【開飯熱店入圍名單巡禮】灣仔銅鑼灣美食特搜 集高檔平民於一身 
2017-03-07
今年開飯仔特別搵咗自命對追求味覺有強烈使命感嘅「特種開飯團」,進行十面埋伏、吖唔係、係全面巡邏全港九新界,一日食足十餐幫大家地氈式搜索,從唔同地區、唔同菜式當中搵出真正本土滋味!
 


想約朋友出街食飯,灣仔、銅鑼灣區經常都係不二之選,想知道邊啲地方最啱三五知己一齊gathering?問團結步兵Infantry就啱晒喇!喺灣仔、銅鑼灣區,想食得高檔嘅話有西餐廳、居酒屋,想食得平民一啲亦有漢堡店、中菜館,今次就等Infantry為大家逐一介紹下依區嘅美食喇,睇完大家記住為地區組別投票啊。

溫馨西餐小店 阿麥廚房

 

想喺銅鑼灣搵一間好食嘅西餐唔難,但係要搵一間性價比高嘅西餐小店就一啲都唔容易,而阿麥廚房就係難得一間好食又抵食嘅西餐小店,幾乎每晚都爆場,唔book枱都好難食到。其中食客必叫嘅有德國燒鹹豬手,份量多,全隻豬手燒至脆身,再配上炸薯條,的確係一味邪惡但又難以抗拒嘅菜色。


豪食高質串燒 鳥居居酒屋

用過百蚊嘅價錢去叫一份串燒,聽落好似好奢侈,但偶然總會有啲特別日子想食豪啲,喺呢個時候,鳥居居酒屋會係一個唔錯嘅選擇。依到主打一系列日式串燒、燒物,價錢收得貴絕對係有道理,因為佢地一向選用高品質食材,而且大部分食物都係即叫即燒。幾款大熱串燒當中,厚切牛舌嚼勁十足,燒得非常入味,咬落去充滿肉汁;燒味噌龍蝦肉質彈爽口彈牙,配上芝士同味噌醬燒至金黃色,賣相十分討好。


大熱得獎漢堡 Burgeroom

 
圖:Voracious

相信大家對Burgeroom唔會陌生,依間漢堡店喺上年獲得OpenRice開飯至尊大獎,足以證明依到嘅漢堡有幾咁受歡迎。Burgeroom嘅漢堡尺寸唔係一般嘅大,相信女仔一個人都未必食得晒全個,但偏偏呢到漢堡嘅款式有成三十幾種,真係款款都想試,唔知點揀好!當中,雙層牛肉芝士漢堡嘅牛肉厚到嚇親人,芝士背後仲埋藏住濃郁肉汁,單睇外表已經令人食指大動。


合理價錢極尚享受 極尚大瀛喜日本料理


食放題嘅精髓一定係在於用一個抵食嘅價錢任食平時唔捨得單叫嘅刺身、燒物、壽司、天婦羅……要逐樣數晒出嚟幾乎係無可能,因為放題實在太多選擇喇!但今時今日嘅放題只係多選式係唔夠,就好似依間極尚大瀛喜日本料理咁,食物質素高,落order叫幾多份量就嚟幾多,絕不偷工減料!而且價錢合理抵食,難怪咁多人大讚喇!


延續韓式炸雞熱潮 Sodam Chicken

韓式炸雞熱潮喺香港已經持續咗一段時間,至今仍然可以keep得住人流嘅餐廳都一定係實力派,Sodam Chicken就係其中一間。呢到唔只有一般韓式炸雞,仲有賣相好吸引嘅太陽芝士炸雞,農夫包烘得外脆內軟,配上芝士炸雞,真係不得了!芝士迷覺得仲未夠喉?呢到仲有暖笠笠嘅芝士火鍋,配上豬仔骨、手工流心芝士年糕、脆麵包粒、薯條等等。美食當前,減肥單野就暫時放埋一邊先喇!


平民價錢氣派中菜 名館

圖:Hunter115

食得多外國菜難免會想食返餐中菜,去一般酒樓食晚飯總係怕份量太多,又怕食嚟食去都係果幾款,無啲新意。名館就唔同喇,菜色創新,份量適中,價錢相宜,而且可以一邊食中菜一邊飽覽銅鑼灣夜景,的確係物超所值。一味簡單嘅飯焦鳳凰蝦,巧妙地用上飯焦同白飯一齊炒,令你可以同時享受雙重口感。必叫嘅厚切叉燒皇,半肥瘦叉燒肉質鬆軟,蜜汁非常入味,送飯一流。

咪走住,灣仔銅鑼灣區嘅入圍餐廳唔只上面幾間嫁,仲有The Pudding NouveauATUM DesserantHeSheEat京林屋。大家記得揀好心水餐廳就click入以下網站投票喇,特種開飯團等緊大家。



文:Dap


其他開飯熱店入圍名單巡禮:
當新潮遇上傳統 廣東菜館之選
關鍵字
開飯熱店大賞
入圍名單
灣仔
銅鑼灣
小店
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【開飯熱店入圍名單巡禮】來一場正宗葡萄牙盛宴
2017-02-27
【優秀開飯熱店大賞 2017】頒獎禮盛況
2017-05-17
【開飯熱店入圍名單巡禮】走訪各路中式飯店感動胃兒
2017-03-08
【開飯熱店入圍名單巡禮】小城地道茶記麵檔尋滋味
2017-02-27
【開飯熱店入圍名單巡禮】盡享酒店的五星餐飲體驗
2017-03-08
【開飯熱店入圍名單巡禮】渡過美好的小食甜點時光
2017-02-27
餐廳資料
更多
收起
本月熱門
【隨時更新】便利店尋寶 每周新品速報
3天前
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
秋風起!5間大閘蟹放題食店集合
4天前