有名氣,因為大部分都係街坊小店而唔係連鎖店。當中就以呢間韓式小食最特別,因為老闆係真·韓國Oppa嚟!炸雞分三款口味:韓辣醬、甜辣同甜醬油,三款都係即叫即翻炸同加醬汁,炸皮脆得嚟又夠薄,雞肉已經去皮去骨,啖啖肉而且Keep到Juicy。雖然小店只得炸雞賣,但依然非常好生意,下午7點到賣哂就收舖㗎啦。

隨時接收最新資訊
讚好OpenRice專頁!
關鍵字
深水埗
芋圓
炸雞
紫薯
大排檔
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【編輯推介】韓風炸雞:屋裡炸雞
2016-06-09
試食報告! 青衣戲棚掃街攻略
2017-04-09
端午糭動員 新潮口味逐隻數
2017-05-18
台式手工火鍋落戶銅鑼灣 晚市半放題有驚喜(有片)
2017-05-08
好新奇!KFC推出全港首部語音及體感偵測技術點餐機(有片)
2017-04-20
【愛心熱店專訪】派飯背後 深水埗明哥:我唔認為自己有愛心,我只係用心 (有片)
2017-03-07
餐廳資料
更多
收起
本月熱門
【隨時更新】便利店尋寶 每周新品速報
2019-11-08
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
糧尾打氣!5間灣仔平價飯堂推介
2019-10-24