以為香港雪糕店口味已經夠多變，而且世界上各種奇怪口味雪糕已經夠多？少年你太年輕了，正所謂天外有天山外有山，日本山口縣有間小店，一間店就有165種口味！有選擇恐懼症嘅朋友會唔會企成日都揀唔到？咁不如先睇睇有咩「伏」要避開先...

呢間小店就喺山口縣著名景點錦帶橋附近，既有家常料理亦有超過100款雪糕口味選擇，而喺日本一名記者去採訪嘅時候（2016年5月）就正式達到165款咁多！

165口味包括啲咩呢？有北海道牛奶等基本款，濃厚抹茶等茶系，巨峰提子等水果味，不過當中最吸睛嘅，就係變種嘅特別口味。

呢款拉麵口味只係加咗啲好似點心麵嘅麵條上去，咁其實自己整都得？

呢個鮎魚味就有誠意得多，因為雪糕真係混入咗鮎魚碎，上面再插一條鹽燒鮎魚尾。雖然無魚腥味，但呢種海鮮雪糕點都好似有啲「伏」嘅感覺。

最後，唔好睇佢平平無奇咁，其實係水魚口味！記者試完覺得似鐵味多過水魚味，而且同甜嘅雪糕唔係好夾。

嗯，睇到呢到，開飯仔我決定留返喺香港食朱古力雪糕就夠啦...

info
食事処むさし
地址：日本山口縣岩國市横山2-1-23

資料來源：RocketNews24