元宵節5大必食特色湯圓店推介 米芝蓮鴛鴦湯圓、泰式鹹椰奶湯圓
2022-02-11

過冬到農曆新年大家都應該食咗唔少湯圓,不過仲要繼續食,因為話咁快就係元宵節喇~今次介紹幾間供應特色湯圓嘅糖水店或餐廳畀大家,由新鮮出爐米芝蓮推薦嘅糖水店同泰國特色湯圓都有,鍾意傳統定創意款式嘅都無問題,如果因為疫情唔想外出用餐,買返屋企慢慢嘆都得!


全人手新鮮製造湯圓 福元湯圓

2021米芝蓮唯一間新上榜嘅街頭小食,北角炮台山附近嘅街坊應該都對呢間老字號糖水唔陌生喇!店舖主打當然係每日全人手新鮮製造嘅湯圓,粒粒都皮薄餡靚,而且一咬開餡料就爆晒出嚟,好足料~最受歡迎有招牌黑芝麻同花生口味,兩者都會事先炒過,再用磨米機磨碎,入口香氣更突出。貪心嘅朋友可以叫鴛鴦湯圓,咁就可以一次過試晒兩個味喇。

圖: JoyfullFoodstagram


黑芝麻擂沙湯圓 麒藝館 

以中菜日化為主題嘅粵菜餐廳,呢道甜品黑芝麻擂沙湯圓好有人氣~平時見開嘅擂沙湯圓都係沾滿黃豆粉,但呢度嘅做法係沾滿黑芝麻碎,黑芝麻香氣更上一層樓。而湯圓皮口感煙韌軟糯,厚薄適中,一咬開就湧出芝麻半流心內餡,鍾意芝麻嘅朋友不可錯過。

圖: eunice2046


多口味湯圓 杏甜品

位於尖沙咀嘅小清新木系甜品店~想拎個好意頭,必試人氣全家福湯圓,除咗寓意團團圓圓外,仲可以一次過試晒四款口味嘅湯圓。包括抹茶、榴槤、奶黃同花生,餡料流心,推介抹茶口味,抹茶香濃之餘有少少回甘,好有驚喜。榴槤都值得一試,一入口香氣就於口腔爆發~至於湯底係桂花糖水,清清地配香甜嘅湯圓食好夾。貼心位係如果有某種口味唔食嘅,落單時講清楚就無問題。

圖: pancyy


香氣撲鼻桂花湯圓 地茂館甜品

同樣主打自家製手工芝麻湯圓,餡料加入香氣十足嘅黑芝麻同油分較高嘅白芝麻平衡味道,兩種芝麻用白鑊炒香後磨粉,加糖同油搓成麻蓉餡。糯米麵團用糯米粉、水同生油製作,湯圓皮比起坊間嘅厚啲同煙韌啲,湯圓入口芝麻香氣滿溢,味道香甜又唔膩。薑汁糖水味道溫和,加入桂花更清香,推薦可以買一盒生湯圓返屋企自己煲嚟食~

圖: littlefoodie00


泰式鹹椰奶湯圓 Chachawan

泰式湯圓你又食過未?如果未食過真係值得專程去試下,呢個泰式鹹椰奶湯圓皮薄煙韌,內餡包住椰子蓉,椰汁湯底帶點鹹香,比起淨係得甜味嘅湯底更有層次感,好有驚喜。

圖: sorlo




文: Yanica


關鍵字
湯圓
甜品
糖水
米芝蓮
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
持續更新! 2024生日餐飲優惠放送
2024-06-04
【隨時更新】最後倒數!2024即將結業人氣/老字號餐廳
2024-06-04
【2024新店精選】5月更新! 娛樂體驗主題酒吧、古蹟化身意大利餐廳
2024-05-24
【隨時更新】零食速報 每周新款零食、酒品點評
6天前
香港4大西班牙餐廳推介 屹立26年老字號、必食紅蝦熱狗
2024-06-07