![](https://www.openrice.com/userphoto/Article/0/2L/000IF7E57B328E8A31C6E5j.jpg)
望下月曆,9月15號就係中秋,即係又係時候食月餅喇!以前食月餅最期待就係開刀之後嗰下,究竟自己揀中嗰嚿有冇鹹蛋黃,有幾大嚿;後嚟就慢慢由傳統嘅蛋黃蓮蓉月轉咗食冰皮月餅,有時當雪米糍咁食,一個人都可以食晒一件;再到而家,無論傳統定冰皮月餅,都已經畀細個嗰時出多咗好多口味喇,又會想同多啲人些牙,咁可以試多幾款吖嘛。咁今年有咩新款?開飯仔幫你哋收集咗少少資料呀:
抹茶月餅 中村藤吉
![](https://www.openrice.com/userphoto/Article/0/2J/000I667FF17100AF486D24j.jpg)
連中村藤吉都出月餅!仲要係抹茶味添呀呀呀呀呀呀!!!我隔住個mon都聽到你哋嘅尖叫聲同見到你哋嘅心心眼喇!冷靜啲,我要講多個消息,就係……另外仲有隻抹茶日本甜薯味添呀!呢兩隻味都係日本京都整嘅,切開成個餡都係抹茶蓉,甜薯嗰隻仲有甜薯肉添,聽到都好想試。
預訂日期:7月22日至8月23日(數量有限,訂完即止)
預訂地點:全線分店
乳酪雪糕月餅 Haagen Dazs
![](https://www.openrice.com/userphoto/Article/0/2I/000HTM2747E27808691B33j.jpg)
Haagen Dazs 粉絲應該都食咗好多年雪糕月餅,今年佢哋終於出埋乳酪雪糕月餅喇,第一年出暫時有兩隻味:原味同士多啤梨味。比起其他傳統或者冰皮月餅,乳酪雪糕月餅感覺應該會冇咁膩,酸酸甜甜咁食多少少都得(好似係),而且仲係成朵花花咁樣。至於雪糕月餅亦同樣整到成朵立體玫瑰咁,其中新口味荔枝紅桑子玫瑰,入面係熱帶水果夾心,外面係脆米朱古力嚟。一盒有8款味唔使爭,成家人一人一個都得。
預訂日期:7月18日至8月24日
查詢電話:2629 6116
茶味月餅 Tea WG
![](https://www.openrice.com/userphoto/Article/0/2I/000HTN5AB65D2DFADFFC38j.jpg)
有時食月餅怕食得太多蓮蓉會膩,不過如果混入咗茶葉入蓮蓉度,又可能可以中和返啲膩嘅感覺喎。Tea WG有三款茶味月餅:Jewel(巴黎-新加坡茶)、Ruby(象牙宮殿之茶)同Midnight(藍色蓮花香茶),三種月餅三種色,每款都有唔同食材做配搭。就好似紅噹噹嘅Ruby咁,就用咗檸檬皮同芒果乾嚟整嘞,甘甘地嘅茶味之仲略帶些少酸甜。
預訂日期:8月16日至9月14日
中法合壁月餅 Paul Lafayet
![](https://www.openrice.com/userphoto/Article/0/2I/000HUN188962C0B296D26Dj.jpg)
甜品控一定聽過Paul Lafayet個名,上年開始出埋月餅,你哋有冇試過先?未嘅唔緊要,今年都仲有,而且仲係新配方。佢哋取傳統月餅嘅蓮蓉餡,配合西式嘅蛋糕餅底,創製咗4款中法合壁嘅月餅,而且仲有建議食用嘅先後次序添!首先係甘香嘅栗子伯爵茶、香脆又甜甜der焦糖、然後就係又甘又甜嘅抹茶榛子,最後就係酸酸咪咪嘅檸檬,係特別嘅。
預訂日期:即日起至9月15日(7月31日前預訂有優惠)
預訂地點:全線分店
玫瑰醬洛神花月餅 國金軒
![](https://www.openrice.com/userphoto/Article/0/2I/000HTP45F87C126EF65D07j.jpg)
想食月餅但又想健康啲,好似好矛盾?但都唔係完全冇辦法嘅。有款加入咗玫瑰花醬同洛神花顆料嘅月餅,有口感得嚟又有花香,最緊要係洛神花顆料養顏㗎。另外仲有一隻叫「有機龍舌蘭蜜蛋黃低糖白蓮蓉迷你月餅」,個名都幾長,但係見到「有機」、「低糖」呢啲字,都知道相對會清淡啲,至少感覺上係健康啲先嘅。
預訂日期:即日起至9月10日(7月31日前預訂有優惠)
預訂電話:5361 3070(中環)、 2315 5885(尖沙咀)
另設網上預訂
流心月餅 Starbucks
![](https://www.openrice.com/userphoto/Article/0/2I/000HTQB88A9935351BD059j.jpg)
而家潮流興流心,唔知大家點解一見到啲嘢切開係流心嘅就會好開心。所以連月餅都有流心!之前都同大家介紹過㗎喇,焦糖流心咖啡月餅!另外仲有日式焙茶桂花同抹茶紅豆味,好似全部都好好食咁呀。
預訂日期:即日起至8月14日
預訂方法:全線分店
抹茶手工月餅 Valérie
![](https://www.openrice.com/userphoto/Article/0/2I/000HVD97339D8A183132B6j.jpg)
除咗傳統餅店會整月餅,而家都愈嚟愈多師傅會做手工月餅。就好似呢間網上人氣餅店咁,唔止有奶皇月餅,仲有人見人愛嘅宇治抹茶月餅同加拿大楓糖果仁月餅呀,又中又日又西,要咩式都有。
供應日期:8月1日至9月30日(即日起至8月31日前預訂有優惠)
預訂網址:www.valeriepastry.com/mooncake
文:Kar
![](https://www.openrice.com/userphoto/Article/0/2L/000IF88BFB4A660EC35714j.jpg)