~六嬸~的个人专页

正值生日飯局週，朋友請我到一間法國餐廳食晚飯，但竟然相約我在長沙灣等，心諗果度又係商場，又係餐廳集中既食街，何來有一間法國餐廳呢??友人帶我由長沙灣廣場向美孚方向行，行到一個商業大廈地下就見到一間裝橫高尚的餐廳 → Amuse. 竟然係工廠區中有一間這樣的餐廳，我只可驚嘆老闆的膽很大呢！進入餐廳之後，被安排坐在窗口旁的二人枱。可能隔離有十多人在用餐，顯得有點迫夾。點菜後，侍應隨即送上一籃香噴噴既香草麵包，原先諗住留肚，但佢既香味，令人不得不試一試，雖然有法國包的外表，其實很軟熟，再配以醋，好開胃，但要留肚呀!第一味上枱既係香港好多人既最愛 → 生蠔呢4隻屬於唔同產地既生蠔，由於侍應講得太快，未能記住，但佢建議順時針食起。我個人覺得，最右手邊第一隻食入口真係好juicy，一般酒店都會準備醬汁配搭，這裡就只有一片檸檬，可見餐廳對自己的食物幾有信心。第二道菜係 → Crab cake + 鵝肝件Crab cake 外脆內軟，啖啖都係蟹肉而且蟹味鮮甜，簡直係懶人恩物！同碟既另一件係煎鵝肝，厚大肥美，雖然食果陣諗到d 鵝好慘，但食一啖之後，佢入口即溶既感覺，令我忘記咗我既罪惡感。底層既麵包一向都會同鵝肝差不多Size, 但呢塊相比之下細三分之一，而且充份吸收鵝肝的油份，忍唔住，食埋。 (件鵝肝油份多到一邊切, 一邊出油呀!)第三道菜係 → 帶子粟米茸湯粟米味好香濃，而且幼細得一粒粟米殼都飲唔到，出奇地帶子同粟米既味道互相無被搶走，帶子略略煎一煎兩邊，香口得黎，內裡滲出帶子既香味。好正呀! 你見我飲咗幾啖先記得影底隻帶子呢!第四道菜 → 上湯龍蝦 原隻龍蝦，先焗再加上湯煮製，龍蝦爽口，最開心的係已經起好殼，懶人又多份恩物啦!龍蝦湯，好香濃，配以麵包入哂味，好似龍蝦包咁，但因為仲有主菜，所以又要忍住呀!第5道菜亦係主菜 → 低溫慢煮黑毛豬配牛肝菌汁 + 香煎海鱸魚個黑毛豬真係呢餐既焦點，我嘗試唔配汁，直接放入口，一開始會有煎既香味，但當咬多兩啖，個豬味由內裡滲出黎，因為豬通常都要煮到十成熟，但就容易過火變成「擦子膠」。呢個不單唔會，而且肉汁仲可以保留住，後期請教侍應之後先知，原來大廚係用低溫慢煮既煮法，將黑毛豬所有優點帶到出黎。相比之下，Seabass 真係比下去，但魚質香滑，無雪味，簡單既配搭，好清新。平時唔食魚皮既我，被呢塊煎得香脆口既魚皮吸引，食埋....hehe!最後一道菜，甜品 → 雪芭淨係睇個賣相，已經覺得好好味，一開始睇以為係一件蛋糕，心諗已經好飽，仲點食得落呢，但試第一啖之後發現.......正呀! 雪芭黎架。我黎解構一下先，唔同層有唔同味，最面層紅色係野莓，之後白色有d黑色一點點既係雲尼拿 (無諗過雪芭都可以有新鮮雲尼拿籽)，黃色係蕃薯味，底層白色係石榴，最底最底有一層薄薄既蛋糕底。我一開始幾款味道一齊食，雪芭加上配料，味道都是酸酸的，未能分得出咩味。但當我分開逐層逐層食既時候，所有味道就出哂黎啦，我最欣賞中間的萫薯味，因為味道好出，比起平時食既更出味，好食。整體，除咗環境比較迫夾，其他食材同味道都好出色，我會畀9粒星星(10粒滿分) 地址 荔枝角長沙灣道909號地下…查看更多

約咗朋友去尖沙咀食飯，想搵一間可以坐得、食得、飲得既餐廳，最後揀咗呢間。 可能算早到既關係，雖然要等位，但好快就等到。 店舖以Open Kitchen 形式設計，坐位多數為4人枱，分左右兩邊，一邊係高枱(近廚房)，另一邊係低枱。之前去過太子果間，兩間的格局好唔同，呢間光亮好多，但比較擠迫。 我地一行三人，叫咗個二人餐，話就話二人餐，其實都幾多野食，因為佢有一份沙律、一份三文治、一份意粉、兩件意大利餅及兩杯飲品。 紫薯葡萄沙律↓ 佢以黑醋取代沙律醬，簡直係我既喜好，因為我本身對沙律醬有D抗拒。單係賣相，有齊各種顏色，紅、橙、黃、綠、紫，已經令人胃口大開。 煙三文魚炒魚三文治↓ 若果3款食物本身併埋無咩特別，但食落先發現，麵包用了丹麥麵包，所以味道比白麵包較甜，卻配合一齊令人有喜出望外。 黑椒煙鴨胸炒意粉↓ 味道一般，相對三文治來說，比較平傭。 黑森林+藍莓Cheese↓ 朱古力中間夾著紅莓醬，減輕朱古力既甜漏感覺 雖然唔係咩有名的蛋糕店，但Cheese 味夠而不漏 檸檬生薑茶+Caffe Cappuccino 對於咖啡控既我，呢杯味道唔酸，奶泡又打得好幼滑既Cappuccino, 真係暖在心頭呀! 整體，除咗意粉味道一般之外，其他都感覺唔錯，我會畀8粒星星(10粒滿分) 地址 尖沙咀河內道18號K11購物藝術館B2樓B227號舖…查看更多

同友人一向都鐘情魚湯的食品，所以打算到連鎖店→漁米，食個普普通通既晚餐，去到西環屈地街既漁米的時候，八八掛掛既我望下隔離舖坐滿人食咩架啦，點知又係魚湯，價錢比漁米更吸引，既然係咁，不如試下新野啦!(但當我地坐底先發現原來同漁米係同一集團)Menu 好簡單，但又好多選擇，有預先設計好的款式，亦有自述配搭，最有趣的是飯和湯都可以Re-fill↓最後我同友人都揀咗自選款式，我揀既係綄魚腩+自制魚腐+娃娃菜 配 藜麥飯↓友人揀既係 綄魚骨+鮮牛滑+豬肚+勝瓜 配 藜麥飯↓單睇賣相，相當健康，但食落第一啖，我覺得味精味重，魚湯落咗大量薑蔥去辟味，可以簡單咁估計本身用黎煲湯既魚可能唔太新鮮吧!自制魚腐↓綄魚腩↓整體黎講，我個人認為西灣河有一間同樣食魚湯的小舖頭比呢間連鎖店黎得出色，若果將價就貨，我會畀6粒星星(10粒為滿分) 地址 西環屈地街28號地舖…查看更多

係附近打完波之後，同波友鐘意周圍試，今次黎到呢間「炊豕家」睇餐廳個名就知係一間以🐷為主題，餐廳既食物有9成都圍繞🐷，餐廳地方小，以最小既面積去容納最多的客人，所以若果你shopping 後，帶著戰利品既時候，就諗諗先去啦！不過餐廳裝修，睇得出花咗心思，有類似康樂棋既漫畫畫係牆上面，帶有一點復古既感覺！餐廳點菜似車仔面一樣，先揀咗餸菜款式，再揀配伴粗面、幼面定飯。一場黎到就試試秘製🐷（肉燥）配伴粗面，另加$5仲有一杯柚子蜜！餐廳有復古既味道，所以盛載既碗都用上公雞碗，配合復古既裝修。至於食物方面，🐷扒有返咁上下厚度，炸粉唔算太厚，而且食落唔會一口油，亦都唔會太乾。粗面伴以肉燥鹵水汁，面質食落比較（林）身，唔彈牙，我本身唔太鐘意食到一口都係醬汁，佢既鹵水就係得岩岩好，而且唔太咸。朋友還點選了兩款小食，分別香蒜炸魚旦、豆卜大豆芽盛載小食的器皿都離不開懷舊鐵碟同酒碗香蒜炸魚旦，係魚旦炸咗之後沾上炸蒜及七味粉，少少辣，惹味！魚旦亦夠彈牙！豆卜大豆芽，都似60-70年代大排檔伴酒既小食，所以就用酒碗盛載，雖然味道唔太特別，但睇得出它的別有用心！整體黎講，味道，價錢都係合理，有機會可以再黎！😁…查看更多

同朋友周圍試周圍食，今次就黎到呢間廣東上海菜式都有既餐廳，據店員所講，舖頭只係營運咗一星期喳，咁即係都算「頭啖湯」啦！先講環境，我覺得舒適寬敞，光猛整潔，餐廳混合咗傳統既2/4人枱同大夥兒10幾人枱，感覺有如去咗新興起既韓國餐廳一樣。各菜式都有住自己特別既名，所以單睇點心紙，唔太知道係咩黎，餐廳都好細心，有埋一本中英圖文並茂既菜譜，期間，店員都在旁介紹一下。頭盤。包菜鴨卷椰菜包住蘿蔔，鴨胸肉，再淋酸汁上面，涷食。感覺好清新，好開胃小食。玉桂香鴿其實即係乳鴿，略嫌油份太多，但因為新鮮製起，溫度加分！包點。紫薯喵星人、紫芋小豬、奶黃蜜語賣相，真係可以引起食慾。紫薯喵真係值得一讚，紫薯味夠出，又唔太甜。但紫芋豬就麻麻了，唔覺有芋頭味，感覺只係食緊有甜味既蓉。奶黃蜜語，故名思義即係流沙奶黃飽，不過佢同酒樓既流沙飽有d 唔同，因為酒樓既一係就全流沙，無奶黃，一係就全奶黃，無流沙，但佢就可以做到各一半，確實唔錯！包點。猛虎咬一口呢個其實係招牌菜之一，佢既饀料可以揀豬腩、雞同魚，而我地就揀咗魚。友人同我都覺得感覺似某快餐既魚柳飽一樣，味道一般！主菜。桂花蜜瓜豚肉桂花蜜完全蓋過了豚肉既味道，而且同蜜瓜既味道唔太夾，少少驚喜，就係加入咗南瓜，但都畀桂花蜜蓋過了味道！主菜。至尊飯爺有冬菇，松露既香，汁同飯既比例岩岩好，唔會太濕亦唔會太汗，鮑魚汁同菇既香味相應，飯用咗珍珠米，但唔會好似壽司一樣咁黏，有口感，感覺似食緊意大利飯一樣，中西合璧！甜品。玉桂陳皮梨其實只可以講食物如它的名字一樣，桂花、陳皮同雪梨，三樣食物唔多有溝通。陳皮，其實就如相中雪梨上的陳皮絲，我覺得似「話梅絲」放在上面。甜品。紫薯流星、藍螺桂花紫薯流星確實有驚喜，它是由紫薯味既皮包住奶黃流沙，是熱食的。加上芝麻係面，食落似食糯米糍的感覺，煙煙靭靭的，加上味道唔太甜！好食！經理向我地介紹藍螺桂花，其實係加入了蔬菜汁的桂花糕，所以先令到佢變成紫藍色配合桂花，有星空夢幻既感覺，但可惜味道都係一般，桂花味唔突出。整體黎講，食物賣相，餐廳環境，對視覺來說，確實唔錯。但若果要享受味覺同視覺，食物的味道就仍有進步既空間了。…查看更多