古早味魯肉飯登陸觀塘! 台灣食材帶出風味
2017-11-15

香港人似乎對台灣餐廳有一份情意結,即使有請坐程班長台灣美食阿元來了小時光1963木十豆寸等台式餐廳,呢間開業只有幾日嘅台式餐廳已經深得觀塘區內食客歡心,午餐經常好快售罄!究竟呢間台式餐廳有乜咁巴閉?

舖頭由幾個女生主理,主打幾款台灣街頭常見嘅台式美食,例如魯肉飯、肉燥飯、米粉湯、黑糖刨冰等等,老闆之一嘅Garine強調,店內大部分嘅食材、配料都來自台灣,務求可做出正宗台式風味。

古早味魯肉飯($38),每日大廚將五花腩、豬下脾切成肉粒,並以醬油糕、冰糖等配料一同熬煮兩三個小時,形成濃稠嘅魯肉汁。當收到客人柯打時,就會將濃濃魯肉汁淋上粒粒分明嘅米飯之上。

未食之前就已經聞到肥豬肉嘅陣陣油香,好邪惡!魯肉分量多,口感軟腍,非常香口,加埋台灣國民最受歡迎嘅「台梗九號」珍珠米,煙韌得嚟又吸收魯肉汁,味道一流。

古早味肉燥飯($36),比起魯肉飯,肉燥飯就相對無咁油膩,因為當中以豬肉碎為主。少啲肥豬肉雖然少一份油香,但肉燥就多啲咬口,而且肉燥汁內加入咗蝦米,再連埋台灣生抽、醬油糕等食材一同熬煮,惹味得多。

惹味肉燥乾拌板條($38),香港較為少見嘅台灣板條,形狀似河粉咁長而扁平,但食落好似潮州粉果層皮咁,有少少煙韌,食多幾條都幾有飽肚感。配以肉燥、韭菜、蒜泥、炸乾蔥、醬油糕及烏醋就大功告成。

祖傳米粉湯($34),唔好誤會,唔係米粉加湯,米粉湯係以豬骨、雞熬煮出嘅高湯去煮米粉,煮到米粉碎成一小條一小條,接近好似粉漿咁樣架,最後加上胡椒粉及韭菜,令米粉湯更香。食嘅時候用匙羹就可以,如果唔夠味仲可以加入自家秘製辣椒油添!

相比起中式佛跳牆,呢個兩人份嘅台式迷你佛跳牆($78)雖然用材無咁華麗,但勝在非常足料,太足料反而被客人指唔夠湯水。入面有素翅、芋頭、栗子、冬菇、鵪鶉蛋、排骨酥、豬手及魚皮,湯水好清但飲落就好黏口,好似平時食到豬手嘅骨膠原咁,好豐富。

招牌黑白切(綜合)($168)黑白切,係咩嚟架?其實「黑白切」係台語嚟,意思即「隨意切」,舊時代嘅台灣人會叫小店店員隨便切一碟豬嘅部位嚟食,即指豬嘅內臟──豬雜!餐廳供應6款豬內臟,分別係豬蝴蝶腩、豬舌、豬心、生腸、嘴邊肉(即面頰)以及豬脆管(即氣管)。聽落有點兒那個,不過食落又幾好味喎,尤其是豬脆管,口感比豬軟骨更爽脆,最啱送酒。注意,每日限量供應!

飲品方面有自家煮製嘅7款台式飲品,材料從台灣入口,而且不含色素、防腐劑架!左起有古法烏梅汁、古早味楊桃汁、阿里山烏龍茶、山楂洛神花茶、檸檬冬瓜茶、黑糖冬瓜茶及古早味紅茶。

開業一星期,最多人點嘅就係山楂洛神花茶,味道好酸好純,一飲就知並非以糖漿或濃縮水調開,而且每朝開店前煮好入樽,夠新鮮。樽上寫滿餐廳供應嘅各款飲品名稱,感覺classic。

傳統黑糖刨冰$36(圖為$72)用刨冰機刨出冰粒,再加入心水配料,最後淋上黑糖漿就完成。每客可任選2款配料,每款配料追加價錢為$6。

配料有仙草凍、小丸子、珍珠粉圓、紅豆、綠豆、椰果、蘆薈粒、爆爆珠、手工芋圓及手工地瓜圓選擇,識食就梗係揀芋圓、地瓜圓啦,夠煙韌,學台仔店妹們話齋,「夠Q彈」!

門口有一道寫滿菜式名嘅黑白字牆,仲有木窗花、木牌匾、紅色餐廳大門仲有埋鋪首銜環,古色古香。

入面裝潢以木為主,枱凳甚至餐牌都係木製,好似古裝片入面啲客棧咁。不同嘅係,餐廳內有一幅壁畫,一個女人開心地被餵食,旁邊仲有黑毛豬、八角、台灣乾蔥等,好有心思。

仲有呢個「龍鳳號」嘅柔黃霓虹燈,增添少許現代風味。

龍鳳號
地址:觀塘駿業街56號中海日升中心2樓2B號舖


文:Joy

關鍵字
台式餐廳
觀塘
魯肉飯
肉燥飯
米粉湯
刨冰
古早味
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
1天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
本地搵食有著數!OpenRice x 旅發局 合推 5折餐飲券+餐飲禮遇
2020-09-21
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2天前
悠閒早晨 3間英、澳、日Brunch推介
2020-09-21