必試泰式生菜包漢堡!灣仔創意手工漢堡小店(有片)
2020-04-09

喺香港想食漢堡有好多選擇,唔一定次次都要去連鎖店,不如多啲支持一下本地創作。好似灣仔呢間新開嘅小店就好有諗頭,以生菜包為靈感設計咗一款泰式漢堡!牛肉漢堡亦特別用咗本地同美國三個唔同部位嘅牛肉手打成漢堡扒,落足心機㗎。
 


MAD Burger主打手工漢堡,亦有供應意粉、沙律、咖啡等。半開放式廚房可以畀大家見到製作過程,感覺安心啲又可以增加同廚師嘅互動。漢堡暫時有三款選擇。
 


Right Mad($78)

漢堡扒食落柔軟多汁有牛香,原來係用咗本地牛腩、牛小排,同美國嘅牛肩胛三款牛肉打成,各自取其油脂香、瘦肉口感同牛肉香,難怪食落口感同味道都啱啱好,香而唔膩。而包就選用法式牛油麵包,就咁食已經有淡淡牛油香,口感鬆軟。
 


配料方面有生菜、蕃茄、車打芝士、焦糖洋蔥、同Mad Sauce。車打芝士用火槍燒至半融,而Mad Sauce係用燒烤醬、蛋黃醬等同自家秘方調配嘅醬汁,酸酸甜甜咁,加埋蔬菜可以平衡膩感。碟邊仲有酸黃瓜,方便返唔食酸黃瓜嘅朋友仔吖嘛。
 


Thai Mad($78)

係泰式同西式Fusion,豬肉碎加辣椒絲、金不換、檸檬葉、魚露等炒香,放入生菜成為漢堡主角,配搭煎蛋、艾民頓芝士、蕃茄。食落香料香味突出,味道微辣,爽脆嘅生菜、帶酸嘅蕃茄同蛋黃半熟嘅煎蛋就可以增加口感層次,亦令漢堡整體味道平衡。
 


Veggie Mad($78),Potato fries($38,漢堡+$20)

另外亦有「走肉」版本嘅漢堡,材料有薑黃蘑菇、生菜、蕃茄、牛油果、艾民頓芝士、焦糖洋蔥,同樣配以酸黃瓜。其他蔬果味道都比較輕,蘑菇就特別加入Super Food薑黃粉炒香,增添風味。軟滑嘅艾民頓芝士同香甜嘅焦糖洋蔥亦好夾。

另一個心機位喺薯條度,選用薯仔味較濃嘅黃皮薯仔,連皮切完之後要浸冰水,洗走表面多餘澱粉,先焗至軟身,再喺收到Order之後立即油炸,就做到外脆內軟嘅口感喇。
 

更多【新店直擊】:
1. 蛋炒胡麻黑松露腸粉、龍蝦芝士撈丁 紅磡新開誠意小店
2. 淡粉玫瑰雪糕x自家製蘋果醬 尖沙咀新開粉紅雪糕屋
3. 西九文化區現代手工中菜館 黑松露法葱炸子雞、煙燻片皮鴨

  


Pastas of the day($88)

意粉每個月都會更換款式,新開張係呢款香蒜辣椒魷魚意大利麵,係經典蒜片辣椒意粉嘅變奏,加入蕃茄同魷魚,最後撒上巴馬臣芝士碎。味道酸酸辣辣,而且魷魚食落充滿鮮味又彈牙,非常醒胃。
 


Dirty($38)

咖啡採用選用本地烘焙品牌咖啡焢嘅Season Blend咖啡豆,而Dirty即係熱嘅Espresso撞凍牛奶,唔加冰亦唔使搞勻,可以同時品嘗到熱同凍兩款口感,當中以凍咖啡嘅朱古力香較為突出,味道香醇口感柔滑。
 


(右)Lime Mad($38)

而Lime Mad係香茅青檸梳打,用自家製香茅糖水加新鮮青檸片同梳打水,氣泡口感加上青檸酸味非常清爽。
 






MAD Burger
地址:灣仔灣仔道181A-181G號長春大廈地下A號舖




文:Cathy
相、片:Tom Li

關鍵字
灣仔
漢堡
意粉
咖啡
MAD Burger
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2021-05-03
【2021生日優惠】持續更新!5月食日本直送海鮮送西班牙紅/白酒
4天前
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
荃灣新開 人氣名古屋班戟分店 首推沖繩紫薯梳乎厘班戟+班戟漢堡
2021-04-15