共聚天倫啱哂 十間親子餐廳介紹
2016-04-11


假日係一家人共聚天倫嘅好時機,不過可能唔少爸爸媽媽都覺得搵餐廳有難度,因為既要照顧小朋友口味又要確保餐廳有位擺BB車,而且餐廳最好有埋BB櫈等嬰幼兒設施,咁就一家人都食得開心又放心啦。以下就介紹香港其中十間親子餐廳,滿足哂大朋友同小朋友嘅需要!

海風餐廳

位於尖沙咀一間酒店嘅自助餐廳,有BB櫈比嬰幼兒之外,仲特別有個Kids Corner比小朋友喺裡面大玩特玩。而且值得一讃嘅係Kids Corner唔單止有各種玩具,仲有職員扮小丑陪住小朋友。訂座嘅時候亦可以請職員安排坐喺接近Kids Corner嘅位置,咁爸爸媽媽就可以放心享用自助大餐啦。


Photo by wooddot




呢間可以話係最接近大自然嘅親子餐廳!雖然元朗屏山係有少少隔涉,但可以喺闊落嘅戶外環境之下玩同用餐,無論對小朋友定大人都係另一種享受。呢間海鮮牛扒屋設有令小朋友樂而忘返嘅戶外遊樂場,玩到攰就可以到兒童進食區食飯,職員亦會安排一啲小活動例如填色,慢慢玩慢慢食。


Photo by kimada


焱咲自煮理平板燒概念店

帶住小朋友唔敢去食燒肉?咁嚟呢間就啱啦!荔枝角呢間工廈餐廳用遠紅外線平板燒爐代替火爐,無火燒肉減少一定危險性;而且遠紅外線平板燒爐溫度最高有308℃高溫,可以落少啲油更健康。如果小朋友唔鐘意食燒肉,餐廳亦有兒童餐供應,非常細心。餐廳一角係兒童樂園,有齊滑梯、波波池、車仔等。


Photo by VCY


Moomin Cafe

小朋友唔肯坐定定喺High Chair食飯?有得意公仔陪住會唔會好啲呢,呢間卡通人物主題Cafe就可以請職員安排唔同大公仔坐喺度陪住你食飯!而且餐廳亦有兒童餐供應,唔洗煩揀咩食。喺小朋友進食嘅時候,大朋友亦有卡通主題美食任揀,不失為重拾童心嘅好機會。


Photo by kimada


Jamie’s Italian

細路仔鐘意玩是常識吧,呢間意大利餐廳從Kid’s Menu開始就非常有趣,紅色眼罩其實係一部幻燈片機,透過佢見到嘅就係餐牌;另外點餐紙會連埋蠟筆比你,因為反轉張紙就係填色同連線遊戲。兒童餐嘅菜式設計亦相當認真,Shake Me沙律就係有得玩、有得食又健康嘅最好例子。


Photo by supersupergirl


Fullhouse Kitchen

一如其名,呢間西餐廳打正旗號以家庭做主題,唔單止裝修有特色,有唔少公仔可以比小朋友影相留念,空間亦相當寬敞,絕對有位擺BB車。兒童餐仲分男仔同女仔版,有兄弟姐妹嘅小朋友一於嗌唔同版本一齊開心Share食。食厭咗兒童餐亦有三文治同小食等方便分享嘅美食選擇。


Photo by 車媽媽


Tree Cafe

小朋友鐘意玩嘅時候,其實大人亦需要一個Relax嘅空間。呢間位於鴨脷洲一座工廈嘅木製傢俬店裡面有間Cafe,裝修一樣以木為主而且有大玻璃窗可以望住海景放鬆下。另一方面小朋友就可以喺Kids Play Corner玩,裡面有唔少童話書、玩具同得意木馬,唔好話小朋友,大朋友都想玩!而且仲有間獨立育嬰室,夠細心。


Photo by mohkc


大樹先生的家

唔少爸爸媽媽帶小朋友到台灣旅行必去嘅親子餐廳開到嚟香港啦!香港店佔地約6,000呎,荔枝角店鄰近地鐵站又有得泊車,方便各位父母。而最令各位小朋友樂而忘返嘅一定係佢地嘅特大波波池。玩厭波波池仲有個沙池,玩完可以用風筒吹走身上面嘅沙,安排貼心。食物以西餐為主,仲有特別多蔬果嘅兒童餐供應。聽講好受家庭客歡迎,成日Full House,所以想去都係早少少Book檯


Photo by kaka1001hk


The Story Cafe and Bakery

觀塘呢間Cafe一到週末就會變身親子餐廳!因為星期六、日同公眾假期佢地會開放兒童樂園,最多小朋友玩嘅係色彩繽紛嘅砵砵車。Menu一樣以西餐為主,另有兩款兒童餐,用車盤奉上,小朋友見到實鐘意。大朋友食嘅意粉或者扒餐水準都唔錯。不過呢度午市要消費滿$100先可以玩1節,每節5分鐘,之後想繼續玩就要額外畀$30買2節喇。


Photo by sugar_tang


宜家家居餐廳及咖啡室

兒童餐或者Kids Corner唔係高級餐廳先有,平價餐廳一樣有!無獨有偶呢間同樣位於傢俬店當中嘅餐廳一樣有比小朋友任跳任玩嘅遊樂亭,家長可以坐喺遊樂亭外面睇實小朋友。另外一樣有兒童餐,價格仲相當實惠。餐廳係自助形式,有需要可以自行獲取小朋友專用嘅膠碗、膠羹同膠叉使用。


Photo by ryu_ng & mx8034


香港當然唔止得十間親子餐廳,咁點搵?OpenRice而家幫各位爸爸媽媽行多步:喺搜尋條件新加「嬰幼兒設施」選項!咁就更容易搵到方便嘅心水餐廳啦。



隨時接收最新資訊
讚好OpenRice專頁!

關鍵字
嬰幼兒設施
兒童餐
Kids Corner
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
米芝蓮一星拉麵登陸銅鑼灣 必試松露鮮味湯底(有片)
2017-05-18
【便利店尋寶】限量版蝦子杯麵試食報告
2017-05-19
端午糭動員 新潮口味逐隻數
2017-05-18
初夏清新之選 酒店芒果主題下午茶
2017-05-19
【優秀開飯熱店大賞 2017】至尊大獎衛冕者 突破傳統漢堡界限
2017-05-19
OpenRice Best Restaurant Awards 2017 - Prestigious Awards Winner Burgeroom Again!
2017-05-19
餐廳資料
更多
收起
本月熱門
【隨時更新】便利店尋寶 每周新品速報
2019-09-27
尖沙咀新商場開幕 過江龍餐廳一覽
4天前
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24