【國際新食力】Häagen-Dazs 雪糕限定口味回顧（三）

之前同大家回顧咗Häagen-Dazs多款期間限定口味（重溫第一集）（重溫第二集）。

話咁快又一年，應該又係時候開第三集，今次開飯仔會再介紹更多曾經大受歡迎嘅限定口味，當中有唔少到依家都仲有得賣，大家唔好走寶喇。

芝士蜂蜜蛋糕味

原來2015年Häagen-Dazs曾經推出呢款只係Lawson獨家發售嘅蜂蜜芝士蛋糕味雪糕。以北海道芝士配上蜂蜜，味道令人無法抗拒。

跟住落嚟介紹嘅幾款口味喺日本仍然發售中或者即將有得食嘅，大家去開日本嘅話記得試吓喇。

麻糬系列「華もち」－黃豆粉黑蜜味

跟住落嚟要介紹呢款好味到令人尖叫嘅口味，喺2015年曾經兩度推出嘅麻糬系列－黃豆粉黑蜜味。呢款雪糕當時出咗兩日就賣到斷市，可想而之係幾咁受歡迎。呢款口味以黃豆粉同雪糕混製，再配上黑蜜、黃豆粉同麻糬，四種唔同口感、味道同時衝擊味蕾，簡直令人有置身天堂嘅感覺，Miss左唔緊要，2月28佢會返嚟呀。

開心果雜莓風味

單睇華麗嘅包裝盒設計已經好吸引開飯仔，超有節日氣氛。雪糕分為三層口味，分別係開心果、雜莓果漿同焙煎口味嘅朱古力，一次過滿足你三種願望。而家呢款口味喺全日本嘅便利台都有得賣。

芝士紅莓曲奇味

香蕉焦糖曲奇味

芝士紅莓曲奇味同香蕉焦糖曲奇味屬於「Decorations」系列，呢個系列嘅口味同樣係等雪糕溶溶地嘅時候將曲奇碎同雪糕一齊攪拌然後進食，唔同平時食開嘅其他口味。一打開雪糕就係滿滿嘅曲奇碎，超吸引，同樣喺日本各大便利店有得賣。

三重朱古力味

而呢款三種朱古力味即將喺2月7日開始推出，當中白朱古力雪糕更係首次喺迷你雪糕杯現身，再加上略帶苦味嘅朱古力醬同香濃牛奶朱古力雪糕，一次過歎三種朱古力口味，各位朱古力唔好錯過喇！

去唔到日本？其實Häagen-Dazs喺香港都有推出期間限定口味嫁。仲記唔記得Häagen-Dazs上年喺香港推出嘅情人節花味系列雪糕呢？當時呢兩款雪糕都引咗唔少人搶購。

荔枝紅桑子玫瑰味

味道清甜嘅台灣荔枝配上酸酸地嘅紅桑子，再加上主角土耳其玫瑰，未食過都知道杯雪糕有幾浪漫啦。

杏桃薰衣草味

另一款味道都好夢幻，用上地中海薰衣草配上香甜杏桃，味道同樣絕配。

上年錯過咗都唔緊要，因為今年Häagen-Dazs亦重新推出咗玫瑰紅桑子荔枝雪糕，更同英國品牌合作設計全新包裝，依家喺各大7-11便利店已經有得賣喇，個杯咁靚，買嚟影相呃Like都抵喇。

文：Dap

圖片來源：Häagen-Dazs

隨時接收最新資訊
讚好OpenRice專頁！