AshleyCheung105的個人專頁

餐廳打主日式食品，所以店舖門外裝修好有日本風格👍🏻星期日人流較多，等咗大概半個鐘就可以入去🤓排隊期間店員會派餐牌，點咗餐再入內。而招牌竹簾烏冬係假日停賣😕🥢鰹魚湯咖喱烏冬 $54烏冬的確好煙韌，唔會太軟或太硬，煮嘅時間啱啱好😍 咖喱汁好濃稠，係日式偏甜口味，雖然感覺上唔似湯亦唔太食到鰹魚味，但仍然係好食🤓🥢天婦羅5件 $59天婦羅亦係呢間餐廳嘅招牌菜，有兩條魚、冬菇、茄子同蝦。魚炸得香脆，唔苦。冬菇同茄子夠多汁，蝦肉彈牙但略嫌炸粉太多。🥢鰹魚白味增鍋仔燒烏冬 $80呢個鍋燒烏冬就有啲失望，湯底淡到完全冇味道 連少少鰹魚味都無😕 雖然牛肉靚而烏冬質地好，但賣緊呢個價錢而湯底無味的確太失望。…查看更多

經過西灣河太安樓發現對面開咗間店面全黑嘅店舖，抬頭望望原來係李家🤓當日下層坐滿，店員帶我去上層，店舖位置都好大，但牆身座椅都係橙色同淺木色，而燈光都偏黃偏橙，坐係到個感覺有啲唔太舒服咁，壓迫感有啲重。當日大概3點到，已經係下午茶時間，但同樣都有午市套餐選擇。大概四十幾至六十幾蚊一個餐，價錢唔貴選擇都好多。🥢烤去骨豬肉餐 $48睇圖見到套餐包好多配菜，以為係細細份，點知嚟到俾佢個份量嚇親😂 四格配菜一份沙律一碗湯再加一份主食同飯，$48有咁多野食真係好抵👍🏻配菜有四格但食物種類有七樣咁多，味道正常發揮，最好食係個薯仔，而魚糕就覺得有啲怪味。主食烤豬肉味道偏甜，幾好食而份量都多。整體唔錯，以後午餐又多個選擇🤓…查看更多

店舖位於中環結志街，附近都有幾間餐廳，但以小食同飲品作為主打嘅店舖就比較少，漫步中環行過可以食下小食都唔錯。店舖門口放咗幾個易拉架，唔洗行入去都可以見到佢地嘅招牌食物。店舖裝修走簡潔風格，唔會有太多裝飾，但亦以黑白為主調再配上線條同格仔交錯，整體上望落唔會過於單調。座位前仲設有差電器，電話無電果時同朋友入去食下嘢飲杯嘢，一齊傾下計都唔錯🤓店舖空間唔大，一入去就望哂成個環境。由於係open kitchen所以都聞到少少油煙味，但叫店員開大少少冷氣就完全聞唔到啦😎原來呢間小店嘅店主係長駐係到幫手，聽佢講平日較靜，而當日係星期六下午人流都算旺。但佢地有落場食飯時間，如果唔想去到摸門釘嘅朋友可以睇返佢地啲社交平台😆店名叫得Munchies當然係賣小食，但同時見到有Combo set想食得飽就可以叫。店主話佢地最熱賣係Burger，以一間咁細嘅店舖嚟講有咁多口味同種類可以揀，都真係無得彈🥳 餐牌啲英文名都幾有趣，原來店主同店員由外國返嚟，但係識聽識講廣東話㗎，如果睇唔明或者想知更多可以問返佢地😂嚟到重頭戲當然係佢地主打嘅無負擔飲品，叫得呢個名因為每杯飲品嘅卡路里都好低，飲完成杯都唔會覺得好邪惡🤣飲品底有烏龍茶、抹茶、梳打水同檸檬汁可以選擇，所有飲品都使用冷壓技術再配上新鮮水果同有機蔬菜，聽落都夠哂健康🤩🥤Gooseberry Marigold Oolong $42 未試過係香港茶飲店見到有金盞花同龍珠果揀，見幾特別又係推介飲品就試下。未飲已經聞到好香，第一次試龍珠果原來係帶些少酸甜，仲要香味係咁突出，同時加入金盞花中和酸味，令杯飲品更加清新，呢個配搭幾新奇但又唔伏，完全無失望🤩500ml只要$34但加8蚊就可以加大到700ml，最後都係覺得700ml太大飲唔哂，下次可以叫返細杯就得🤓       🥤Fizzy Blackberry Charcoal $42同樣係推介飲品而店主話呢杯係最低卡路里嘅一款，只係得35卡路里，完全無諗過手搖飲品可以咁健康，所以打算一試。同樣係好令人新奇，未試過係茶飲店飲過類似嘅飲品，帶微甜同有淡淡嘅黑莓香味，因為飲品底係梳打水，所以都幾清新解渴😋但係少少略嫌莓味唔夠重，同埋我重口味啲鐘意飲甜啲，但店主話佢地係採用活性碳果糖，份量都係特定嘅以維持飲品係35卡路里。但如果好似我咁鐘意飲甜啲可以試下問佢地加多啲果糖🤣🥢Kimchi Fries $35 推介🔥肚餓就叫多咗個小食，完全估唔到呢個係咁驚喜，超級好食😍泡菜食落好爽脆，有炸過嘅感覺，但面層又見唔到有炸粉，所以忍唔住又問佢地！店主話係試過幾十種唔同嘅粉去炸，最後試到有一隻麵粉個效果出到嚟係咁好，真係好有心機😆爽脆泡菜撒上蔥花，薯格上又淋上類似芝士同蛋黃醬嘅醬汁，好邪惡但係極好食！飲杯健康飲品再食返個邪惡小食感覺上唔會咁有罪惡感😎贈送冰凍西瓜傾傾下當日店主仲好nice咁送咗兜西瓜我地食，話佢地研究緊新飲品，同時佢地周不時都會推出新產品，絕對係可以再次光臨！下次要留定肚去試佢地嘅招牌burger😋…查看更多

餐廳佈置同環境都幾舒服，檯上有乾花而牆上有霓虹燈，氣氛唔錯👍🏻除咗坐係霓虹燈下環境較幽暗外，其他位置都好光猛，唔怕會食到好眼訓🤪同時留意到餐廳梳化上有放到boardgame出嚟比人玩，當日仲見到有家人一路食甜品一路玩boradgame，如果食完飯無野做，同朋友或家人嚟到食甜品玩boradgame消遣下都唔錯😎 阿華田脆脆牛奶雪花冰 雪花冰佈滿阿華田粉同脆片，連雪花冰都係濃濃嘅阿華田味🤩鐘意阿華田嘅朋友必試！雪花冰奶白味亦重，同時都好綿密，入口即溶嘅感覺，再加入煉奶令整體甜度上升😉但以呢個價錢嚟講份量就略嫌細咗少少，不過一個人就絕對夠🤓…查看更多

難得入大埔 一search大埔美食就彈出呢間粉果佬 未去到店舖門口已經見到一大條人龍隊伍🤯 最後足足等咗45分鐘先有得食店舖門口有寫每人限買30蚊燒賣同20蚊粉果 但可惜我地當日傍晚六點左右粉果已經賣哂😭雖然人氣極高要大排長龍 但仍然保持平民價錢 無因為人氣而加價等緊拎燒賣果時見到有位叔叔不停搓緊燒賣 每粒都人手包 唔知呢位係咪就係粉果佬🤣終於有得食 排咗咁耐一個人都買廿蚊嚟食😎 燒賣極度煙韌 好有咬口 的確似係用咗鯊魚肉 但亦食到有啲豬肉 兩樣加埋都頗有驚喜🤩 真係未食過呢種口感嘅燒賣 同時亦聞到好香嘅味道 問返店員話佢地啲燒賣加咗冬菜 唔怪得知咁香🤤 但醬汁略嫌有啲普通🤓 如果下次再入大埔一定會再試😍…查看更多

開店唔係好耐但晚飯時間門口總有人排緊隊，等咗大概10分鐘就入得🤓店舖主打蕃茄湯底，配料有十幾款選擇，連冷麵都有👍🏻店舖位置唔大，只有約七張檯，但裝修都幾別緻，坐得夠舒服😼餐廳採用電子落單，點餐過程都好簡單，仲有圖可以睇😎🥢自家鮮茄濃湯/牛魔王/韭菜雲吞/刀削麵 $101蕃茄湯好濃味，一啲都唔酸仲甜甜地，仲有啲蕃茄蓉，食得出係真材實料🤓 牛腩同牛肩份量唔少，牛腩夠腍，牛肩肉雖然薄但煎得好香，好好食🤤 刀削麵亦好掛汁。韭菜雲吞不過不失，因為湯底已經好濃郁，所以加埋一齊食唔係太食到韭菜味。🥢自家鮮茄濃湯/炭烤風味雞排/淮山/葛絲 $77雞排外皮燒得好香脆，但肉質仍然好嫩滑juicy👍🏻如果唔想食太飽可以試下葛絲，食極都唔覺膩，仲好清爽同吸湯😻 一開始食幾啖有啲後悔，覺得葛絲唔太夾個湯但食食下又覺得幾好食🤣 淮山好爽脆，但唔吸湯所以就只係食到佢原本嘅味道。一碗麵嚟講價錢唔算平，但勝在用料講究，如果未試過絕對值得一試🤓…查看更多

終於得閒去試呢間已經新開數月嘅漢堡小店，開係呢個黃埔住宅區附近都應該係做街坊生意。買果陣以為門口無咩人，後來發現附近全部企滿等緊拎野食嘅客人🤯小店主要都係賣漢堡，但都有供應小量小食同汽水。小店不設堂食，只提供外賣，廚房整完就會交出嚟入外賣袋逐個number叫。好多人買所以都等咗都大概15分鐘🤓今次嚟就係為咗呢個期間限定漢堡，每日12點開賣，只係賣30個㗎咋，賣完就無。我地當日去到差唔多晏晝1點左右已經賣晒原隻龍蝦肉，所以餐廳改用龍蝦鉗肉嚟整，會比原本平10蚊，如果想食原隻龍蝦肉記得要早啲嚟🤓 聽講只係賣到10月31號就會轉第二款漢堡，想試就要快啲去啦😆🍔波士頓龍蝦安格斯漢堡 $88麵包好鬆軟，安格斯牛肉煮嘅時間啱啱好，無令到啲肉太老，仲係好嫩滑多汁😍龍蝦鉗食落一定唔夠整隻龍蝦肉咁鮮味，但都依然係好彈牙夠出色。龍蝦配安格斯呢個組合已經無敵，再搭配埋黑松露蛋黃醬、芝士同菜令個包嘅層次再昇華多幾級🤩 $88蚊食到呢個質素嘅burger真係超值🥳…查看更多

由台灣師大夜市開到嚟香港，呢間係佢地首家海外分店，就咁聽個來頭都已經好期待，特別係已經成年無得飛去台灣旅行。燈籠滷味嚟到香港選址登龍街，令人更加印象深刻，但估唔到已經開業超過半年，但門口仍然係長期都有人排隊😦一入門口就係見到有廚師處理緊滷味食材，見到一份份切好嘅滷味，感覺真係有少少似係台灣咁。餐廳採用台灣直送的滷味材料，保持台灣原有風味。餐廳有兩層，位置都夠大，下層盡頭見到大大個燈籠滷味霓虹燈招牌，仲擺放台灣特有飲品，增添台灣味😆餐單有30幾款滷味配料可以揀，仲有台灣地道飲品同小食，選擇夠多👍🏻🥢蘋果鹽酥雞 $38本來以為咁特別係蘋果味鹽酥雞，點知原來係蘋果片配鹽酥雞，但呢個配搭都幾有趣，重口味鹽酥雞配蘋果片令成個感覺唔會過膩。蘋果好甜，鹽酥雞都炸得香脆🤓🥢百頁豆腐白蘿蔔雞翼冬粉 $38整體滷味配料都滷得唔夠入味，雞翼更加係無咩味。反而係冬粉吸哂滷湯精華，係好濃郁嘅中藥味。🥢雞腎杏鮑菇豬耳冬粉 $39豬耳同雞腎味道好淡，杏鮑菇就切得比較薄好吸汁，同冬粉一樣好食。可能對佢本身期望好高，所以整體都有啲失望🙁雖然價錢唔貴，但如果要排隊，就未必會再食🤣…查看更多

今日嚟開附近，聽朋友講最近呢度開咗間新嘅日式料理就嚟試一試。店舖外裝修走日式原木風格，連門口都跟足日本餐廳，少少透咁好似日本大廳啲屏風，即使就咁係條街行過都會俾佢吸引到望一望👀門口已經擺放少量餐牌，唔駛$50就有野飲同野食，而款式選擇亦唔少，雞牛豬魚都齊，十分吸引😍入到餐廳見到牆上掛滿類似日式浮世繪壁畫，同時店內裝修風格貫徹始終，採用大量木質材料，透露出傳統日式氣息，使用黃燈感覺更溫暖。💛🥢帶子$28兩件 油甘魚$28兩件 三文魚$22兩件 蟹肉蟹膏$24兩件 先叫個壽司開始呢一餐，帶子夠鮮甜，油甘魚同三文魚都切得夠肥厚，蟹膏亦夠甜唔腥，值得一讚係軍艦壽司嘅紫菜唔淋夠脆，呢個價錢絕對抵食😋🥢火灸三文魚腩$30兩件 火灸左口魚邊$32兩件 推介🔥火灸後迫出三文魚同左口魚嘅魚油，令口腔充滿魚油嘅甘香，火灸左口魚特別好食，夠肥美爽口🤓壽司質素頗高，食得出材料新鮮😋🥢軟殻蟹反卷$48四件軟殻蟹炸得香脆，亦都食到蟹肉，唔係一層好厚炸粉，再配上青瓜同蟹籽，饀料十足，大大件好滿足。計返一件只係要$12咋🤩🥢日式牛肉鍋 $62除咗壽司當然要試埋熟食😌牛肉份量十足，食極都仲有，但略嫌牛肉唔夠嫩滑。勝在湯夠甜，配料亦充足，有金菇、冬菇同豆腐👍🏻🥢椒鹽雞軟骨 $42雞軟骨份量好多，好似成碗飯咁上，差啲食唔哂😆炸得幾香口，抵食🤓🥢蒜片一口和牛$52 和風燒茄子$48一口牛肉質好腍，但牛味唔夠重，而蒜片較淋有苦味，唔夠香脆。茄子就有啲失望，睇名以為係用和風醬燒配上鰹魚碎灑面，但實情調味只係得蒜再灑少許蔥係面，口感更加係似蒸茄子多過燒茄子，外皮同肉都好淋，完全無燒過嘅感覺。🙁當日好彩有打去餐廳book位，實在估唔到新店開張唔耐都幾full下，到達時都仲等多咗10分鐘。食物性價比高，餐廳環境都好舒服，而店員亦十分友善，更會自動嚟加茶。下次會再幫襯🤓…查看更多

店舖門面唔算太起眼，細細間店差啲就行過龍😂小店經營模式就係有時入到去都見唔到店員，但佢地一聽到有人就會即刻出嚟🤓店舖面積雖細，但都有得坐，又可以差電，而且仲有花啲心思去擺設。選擇唔算少，價錢都合理。 🥢芝士烤雞 $46 + 跟餐越式特調咖啡 $15法包烤得夠脆，而烤雞味濃配搭醃蘿蔔同青瓜食落夠清新，唔會食到好膩🤓 不過就唔太食到有芝士味。咖啡嘅冰都係由咖啡而製成，即使啲冰溶咗都唔會影響咖啡嘅味道，抵讚👍🏻🥢經典扎肉 $49由於扎肉本身無咩味，所以成個包都係食配料啲味道。豬肝醬味道略嫌太重，即使有青瓜、芫荽同蘿蔔配搭，仍然係蓋唔住肝醬濃郁嘅味道。食唔慣內臟嘅人應該可能會被個肝醬嚇怕。整體價錢合理，唔使$50就可以食得飽，值得一試🤓…查看更多

呢間係一間主打好味到連湯底都會飲哂嘅火鍋店，今次就嚟試一試🤓店面裝修以木色同白色為主，有種和諧嘅居家感覺，可以好放鬆咁食餐飯。餐廳位置亦夠闊落，唔會坐得太迫。見到靠牆櫃上寫有唔少客人名嘅酒，估計呢間都係熟客常店🤓🥢滋潤椰子雞煲一隻       $228餐廳主打四款特式湯底，今次揀咗椰子雞。湯底非常足料，紅棗、竹笙、雲耳、大蔥、秀珍菇等，雖然湯好鮮甜，但無椰子肉同油太多較遜色。上枱時雞係生嘅，所以要等大約15分鐘，而雞件係十分嫩滑🤩🥢手切安格斯雪花牛肉 - 大    $228牛肉雪花分佈平均，肉質嫩口感唔錯但牛味較淡😕🥢雙拼蚌 - 珊瑚蚌 桂花蚌    $118清潔乾淨，夠爽口彈牙😎🥢篙筍 $32份量尚可，但蔬菜都竟然有擺盤👍🏻🥢墨魚滑   $68本身見有兩條以為嚟錯兩份，但原來呢個就一份，份量都幾多。 都幾彈牙但帶點腥味😕 🥢安格斯牛丸   $42   推介🔥🔥好有牛味又夠juicy，牛味仲重過果碟牛👍🏻 意料唔到呢個牛丸咁出色🙀🍹綜合水果茶 $36綜合水果茶大大杯都只係$36，仲要真係好足料：有齊藍莓、火龍果、西柚，飲落清甜有水果香！抵飲過好多連鎖店嘅水果茶😝🍹巨蜂乳酸梳打特飲 $24甜度適中，唔會過甜，但啲冰溶得好快，再飲就無咩味😕店員服務態度好好，感覺真係似街坊小店咁 座位坐得舒服唔迫，值得回頭再試😎…查看更多

由泰國開到嚟香港嘅過江龍一定要試下，整體都無失望🤓裝修以橙色為主調，望落去都好醒神，牆上掛有漁夫帽，感覺更似係船上食咁😂餐廳位置都幾多，呢日晚市都唔洗等位就入得！湯麵或撈麵都有四款選擇，麵底亦都可以揀，同時都有唔少串燒同小食提供。如果叫船皇湯麵仲可以加$1或$5升級同加量和牛，適合鐘意食牛嘅朋友👍🏻檯上放有齊全嘅醬料🤓🥢豬肉丸+豬肉+豬潤 金邊粉     $48湯底好香藥材味，味道好濃，應該加咗豬血同牛骨。金邊粉揀得啱，夠索湯😍豬膶新鮮彈牙，份量都幾多食極都仲有。豬肉丸就無咩味，而豬肉片就得兩片，味道普通，但炸豬皮就脆卜卜唔會淋。🥢牛肉丸+牛腩+牛肉片 金邊粉 (小辣)   $52個湯加左小辣，令本身湯嘅味道更豐富，有更開胃嘅感覺！牛丸相比起豬肉丸好食，起碼食得出有牛味，而牛腩都好稔，易咬唔痴牙。牛肉片都係得兩三片，但炸豬皮竟然有幾舊。整體份量算適中，男仔食可能得七分飽。🧉泰仔凍奶茶    $18奶茶用冰碗上，甜度適中，茶味香，味道同泰國著名連鎖奶茶店一樣味。雖然無加冰，唔會出現冰融味道變淡嘅情況，但係夏天略厭飲落唔夠凍。…查看更多

西營盤福壽里可謂旺中帶靜嘅住宅區，雖然以民居為主，但仍有唔少餐廳座落係呢區，人流不絕。而呢間新開數月，融合法國同印度飲食嘅Pondi都唔例外，好彩前一晚已用WhatsApp訂座，企左係門口一陣，就有幾群客人一齊等入座。 餐廳裝修講究氣氛，採用黃燈和以營造浪漫同舒適氣息，設有戶外同室內座位供客人選擇，而樓上座位亦可容納更多客人。戶外木椅餐桌配上被植物圍繞嘅籬笆帶有歐式鄉村風格，令人感覺休閒放鬆。天氣較熱，都係選擇室內位置涼冷氣🤓望返出餐廳，更清楚見到整個露天陽台，讓客人係可以坐係陽台到等入座。坐係廚房同酒吧檯隔離，經常都聞到食物嘅香氣，企高可以望住廚師準備食物，如果坐係酒吧檯絕對係一種享受😎食物數量同一貫小餐館一樣，貴精不貴多，但各種肉類都有供應而且價錢唔貴。酒類選擇多，可以向店員查詢，佢地都好樂意慢慢推介岩你嘅酒👍🏻🥢Baby Calamari  $150  🔥推介🔥Calamari塞滿意式煙肉同豬肉碎，意式煙肉切粒，質感柔軟味帶鹹香，而芹菜嘅清新又可中和煙肉嘅鹹味，同時加入西班牙酒Fino Sherry嘅湯汁帶甜有酒香，蜆肉吸滿湯汁夠鮮味！烤餅($35)帶有少少椰子甜味用嚟配鹹鮮嘅湯汁一流！整道菜嘅配搭好用心，食落口感好豐富，一道菜就食到唔同嘅味道，絕對係唔可以錯過🤤🥢ÉTOUFFÉE $198 其實睇Menu唔明係一道咩菜，所以就問店員，佢簡單介紹有三款海鮮同味道，我地就叫咗嚟試。有炸軟殻蟹，大蝦同魚，感覺上就係雜錦海鮮，再配有一小杯龍蝦湯加羅勒希臘乳酪醬脆片。雖然用料好新鮮，但仍有加入茴香避除海鮮腥味。龍蝦湯用料十足好濃味，店員話可以就咁飲，或者用嚟蘸蝦食。大蝦先烤過，蝦肉一半拆出用龍蝦汁再煮，蝦嘅香氣濃郁，肉質彈牙！鱈魚扒魚皮有先煎香，肉質保持鮮嫩Juicy。但敗筆係軟殻蟹懷疑係調味粉過多，所以食落好苦，亦唔香脆😕🥢Air-dried lamb loin $225 🔥推介🔥羊排上碟前已經分開骨同肉，羊皮煎得好香脆，直頭聞到有炭香味，但肉仍然係好嫩。羊排加入黑孜然味道會較重，所以配有清新嘅薄荷醬又用上帶酸甜石榴粒，令羊排味道唔會過於單一😋 既香濃又清新酸甜，又係一道沖擊味蕾體驗嘅菜，必食🤩🥢SMOKED PORK BELLY "OPEN" DUMPLINGS  $150雖然寫要兩日前預約，但都係臨時叫就有。Open Dumplings其實係外層一塊皮包著豬腩肉，係皮上開一個窿，就係OPEN咁解。餃子底下係酸南瓜蓉，而面頭係薑味乳酪醬同韭蔥絲。雖然韭蔥鮮甜而酸味開胃，但肉質實在太厚實，食到好飽。呢個菜算係咁多個之中較平實嘅，但實在係之前果啲太出色所以令佢有啲遜色🤣由於係生日飯，所以叫餐廳準備咗個甜品，上檯前已經插上蠟燭。底部由多種水果粒同餅碎堆成，水果好鮮甜，中間係加入大量冧酒嘅cream，酒味極重，另外都插左啲焦糖脆片。絕對係好難忘嘅一餐，係到食嘅野係出面從未食過，佢地好識運用各種香料同配料去組合一道菜，而店員都好熱情，各方面都唔會令你失望嘅一間餐廳。推介👍🏻…查看更多

星期日打算係中環行下，行到歌賦街街尾見到呢間裝修簡約嘅Bean to Bar朱古力小店就俾佢吸引咗上前一望，因為Bean to Bar係外國較流行，估唔到香港都會有🤩呢間Bean to Bar嘅朱古力店，裝修都以黑白為主，走簡約風，再配以淺木色凳感覺上帶點日式風格。店面唔大，一眼已經可以望哂，當日有兩位女士打理店面，應該就係店主。其中一位好健談，亦都介紹得好詳細，有分享到佢地可可豆嘅來源、分別、製作過程同製成品，將整個Bean to Bar嘅過程都鉅細無遺咁同我地講解。估唔到由揀可可豆、烘培、碾碎、調味、調溫到最後包裝都係由呢間咁細嘅舖頭一手包辦👍🏻收銀處放置幾款自家製朱古力，價錢由$50-80不等，有原味74%純黑朱古力、抹茶杏仁同金芝麻夏威夷果仁。叫得Bean to Bar 當然由Bean去到Bar都會見到，但當日只見到一款朱古力Bar，係桂花枸杞味，材料都幾多，而且口味都好特別。店主話平時仲有個特吃啲嘅四川辣味同普通嘅喜馬拉雅鹽口味，但係都啱啱賣哂，唯有下次再嚟碰運氣。Menu貫徹店舖簡約風，以黑底白字寫上。除左有得食朱古力，仲有得飲😋由於天氣都比較熱，所以就想叫杯凍飲嚟試，而飲品可以選擇牛奶、全脂奶、荳奶或杏仁奶沖配，我唔飲牛奶，今次就揀咗荳奶。聽店主講佢地因應不同時節由世界各地挑選唔同嘅可可豆，而今次就係左邊果隻由厄瓜多爾空運過嚟嘅74%濃度 Costa Esmeraldas，店主話呢隻豆係世界Top 50嘅豆嚟，有突出嘅花香同果味，同時酸味都較重。透過玻璃可以見到整個沖調過程，都幾有趣，可以望住店主打奶調溫🤓🥤Iced Drinking Chocolate with Soy Milk $ 45 入口先感受到朱古力嘅香醇順滑，及後有濃厚嘅果酸味，最後先品賞到淡淡花香，口感層次好豐富。果酸味好突出，春夏飲好有清新感覺，唔會愈飲愈口乾，但花香味覺得淡咗少少。飲飲下仲會食到啲朱古力碎，可以更加品嘗朱古力原有嘅味道。尺寸份量適中，唔會太細杯飲兩啖就無，或者太大杯飲到飽。如果係朱古力迷一定要嚟試一試，店主有好多朱古力嘅知識分享，聽完都好似上左堂朱古力課咁。好欣賞係香港咁急速嘅城市，仍然會見到咁用心製作嘅小店🥰閒時可以嚟坐低慢慢飲杯朱古力消磨時間都好舒服👍🏻…查看更多

呢間位於灣仔內街嘅車仔麵一啲都唔起眼，要由莊士敦道轉入去先見到，附近仲有地盤工程進行緊，晏晝三點去到都竟然都有人排隊等緊位，睇落都似係做開熟客生意🤓應該係自家經營嘅小店，所以裝修都較為樸素，只係齊集基本嘅設備。舖頭只有五至六張檯，老闆事前都有同我地講由於疫症關係，唔可以坐滿客都唔可以搭檯，所以等候時間比較耐。雖然舖頭地方唔大，但都好企理，啲野唔會放到好亂，夠整潔👍🏻一間小店嚟講食物同飲品種類都算多，仲要有埋特色小食，都應有盡有👍🏻🥢全日車仔麵套餐 - 蘿蔔+雞翼+油麵 $36蘿蔔切得比較細舊，易入口而且清甜無渣，值得一讚😋豉油皇雞翼唔會太細隻，同時都醃得好入味！油麵無鹼水味，軟硬度適中。至於湯底我揀左腩汁，味道偏甜，有少少似瑞士汁嘅味道，我就幾鐘意😋份量方面對女仔嚟講就完美，但男仔可能會唔夠飽。套餐包飲品，叫左杯熱阿華田，最後無落到糖都覺得夠味，唔似平時係茶餐廳飲果啲只係加咗好少粉又無味嘅阿華田😂🥢乾撈沙嗲汁銀針粉 $52 🔥必食🔥好少見車仔麵檔會有銀針粉食，所以就即試，果然無失望🤩雖然叫乾撈，但都好多汁，絕對唔怕無味！我地叫咗沙嗲汁，但應該都有加豉油，食到豉油嘅鹹味，而銀針粉嘅粉質唔會太硬，吸收哂啲汁嘅味道，好食😋 因為叫三個餸嘅價錢都較高，所以都要五十幾蚊，但係佢啲餸嘅味道同份量絕對值得呢個價錢👍🏻 豬腸清理得好乾淨，唔會有異味，亦都無太多嘅肥膏，切得都夠厚，咬落去煙煙韌韌，口感一流🤓 鵝腸亦係處理得好好，唔會有過多嘅油脂同雜質，時間亦煮得啱啱好，保留到爽脆嘅質感🤩咖哩魷魚唔會太辣，亦爽口彈牙，夠惹味👍🏻 🥢淨餸 $42 由於太鐘意佢個甜嘅腩汁湯底，所以專登再叫啲吸湯嘅餸嚟食😝 豬腸同蘿蔔係絕對要encore🔥 另外就叫咗美味齋吸引哂湯嘅味道同精華，無得彈🤩豉油皇雞翼尖亦都處理得好好，無毛亦都好入味👍🏻🥢炸燒賣 $20見店舖入面貼咗張poster推介炸燒賣就試一試佢，估唔到炸燒賣係配泰式辣醬，都幾新奇，燒賣都炸到外脆內軟都唔錯，但$20六粒都唔算平。有時真係唔可以睇少啲小店，以佢處理食材嘅質素嚟講絕對係超水準😍雖然以車仔麵嚟講佢嘅價錢唔平，但一分錢一分貨，呢間比起好多出名嘅車仔麵都更用心👍🏻而老闆雖然笑容唔多，好似有啲嚴肅咁，但其實服務態度都唔錯，仲派左兩個口罩膠套送俾我地🤓呢間車仔麵以後應該會成日去，真係一試上癮🤣…查看更多