【新界搵食】天水圍係咪美食沙漠?帶你走入新北江商場睇睇
2017-02-06
一講天水圍除咗個遠字,都係個遠字,完全同食扯上唔到聯想,不過同啲好多天水圍朋友傾過,佢哋話嗰度其實有好多小店美食,喺市區都未必搵到。其中位於天水圍嘅嘉湖新北江商場更加係美食集中地,今次開飯仔就帶大家走入呢個對市區人真係好隱世下美食商場,介紹以下八間街坊價嘅小店畀大家,咁大家下次糧尾嘅時候就可以慳住荷包食好西喇。

溫馨家庭式CAFÉ 87 Coffee


 (圖:Kikivickihelloimbunny

平時出市區食個全日早餐連埋杯飲品閒閒地都要百幾蚊,呢度只係收你幾十蚊,質素亦拍得住市區嘅CAFÉ。蛋炒得嫩滑而且有奶香、再配上香腸同煙肉,老闆娘更細心咁加入新鮮生果中和油膩感,認真抵讚。不得不提嘅係咖啡拉花亦做得唔錯,假日一個人嚟依到嘆杯咖啡相信係一個好提議。小店雖然位置唔多,但環境算舒適,牆上貼滿色彩繽紛嘅食客留言,令人有溫馨感覺。 


焗飯焗意粉自由配 森堡美食


 (圖:kayiiKLABB

森堡美食係唔少區內學生鍾意幫襯嘅食堂,全因為呢到嘅焗飯焗意粉價錢平、選擇多。正所謂「有得揀,先至係老闆」,喺到叫焗飯或焗意粉可以自選一款主菜同一款配菜,亦有幾款汁可以任你自由配搭。炸魚柳份量多,炸好之後放喺汁上面,唔洗驚外皮淋晒,食落口仍然係脆身,以街坊價嚟講,CP值算幾高。


小心食上癮 麗江雲南米線


          (圖:Duffy Bear白蘭地Brandy

要數天水圍區內最受歡迎嘅小店米線,一定係呢間麗江雲南米線。呢度嘅米線有分酸辣同麻辣湯底,當中麻辣湯底嘅味道非常特別,食完之後嘴巴會有少少麻痺感覺,好過癮。小食都做得出色,麻辣雞辣得開胃、炸酥肉香脆可口、蒜泥白肉肥瘦適中,價錢抵食。舖頭面積唔大,去得食嘅都預咗要搭枱,高峰時間可能要等位等半個鐘以上,所以開飯仔建議大家想試嘅話就記住預早10分鐘打電話去拎飛先,咁就唔洗怕等到頸都長喇。


香港風味肉澡飯 臺味冰點餐廳



呢間餐廳主打賣台灣嘢食,當中包括台式湯麵、肉澡飯同台式飲料。雖然係主打台式食品,但依到嘅肉澡飯有別於台灣本土風格,肉澡比較濕而且當中夾雜冬菇碎,味道香濃,拌飯食真係一流,配上兩塊香煎雞扒同四季豆,份量極多,女士們可以兩個人share一碟都得。食台灣嘢又點可以唔飲返杯台式珍珠奶茶呢?雖然奶茶味道中規中舉,但勝在跟餐叫唔洗加錢就有得飲,一個字,抵!


五顏六色雞蛋仔 津津有味


(圖:au9J_J723

早一排有鼓紫薯熱潮,吸引咗唔少人嚟排隊幫襯呢間小店買紫薯雞蛋仔。而家熱潮已過,小店回復平靜,但仍然有得買五顏六色嘅自創雞蛋仔。四色雞蛋仔包括香芋、士多啤梨、朱古力同蜜瓜味,可以揀另外加上oreo餅碎,令口感更加特別。坦白講,味道就比較人工,但雞蛋仔都叫脆口,平平地買嚟相機食先都可以諗下嘅。


媽媽餃子配零味精靚湯 餃子館

                (圖:Kikivicki

餃子呢樣食物睇落簡簡單單,但要煮得好食亦係一門學問。全人手包嘅媽媽牌餃子,再配上唔落味精嘅魚膠淮山豬骨湯,一啖餃子、一啖湯,唔經唔覺就已經食晒全碗,完全可以好好咁滋潤吓dry到爆嘅冬天。胃口比較大嘅可以加6蚊配埋上海麵,咁呢餐就夠晒飽足同溫暖喇。


抵食川菜小店 海南小廚


               (圖:Kikivicki

近年愈嚟愈多人鍾意食川菜,貪佢夠辣夠開胃,而新北江商場入面都有一間做得唔錯嘅川菜小店。海南小廚有好多款小菜,價錢大多都係三四十蚊一碟,絕對比起其他地方抵食。蒜泥白肉上嘅蒜蓉經過油炸處理,香脆惹味,無咗生蒜嗰種難入口嘅過重味道;口水雞肉嫩,辣度適中;水煮魚睇落放滿辣椒,但食落唔會過辣,再配上索晒辣汁嘅薯粉、木耳同芽菜,都好刺激,鍾意食辣嘅朋友記住唔好錯過喇。


招牌嫩滑蔥油雞 煮八


            (圖:nicoleayyuen幸樂兒

煮八係一間專做街坊生意嘅小店,下午茶三十幾蚊就有交易,而且份量頗多,吸引唔少街坊支持。招牌蔥油雞肉質嫩滑,蔥油入晒味,雞皮唔會太厚太肥,配上一大碗肉燥飯,相信一個大男人叫都夠食。小店另一招牌係喇沙,湯底充滿椰香味,唔會太辣,雞件份量多,大家亦可以一試。


隨時接收最新資訊
讚好OpenRice專頁!
關鍵字
天水圍
小店
米線
川菜
餃子
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【當時得令】心思湯底麵食 窩心又飽肚
2016-12-08
【當時得令】澳門新橋區宵夜之選
2017-01-31
一個人喺太子食乜好?
2017-05-04
【熟食中心尋寶】禾稈冚珍珠 皇后街熟食市場
2017-02-28
【開飯熱店入圍名單巡禮】灣仔銅鑼灣美食特搜 集高檔平民於一身 
2017-03-07
再戰東大街 有咩小店值得食?
2017-04-19
本月熱門
米芝蓮2018:車胎人美食推介率先公布 17間餐廳新上榜
2017-10-30
深水埗馬來茶餐室 放下自己然後賺到滿足感(有片)
2017-11-01
邊行邊食!荃灣10大掃街熱點
2017-11-02
打邊爐時間! 四間新開火鍋店推介
2017-10-31
銅鑼灣新場!5.5小時無限時任食火鍋
2017-10-27