eatnuts的个人专页

行過尖沙咀想飲下開到成行成市既台式飲品，開openrice search下附近有咩選擇，竟然發現本身只有銅鑼灣店既迷客夏！即刻狗衝🏃🏻‍♂️星期六下午六點去到，得兩三個人排隊，排到我就知點解 - 大甲芋頭售罄😢 見到好多人排完隊order嗰一刻先同我一樣咁失望，要再諗過飲咩好。其實店員應該擺出告示，manage顧客expectations之餘亦可以縮短落單時間。我對珍珠興趣唔大，叫左出雲抹茶鮮奶($30)，二分糖，去冰。由排隊到飲品到手只用左15分鐘，可以接受。抹茶味唔夠濃，味道比其他抹茶粉(例如小山園)明顯遜色。唯一可取之處係牛奶幾濃香，感覺就好似用$30買左杯奶咁....下次都係等有大甲芋頭先買😪…查看更多

時不時都需要喺尖沙咀食客飯，除左中菜西餐，有時會想轉下口味食日本菜。去過另一酒店既日本餐廳嵯峨X兩次都好滿意，今次就試試同級數既雲海，點知，出乎意料地失望😔餐廳侍應話是日推介新鮮運到既星鰻，於是一行四人都要左星鰻蓋飯套餐 ($540)。套餐包括頭盤、刺身、星鰻天婦羅、星鰻蓋飯、麵豉湯、香瓜菜。頭盤 - 木魚絲海苔，清新開胃。刺身 - 三文魚、似乎係油甘魚既刺身各兩片。前者正常冇驚喜，油甘魚好新鮮肥味👍🏻👍🏻星鰻天婦羅 - 炸皮薄薄一層，隱約見到白色既鰻魚，有兩隻手指咁粗。趁熱咬開，魚肉唔會乾、仍然嫩滑，食得出係靚魚😙 仲有兩條秋葵天婦羅，好似係出面既日本餐廳冇見過！燒星鰻蓋飯 - 希望越大失望越大，最差既一道菜，又唔肥美又有啲乾🙍🏿‍♀️隔住個屏幕都睇得出有幾差👎🏻士多啤梨清酒芭菲配紅豆雪糕 $80 - 索價不菲，但質素追唔上。芭菲同雪糕都太甜，兩者唔夾味；芭菲texture似雪糕多啲，又冇清酒味，整體唔合格。四個人食一樣既午市套餐、一樣既甜品，埋單每人近$700！好少喺尖沙咀食到咁唔滿意既貴價日本菜，唔推薦比人亦唔會再黎！…查看更多

Team dinner老闆話要食好啲，仲指定要食298 Nikuya。是晚果然冇失望，每道菜都表現出色！雖然唔平，比起動輒都要二三百既燒肉連鎖店牛X再貴超過一倍，但滿足感大好多！如果唔係成日食咁多肉，其實值得花多少少錢，食番啲有質素既燒肉，對自己味蕾好啲☺️第二日仲要準時番工，大家都冇叫酒，只飲烏龍茶消滯。不過見到Menu有唔少日本whiskey、梅酒、清酒，相信放工黎happy hour都係唔錯既選擇呢。叫左好多碟四個人share。如果唔識處理，侍應都可以代勞，介紹下正確燒烤同食法。和牛西冷燒 shabu (蛋黃汁) $210 - 睇下啲紋理😍😍😍 侍應幫忙將牛肉兩邊輕燒，沾上蛋汁再攤平碟上，放上飯糰、捲起切半， 分到每人一份bite size。牛肉本身冇得頂，肉味濃、肥美就唔多講，加上少許白飯同蛋汁就更平衡、減低肥膩感。要好似家燕姐咁大嗌：好好味呀!!!!鹽燒厚切和牛西冷 (1pc, $160) - 與上述和牛西冷燒shabu成為是晚top 2我覺得最好食既！極厚切既西冷大概有男士掌心一半咁大，睇落份量唔多，但其實一人一啖已經足夠，食太多會膩。侍應教路，要每邊燒至起角再rest五分鐘，先好切粒。除左入口即化，我都諗唔到第二個形容詞，its heaven on earth😍塩醬香蔥和牛牛舌 ($110) - 將每片牛舌對摺再輕燒，唔使燒到全熟係最佳享用辦法。牛肉已經調味，蒜味唔會over-powering，唔需要再點汁就已經好好食。和牛腿肉扒 ($200) - 侍應話今次要燒至全熟；先烤已介好斜紋既表面，再剪開一條條烤熟牛扒中心位置。同先前既牛肉相比，腿肉扒較瘦，口感會實啲、有咬口啲，適合唔想食太油膩既人。加上丁點鮮磨芥末，令味道更加豐富，唔會淨係重覆食到牛味。塩醬厚切牛舌 (3pcs, $135) - 牛舌係我至愛既牛肉😋 爽口又juicy，點少少鹽就冇得輸！大和豚五花腩肉跟生菜 ($220) - 雖然都係好食既豬肉，不過喺主角牛肉既光芒下，表現就唔太搶眼。用生菜包住豬肉、加上小小辣醬食好有韓式燒肉風味。柚子胡椒雞腿($85) 都一樣唔算特別，下次可以skip。298招牌沙律 ($90) - 油醋沙律汁酸酸味味，開胃又唔使成餐淨係食肉，不過稍嫌油落多左啲。$90一個普通沙律值唔值得就見仁見智。點左好多碟，未能一一詳細記低。所有牛肉dish都近乎無可挑剔，食到好飽都只係平均每人七百幾，性價比高👍🏻 已經同左爸爸講下次佢生日帶佢黎😙…查看更多

Happy Friday搵左間喺公司附近既法國餐廳同媽媽慶生，星期五晚費事出尖沙咀旺角同人迫。地點都幾易搵，賽馬會過馬路轉左，行多兩分鐘去到電訊大廈，上扶手電梯就見到。餐廳以淡藍、灰、木色為主調，配以金色hardware同雲石紋檯，幾適合影相。我地一家三口被安排坐cubicle梳化位，私穩度唔錯。大約7點黎到，全晚餐廳只係坐滿一半，理應唔太嘈。不過有房比人book左開dinner party，可能侍應為左方便上菜就冇關門，不停有喧嘩尖叫聲傳出，非常滋擾☹️晚餐有tasting menu, set dinner & a la carte。我晏晝食完客飯仲未飽完，媽媽又係雀仔胃，所以只order兩個set dinner再加lobster bisque to share。未講食物質素之前，要先特別一提茶餐廳級既服務☹️ 首先，侍應行路風咁快，衝黎衝去，同優雅既環境好唔夾；冇制服，連一致小小既dress code都冇，有人著denim shirt，有人著casual t-shirt，我一開頭以為係食客既人走過黎serve我地入座。服務亦好粗糙唔細心：先前提到既冇為party房關門隔音，噪音影響大廳食客；另外，lobster bisque上菜嗰時本身擺盤好靚，梅花間竹咁排列粉紅色龍蝦肉、綠色菜莖、croutons，而湯係分開上。但侍應放低碗湯後極速講句 “lobster bisque”，冇手勢示意、冇問過客人想唔想自己倒，就即係倒晒全部湯落碗☹️講番食物，附送既麵包籃中麵包就普通，而脆條就好好食，mayo似乎加左蒜蓉、pickles等，食唔停口！單點既lobster bisque ($108) 好濃龍蝦味，有4-5粒龍蝦肉，可惜太早加湯，croutons浸到淋晒。Appetizer:鮮蝦沙律伴車厘茄及哈密瓜 - 中蝦稍為煎過，配上橙肉同酸酸地既醋汁，係比較light既選擇。不過不失。法式鵝肝焦糖燉蛋 (+$38) - 依個好食，不槐係signature。燉蛋好流心，雖要匙羹舀起，就咁食會有啲漏，配麵包薄脆就剛好😋 唯一要挑剔既係燉蛋面唔脆，整碗都係啫喱狀，似乎唔太乎合叫做焦糖燉蛋？Main course唔記得影相好失策🤦🏻‍♀️ 香煎帶子燴意大利飯伴龍蝦汁 ($228) - 薄薄一層risotto上舖上三粒帶子、切粒蘆筍等食材，同龍蝦湯一樣擺盤頗有心機。帶子幾大隻，味道唔錯，risotto如果硬番少少會更好。西班牙黑毛豬豬扒伴黑松露薯蓉及小甘荀 ($348) - 全晚最失色既一道菜，黑毛豬豬扒冇肉味，同快餐店比只贏在肉嫩上👎🏻生日飯又點可以冇甜品？爸爸係朱古力怪，當然要朱古力心太軟伴士多啤梨雪糕 ($68) - 本身配雪尼拿雪糕，當晚另外有士多啤梨、香梨可選。心太軟係fail safe甜品，冇得唔好食；但雪糕質素一般，甜到涸喉，比預期差。檸檬撻伴青檸雪葩 ($68) - 三個bite size檸檬撻剛好夠一人一個，甜酸適中，配上青檸雪葩可以清清味蕾，適合唔喜歡食太甜既人。總結食物質素同性價比還可以，但服務就不敢恭維。喺觀塘大有其他選擇，所以應該唔會再回訪。…查看更多

有次放工7點幾黎到已經排緊長龍，是日週末十二點半就完全唔使等位😄餐廳裝潢仿古，深色木檯、木板凳、太師椅配上仿燈籠造型既吊燈都好有古色古香既感覺，喺通菜街算係異類。檯面仲有迷你木屏風比人拍食物照，好細心。手撕雞拌雞油飯 (大) $48 - 成碗食落有啲乾，唔係好覺有雞油，熊生話麻麻地，仲要叫左大碗都唔夠飽😅十三么 $66 - 配料有手撕雞、雞叉燒、溏心蛋，麵底則係粉絲拼米粉。依Menu指示，先試啖湯，幾鮮甜；飯後冇口渴，應該冇味精掛？擠左青檸汁、加左甜醬油又唔同左味！最喜歡既食法係夾一住麵落匙羹，加小小湯同炸蒜，一啖食晒佢☺️ 除左麵，仲有幾件腸粉，係就係特別，不過感覺唔多夾呢。手撕雞索左湯撈粉食好好味！雞叉燒都唔錯，每片都輕輕炙燒過，唔鞋👍🏻 我時不時都會食到親戚由鄉下帶番黎既自由放養有機雞蛋，蛋味好濃、冇腥味；今次食落依度既日本無激素雞蛋，就好似同普通蛋冇咩分別呢。雞飯有待改進，雞麵可以再戰。不過食完要買野飲同雞蛋仔加餐🌚…查看更多

食完十X姨冇飽既感覺，要加餐🤷🏿‍♀️黎左一街之隔既TeaDays。事前已經睇左Openrice，黑糖珍珠奶茶好似麻麻地咁，所以揀左好評率高既小山園抹茶鮮奶茶 & 烤紫薯鮮奶。星期六下午兩點鐘左右，只等左10分鐘。小山園抹茶鮮奶茶 $23 - 店家寫明用上明治鮮奶製作，入口順滑香濃，比平時用奶粉沖既台式飲品有heart好多。抹茶雖然唔係佳品，但味道一啲都唔假，半糖甜度對於唔嗜甜既我岩岩好，相信即使全糖都唔會難入口。烤紫薯鮮奶 $28 - 超水準！係唔係烤既就飲唔出，不過紫薯好足料，細食啲既女仔應該可以當係半餐飯😅CP值唔錯，應該會再黎👍🏻飲得慢既，記住嗌少冰，唔會溝淡晒😉…查看更多

嘴刁既我平時唔輕易番兜一間餐廳，但今次已經係第四次黎食，因為真係好好食！人多少少既話最好打黎book定先，依度十二點半就開始要排隊。扮工一族當然辰咁早十二點就閃去食lunch啦😛主角手打烏冬每日鮮製，超級煙韌！粗幼冷熱都有得揀，仲可以任配其他餸。之前冬天會食半湯烏冬/咖哩烏冬，夏天熱辣辣就食冷烏冬。是日試左新菜式 三文魚子 醬油冷烏冬 ($69) 有三文魚子、蟹子、海帶、白蘿蔔泥、蔥，魚子同醬油份量唔多，味道較淡口。另外，依款係粗烏冬，食完感覺好飽好頂胃，個人覺得海苔冷烏冬好食啲。追加左個燒鯖魚 ($32) 皮脆脆地，肉多汁又夠嫩，好好食呀😍😍朋友既海苔冷烏冬 (關東煮 set $70) 12:45就聽到佢話賣晒😨 上次食過，雖然海苔味唔出，不過烏冬幻幻地、浸落冷醬油度食好清新。關冬煮有蛋、白蘿蔔、獅子狗、椰菜包肉卷(唔知正名係咩)，唔錯既。除烏冬外，依度既另一名物係骨付雞，淨係見到幅相都流晒口水🤤 後面既粗掛鍋烏冬 (set $73) 其實即係熱湯烏冬，冇試唔comment。雖然價錢喺觀塘黎講唔算平，不過一分錢一分貨，絕對值得，細食啲既女仔應該會食唔晒添。完全foresee到自己會再黎第五六七八次~…查看更多

前排喺IG見到foodblogger係咁幫佢賣廣告，本身冇乜興趣，不過今日食完對面間pizza，鹹得滯要食啲甜品調劑一下😖 (詳情請refer to上一篇食評)一件crepe cake大概$35，有咁多繁複工序，定價適中。cake shop主要做外賣，不過我地要即場食，入面有好似入左人地屋企咁既一個沙發位、茶几同幾張圓櫈。幾個女仔share左三件：抹茶流心(後左)：果然係招牌，抹茶味濃、有回甘，唔會太甜，同行抹茶表示好滿意😋阿華田流心(前)：阿華田冇想像中咁濃味，唔值一試。揀番經典口味，例如朱古力，應該會好食好多。栗子(後右)：本身期望最高既一款，不過希望越大失望越大☹️ 冇乜栗子味之餘得個甜字，越食越漏👎🏻整體而言crepe皮可以再薄啲；另外口味雖然多選擇，但味道有進步空間。下次咁岩經過既話可能會再試試其他安全啲既招牌口味。…查看更多

Happy friday又去駱駝漆搵食！五個女仔去食pizza，驚食唔晒叫左三個餐先，結果差啲食唔晒🌚叫左Anchovy鯷魚、Chicken Tikka印度香料烤雞、Margarita fungi prosciutto瑪格麗特蘑菇意大利風乾火腿，三款都係$85 連飲品，有罐裝汽水、檸檬茶同礦泉水可以揀。檯面有即棄餐具，個碟好方便鏟起塊pizza，不過就唔環保👎🏻 pizza即叫即焗，等左十分鐘左右就以木盤熱辣辣送上。結論係三款都好鹹，太多芝士，食左兩三件已經漏漏地🌚 Anchovy加橄欖或chicken tikka本身已經鹹，再加咁多芝士真係搞唔掂，味道好單調🙅🏻‍♀️ Chicken tikka上面有辣椒，唔食得辣既記住唔好嗌。本來想試四川雞肉，店員話會有啲鹹，好彩轉左做prosciutto😖 而prosciutto感覺用料將貨就價，係我期望太高了。本身冇人想飲汽水，食食下個個要起身攞，又鹹又辣😂 唯一above average係個pizza底，煙煙韌韌唔會太薄太厚，應該歸功於好既dough同焗爐。如無意外唔會再訪🙅🏻‍♀️…查看更多

身為一個印度菜愛好者，大大話話喺香港都試左十幾廿間印度餐廳，多數impress我既都係咖哩菜式。今次黎New Punjab Club完全顛覆我對印度菜既認知，原來tandoor都可以咁好食！餐廳裝潢行低調奢華路線，有啲art deco風格；當中2/3係梳化位，適合三五好友聚舊吹一晚水。好多人行過我地張檯都笑，原來後面幅牆掛左印度裸男畫好搞笑😂 侍應都係印度人，著住傳統印度服飾，服務就還可以啦。Menu只有一頁，有前菜、燒烤、肉類咖哩、菜/豆類、沙律。是晚五人gathering，燈光好暗，掛住食同講亦冇乜點影相so sorry🤷🏿‍♀️Tandoor先上菜，嘩媽呀超香，兩米外已經聞到🤤 Lamb chops, beetroot salad, ember roasted onion 一定係必嗌 ($468)，兩支羊架斧頭咁大支，外面沾滿香料，調味好足之餘又唔會蓋過肉味。難得係入面仍然係medium rare既粉紅色，好juicy，愈𡁻愈有肉味，冇誇大，可能係我食過最好食既羊架！兩塊肉女仔拳頭左右大細，四五人share岩岩好一人兩片。伴碟有切成碎粒既beetroot salad同埋半個grilled purple onion，可以平衡肥膩感。Yogurt, spice-marinated chicken, mint chutney 都好食 ($248)，不過相比起羊架就冇咁嫩。個人認為Highlight係伴碟既雞肝醬，加左香料、洋蔥粒，again又係出面冇試過既風味！Line-caught cobia (類似cod fish), dill, carom seeds, tomato chitney ($218) 就乾左啲同埋太lone👎🏻 侍應本來話一碟兩件魚塊唔夠五個人分，但係建議大家唔好聽佢地講😂咖哩方面試左 lamb shank, cashew & black cardamom($228)、sundried lentil dumplings, tomato, fennel & yogurt ($118)。Lamb shank煮到一切就骨肉分離，咖哩係偏稀嗰種，不過一試，__ 有杏霜味既😑 估計加左杏汁，連羊肉都索晒隻味。接受到既先好嗌呀，我就食上面啲花生就夠🙊Lentil dumplings外形同咬口都似方形既肉丸，咖哩汁又濃又結撈飯岩晒。Basmati rice ($48) 出奇地好食，好香米味，削得黎又唔會太乾身。再叫多兩份naan bread一共四大片share，上面有少少芫茜，不過唔食芫茜既都唔使擔心，因爲味道唔出。正正常常啦可以唔嗌。餐廳有三款甜品供應，不過黎過既朋友話試過晒都冇乜特別印象邊隻好食，已經好飽既我地就冇嗌lu。除左gathering，如果兩個人想撐檯腳又唔想食西餐，New Punjab Club係少有比較high-end既印度餐廳，感覺係幾好既另類選擇😛 唯一缺點係book位麻煩，一定要上網book兼且留credit card，如果no-show好似要扣$500😕…查看更多

可以喺工作上遇到好朋友唔容易，遇到個一樣咁大食同咁鍾意食既好朋友就更加唔容易😛所以是日借相識三週年，一齊去試下新野！Lunch set包餐湯、餐飲(熱龍眼蜜/熱檸水，轉其他要加錢)、主菜，價錢由$88-$158不等。是日餐湯係南瓜湯，雖然係附送，但有濃濃既南瓜味，好甜好綿密，我地兩個都喜出望外！仲有熱蒜蓉麵包，好食好食。朋友嗌既 慢煮美國安格斯牛仔肋 · 那不勒斯意粉 ($148) 好快就上菜，不過各方面都差強人意。牛仔肋好鞋，唔係適合慢煮既肉質 (或者係廚師handle得唔好)，亦食唔出係慢煮☹️ 四條牛仔肋，朋友食左一半就放棄。意粉淋左啲，所謂「那不勒斯」，除少少番茄外，食唔出有咩特別。擺盤奇怪，幾條醜醜既火箭菜令人唔多開胃。唯一較好既係個汁，味道似平時食紅酒燴牛尾，意粉撈番依個汁好食好多。我既 慢煮刺身級挪威三文魚 · 英式碗豆燴飯 ($158) 就等多15分鐘先上菜，相差時間有啲長。不過漫長既等待係值得嫁 — 每樣都好食！三文魚先慢煮再煎，外面魚皮脆脆地，入面魚肉仲係淡粉紅色好吸引😍 碗豆燴飯似creamy risotto，擠番少少檸檬汁可以稍稍減膩。整體份量仲比想像中大，男士都應該夠飽，好食到我一路嗌飽一路食晒成碟飯😛 同上，敗筆又係上面兩條睇落好可憐既露荀，個人覺得大支少少會靚好多⋯餐廳全日不設加一，是有原因的。服務麻麻上菜亂：餐飲上錯；兩個主菜上菜時間差太遠；我地就黎食完又比多次蒜蓉包，同女侍應講已經食左(which係好明顯)，佢黎手就將佢隊比隔離連單都未落嗰檯😓 隔離檯食客都呆左😑如果食岩野，其實性價比唔錯，希望餐廳留意番服務同某啲食物既質素。為左三文魚 · 碗豆燴飯會再訪🤤…查看更多

見到Openrice好多人推介牛腩治，但有時出街都想食得健康啲，是日就揀左冇乜人講既Ur veggie welcome 矮瓜素菜治試試。D出口開左之後行過黎只需要2分鐘。留意番店舖五月中開始內部裝修，各位可能要六月再訪。所有sandwich即叫即整，整好後會嗌你個名送到去你面前，幾有親切感呢。檯上寫左本月special sandwich叫kimoji，個名好搞笑！Ur veggie welcome $88 (vegetarian) - 餡料有roasted eggplant, chipotle yogurt, hummus, avocado, alfalfa sprouts, pickled carrots，睇落好吸引呀😍 chipotle yogurt有啲辣好惹味，爽爽地既alfalfa sprouts同醃蘿蔔增加口感，hummus + 牛油果切片依個冇得輸既組合簡直係我至愛，冇食唔晒個包既理由。熊生話佢個Kentucky San 日式咖哩炸雞治 $78 都好食喎，highlight(竟然)係個咖哩mayo。可惜我唔好炸野💁🏻‍♀️P.s. 食過最回味既hummus+avocado組合都仍然係Mana fast slow food，大家有機會去試試佢地既wrap，配料選hummus, avocado, roasted veggies, roasted portobello mushrooms🤤🤤🤤 thank me later🤤🤤🤤…查看更多

拖左好耐既食評😅 老西安開左喺屋企附近一段時間，爸爸媽媽試過覺得唔錯，結果同佢地兩星期內食左兩次😛老闆娘話佢地由陝西請來老師傅每日手工擀麵。試晒佢地既粗幼麵，兩款都新鮮有咬口，媽媽話食得出係每日鮮製喎👍🏻 可惜兩晚黎到既時候番茄蛋都係賣晒，冇得試😞以下綜合左兩次造訪試過既野食。總括黎講，手工扯麵、肉夾膜、高湯牛肉麵都係心水推介；不過portion較細，女仔都可以輕鬆食完成碗麵加個小食。值得一提既係小店極唔環保，使用即棄木筷子，所有小食只用塑膠兜盛載👎🏻 希望遲啲會見到依方面有改進☹️香辣麻醬涼皮 $18 - 唔係好夠辣，要自己加辣。涼皮半透明、滑身，幾開胃。西安肉夾膜 $10 - 有啲乾不過肉味好濃，肉既質素比平時喺街食既好一截！簡單美味既代表作！醬香牛肉夾膜 $18 - 如果話豬肉夾膜係食個肉味，咁依個就一定係食個醬同配料。煮到索晒汁既青椒配上醬香牛肉好惹味，體積小小，唔使兩啖就食晒🤤紅油皮蛋 $14 - 正正常常啦，價錢合理，當然比連鎖米線店既好。口水雞 $26 - 唯一一樣真心覺得麻麻地既。雞肉好鞋同好乾，唔點汁就會冇味，附近三X廚房既正好多炸醬手工扯麵 $54 - 炸醬肉碎睇相有啲乾，其實啲汁喺晒底。我好怕芡汁或類似texture既sauce，呢個炸醬就唔會，反而似滷水汁多啲。雖然唔夠掛汁，但係仍然夠味，粗麵條有咬口、煙韌得恰到好處，食唔停口呀。酸湯手工扯麵 $48 - 起初以為係酸辣湯，其實係加上豬肉粒、酸酸咸咸既湯(廢話)清清地唔漏，鍾意食酸野既要試試。秘製高湯牛肉棍棍麵 $58 - 一碗大概有4-5片瘦牛肉，因為切得薄既關係，完全唔覺得鞋口。清甜既高湯應該係用牛骨煲，飲左一半都冇覺得口渴，應該冇味精，冬天送麵一流！…查看更多

星期日去附近既士叻多買咸蛋黃餐肉雞蛋仔，趁機試埋Bookmark左一段時間既The Hotdog Submarine🌭上到西九龍中心五樓蘋果商場，喺巷仔之間搵左一段時間先搵到The hotdog submarine，唔係有心去既話真係好難發現佢。小店除左賣熱狗小食，仲有得訂熱門新加坡零食，包括咸蛋黃魚皮、薯片。雖然冇現貨買，但係老闆都好好人請得地試食😛Menu有好多set可以選擇，熊生揀左招牌A餐 - 蟹肉辣醬熱狗 + 罐裝汽水 $33；單買熱狗既話就$30。落單後老闆即刻焗熱狗包、烘香腸，再加咖哩蟹肉同茄汁，好香😍如圖，熱狗上見到一絲絲蟹肉😍 咖哩係新加坡風味，香辣得黎帶點甜，仲食到粒粒菠蘿，出奇地夾喎。食食下老闆仲送多兩粒蟹肉咖喱菠蘿魚蛋比我地！彈牙白魚蛋同蟹肉咖哩冇得輸，好滿足☺️ 平靚正小店值得多多支持，有機會會再黎！…查看更多

見到介紹話有咸蛋黃雞蛋仔，即刻衝去會會佢。小店openrice地圖show長沙灣道，實際上係欽州街面向長沙灣政府合署，狹窄既行人路上人來人往，比較擠逼。星期日兩三點左右唔算好多人排隊，落單後即叫即整，等左大概十分鐘。雞蛋仔一款餡料只需$15，我揀左雙拼咸蛋黃+餐肉都只係$20，價錢合理。店員好用心，雞蛋仔出爐後竟然以人手撥扇😧口感：頭幾粒入口仲有啲脆，食左一半後已經淋淋地。可能因為有餡料既關係，唔可以好似平時啲雞蛋仔咁蛋漿只fill一半，半空心、脆卜卜。餡料：咸蛋黃味冇想飲中咁濃，餐肉粒亦唔算多。可能係成本考慮，或者驚落得多會唔夠脆？如果經過附近可以一試，價錢唔貴又唔使等好耐；不過專登黎就不必啦。…查看更多