史利夫's Profile

今日忽然想食粥，呢度成日經過，但竟然未嚟過，所以今日決定試吓。叫咗個皮蛋瘦肉粥同炸腸。皮蛋瘦肉粥係用咸肉絲，覺得好"正宗" 皮蛋唔會煮得太爛，粥底亦唔錯。個炸腸就差啲，腸粉皮比較嚡，油炸鬼亦唔脆。簡簡單單一餐，可接受喇！…Read More

是日午餐有白汁雞皇同西班牙豬扒揀，同太太倆個都不約而同地，揀咗西班牙豬扒，一飯一意粉。餐湯揀咗羅宋湯，濃淡適中，唔會太辣太咸。仲要熱辣辣上場，合格有餘。相反，餐包一啲都都唔熱，好在唔太硬。牛油用凍水浸住，好處係保持到溫度唔會熔，壞處係比較濕。主菜上場，豬扒水準好參差，有兩塊好瘦好實淨，一塊好肥，一塊好腍。味道其實唔差，係口感怪咗啲。個汁甜甜地辣辣地，幾惹味。咖啡乃全場最大敗筆，帶苦澀而嚡。落多多奶都補唔返...呢度啲侍應都十分快手，雖然唔算好有禮貌，但都可以接受。食物賣相、味道都有唔錯水準，而且午餐只係$35 (另有加一小費)，值得俾個笑笑口。…Read More

唔想打邊爐，但想食啲熱辣辣o既食物，於是諗起呢度o既湯飯...太太叫咗鯪魚肉、魚腩、支竹、西洋菜而我叫咗牛肉、豆腐、豆卜、娃娃菜雖然全部都唔係上價菜色，但簡簡單單都可以好好食。例如牛肉唔會煮得太老、鯪魚肉幾煙靱、支竹唔會煮爛晒...而且餸菜o既份量好多。當然唔係全冇缺點，豆漿冇味，魚腩冇特別...…Read More

臨時決定去新世紀食飯，所以冇上網搵定食乜~~ 結果去咗 food court。既然冇心水，見個午餐賣相唔錯，於是叫咗雞扒石班意粉，熱奶茶。一上菜，見意粉少得可憐，於是叫佢添加。佢老大不情願地都加咗俾我。但最後發現，唔加都冇所謂，因為啲意粉冇味兼粗嚡，食少啲都唔覺可惜。石班肉質比較怪，有啲似軟膠質地 ！？ 味道欠奉。雞扒相對地好啲，較有味道。但熟唔透咁...奶茶唔合格，茶味淡而嚡。真係7仔都好過佢！湯係最一般，但最可以接受o既一項！！…Read More

總有啲食物、食肆，耐唔耐就會想起，今日想起呢度...一個人食，所以揀咗最想食o既豬扒撈丁餐，飲熱奶茶，小食當然係格仔餅。豬扒一定係主角之一，記憶中比較薄身同脆口，今日較厚及肥，幸好仍然夠入味。撈丁有啲硬，又冇乜味道，麻麻地。奶茶唔夠茶味唔夠滑，不過，冇祈望冇失望。格仔餅幾香口，可能自己貪心啲，總覺得花生醬同煉奶唔夠多...…Read More

近年好少响屋企打邊爐，所以難得一次，梗係想搵啲好味o既牛肉食吓。呢度雖然食評唔多，不過，幾年前已經聽聞。所以，決定試一試。手切肥牛的確有料到，唔算太肥，充滿牛肉味。淥耐咗都唔會韌，肉質算唔錯。$120 左右一斤，值。同時都買咗牛丸同牛筋丸。牛丸比較普通，味道冇乜特別，勝在爽口。牛筋丸較有牛肉味，唔會有渣，相對地出色。…Read More

一直以嚟，都好想搵返細個响街邊檔食過嘅豬油渣麵/粉仔。走訪過好多自稱正宗、真正油渣麵/粉仔嘅食肆，最終只有失望而回...以為呢種麵已經失傳。今日行過呢度，望落似新開無耐嘅舖頭。又係寫住正宗粉仔，冇理由唔俾個機會佢。近年食到嘅油渣麵，都係一舊一舊小豬膏，又腍又肥。呢度食到嘅，真係脆卜卜嘅小油粒。湯底係比較"杰"，味道幾濃郁。跟餐有串燒，叫咗雞腎。切得太厚，好在都幾爽。辣味太濃，食唔到其他味道...整體好滿意，要响佢紅起嚟之前，帶太太嚟試吓！p.s. 散叫一碗粉仔都係$15，抵食！…Read More

放假可以走遠啲，太太決定去深井搵食，見呢度食評唔錯，所以嚟試吓。中午1點幾嚟到，仲有幾張枱剩，即刻有位坐。點咗倆個午餐：紐西蘭西冷扒飯、雞扒拼帶子意粉包餐湯餐包、飲品同甜品餐包先到，係熱辣辣、軟腍腍o既芝麻包同粟米包。芝麻包充滿芝麻香味，又煙煙韌韌；相反，粟米包就食唔到粟米味喎~~餐湯都係揀咗雜菜湯，飲唔出有乜特別。飲完湯，等咗差唔多25分鐘，再集齊所有西冷扒先一次過上菜...細細塊，味道唔錯，少少腍夠入味。值得一讚o既係要求七成熟，真係做到七成熟！飯係粒粒飯，有啲似日本珍珠米，口感唔錯。由於原本係豬扒，冇貨先改為雞扒，所以心底裏面冇乜祈望。反而覺得佢哋煎得唔錯，多汁而入味。帶子相對地冇乜味道，不過都幾厚肉，質地亦唔嚡。意粉就令人失望，又乾又冇味。餐飲叫咗石榴汁、柑桔青檸汁石榴汁唔夠味，柑桔青檸汁濃啲。甜品係芝士餅，但係冇乜芝士味，而且好黐口。整體嚟講，呢度食物水準唔錯又抵食，可惜服務認真麻麻地。派湯o既真係專注派湯，餐具要等好耐先再由另一個人送上。安排坐位方面，又好似得老闆一個人話得事...時間許可、仲要唔怕等吓的話，先好諗嚟呢度。…Read More

去米芝蓮餐廳食飯，都好難唔使等，八個人等半個鐘，都叫做可接受~~一大班人食飯，想影相？除非想唔食啦 不過，咁多人就可以試多幾款菜囉。憑記憶，叫咗：鵝片例牌、麻香雞腳筋、南乳粗齋、蔡瀾撈麵、招牌撈麵、阿鴻鴨舌、鵝掌翼、三拼(墨魚、鵝腎、豬頸肉)、牛月展飯鵝片雖然係例牌，不過份量幾多吓，而且味道同質地都唔錯，又唔算肥，掂！雞腳筋幾爽口，但麻香味就唔係好濃烈。平時好少剩食雞腳筋，所以都幾特別。南乳粗齋份量唔多，唔會太咸太濃味，合格。蔡瀾撈麵，味道偏淡，可能揀咗粗麵，更加唔夠味。招牌撈麵，XO醬惹味，麵質爽口，水準之作。阿鴻鴨舌雖然味道唔錯，但唔夠入味。鵝掌翼，好耐冇食過咁厚肉o既鵝掌 :) 有質感得嚟，又夠入味。墨魚腍咗啲、鵝腎好味、豬頸肉冇特別。五香牛月展但唔太香，或者切得薄得滯，味道都唔係好夠...整體嚟講，滷水唔會太咸，味道出色，價錢經濟實惠。p.s. 雖然啲阿姐唔算好好聲氣，但亦唔會好冇禮貌。仲快手快腳，茶水密密斟...反而見到好多客，冇禮貌到死...…Read More

去過鰂魚涌o既人都知道，呢道實在幾多嘢食揀。事先做啲準備功夫係必須o既~~呢度地方比較偏，印定地圖先識嚟。响阿姐不斷催促下，叫咗：坑腩魚角麵、蔥油豉油豬扒飯、 峇拉醬芥蘭、藕片，最後加咗個甜品 - 芝麻糕唔知坑腩應該係咩質地？不過，其實最緊要好食。肉質比較滑、唔韌，牛肉味濃。魚角幾彈牙，味道淡淡地，幾易入口。點咗粗麵，煮得唔會太腍，唔錯。豬扒好厚身，肉質較腍較肥，好在夠入味。蔥油豉油咸咗啲，不過用嚟送飯就啱。芥蘭夠爽，峇拉醬夠特別，好有馬來西亞風味。藕片可能唔合時，唔爽口，辣味亦過重，有啲失望。見到有芝麻糕，明明已經好飽，都忍唔住叫一客。芝麻味唔夠，好在質地煙韌。埋單走人時，餐廳內都唔係好多客。如果阿姐唔好催落單催得咁緊會好啲...…Read More

本來冇諗住嚟呢度，不過原先諗住去o既熱狗店冇開。結果，咁就入咗嚟。由於幾肚餓，所以揀咗倆個飽肚o既茶餐：公司三文治+鮮奶、漢堡包+熱奶茶公司治係餐肉、雞蛋、蕃茄做餡，雖然材料簡單，不過味道一啲都唔輸蝕，尤其午餐肉係剛剛煎起o既，配合新鮮蕃茄，美味！奶茶唔係用黑白牛沖，不過都幾滑幾夠茶味。漢堡包係港式，即係好似時新o個種。好濃烈o既漢堡扒味道，但肉質比較鬆散同腍，好在又係剛剛煎起，熱辣辣~加分！薯條係粗身，又係剛炸起，唔太油，唔錯。舊式快餐店格局，但總算乾淨企理。可能今日客人唔多，坐得幾舒服。…Read More

動身嚟過兩次，但都因為不同o既理由而嚟唔到。皇天不負有心人，在黃雨o既環境下，終於一嘗心願。同太太倆個人，分別叫咗：燒肉眼牛排三文治套餐、熱狗套餐，倆個餐都轉熱咖啡，一個薯條轉煙三文魚沙律。牛排比較薄身，似燒牛肉片多啲，好在肉汁豐富，而麵包好脆口，襯熱食正斗~~伴碟薯條似剛剛炸起，外脆內軟，仲要係粗身薯條，口感一流。沙律算新鮮，味道就一般。熱狗用芝麻包，好香！麵包同樣好脆，蕃茄好鮮，加上芥醬，已經好惹味。相對香腸有啲平平無奇…咖啡唔算濃郁，不過，如果以加 $6 呢個價錢嚟講，絕對合格。環境麻麻地，坐得好迫吓。服務都係麻麻，唔算好有禮貌。轉咖啡要 +$，轉沙律又要 +$，加起嚟都唔平…好在有免費 wifi，可以上吓網，寫吓食評咁。感覺幾優閒~~…Read More

以前只有粥品類，宜家真係粥粉麵飯都有。揀咗窩蛋免治牛肉飯加例湯。記得細細個响新釗記，成日食窩蛋免治牛肉飯，以為可以舊夢重溫，但帶嚟只有失望。牛肉碎份量唔多，但茨汁實在太多喇，而且味道偏咸。最失敗啲青豆,根本未煮得腍、未煮得透…聲稱係粉葛眉豆湯，但飲到嘅只有味精！作為連鎖式快餐店，最緊要價錢合理、味道OK，所以呢度算合格。但如果想食好啲，就唔會係好選擇。…Read More

為慶祝太太生日，想搵一間特色啲o既食肆，呢度應該係一個好選擇。一早訂咗位，雖然係下午1:00食飯時間，但人客唔多，不過，侍應都唔多。先叫一支紅酒，可能係前酒吧後餐廳，酒o既款式好多。由於不精於此道，隨便揀選一支叫 ROSSO 2005 o既紅酒。初入口時，酒味較淡，但越飲越有味。為呢一餐揭開序幕！同太太倆個都叫咗 Executive Lunch，因為價錢似乎比較抵食啲。不過，大家都加錢轉咗主菜，分別係 6 oz USDA Fillet Mignon 同 5 oz Blackmore Iron Steak。先嚟兩款麵包：一款麥包、一款似鬆餅o既麵包麥包比較有嚼口，而且麥味香濃，深得太太喜愛。鬆餅麵包冇特色唔特別。前菜係 Beef Tartare 同 Greek SaladBeef Tartare 以前未食過，本來對生牛肉有啲抗拒，但食落發覺口感同質感真係幾特別，帶嚟唔少驚喜。Greek Salad 裏面有好多青瓜、橄欖，平時好少食，因為青瓜帶有好強烈o既草青味，而橄欖則有澀味。但呢個 Greek Salad 完全食唔出草青同澀味 :) 感覺好清新Fillet Mignon 有少少 overcooked，不過，肉質仍然保持唔韌，仲好有牛肉味。Blackmore Iron Steak 入口有好濃o既炭燒味，但一啲燶味都冇。脂肪似乎偏多，不過，被火燒去多餘油份之後，令牛肉帶有一份甘香。唔需要加任何芥末醬，已經非常可口。配菜薯條炸得香脆，更加係喜愛o既粗薯條，正！另有一串車厘茄，可能曾經燒過，帶出更強o既甜味。是日甜品係芝士餅。食落真係冇乜特別~~餐飲點咗咖啡，比預期中濃郁。用o既咖啡糖，唔係方糖或者紙包糖，反而係形狀古怪、原始o既咖啡糖，夠特別！優優閒閒，享受一餐高水準o既午餐，人生一大樂事！…Read More

好在事先冇睇過食評，否則未必會揀呢度。倆個人叫咗：吉列宮崎黑豚扒便當、滑蛋帆立貝飯、魷魚鬚天婦羅餐湯最先到，味道濃郁，湯料亦算豐富。以為有個好開始...滑蛋帆立貝飯上枱，帆立貝完全冇甜味，仲腥腥哋，感覺上唔係咁新鮮 foot court 水準都不如~~吉列宮崎黑豚扒便當，炸粉薄而脆，但肉味欠奉，而且都好肥吓。配菜玉子豆腐其實幾滑，可惜凍咗啲。魷魚鬚天婦羅最後上場，竟然係腍o既。份量唔多都預咗，不過只得三件...反而洋蔥圈炸得唔錯，比較透同唔係太油。傳菜o既大叔非常之粗魯，連服務分都扣埋。整體價錢與質素不相稱。…Read More