豚王拉麵有新麵──蟹味噌王，單睇相片都覺得蟹味噌分量驚人，潷起有成個雪糕球咁大，而且唔使自己動手拆蟹，都可以食到啖啖甘甜嘅蟹膏味道，啱晒一眾懶人，速睇開飯仔試味報告。
新推出嘅蟹味噌王，採用嘅蟹味噌來自日本北海道函館竹田，蟹味甘甜鮮美，濃而不鹹，食完仲有齒頰留香嘅感覺，口感一流。
濃郁嘅主角蟹味噌上場，其他搭配嘅拉麵、湯底、配料，味道就要相對地清淡，以免搶去蟹味噌嘅味道而變得雜亂。平日食開啲拉麵多為好濃味，亦好油膩，今次呢個蟹味噌王就用咗清清哋嘅鹽味清雞湯，湯底以海鹽、雞湯、魚骨等配料熬煮約4個鐘頭，味道好清之餘，又有海鮮嘅鮮味。
上枱時可先品嚐少少蟹味噌，嗒下原味嘅甘甜；再試一口蟹味噌連拉麵，蟹味令拉麵提鮮；最後將蟹味噌與湯底混和，加重湯底嘅鮮味味道，從而品嚐出3種不同層次。
更多【飲食潮流】： |
除咗蟹味噌，配料仲有兩隻蟹鉗、兩片豬肉、洋蔥及蔥。蟹鉗只係本地貨，但勝在蟹肉鮮甜多汁；兩片豬肉係豬肩肉，口感較為清爽，無咁油膩，與整個主打「鮮」味嘅蟹味噌王好夾。
蟹味噌王由2018年1月1日至1月31日限時供應，每日分兩個時段供應，每時段只會供應40-60碗架咋，一於mark住佢，做2018年嘅開心第一餐啦！
豚王
地址：尖沙咀棉登徑28號錦榮商業大廈地下
文：Joy