就快聖誕節，往年就話去旅行啫，今年冇得飛、冇得去外國感受白色聖誕就要plan下節目喇。唔少酒店同餐廳都陸續推出聖誕下午茶，搵個下晝畀個機會自己放鬆下啦～不過呢排疫情咁嚴峻，想留喺屋企安全啲嘅，都一樣可以嘆到Tea，有外賣下午茶呀都。
外賣
聖誕外賣下午茶 香港四季酒店
喺屋企一樣可以嘆下午茶。香港四季酒店嘅外賣下午茶，以紅色聖誕樹造型嘅三層架盛載住4款鹹點、5款甜點，加招牌鬆餅，充滿節日氣氛。其中幾款甜點更以聖誕為主題，例如迷你朱古力柑橘聖誕樹幹蛋糕、紅酒燴野莓雪人法式蛋白杏仁餅同迷你薑餅人等，又睇得又食得。
價錢：$628（2人）
供應期：即日起 至12月17日
Waltz of Festive Joys 節慶下午茶 樂聚廊
金鐘呢間酒店則同Perrier-Jouët法國巴黎之花香檳合作，推出節慶下午茶，墨綠色嘅下午茶盒設計有啲似薑餅屋，內藏多款聖誕主題嘅鹹甜點，要數最吸睛嘅當然係聖誕老人同聖誕樹造型嘅聖誕曲奇啦，夠晒cutie。另外有傳統嘅英式聖誕甜餡餅，內餡係酸香乾果同辛料同雲呢嗱忌廉；法式栗子蛋糕以時令栗子製成栗子蓉入饌，啖啖香口，師傅仲特意加多咗粒小鈴鐺上去增添氣氛。
價錢：$502（2人），另贈送限量聖誕小熊玩偶乙隻及TeaWG 香茗茶包兩份
供應期：即日起 至2021年1月3日
Tiffany 四件裝甜品盒 The Tiffany Blue Box Cafe
外賣下午茶愈嚟愈盛行，連呢間打卡界嘅大大，The Tiffany Blue Box Café都首次推出外帶甜品禮盒。雖然係外賣，但依然貫徹餐廳一向嘅紐約風格，以純白色禮盒盛載，充滿貴氣。四件裝甜品盒包括以佛手柑玫瑰慕絲同紅桑子士多啤梨內餡製成嘅迷你 Blue Box 蛋糕、焦糖爆谷朱古力撻、栗子忌廉蛋糕，同埋紐約芝士蛋糕。另外，平時只可以堂食享用到嘅海鹽焦糖白芝麻味The Blue Box Celebration Cake，而家都可以帶走返屋企啦~ 呢個聖誕要喺屋企打個靚卡都唔係問題啦~
供應期：12月10日起接受預訂
堂食
德國Steiff小熊節慶下午茶 Café 103 
鍾意熊仔嘅你，就唔可以錯過呢個下午茶啦~香港麗思卡爾頓酒店嘅Café 103聯同德國傳統公仔品牌Steiff合作推出一系列充滿德國風情嘅下午茶，包括咗10款糕點。特別推介黑森林慕絲杯呢個德國必食嘅甜品，一層層嘅Valrhona朱古力海綿蛋糕、櫻桃蜜餞同慕絲再配上淡淡嘅Kirsch櫻桃酒，甜入心～喺12月24號至26號呢幾日仲有派完即止嘅可愛Steiff小熊鎖匙扣一個𠻹。
Steiff小熊節慶下午茶
供應期：2020年12月1日至2021年1月3日
價錢：$458/一位，$788/兩位
（2020年12月24日至26日除外；有關節日價錢，請餐廳參閱冬日節慶活動列表）
「聖誕糖果世界」下午茶 廷廊 
廷廊推出嘅呢個下午茶set，呈現咗一個高貴優雅嘅糖果世界出嚟，將九款精美嘅甜品放喺三層架上面，再加入可愛嘅聖誕元素上去，令人好似走咗入童話世界咁，充滿童心。聖誕tea set包括咗傳統開胃嘅聖誕豬包毯、迷你薑餅人曲奇、紅絲絨樹頭蛋糕同自家製嘅招牌英式鬆餅，九款糕點慢慢嘆，啱晒畀大家同閨蜜年尾嚟chill一chill!
「聖誕糖果世界」下午茶
供應時間：2020年12月1日至2021年1月3日
價錢：＄698/兩位、$958/兩位(包括香檳一杯) (每位$298升級兩小時無限量供應香檳)
夢幻佳節香調下午茶 Gradini
今次Gradini聯同法國傳奇香氛品牌GOUTAL推出聖誕節限定下午茶set。大廚將橙花柑橘同玫瑰嘅香氣加入食物，令到食物帶有淡淡花香。下午茶包括四款鹹點同五款甜點，如蟹肉、柚子及飛魚籽脆餅、青瓜配刁草忌廉芝士三文治同玫瑰白朱古力慕絲。除咗品嚐Tea WG嘅茗茶之外，大家仲可以額外升級試下GOUTAL「夢幻香調」無酒精飲品同雞尾酒，全方位畀啲香氣包圍住，感覺好放鬆～另外，凡惠顧呢個下午茶，仲可以獲GOUTAL限量精美禮品乙份，包括香水隨行裝(5ml/7ml)乙份(款式隨機送出)、GOUTAL購物禮券同「香．遇GOUTAL」美酒體驗工作坊禮遇卡乙張添~
夢幻佳節香調下午茶
供應日期：即日起至2021年1月10日
供應時間：15:00-17:30
價錢：HK$298一位用；HK$528兩位用
額外HK$48享用GOUTAL「夢幻香調」無酒精飲品一杯或HK$78享用GOUTAL「小甜心」雞尾酒一杯
歐陸聖誕下午茶 Popinjays
香港美利酒店嘅天台酒吧同餐廳嘅下午茶足足有12款鹹甜點，份量十足，有英式鬆餅、美味曲奇同埋各款特色蛋糕等。喺天台餐廳睇住美景同閨蜜打下卡，傾下計，一齊享受呢份精緻奢華嘅下午茶，就再寫意不過～
聖誕下午茶
供應日期：2020年11月30日2021年至1月5日
價錢：$698/兩位
比利時風節日下午茶 Artisan Lounge
尖沙咀呢間開放式嘅餐廳酒吧就同比利時王室御用皮具品牌Delvaux合作，推出特別版節日下午茶。以品牌年末推出嘅「Constellations」星空系列為靈感，將漫天繁星同海軍藍色帶到茶點當中。同時亦有比利時特色，例如將下午茶常見嘅英式鬆餅換成比利時鬆餅。
Festive Afternoon Tea
供應日期：2020年12月8日2021年至1月4日
文：Hailey
編：Kar
