入嚟睇入嚟揀!聖誕禮物實用建議(有片)
2017-12-19
聖誕節又到啦,即係代表又要準備禮物送畀朋友,或者去party交換喇。每次一講到揀禮物,就頭都大晒,都唔知揀乜好,等開飯仔畀啲提議你哋啦~

誠意系列

心機手造朱古力  Villa Villa
朱古力幾時都係送禮首選,多人鍾意嘛。但個個都送朱古力,又好似唔夠特別。不如送手造朱古力啦,雖然唔係你自己親手造,但呢份禮物都好有誠意㗎。朱古力係由一間北角小店嘅男生sss每日手造嘅,貫徹返佢哋舖頭做手工菜嘅精神。手造朱古力工夫好多,淨係塗層(coating)都要做兩次,成個過程歷時3日,務求令到朱古力餡唔好遇到空氣同水分,保持喺最佳狀態。
開飯仔試過,啲朱古力嘅外層咬落「卜」一聲,脆脆地,中間又好軟心同好順滑,入口即溶,有baileys、咖啡等味,聖誕限量約300盒咋。

送禮首選

人氣日本抹茶禮盒    中村藤吉
你哋身邊實大把抹茶控㗎啦?呢間日本過江龍嘅人氣抹茶店,有幾款聖誕禮盒賣呀,入面有焙茶伯特朱古力(搣開有棉花糖添呀好治癒)、唔太甜嘅白朱古力抹茶紙杯蛋糕同埋茶包等等,包保你啲抹茶控friend子滿意。

手工朱古力 Bread Espresso &
呢間麵包店,趁聖誕檔期同比利時一間朱古力品牌合作,設計咗9款得手工朱古力,包括有西西里開心果、焦糖醬油、香檳之類等味道,啲朱古力賣相都好精緻,送畀女生應該都會幾高分嘅。

聖誕馬卡龍 PAUL LAFAYET


用macaron砌成嘅聖誕樹,唔單止睇得仲食得添。呢款聖誕限定版嘅馬卡龍塔包裝好有聖誕氣氛,送畀人或者用嚟開party都唔錯。佢哋仲特別推出咗兩款冬日口味macaron,分別係肉桂同金栗蘭姆酒味。想豪啲嘅仲有尊貴精選禮盒,一盒有齊手工曲奇、果醬同茶葉等,夠晒得體。

法式糖果 The BonBonist

由法籍糖果專家Olivia Niddam創立嘅糖果店推出咗兩款節日限定版禮盒,入面有7款節日限定嘅朱古力。好似以聖誕老人為主題嘅紅白脆糖杏仁粒朱古力、穀物脆粒黑朱古力同榛果櫻桃軟心朱古力等。

雪糕火鍋 Häagen-Dazs

呢間雪糕店嘅外賣雪糕火鍋有幾個set,有啲多啲醬,有啲多啲甜品,送埋閏蜜屋企一齊食就最開心喇,要肥一齊肥嘛。醬有森半抹茶白朱古力醬同紫薯白朱古力醬。一款甘香,一款香甜。雪糕口味就有仲夏野莓、比利時朱古力同焦糖脆餅等。而甜品配料就有朱古力雪糕馬卡龍、雪糕麻糬同焦糖脆餅雪糕小糖果等,但係有紫薯醬就冇甜品,有甜品就冇紫薯醬,媽,點揀好?
 
聖誕茗茶禮盒 Tea WG
唔知今年聖誕幾多度呢?不過幾多度都可以嘆返杯熱茶嘅。呢個經典茗茶品牌推出咗內有12款唔同味道嘅茶葉禮盒。其中最特別嘅係融入朱古力同香料水果嘅聖誕紅茶,另外仲有奶韻烏龍茶、夜茉莉白茶同大吉嶺公主茶等多款手工調配茶。而禮籃仲有茶味果凍、朱克力、茶糖、馬卡龍同茶韻奶油酥餅等,送畀鍾意茶嘅朋友一定好開心。

新口味芝士蛋糕 Cheesess
開party點少得切蛋糕呢個環節呀,呢個品牌今年新推紅絲絨芝士卷,用澳洲忌廉芝士製作,紅色係用天然食物色素,加埋白雪雪嘅糖霜,好有聖誕氣氛!鍾意Bailey’s嘅一定要試埋百利甜酒口味,以法國忌廉及澳洲忌廉芝士加埋朱古力脆餅底,香甜實多人like。揀唔到咩味,聖誕限定禮盒有齊多款招牌口味,除咗有以上兩款,仲有焦糖燉蛋、熱情果菠蘿、Tiramisu同薄荷朱古力慕絲蛋糕等。



明星系列

冬日限定曲奇 祝奇餅

藝人陳敏之有份設立嘅餅店今年再次推出三款冬日限定曲奇,分別有肉桂蘋果批、薄荷朱古力同飄雪紅桑子味。其中薄荷朱古力味用上特濃委內瑞拉朱古力,配上天然純薄荷,味道好清新。而飄雪紅桑子味面頭鋪上一層薄薄嘅乳酪粉,加埋25年意大利陳醋,味道好有層次。

台灣手工日曬麵 KiKi食品雜貨

舒淇有份創立嘅Kiki品牌有三款嘅節日限定禮盒裝,有齊晒品牌熱賣嘅蔥油拌麵同椒麻拌麵,仲有啱啱10月先出嘅老醋辣拌麵同小醋拌麵。另一款就係透過自然日曬風乾嘅手工日曬牛肉麵。佢哋選用嘅日曬麵來自台南,而且無加入任何化學添加劑。屋企都可以食到台灣風味,係正嘅。

購買詳情:「黑金特别版禮盒裝」將於11月30日起在香港網店(www.kikifg.com.hk)發售;「聖誕老人禮盒裝」及「聖誕馴鹿禮盒裝」則於12月6日起發售。三款聖誕禮盒裝將於12月13日起至26日在銅鑼灣祟光超市「聖誕美食巡禮」中發售。

閃令令DIY 鋒味曲奇
呢一款全新閃爍DIY Bling Bling包裝,可以俾你好似Chef Nic咁自由發揮創意,用貼紙親手製作個人專屬的鋒味曲奇盒。聖誕特別版包括經典甜酸苦辣禮盒、「港式茶餐廳系列」禮盒及多款口味。港式茶餐廳系列有咖啡、奶茶、麥香奶同阿華田味,充滿港式風情,送禮或者自己食都唔錯!

健康之選

純素手工曲奇 Green Common

唔一定素食朋友先啱嘅,對住啲著重健康嘅朋友,不妨揀純素曲奇畀佢哋。呢間舖頭嘅純素曲奇由本地婦女全人手製作,不含色素、香料、防腐劑同反式脂肪,對蛋奶敏感嘅人士都可以放心食用。四款口味分別有蝴蝶酥、薑餅人、黑糖同原糖曲奇。口感都幾鬆脆。

Party抽獎

聖誕限定黑朱古力焦糖爆谷 Garrett

一班人開party嘅話,爆谷都係個唔錯嘅選擇,即抽即拆即食,Yeah。呢間來自芝加哥嘅爆谷店,趁聖誕推出咗期間限定嘅黑朱古力焦糖脆脆口味,黑朱古力微甘,唔會太甜膩。仲有三款聖誕限定罐裝,一款係好有聖誕feel嘅紅綠條紋,另一款就以雪花為主題,仲有胡桃夾子三層罐,個罐咁靚,一啲都唔失禮呀。

聖誕樹禮盒   M&S


呢個品牌每年聖誕都會有曲奇禮盒,今年都唔例外,其中又睇得又食得嘅,應該就係聖誕樹禮盒喇。細細棵當裝飾都唔錯,仲有音樂聽添,而且,連裡面嘅牛油酥餅都係聖誕樹造型呀,夠晒氣氛。而想送啲cute cute嘢嘅,柏靈頓小熊系列啦,朱古力、啫喱糖等等,全部造型都靚靚。

薯條連公仔禮盒 Jagabee
零食用嚟抽獎唔會伏喇啩,期間限定禮盒裝有特別包裝嘅原味同紫菜味宅卡B薯條,寫明Love You夠晒肉麻,仲有一隻好得意嘅Potta毛公仔掛飾同埋心意卡一張,鍾意寫咩message送俾人都得架。於灣仔專門店Calbee Plus、零食物語及AEON有得賣,買定幾盒送俾人啦。


文:Kar、Crystal
相:Kar、Cathy

關鍵字
聖誕節
禮物
曲奇
朱古力
紅茶
爆谷
雪糕火鍋
雪糕
抹茶
北角
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
2021及歷屆米芝蓮香港澳門指南完全版
2021-01-27
情人節愛意滿瀉 甜蜜蜜堂食/外賣下午茶推介
2021-02-01
【隨時更新】零食速報 每周新款零食、酒品點評
2天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
7天前
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10