既然大家都咁掛住文生哥哥，佢做茶記又做到咁出色，開飯仔上個月12日就帶埋班會員去探下佢，順便偷下師，聽下佢有冇啲做茶記嘅心得，話唔定第日我都可以開返檔。
文生哥哥點解無啦啦會去做茶記呢？原來佢岳父係深水埗大名鼎鼎嘅新香園 (堅記)嘅老闆，難怪傳授晒一套好功夫畀佢，仲有好多茶記嘅秘密可以分享畀我哋知：
1.原來地盤班大佬好鍾意飲檸啡；
2.原來以前茶記無朱古力，得谷古，味道會較苦澀同無咁幼滑；
3.原來茶餐廳有三寶，分別係沙嗲牛肉、五香肉丁同 雪菜肉絲，以前全部自家製；
4. 原來一杯奶茶嘅茶係由10幾種茶葉溝埋而成；
5. 原來最易沖嘅飲品係菜蜜，溝水就得；
6. 原來最麻煩嘅飲品係檸樂煲薑，因為要即整，又要切薑再煲成10 分鐘
7. 原來凍檸茶得1/3係茶，另外1/3水加1/3冰，熱檸茶就係20%茶加80%水。
8. 原來西多士係最麻煩嘅食物，以前無炸爐，一塊要煎成10分鐘，不過又最賺錢，因為材料成本低。
爆完咁多趣事，文生哥哥仲示範整佢嘅成名作蛋牛治，佢嘅蛋牛治同出面嘅唔同就係佢用嘅係新鮮牛冧肉，牛味較真同埋有咬口，先將蛋同牛肉搞勻，倒落Pan時要keep住前後郁，如果唔係好易黐底，千祈唔好反嚟反去，一邊濃邊時先反，最後就夾落烘脆咗嘅多士中，一份新鮮熱辣嘅蛋牛治就完成喇！會員門仲有得一齊整同試味添！老土講句，當日真係學到好多嘢，大家對茶記呢個本土飲食文化重要一環嘅了解又增進咗唔少！多謝文生哥哥同SHY Dance Café店長當日熱情款待。
文:Marcus
隨時接收最新資訊
讚好OpenRice專頁！