世界各地特別口味雪糕 | OpenRice 香港開飯喇

世界各地特別口味雪糕

2016-06-10

初夏，係食雪糕嘅季節。細個答人鍾意咩味道嘅雪糕，永遠都係士多啤梨同朱古力，大個就變咗抹茶同牛乳。食嚟食去都係呢啲，係咪有啲悶呢？今日開飯仔就為你搜羅世界各地唔同特別口味嘅雪糕，鹹味嘅有，辣味嘅又有，邊個話雪糕得個甜字？

台北　豬腳味雪糕

/br>Photos by Terok Nor
位於台北嘅雪王係一間已有半世紀歷史嘅老字號，售賣著73種口味嘅雪糕。除咗一般水果口味外，竟然仲有辣椒、高粱等騎呢味道。最特別係呢個豬腳味雪糕，食落鹹鹹地，雪糕入面仲有豬腳碎粒。唔知店家下咗咩工夫，令雪糕帶豬肉嘅黏稠，但又褪去咗豬肉嘅油膩，令豬腳同雪糕嘅配搭冇咁突兀。

日本 Häagen-Dazs櫻花味雪糕

Photos by Häagen-Dazs
睇完比較粗漢子嘅豬腳味雪糕，嚟番個少女啲嘅櫻花味雪糕。Häagen-Dazs鍾意出季節限定就係人都知，日本Häagen-Dazs更加係出得比其他地區頻繁。好似呢個櫻花味雪糕，帶有清新花香，配以香而微酸嘅櫻桃醬。包裝就個pink lady咁，印上櫻花嘅圖案，無論味道定樣貌都帶濃濃少女feel。

香港火焰雪糕芝士撻

Photos by 良善熊熊
既然係香港地區，又點少得芝士撻呢？Lab Made就緊貼潮流，將一球芝士雪糕放喺鬆脆嘅撻底度，再用火槍將雪糕面嘅砂糖燒焦，令雪糕呈金黃色，味道就介乎冷熱鹹甜之間，非常特別。

紐西蘭冬甩雪糕

Photos by Wa Cow LA
呢款雪糕攞咗紐西蘭雪糕一等獎，就知品質有番咁上下保證。生產商用香甜嘅冬甩同樹莓醬汁填滿咗個雲呢拿同肉桂雪糕，令口感好似啫喱冬甩，甜到入心，包保掃走哂你一日嘅煩惱。

日本日清咖哩杯麵雪糕

Photos by cupnoodle museum
咩話？杯麵雪糕？仲要咖哩味？無錯，日清曾經喺博物館限定推出咖哩杯麵雪糕，聲稱雪糕甜味會和杯麵的「湯」，會做到平衡的效果，而軟雪糕上Topping亦會跟足原版杯麵，加上肉粒、蔥、蛋等。而雪糕就加咗咖哩粉。有冇試過呢款雪糕嘅烈士呢？

日本沙律味雪糕

Photos by hkgalden
日本真係無奇不有，今次要介紹嘅雪糕繼續來自日本。呢款雪糕以士多啤梨做底，加埋蕃茄、青瓜同胡椒等配料，味道酸酸甜甜咁，想減肥又想食light啲可以試吓，日本各大超級市場都有得賣。

美國大蒜味雪糕

Photos by 重慶都市圈
作為「世界大蒜之都」嘅美國吉爾羅伊市，推出大蒜味嘅雪糕都係理所當然嘅事。最特別嘅係，喺當地每年七月嘅大蒜節，人們都可以免費食到大蒜雪糕，係咪好吸引呢？不過食完唔好同開飯仔講嘢就得啦！

文：段

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。