搵黎緊係食啦的个人专页

在咸豐年時被各大傳媒及昔日戰友攻陷後，自己才第一次到布袋澳食海鮮。五點還未算多人，好不容易選擇了近海邊兼當風位置，比起強勁冷氣及冰凍啤酒好十萬九千七倍。小菜有人負責，而我及部份人出去選擇海鮮，當點到一條要四舊水，大家異口同聲話唔駛，我差的想講「多舊魚」。九個男及女共點了九道菜，約十分鐘後就陸陸續續送上。以下是各菜式的簡評：椒鹽鮮魷：粉漿厚度不一兼不脆，鮮魷比較鹹，唔知係唔係出完一身汗的問題，還是汆水時都落鹽；沙薑雞腳：味道剛剛好，不太硬，不點沙薑粉都可以；白灼蝦：這些都是養蝦，七元一兩，太約點了斤四，蝦頭有苦味，我諗貴三蚊一兩的海蝦或者好少少；豉椒炒聖子：每人一條，炒完後都係好大條，與鮮魷一樣都係偏鹽，咸的是肉質本身，而不是汁醫；椒鹽瀨尿蝦：是幾道菜中最好的，少少辣，多多脆，脆的是指殼，肉質爽脆；蒜泥蒸帶子：蒜泥、粉絲及帶子各自各精彩 (三層味道係分開)，尤其粉絲最不夠味，蒸得幾乾身，不過都係不好食太鹹；椒絲腐生菜：不夠腐乳味，同埋有點兒乾身；豉油王炒麵：色水滿分，豉油味零分；揚州炒飯：有人想點海膽炒飯，但已經賣曬，唯有點另一款。一睇就知飯煮熟無耐，及比一般的細粒，配料都幾多下，食落沒有平時一粒粒的層次分明。 加埋糖水後大家傾了一陣計便埋單離開，每位都係161元，比想像之中平，如果超過 200元就只得 OK 臉。…查看更多

24Dec2007 1520這杯綠茶鮮奶咖啡，就咁聽起來，點整得好都好難有明顯的三種味道，飲到第2日唔駛見報已經偷笑。不過，不知是否特價品，三T (taste) 仲左頭兩關再加任何一樣似樣味道已經可以俾笑臉，hea下hea下，又要行番轉頭。…查看更多

24Dec2007 1449今日公司半日假，食飽之後緊係拿拿聲閃人，向東徒步，就黎左呢度，再一次大鄉里出城。 只叫了 Fire Wiener，這是熱狗加上紅腰豆及紅番椒醬，對食得辣的來講只係輕度，包皮沒有一般店鋪的厚到冇朋友，正如我之前所講，越厚越難鬆化，這裡做得剛剛好，分量剛剛好可以用單手完成任務，而家大M都玩「即整」，不過呢度早閣下十萬九千世。食完後，又要繼續下山打發時間。…查看更多

24Dec2007 1230今年此集團的生意真係好到不得了，聖誕節外賣要二千蚊以上先有送貨服務，十九幾年前都係舊幾水就搞掂。食物由圖片由左上角向右至左下角分佈如下：焗西班牙海鮮飯 – 像走了豬扒的焗茄汁飯；鴛鴦雞中翼 (椒鹽及鹵水) – 味道剛剛好，不錯；星洲沙爹雞肉串 – 汁不夠濃，雞肉稍鞋；原隻大蝦鮮果沙律 – 不過不失；泰式香葉小雞腿/鮮蝦石榴球 – 連基本應有的味道都沒有；日式煙鴨胸鮮果生菜沙律 (配芝麻汁) – 一定要配汁食，不過芝麻汁的芝麻味少了幾分，如果黑醋加少少鹽，咁就 very good；泰越式小食拼盤 (蔗蝦、紙包小雞腿、越式粉絲春卷、粟米芝士春卷) – 頗硬，無計，呢的要即食先至好一點。千幾蚊的價錢加上趁好景搶錢的情況來看，都俾合格，點知俾個芒果西果布甸累街妨，真係酸到冇朋友，就咁變喊面啦。…查看更多

24Dec2007 0827如巴士不回程載客，一落就對正這間餐廳，是日年尾發功，進佔一席。除丁麵及極特別食物外，湯類不嬲唔叫，在眾多的類項中，蘑菇火腿奄列是不二之選，蛋表面似乎煎得比較乾身，食落有少少過熟及叫做有水份，側邊的兩塊青瓜及蕃茄片亦有少少生水。加埋熱咖啡及多士後，諗下點樣可以將時間超頻，即係過得快點。…查看更多

4Dec2007 1935蛇宴翌日，主持人回主場主持火鍋局，男下女上分開坐，女的叫了蕃茄豬肚湯底，而男方選取鹹菜蟹湯底。當晚我覺得比較特別的有八爪魚刺身食，第2日唔駛見報入院就證明衛生程度小弟的腸胃可以頂得住，跟住黎的肥牛、羊肉、大蝦、鯇魚片、炸豆腐角、墨魚滑、豬肉丸、黑栢葉、豬膶等等，食落不太突出，但欣賞沒有用菜絲打底，實實在在，自己叫飽時，還有人用烏冬及公仔麵埋齋。冇年初時的後巷激情，但有年尾的心安理得，有個完美的句號，明年今日去大記一人一爐算罷。…查看更多

3Dec2007 1935多年前幫襯工聯會的蛇宴，到今時今日先至有緣在蛇舖食蛇宴，主理人安排我地在擺放部份雜物地方享受，以免滋擾其他食客。首先上場的是蛇羹，完全足料到乜野係叫展示實力，份量足以每人兩碗仲有剩，唔駛冬菇扮蛇肉，伴料如薄脆唔係好夠，我地無意中發現佢地成批十幾大袋放係附近，要幾多有幾多；炒龍衣其實就係蛇皮，要好食本身就要爽滑，這裡能做到了；蛇起完了肉及皮後，剩下骨段，這裡會用來炸，然後再落椒鹽炒，這就是五蛇碌，這裡炸得不夠徹底，否則連骨都可以食埋；在這裡食酸辣松鼠魚唔會有任何其物，但總算炸入入型入格，汁多一點及炸得再鬆化會更好。除魚外，與蛇宴最無關的食物便是黃油雞，但係最快搞掂的一味，嫩滑加雞味甚濃，人人皆愛；另一道令人有高潮的菜式就係差不多到尾聲的佛跳牆，別名叫蛇龜竹絲雞燉蛤蚧，又一實力之作，不只暖身，女食左聲都大的，男既就強身健體，主持人還將殘骸黎左幾幅大特寫。當晚唔夠其他人快冇食蛇腩、還有其他食物如郊外灼菜心，糯米飯及蛇酒，都差不多掃清，大家都盡興，最後還要多謝「beeleebala」及其伉儷請搭的士回巿區。…查看更多

1Dec2007 2355老老實實，比起想像之中係飽，之不過想消一消酒氣，都係要落下一場，順便行遠少少吹吹風。選了平時屋企好少整的煎肉餅，肉餅先蒸後煎，裡面還有鹹魚粒及肥豬肉等配料，香得來還幾濕，如有啤酒就更加一流呢！食完後拿拿聲趕尾班車。…查看更多

1Dec2007 1815臨去公司聖誔扒地前，到這裡食隻熱狗。熱狗最難整得好的部份，唔係醬汁，唔係條腸，而係個飽，唔似得沙爹串燒個汁整得好基本達標，這裡個包又係大到冇朋友，唔得鬆軟，個沙律醬又唔係好突出，加上7蚊之下還有對手宜記，名氣加簡單都係5蚊，一味靠班老食客，怎能延續到下一代呢？…查看更多

24Nov2007 2223賽事完畢，食個遲來的晚餐，近近地選擇左呢度，就點了這裡的招牌菜叉燒炒蛋加白飯一碗。蛋味比一般的濃，唔會炒到全熟，可以保持住應有的味道，叉燒如可以係全肥的話真係人間極品。咁又過左一日。…查看更多

24Nov2007 1649這間係元朗廣場不近大排檔/巴士總站的一間小小食店，冇心去食，跟本冇可能留意，活生生一家三口沒有俾雜誌及食家一點銀兩去宣傳或發掘，而可以生存1年多，係有水準兼住家味道，從保持質素的角度，真係希望可以堅持得到。今日就首先試了正宗海南粉撈粉，據說源始於福建閩南，跟據他們的菜單上共有9種主要配菜：大豆芽菜、咸酸菜、春荀絲、豬肉絲乾、蒽花、芫茜碎、脆花生、芝麻、生蒜容，再加秘制醬汁，可以當佢係一道菜伴或消暑的小食，佢碗胡椒豬骨湯先係正野，聞落不算好香，飲落有極濃的胡椒味，佢地仲有一樣秘密武器係就黃辣椒醬，比起一般茶記的紅辣椒辣好多，當然唔會去到麻地的步，加埋落去的湯到可以發揮到淋漓盡致，而凍奶茶亦有水準。今餐食得好滿足，臨走時都同老闆娘傾下計，因為當時網上沒有資料，我話可不可以映一映商業登記上的地址及舖頭相，佢話可以，仲話怕乜，都冇做虧心事，師奶得黎唔會懷疑任何人，呢的為識做囉。下次試埋凍咖啡、海南雞飯及豬什先。…查看更多

24Nov2007 1423像我這個極度外人得知這間食店的途徑，都係留意多一點像我不起眼的東西，跟大圍只會有大圍的見識。這裡出名的就是醉雞及炸豬扒，就點了這雙併，醉雞用一小碟不銹鋼載著，除肉之外，骨裡面還是紅色的，新鮮雞即使被有少少苦澀味的花雕酒，仍然食到其鮮味，相信酒只係不太靚及份量落得稍為重，而豬扒亦係新鮮的，炸得相當鬆化及入味，我很不聽話點了麵，都幾重梘水味，這裡如果選擇撈類最好係米粉。30幾蚊有如此水準，點會只得喊面或ok呢？…查看更多

24Nov2007 1337這間又係另一間我一直想試的，趁又入黎元朗搗亂時試味，大致上都唔難搵。入到來，緊係點了最豪邁的燒鵝脾瀨，唔記得叫佢免切，個侍應都再問要成50幾蚊，我話冇錯。雖則唔係新鮮出爐兼只係暖，肉嫩有少少脂肪，而皮還脆既，燒鵝還有本身的鮮味，出面可能同樣價錢，但食唔到皮脆有肉味，你地緊話又唔係乜驚天絕地鬼哭神泣黎仲乜鬼，我覺得望野要望遠的，食野要夠獨立，咁諗法富貴就唔會有我份，但絕境到戰爭或溫疫的地步，都唔會餓死，就算點好不能忘記好多人還/曾經活在水深火熱的環境，基本生活都成問題。…查看更多

24Nov2007 1200這裡都係一直想來，趁朝早做完運動後便過來休息一下，基本上只係得張 bar 檯及遠少少有一張2人摺檯，我就坐係摺檯。裡面環境都比較狹窄，但都有不同類型擺設，典型兩公婆擺個心落去製作。我要了熱狗套餐，田園沙律裡有生菜，青瓜片及蕃茄片，而汁醬只係用了白醋及黑椒粒，份量剛剛好佔染食材，味道頗為清新；而熱狗我選了意式熱狗，腸就算了法蘭克福，腸只係白灼而不是煎、炸或焗，加上蕃茄醬及千島醬，味道都蕳單得來不錯，之不過個包大得來唔鬆軟，實在係好難整得鬆，如細番一點即使質素不太靚都容易控制，最後以一杯 mochaccnio 完成。期間有一位婆婆坐係我對面，同佢又傾左一陣計，她原來係獨居的，間唔中都會黎呢度及食 pizza，人一世，物一世，在許可情況之下乜都試，這麼樂天的性格，年青的一代在行為上能學到嗎？…查看更多

11Nov2007 1815病緊都要飲咖啡頂住，冇計。頭盤及小食為鵝肝及炸魚塊拼盤，鵝肝不是上乘的，煎得已經不錯，配合蘋果醬可以減少一點肥膩；炸魚除了主角外，還有春卷及薯塊，一般冇乜特別。主菜共點了3道，分別為香草焗乳鴿配香草意大利飯、parma ham燴意粉及芝士煙肉洋蔥焗豬扒釀鮮磨菇伴蘋果沙律。乳鴿焗得幾香及入味，意大利飯我覺得可以再硬一點；意粉原汁原味夠煙韌，不需整色整水，夠曬 keep it simple and stupid；這道豬扒菜式是這店的招牌菜，豬扒嫩滑及濃味，配合沙律一齊又係另一種味道，挺特別的有兩種食法。最後甜品就係3磅生日蛋糕，7人盡最後努力都食剩少少，不論如何，祝壽星女生日快樂。…查看更多