必試即蒸石磨腸粉+煎手工餃子!尖沙咀新開小食店(有片)
2020-03-05

尖沙咀掃街新店!呢間新店由幾位後生仔主理,主打雲浮石磨腸粉同自家手工餃子,即叫即製熱辣辣夠好食。最值得一讃嘅係甜豉油同辣椒醬都係自己整,調配過嘅豉油甜甜地又有鮮味,手炒辣椒醬又香又辣,落足心機自然好味啦。
 


不忘位於又名韓國街嘅尖沙咀金巴利街,店主之一去過雲浮跟師傅學過點整當地嘅正宗石磨腸粉,仲特別將個五彩石磨帶埋嚟香港,磨出嚟嘅米漿特別細滑,咁蒸出嚟嘅腸粉口感亦會更滑。
 


鮮豬肉碎蝦米雲浮石磨腸粉($32)

腸粉有九款配料想點配搭都得,收到單先將每朝鮮磨嘅泰國米漿加上自選配料放入爐蒸,蒸好刮成四條腸粉。鮮豬肉碎加蝦米係小店推介口味之一,蝦米嘅鮮香加上鮮豬肉嘅肉味就夠香口。
 


不過都強烈建議大家落埋甜豉油,係店主用豉油加上羅漢果同蝦皮等材料調配,羅漢果係增加天然甜味,而蝦皮就令豉油多一份鮮香,加落皺皮腸粉度真係立即「升呢」!
 


薑蓉豬潤芫荽雲浮石磨腸粉($32)

腸粉透薄可以清楚睇到配料,薑蓉豬潤蒸過後薑蓉味其實唔係特別勁,怕食薑嘅朋友都可以一試。豬潤略嫌口感唔太滑,但勝在相當甘香而且完全唔腥,加埋清新嘅芫荽真係無得輸嘅。唔食芫荽?推介配搭仲有肥牛生菜($32)同香菇雞蛋($30)呀。
 


手工生煎粟米豬肉餃($35/6隻,$50/10隻)

餃子亦係自己人手包,有煎餃同水餃揀。煎到個皮脆卜卜咁就惹味啲,而且餃子皮厚薄適中,唔會一夾就爛又唔會厚到好似食緊粉咁。裡面嘅豬肉亦仲有少少肉汁,加埋甜甜哋嘅粟米唔會太膩。唯一扣分嘅係煎餃油咗少少。
 


食得辣嘅朋友非常推介加埋佢哋人手炒嘅辣椒醬!用新鮮辣椒、蒜頭、魚露等炒成,唔加任何防腐劑,聞起嚟已經好香,食落辣味都真係幾勁下,但唔會嗆喉而且仲可以帶起其他味道!
 

更多【新店直擊】:
1. 人氣甜品小店登陸大角咀 新出肉桂蘋果金寶配自家製乳酪雪糕
2. 水果入饌 農家蟹皇配蘋果叉燒 深水埗新開健康串燒居酒屋
3. 卡邦尼口味Pizza!中環新開抵食意大利手工薄餅專門店

 

雞湯手工雲耳椰菜豬肉餃($32/6隻,$48/10隻)

水餃就會加上雞湯同紫菜,食落又係另一種鮮味。雲耳椰菜豬肉餃裡面嘅雲耳相當爽口,食落口感層次豐富,連埋湯一齊食味道香甜。
 


牛丸紫菜湯($28)

用嘅係潮州老字號福合埕嘅牛丸,特色係人手打成,粒粒大細都有啲唔同。但口感彈牙又夠實,有肉汁富牛味。食過想Encore嘅話可以外賣埋佢哋嘅生餃同牛肉丸㗎。
 


外賣生餃($45/12隻)





不忘
地址:尖沙咀金巴利街1E號地舖




文:Cathy
相、片:Tom Li

關鍵字
尖沙咀
石磨腸粉
皺皮腸粉
餃子
牛丸
不忘
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11