九龍城一人“牛邊” $88騸牯牛頸脊有乜咁巴閉?
2017-12-20

呢排天氣咁凍,打邊爐是常識吧!成日食“吉邊”都嫌悶啦,不如改試九龍城呢間一人“牛邊”,價錢相若,但係用嘅都係高質靚騸牯牛頸脊。聽個名似乎好架勢,但實情呢個騸牯牛頸脊有乜咁巴閉呢?

騸牯即指已閹割嘅牛隻,被閹割嘅牛隻嘅活動比起未被閹割嘅牛隻無咁多,比較斯文啲,因此騸牯牛身脂肪較多,牛味亦更濃郁,口感亦比較嫩滑而不韌。店子用嘅係騸牯秦川和牛,肉紋好完整,而且無乜油花。

至於牛頸脊,係牛隻活動最多嘅部位,比起其他牛肉部位,脂肪亦比較少。肉質同一般肥牛、肉眼、西冷都好唔同,肉味亦相對濃郁。

一隻牛只有少量牛頸脊部分,來貨價格自然貴,店子用嘅仲要係本地新鮮牛肉,購自擁有30多年經驗嘅香港第一牛肉買手莫景雄,牛頸脊每日從屠房新鮮直送到店,由店子手切上碟,絕無雪藏氣味,畀各位牛魔品嚐高質素、「牛汁牛味」嘅“牛邊”,實屬難得。

有靚牛,都要有好味湯底襯托。店子用超過50斤牛骨牛頸肉、胡椒、香葉熬煮超過6個鐘頭。湯色偏深,單單湯底就已經好有牛膻味,味道好鮮甜,亦好濃,濃到連平日火鍋沾嘅調味醬都可以唔要,而且明顯飲得出無添加味精。

湯底滾起後,放入牛頸脊,大約10秒左右就可夾起食得。牛頸脊紋路分明,無乜脂肪,食落有咬口得嚟而唔會韌,咀嚼時間越長,陣陣牛味不斷滲出,身為牛魔嘅開飯仔表示好正!美中不足嘅係,“牛邊”只跟一碟6塊牛頸脊,如果想食多幾塊,就要追加牛頸脊啦,價錢係$48!

更多【飲食潮流】:
1. 呢個聖誕最「芝」味!The Cheesecake Factory聖誕推介
2. 快餐店出火鍋! 超足料姬松茸花膠雞鍋
3. 麥當勞冬日新品!$28 北海道三文魚菠蘿堡餐

除咗牛頸脊,“牛邊”亦包咗牛丸、魚蛋、菜肉雲吞、時令蔬菜、雞蛋、粉麵及蔥花。牛丸、魚蛋均由店子手打,牛丸好似牛筋丸咁好有肉感、有咬口,內裏嘅油香滲滿整個口腔,讚;四方形嘅白魚蛋非常彈牙,淥起即食嘅話仲會爆湯汁添!

菜肉雲吞來自北京水餃店,味道清新,能減輕濃郁嘅牛膻味,惟雲吞皮略嫌過厚。

粉麵有粗麵、幼麵、河粉、米粉、伊麵(加$4)選擇,開飯仔就選擇河粉,河粉比較幼身滑溜,容易煮熟之餘,亦好吸牛骨湯精華,客人好容易一邊食河粉,一邊飲晒牛骨湯底。不過唔使擔心,店子可免費加湯架!

雞蛋Special食法!

“牛邊”包括來自湖北嘅雞蛋,蛋汁比較深色,蛋白較少,而且充滿蛋香。老闆Kenny建議兩種食法,第一種就將雞蛋打入碗中,並加入蔥花、少許牛骨湯拌勻,就做成牛肉嘅沾醬,口感更滑溜。

第二種就係,將雞蛋打入湯中,然後快速攪勻形成蛋花,煮成牛骨蛋花湯,品嚐牛味至極致。

口渴點算好?只要like店子Facebook page,即刻送你汽水1支,so easy。

食材追加價目表:
本地手切牛頸脊 $48/6片、手打牛丸 $38/7粒、手打魚蛋 $38/7粒、菜肉雲吞 $42/6隻、酥炸魚皮 $26/碗、時令蔬菜 $23/碟、鮮雞蛋 $5/隻

牛魔王火鍋
供應時間:6pm-10pm
價錢:$88/位
注:只限晚市供應

同場加映!首推牛頸骨煲

除咗牛魔王火鍋,餐廳亦推出牛頸骨煲!以馬來西亞肉骨茶作為靈感,用牛味好濃嘅牛頸骨熬湯,加埋煲得軟腍嘅牛筋、吸收湯汁嘅蘿蔔,好鮮甜。仲配埋白飯1碗,滋味又飽肚。


坤記牛腩
地址:九龍城侯王道2B號地下


文:Joy

關鍵字
火鍋
牛邊
一人火鍋
牛頸脊
打邊爐
九龍城
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
迎接全新2020 1-2月下午茶推介
2020-01-06
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13