【開飯熱店大賞】編輯常去!四間真心推介餐廳
2018-05-25

《開飯熱店大賞2018》圓滿結束,咁多間開飯熱店,要食勻都真係要啲時間!以下呢幾間係OpenRice編輯精選,我哋真係餐廳熟客嚟架,即睇睇我哋真心推介,試咗先喇唔好講笑。


健康日式家常食堂    坐忘

Perrins:成日介紹鰂魚涌餐廳,說穿了因為本人係東區之友,太古坊去到太安樓,都留低唔少搵食口水漬。作為街坊,坐忘呢間小餐廳我一直都幫襯開,由日籍丈夫同香港太太經營,因為兩人嘅小朋友身子弱,所以兩位父母就苦心炮製以蔬菜為主嘅料理俾小朋友食,後來開設坐忘亦以相同理念出發,主打健康美味嘅日式家常菜。

自己最鍾意係一日野菜咖喱飯,一碟飯有齊十幾種唔同蔬菜,而且有啲烤過先煮,每一種都味!蓮藕爽脆、翠玉瓜清甜,飯混入蕃薯,食得出蔬菜的新鮮香甜,咖喱微辣惹味,偏乾身唔算好多汁,但送飯份量剛好。就算我唔太鍾意食菜,每一次幫襯都忍唔住會叫呢個飯!而且呢間店開業都有好幾年,開埋分店,水準一直都保持到,係非常之難得。加上homey得來又有outdoor feel嘅裝修,好似去咗東京小店咁,由食物到裝潢都好舒服好實在,今次佢哋得獎我自己都好開心!繼續努力呀!

圖:Purplejenjen

圖:Eating King


觀塘運動Café    The Stadium

Kar:每個人都有屬於自己嘅飯堂,每次同朋友食飯,諗唔到食咩嗰陣都會諗起呢間餐廳,一嚟貪佢地方夠大,樓底高,好有空間感,係幾啱傾計嘅一個環境;二嚟食物水準認真唔錯,我最鍾意炸魚薯條,真心脆皮,魚肉又嫩滑,送酒啱晒。然後同朋友食下飲下傾下,咁就一晚,relax~

講真,香港主題café多,但運動主題嘅唔多。可能自己本身鍾意運動啦,所以係有私心分嘅。呢度有桌球、飛鏢、足球機玩,仲有好多部大電視播球賽,睇波氣氛一流。Btw,而家好多時揀餐廳都唔淨係睇啲嘢好唔好食,環境氣氛都係考慮因素之一,又,有唔少都係好睇唔好食嘅餐廳,難得呢間食物、環境都唔差,不過,係要預多少少時間去等位囉科科。

圖:人妻咪仔

圖:thomasKwan


鳳梨冰芋圓嘅情意結    程班長台灣美食

Cathy: 係真心推介,亦係私心推介嚟。老實講對喺台灣有幾個好朋友兼鍾意扮下文青嘅本人嚟講,一年去兩三次台灣已經成為等閒事。亦因為咁所以對台灣菜越嚟越高要求,而程班長就係其中一間喺香港食地道台灣菜嘅好地方。


第一次食到程班長嘅手藝,係兩年前嘅美食博覽,程班長同佢嘅員工都好熱情咁向我地介紹佢地嘅嘢食,清燉牛肉麵有幾香同有幾好味就不在話下啦。最驚喜嘅係當時佢地新出嘅傳統鳳梨冰芋圓,台灣土鳳梨嘅香、甜、同一絲絲嘅咬口,配埋一粒粒手工芋圓,感覺好似瞬間返咗去台灣夜市咁。荔枝角店當然都有供應,不過好幾次去返兜時發現成個食堂都係得我一個嗌......下次去到見到有個女仔一個人係度食呢杯鳳梨冰芋圓嘅話,不如同我Say個Hi吖。

圖:劉師父

圖:天生食貨


獨沽一味牛扒餐    La Vache!

Joyce:好食嘅扒房有大把選擇,但我偏愛呢間法式扒房,可能因為佢有性格,獨沽一味,全間餐廳只賣一款牛扒餐,可見大廚對自己出品相當有信心。坐低無耐,侍應自動會遞上麵包以及合桃沙律。麵包旁邊嘅牛油好香,令我一沾再沾,非常邪惡。更邪惡嘅接踵而來,有炸得金黃香脆嘅薯條,仲係無!限!任!添!我尤其鍾意不蘸番茄醬,就咁單食薯條,更能嚐出綿綿薯肉以及薯條嘅牛油香。

主角出場!侍應會事前詢問客人喜愛嘅牛扒熟度(這算是餐廳對客人會問的惟一問題),上枱時牛扒會擺放喺小爐上,以微微燭光保鮮。大廚採用重約10安士嘅USDA Prime 肉眼扒,肉質較為軟腍、有油香,一切開仲有好多肉汁添,好有幸福感呀!牛扒過後,侍應更會推架甜品車去到客人面前揀選喜愛甜品,甜品一樣好有水準,甜而不膩,非常大滿足!單憑一款牛扒餐,就可以喺香港有兩間分店兼獲得多個獎項,實屬難得。

圖:hon1001donaldszeto31

圖:冬天的冬兒


優秀開飯熱店大賞詳情:https://www.openrice.com/info/awards2018/index.html

關鍵字
優秀開飯熱店大賞
開飯熱店
編輯推介
日本菜
西菜
台灣菜
牛扒
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
2020-07-03
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22