正宗越南風味 上環新開越式法包專門店(有片)
2018-10-03

講起越南菜大家可能先諗起牛肉粉Phở,其實越式法包三文治Bánh mì都係當地平民美食之一!香港專賣越式法包嘅餐廳唔算多,最近就有上環呢間新店加入,由醬料到扎肉都盡量選用越南入口貨,法包就特別搵香港供應商訂製。每件越式法包都相當足料,加上定價合理,已經迅速成為區內唔少上班族Grab & Go嘅新選擇!
 


Viet Dating由一對香港情侶開設,兩位都非常鍾意去越南旅行,曾經試過由南到北差唔多去勻成個越南。去過越南偷師後將越式法包帶到嚟上環,試過唔同配搭同做法後,小店而家供應四款口味越式法包。法包係專門請香港供應商,由典型偏硬嘅法包改良為外脆內軟嘅越式法包,每日新鮮供應!
 


經典越式法包($46)

鍾意越式風味嘅話就推介點呢款經典口味,法包先切開,搽上越南豬肝醬同黃油,然後加入青瓜、越南扎肉、切粒燻蹄、自家燜煮嘅腩肉同腌蘿蔔。而越南金不換、薄荷葉、芫荽同辣椒就可以按自己喜好選擇要唔要加,開飯仔建議大家加哂以上香料,咁先係正宗越南食法!
 


法包加醬料再焗,外表睇落帶少少黑色但食落無燶味,表面非常脆口,食落響聲好似薯片咁誇張!配料方面以腩肉同扎肉味道最突出,惹味之餘仲有燻蹄嘅膠質口感頗有層次感。腌蘿蔔酸甜清新,加埋香草相當有越南風味。食得辣嘅朋友記得加埋辣椒粒一齊食,夠醒神!
 


魚果越式法包($49)

如果想食少啲肉嘅話,可以揀三文魚牛油果口味。牛油果切片後用越南青檸汁同黑胡椒調味,口感Creamy味道清新,配埋煙三文魚食落係四款口味中最Light嘅一種。為咗味道平衡,呢款口味就無加到豬肝醬,少咗啲啲越南風味但就廣受外國人歡迎。
 

更多【新店直擊】:
1. 金鐘新開日本料理速食店 靚靚雲霧壽司拼盤
2. 銅鑼灣新開茶飲店 免費加手工榴槤、黑糖珍珠
3. 佐敦豪裝拉麵店 泡沫雞白湯拉麵、厚切鰻魚飯

 


輕型創新越式法包($32)

每日14:30-18:00都有Tea Set供應,輕型法包分量大概都有原本嘅三分之二,啱哂細食嘅朋友仔。創新口味配料有烤雞、煙肉、芝士、青瓜、腌蘿蔔、越南豬肝等等。半溶芝士相當誘人!食落其實又無想象中咁膩,芝士增加柔滑口感同香味,烤雞保留到肉汁,煙肉亦無過乾,所以加埋腌蘿蔔同香料一齊食就平衡返哂。
 


青檸柑橘薄荷梳打(單點$24,買任何法包+$20)

Tea Set包一杯熱嘅越式青檸茶或越式蓮花茶,亦可以加錢換其他特飲。青檸柑橘薄荷梳打聞落有柑橘香,味道酸甜有致。
 


凍越式特濃咖啡(單點$22,買任何法包+$18)

最有越南特色嘅就係越式咖啡,用越南咖啡粉加越南入口嘅煉奶,搞勻後特別濃郁香甜。最值得一讃嘅係佢地嘅凍飲全部都係雪好唔洗加冰,飲幾耐都唔怕沖淡。
 


小店座位暫時只有四個,Lunch Time嘅話建議大家都係外賣,下午茶時間就可以嚟堂食Tea Set。細細聲講埋畀大家聽,因為兩位老闆鍾意越南,如果你都愛食越南菜,或者諗住去越南旅遊,可以同佢地傾下計交流下心得㗎。
 




Viet Dating
上環永樂街87號泰達大廈地下4號舖




文、相、片:Cathy

關鍵字
上環
越南法包
越式法包
越南菜
越南咖啡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2天前
【2019聖誕】早鳥優惠! 聖誕自助餐推介
4天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
7天前