相信一眾Sanrio迷對於cremia配Sanrio角色嘅雪糕一啲都唔陌生，呢間成日同唔同卡通做聯乘嘅日式甜品店，最新嘅分店唔止繼續供應舊有嘅卡通雪糕，仲引入新款Bouquet Sable花花造型嘅雪糕同埋幾款日本直送甜品，其中個蘋果批仲要超多果肉呀！

酥皮蘋果批喺選料方面已經贏在起跑線，用嘅係青森縣嘅蘋果，稍為對日本有認識嘅都會知道青森縣嘅蘋果有幾清甜！今次呢個蘋果批仲要用咗勁多蘋果肉呀，舖滿晒中間嗰層㗎，加埋肉桂係幾香甜嘅，建議食之前用焗爐焗一焗，喺微溫嘅狀態底下食，酥皮就更加香脆喇。不過每日淨係得25個由日本新鮮空運返嚟咋。

另一款由青森縣蘋果製作嘅甜品，就係蘋果年輪蛋糕，切開就會見到成個已經批晒皮嘅蘋果，又係一個字，甜。不過冇蘋果咬到嗰啖得齋蛋糕嘅話，就略為乾咗少少。

布雪忌廉包細細個，最啱口痕嗰陣開個嚟食，口感鬆軟，仲有三款卡通包裝添，蛋黃哥、布甸狗同埋大集合！

另外，大熱天時點少得雪糕吖，cremia大家太熟悉就唔講喇，介紹下佢副線嘅新產品：Bouquet Sable。甜筒邊係花花嚟，用法式牛油餅底烤製，牛油味係幾香嘅。而雪糕亦係做到花花形咁樣，成支加埋就好似拎住束花咁，係幾得女生心㗎。每日限量100支，有紫薯、抹茶、士多啤梨、朱古力幾款口味揀。留意返，同cremia一樣，呢啲口味都係北海道牛奶雪糕base上再撒粉嘅。

甜筒以外亦有杯裝，幾位卡通主角當然繼續出現啦，仲各有各相配嘅味道，Hello Kitty就係配朱古力味嘞。

第三種嘅選擇就係配搭日式甜品，好似紫薯味就配小甜薯同白玉丸子，個底仲有脆卜卜嘅爆谷添。抹茶嗰隻就會有蕨餅~

即榨鮮果汁都有，特別要推介下最新嘅芒果沙冰，好香甜嘅芒果味呀，由聽日開始（5月22-27日）仲有買一送一優惠添~

山下菓子
地址：沙田沙田車站圍1號連城廣場零售層3號舖

文、相：Kar