要數港式漢堡，點會唔提及到嘉寶小食？招牌漢堡包既有港式風味，又有新穎嘅配搭，深得一班本地burger迷歡迎。最近嘉寶小食衝出葵涌，去到尖沙咀開分店！新店除咗繼續供應招牌漢堡包，仲會推出幾款新口味burger添，更有新店限定嘅食物！有乜好食先？

葵涌店之所以咁出名，因為老闆鎧哥會用靚啲又貴啲嘅牛肋條做成漢堡扒，口感寧舍不同；而新店用嘅牛肉再度升級，由原本嘅巴西牛肉升級至澳洲牛肉，牛味濃啲又juicy啲！

5大新店限定：

1.BBQ菠蘿雞扒堡

新店最大賣點，就係新增慢煮雞扒堡系列，葵涌店之前所用嘅係免治雞肉，雖然好味，但始終少咗一份澎湃感。今次舖頭用嘅係原塊雞扒，以65度慢煮雞肉兩小時，令雞肉keep住嫩滑嘅質感，再經油炸後、香煎而成。

先將沙律醬搽喺漢堡之上，再加入生菜、番茄、雞扒、菠蘿、烤洋蔥等配料，就大功告成！

雞扒好厚身，肉質亦好嫩滑，雞皮尤其出色，炸得好香脆。另外，微酸嘅菠蘿能醒胃之餘，亦成功提升其他食材嘅味道。

2.香蔥雞扒堡

將香蔥加入沙律醬，令酸酸甜甜嘅沙律醬多一份小清新。Burger除咗有雞扒，仲有沙律醬、生菜、菠蘿、洋蔥以及燒烤醬。另有凱撒雞扒堡。

3.烤布利芝士牛堡

一個芝士牛堡可品嚐到兩款芝士嘅口感，熱融咗嘅車打芝士，加埋厚實嘅布利芝士，「芝」味更濃更香。

Burger仲加咗秘製嘅嘉寶醬添！

4.香辣煙肉蛋羊堡

以免治羊肉做成漢堡扒再香煎，加埋煙肉、雞蛋、生菜等配料就搞掂！

5.番薯條

至於小食，有呢款新出番薯條，新鮮即炸灑上少許鹽花，口感甜糯嘅番薯好香口。

Upgrade人氣漢堡！

除咗新口味，舖頭亦將固有嘅人氣食物加以改良，令味道提升。講緊嘅係嘉寶小食一直熱賣嘅burger──蜜糖芥末菠蘿豬堡。新食譜加入由自家芥末籽、蜜糖混成嘅芥末醬，香而不辣，將漢堡味道升級！

食素，點算好？

同葵涌店一樣，素食者可向店員柯打隱藏喺餐牌之中嘅「素堡」，喺菠蘿、雞蛋、蘑菇及芝士4款中揀選心水配料，舖頭就會整畀你，價錢為$35。

新店座位比舊店多，有16個座位。裝潢都幾stylish，以水泥牆配以木系傢俬，仲有幾個窗口位添，有種cafe嘅味道。

嘉寶小食
地址：尖沙咀金巴利道78號地下A舖

文：Joy