今期流行!重慶大廈5間咖喱餐廳推介
2019-10-22

講起食咖喱,咖喱集中地重慶大廈一定係首選,無誤。17層樓入面大約有30零間餐廳,當中又以印度咖喱為主。不過,聽就聽得多,可能好多人都從來冇入過去,畀個心理準備大家,入面嘅南亞朋友相當熱情,一入去,就會有好多卡片派到你手,各間餐廳嘅代表都會向你招手,有選擇困難症嘅朋友就頭痕喇,咁多間,點揀好?

明星捧場   7E咖喱王  

 圖:yantung117

呢間可以話係重慶大廈內最高人氣嘅印度餐廳,有唔少明星都嚟過呢度食飯。廚師係印度人,製作嘅菜式亦夠正宗。嚟得梗係食咖喱啦,咖喱牛腩好重印式香料味,牛腩軟腍入味;印度咖喱角同我哋平時食開嘅有啲唔同,薯蓉加蔬菜餡啊,外脆內軟啲咖喱味仲要好濃郁。另外推介呢度嘅特色香料雞,帶有奶油香嘅咖喱香而不辣。

兩國料理    Turkish Kebab & Indian Restaurant   

 圖:phonebustht_dawn

呢間舖頭細細間,大約坐到十零人左右。喺度可以同時食到土耳其菜同印度菜。土耳其菜方面,一係kebab一係薄餅啦,推介有款由旋轉羊肉同雞肉製成嘅薄餅幾香口,餅底即叫即搓即焗,芝士又多肉又多,好鬼足料仲可以拉埋絲。至於印度菜呢,可以試下碳烤香燒雞,用咗大量印度香料、希臘乳酪醃製,肉汁仲好juicy。印式咖喱羊肉亦相當入味。

環境舒適    皇宮印度餐廳   

 圖:Thingirlseatallday廖芷芊

想坐得舒服少少嘅可以揀呢間餐廳,枱與枱之間相對同廈其他店嚟講係幾闊落。呢度嘅咖喱有陣香濃嘅牛油味,咖喱雞啲雞肉仲要冇骨嘅添,送飯一流。咖喱羊肉呢就加咗少少薑落去辟咗啲羶味,配飯食又得,配手打薄餅不停咁點汁食又得。

芝士控大愛   新德里餐廳

 圖:nikilam827德仔老豆

雖然話就話介紹大家嚟食咖喱,但嚟得呢間嘅話,記住記住記住一定一定一定要叫埋個芝士薄餅!食過一次就會明,薄餅中間夾有層軟綿綿嘅芝士餡,熱食仲有拉絲效果,不過當然唔淨止滿足視覺啦,芝士鹹香襯埋咖喱羊肉好鬼惹味。啲羊肉仲要口感軟腍又唔帶羶味喎。馬沙拉咖喱烤雞亦係另一推介,雞肉嫩滑,而呢款咖喱唔係淨得個辣字,嗒真啲,仲有啲酸酸地,甜甜地,口感好豐富。

素食之選    印度素食菜館

 圖:LLwenHK

素食朋友入到嚟一樣有選擇,呢間係大廈內少有主打印度素食嘅餐廳,不過就唔算話好大間,得幾張枱。素食都有印度薄餅,不過就冇落蛋去製作嘅——薯仔千層酥餅,食到啖啖薯泥同微辣香料;至於芝士洋蔥辣燴,一碟有齊晒各式各樣嘅菜蔬,好似青椒、洋蔥、小黃瓜等等,辣辣der幾香口,一啲都唔會覺得dry,可惜係細碟咗少少囉。


文:Kar


關鍵字
印度菜
咖喱
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
5天前
給自己一個休息時間 10-11月下午茶推介
2019-10-25
【特約分享】食魚生轉運 三種好意頭日本海產介紹
2019-10-14
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01