台式手工火鍋落戶銅鑼灣 晚市半放題有驚喜(有片)
2017-05-08

要講到香港人關於美食最愛嘅幾個關鍵字,一定唔少得台灣菜同打邊爐,呢間台式火鍋新店仲要選址銅鑼灣鬧市,唔怪得開業無耐就已經接近Full Booking!開飯仔就特別去試一試佢地嘅午市套餐同晚市半放題火鍋,睇下係咪真係有料到?
 

位於銅鑼灣嘅饕鍋物雖然由港人開設,但店主特別搵嚟台灣大廚坐鎮,而且唔少食材都由台灣直送到港,誠意十足。先睇下最多人關注嘅晚市半放題火鍋,由湯底到配料都有落心思配搭,而且分量同質素都絕無欺場。
 

打邊爐當然要先揀湯底,呢度有五款任揀。最有台灣風味嘅首選台式三杯雞,唔單止雞肉係由台灣嚟嘅,一上枱聞到嘅陣陣台灣米酒香都已經相當吸引,配合埋台灣醬油同麻油味道更豐富。湯底裡面仲有九層塔、蜂巢豆腐同番茄等配料,仲唔油膩𠻹。
 

而牛魔王必試嘅紅燒牛肉湯就用咗牛骨同各款香料燉煮, 無論係湯底定裡面嘅牛腩都帶非常香濃嘅牛味,用嚟烚肥牛完全係錦上添花。另外仲有最啱女士補身嘅黑糖薑母鴨湯、保留正宗台式口味嘅台灣麻辣湯,同保證足一斤蜆嘅九層塔蜆湯!
 

揀完湯底當然就要睇配料,每人會有一份海鮮菜盤,總共18款食材,包括大大隻生蠔、台灣香腸,同各式蔬菜例如羽衣甘藍。食完仲可以無限任添。
 

同樣無限任添嘅仲有呢四款台式小食,鹽水雞加入蘋果食落特別清新,另外青瓜木耳、皮蛋豆腐同滷豆腐亦係細細份,等湯底滾起嘅時候當前菜食就啱哂。
 

台灣手工拼盤就每位一份,由師傅每日新鮮手製,必試口感特別嘅血米糕,同特別加入陳皮嘅手打鯪魚丸。而手工水餃會定期更換,最近推出嘅就係黑松露豬肉餡。仲有砌到成朵玫瑰花咁嘅豬爽肉亦不容錯失。
 

晚市套餐仲包一款自選肉類,可以揀極品牛三角、特級松阪豬、南投土雞脾、胭脂豬爽肉,或者霜降牛三角配豬爽肉。澱粉質控唔洗驚,有肉燥飯同稻庭烏冬等主食畀你揀。
 

更多【新店直擊】:
1. 迪士尼新酒店餐廳巡禮 米奇造型甜品最吸睛
2. 日本洋菓子Pop-up登陸金鐘 抵食心太軟+皇牌蜂蜜蛋糕(有片)
3. 灣仔豚骨魚介風沾麵 一種湯底四種食法

 

以為開飯仔已經寫哂?未!套餐仲包每位一杯台式飲品同甜品。值得一提嘅係甜品嘅芋圓同地瓜圓等一樣由師傅每日手製,配埋薏米、涼粉等配料,夠哂Sweet。
 

Lunch Time唔夠時間打邊爐點算?呢度一樣有台式午市套餐,有唔同嘅主菜同主食配搭,咁就食多幾次都唔會厭啦。鹽酥雞食落有孜然香,炸皮唔會太厚而入面嘅雞肉仲Keep到嫩滑。而蒼蠅頭就係台灣家常小菜,味道帶少少辣最啱送飯。
 

主食就有擔仔麵、魯肉飯、肉燥飯、雞魯飯四款選擇。擔仔麵嘅湯底用咗蝦頭熬製,加埋台灣肉燥香而不膩。意猶未盡嘅話仲可以用優惠價加配小食。
 

唔單止食物,飲品方面亦相當有巧思。講到台式飲品當然唔少得珍珠奶茶啦,但另外仲有兩杯取名非常趣致嘅飲品:不甘平凡同不想上班,係咪講中你嘅心聲呢?其實兩杯分別係荔枝紅茶同巨峰紅茶。
 

嚟銅鑼灣食餐飯就可以當自己飛咗一轉台灣咁,就算無Long Weekend都唔洗怕啦。
 



饕鍋物
地址:銅鑼灣堅拿道西10號冠景樓1樓



文、相:Cathy

關鍵字
銅鑼灣
火鍋
台灣菜
三杯雞
紅燒牛肉
芋圓
擔仔麵
新店直擊
走在最前線,為大家搜羅及報道有關新開餐廳的資訊。
相關文章
【新店直擊】冬日良伴:一人一個小火鍋
2017-01-31
台南百年擔仔麵 度小月尖沙咀店六大招牌菜解構!(有片)
2017-06-20
夏日火鍋新口味!四國湯底+火焰醉牛(有片)
2017-05-16
試食報告! 青衣戲棚掃街攻略
2017-04-09
【開飯熱店入圍名單巡禮】灣仔銅鑼灣美食特搜 集高檔平民於一身 
2017-03-07
一大班人慶生去邊好? 精選café篇
2017-03-14
餐廳資料
本月熱門
【2019聖誕】早鳥優惠! 聖誕自助餐推介
2天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
5天前
【知‧味20年專訪】九龍塘美式意菜餐廳 經典菜式廿年不變 份量激多最啱分享
2019-11-25