Carinaww的个人专页

好耐之前食過一次永利牛腩覺得好好食，但因為佢實在離我屋企太遠而冇再食過，今日難得咁岩喺附近活動，即刻拉埋老公去食。我嗌左坑腩河，老公就嗌坑腩飯，飯係比粉麵貴10蚊，本身都唔係好明，不過之後發現配飯既話牛腩份量係多好多，而且仲會配埋一碗清湯，咁呢10蚊都抵俾既。坑腩有牛味，個人口味覺得可以軟淋少少更好，清湯唔油可以直接飲，不過老公就好不滿個飯，飯質軟硬不一，又唔香。我地事前滿懷期望咁去，可能期望過大啦，今次冇左個種驚歎既感覺，甚至覺得有d一般，我諗下次就算再去附近活動，都會搵新餐廳試喇。…查看更多

新北江係天水圍既平民食堂，今日就黎試下呢間專食車仔麵既八麵館，3餸麵35蚊，基本麵款、配菜同湯底有齊，菜單仲圖文並荗。我嗌左生菜、豬腸、冬菇，配河粉腩汁，望下張相就知生菜真係好多好多好多，應該有一整棵，同埋好新鮮，唔係雪到爛哂個d；豬腸佢俾錯左豬肚我，不過都幾好食就冇所謂啦；冬菇係細細粒個種，普普通通，下次應該唔會叫；河粉幼身，腩汁偏淡味。老公嗌左豆卜、肥牛、芝士腸，配幼麵沙嗲汁；肥牛瘦左d；芝士腸出乎意料係靚野，食落同金x牌一模一樣；沙嗲汁我本身麻麻地，但老公話好香好夠味。有個重點必須要講，就係佢份量好多，無論係餸定係麵都好多，俾料俾得好大方，同時又有個缺點必須要講，就係佢用既都係即棄餐具，包括杯同碗，真係唔太環保。我地仲嗌左炸司華力腸同埋雞翼，味道正常，唔記得實際價錢但印象中幾抵食，加多幾樣小食都唔肉赤。…查看更多

好耐好耐冇出街打邊爐，今日同老公出街見到呢間牛氣做緊午市優惠，門口位店員又親切介紹，就試試佢啦。我地揀左最平既套餐，選擇昆布湯，同其他同類型餐廳一樣，一開始都會先送上豬牛雞各一份，d色水都唔錯，味道亦過關，唔會覺得自己食緊好渣既肉，一般平時只會瘋狂encore牛肉，但今次呢個豬肉又幾好食，我地都加點左幾次。落單係靠店員人手協助，我地食3點，人手明顯唔夠，有時要舉手好耐先叫到店員，不過上菜速度好快，唔會特登拖你，所以整體感覺良好。自助區食物都幾新鮮，亦唔會出現空盤冇人full既情況，款式比較大路，個人覺得餃子好食，唔會煮兩煮就爛哂；而邊爐必備既丸類雖然選擇唔算多，但食得出唔係cheap cheap貨；蔬菜都係提供返基本款，賣相同味道都正常。熟食區有飯、咖哩汁、碗仔翅同湯等等，我只係食左碗仔翅，都唔錯。平時會放出黎任夾既壽司依家就要向店員落單。醬料區企理乾淨，比較特別係有七味粉，除此之外都係大路野。飲品同甜品選擇偏少，不過餐廳有貼心咁將部分飲品放室溫，同埋有好多人都鐘意既乳酪雪糕，但呢個雪糕真係我唯一唔推薦既野食，口感同味道都好好好奇怪。總結，款式大路但食材唔錯，店員幾好態度，如果遇到唔洗等位既時間，我諗都幾大機會再食。…查看更多

今日同老公去食小籠包，我自己就第一次喺香港既鼎泰豐食野，即管睇下佢拍唔拍得住台灣總店既水平先。下午茶時間，店內客人唔多，座位舒服，我地兩人唔算太餓，所以就冇嗌粉麵飯。先上菜既係酸辣湯，記得攪勻左先食，味道比肉眼望落淡少少，木耳絲偏淋，爭左d口感，因為個湯淡味，所以反而令豆腐味幾突出，好唔好就見人見智啦。之後係熱辣辣既小籠包，薑絲係由店員送上，而醋就本身放左喺枱面，小籠包個皮好薄，但唔會一夾就散，識食一定係成粒放入口，湯汁味濃，亦食得出肉餡新鮮，唔錯。呢個紅油抄手都幾失望，一上枱就心諗: 份量咁少既，其實佢都有6粒，但感覺唔太抵食，味道非常非常一般，同小籠包差距幾個level，唔推薦。總結，除左小籠包比較好食，其餘兩樣我都覺得屬中下 (考慮埋價錢)，綜合黎講俾個OK佢啦。…查看更多

作為一個烏冬愛好者，之前一見到呢個白布烏冬推出已經好想試，想過一排先去食可以唔洗等位，點知熱潮依然未減，餐廳12點開門，我地12:20左右到達，大概等左20分鐘左右先入座，其實可接受既。不得不提餐廳衛生意識非常好，除左入座前要量體溫，仲會幫你噴酒精搓手液，門口招待既店員態度好好，未食野先加分。我地坐既位置望到師傅煮食，感覺專業，用餐氣氛唔錯，唔會好喧鬧，坐得舒服。上菜速度偏慢，不過望住師傅喺你面前整，都係一種享受，同埋店員加熱茶好殷勤，等耐d都冇所謂。雞肉熱湯白布烏冬，有4塊表皮微烤過既雞肉、2舊茄子同埋大蔥，湯底清甜，幾特別，冇印象之前有食過呢隻味，烏冬好煙韌，肉眼睇份量唔多，但其實食哂係好飽。至於雞肉只係普通貨色，同埋得4小塊，唔太滿足。鴨肉沾湯白布烏冬，鴨肉得3塊，不過就大舊過雞肉，我一開始以為係中式燒鴨/滷水鴨個種質地，原來佢係煙鴨胸個種，個人覺得好食過雞肉，但都係唔夠喉。味道上沾湯比熱湯濃好多，但就咁飲都冇問題，反而係舊茄子吸滿湯變得好咸，沾湯會附埋薑、蔥同芥末，加入後味道更豐富更有層次，可惜食到中途沾湯變凍，同一上枱比，食感就冇咁好。總結，白布烏冬彈牙煙韌，係誠意之作，本身鐘意食烏冬既一定會鐘意，但此外既湯底同配料就相對失色。不過必須講，佢呢個價錢真係好公道，佢大可以選址貴價地段賣貴多一倍，依家呢個價錢比好多坊間一般般既拉麵店平，環境同服務又咁好，絕對推薦烏冬愛好者一試。…查看更多

好耐都冇飲茶食點心喇，今日係第一次去添好運食點心，一直都知道佢好出名，但就唔知原來佢價錢都幾平，好抵食。通常人多食點心可以嗌多d野樣樣都試下，不過今次我地兩個人都嗌左8樣，好飽好滿足。酥皮焗叉燒包，個皮甜甜地，有d似墨西哥包，叉燒好多，蜜汁好甜，熱辣辣食好正，但我就嫌佢甜左少少。蘿蔔糕，一夾就散，亦唔覺得佢係剛剛煎起，幾失望。鮮蝦餃，個皮唔算煙韌但夠簿，蝦有彈性，唔錯。叉燒腸，比出面酒樓細條d，味道不過不失，下次應該會試下個帶子腸。馬拉糕，都係比出面酒樓細件，我本身對馬拉糕無感，只覺味道正常。燒賣，好食有咬口，睇張相都知蒸氣好勁好熱，不過有d唔明點解會配杞子，偏食既我挑走左冇食，所以話唔到俾大家知到底燒賣同杞子夾唔夾。鮮竹卷，冇咩特別，正常水平。豉汁鳳爪，鳳爪大隻有肉，豉汁夠入味。有d猶豫要俾笑哈哈定係OK，如果抱住食米芝蓮既心態，相信係會失望既，但佢作為一間點心專門店，我又會同意佢屬於中上水平，性價比高，encore機會大，所以就俾個笑哈哈啦!…查看更多

關於內臟，我唔抗拒但平常好少會想食，今日老公講起話有間豬潤麵好出名，咁就即管試下有咩特別啦。位置唔算方便，3點半去到要等位，大概10分鐘後可以入座，雖然店面唔大但唔算坐得好逼，店員仲好好人咁拉多張椅俾我放低個超重背囊，加分!我地嗌左2個豬潤一丁再加份豬扒，豬潤份量好多，舊舊都厚身大塊，食落爽口彈牙，一d都唔粉，刷新我對豬潤既印象，湯底唔咸，麵亦煮得剛剛好。豬扒係另上，唔怕會浸到淋哂，個人覺得可以再整燶少少，會再香口d，不過依家都唔差，肥瘦適中，調味足夠，都食得過。…查看更多

身為元朗人點會冇食過過橋麵檔呢，今次終於心血來潮寫返篇食評，推薦名物霸王雞俾大家。呢段日子周圍都淡市，唯獨過橋麵檔坐滿哂人，環顧四周八成人都食緊霸王雞，我地一行兩人就分別嗌左霸王雞同豉油雞，再加個炸魷魚鬚share。先上枱既係炸魷魚鬚，本來仲想等埋個飯先起筷，但佢實在太香喇，忍唔住食左先，炸粉好薄，亦算均勻，魷魚鬚偏淋左少少，不過味道一流，唔會好似喺有d餐廳食到既好咸好重味。好快主角就上枱喇，其實佢個菜飯冇咩味，但當d飯索哂雞既蔥油味就變得好滋味，同埋佢夠哂大碗，多數人都食得飽。雞就一如既往份量好大，肥瘦適中，我罕有地會食埋雞皮，我地兩人一致認同霸王雞好食過豉油雞，唔係豉油雞唔好食，只係相對普通d。重點係墊底既芽菜，又爽又吸味，完全係餸飯殺手，呢個配撘真係好好。…查看更多

今日喺沙田活動，3, 4點鐘餓餓地，去食返個tea先，知道呢間餐廳既西多士同奶茶都攞過獎，一於試下啦。下午茶餐幾抵食，我地兩個人嗌左半份西多士加司華力腸，同埋咖哩雞扒撈麵。西多士夠厚身，入口鬆化，蛋味香濃，難得既係佢唔油膩。司華力腸冇咩特別，正常貨色。咖哩雞扒撈麵相對普通，咖哩冇咩辣味，不過雞扒大份搭夠，麵既硬度亦剛好。奶茶好滑，不過我個人中意茶味濃d既，對比其他平民茶餐廳黎講已經算唔錯。…查看更多

今日老公帶我食好西，特登走去大角咀，食佢強烈推薦既文華雞飯。當晚我地6點就到達，客人唔多，門口位置放左消毒搓手液，非常貼心。我地各嗌左一個白雞飯同燒雞飯套餐，另加錢轉脾，套餐好豐富，有湯有菜有飯，唔洗等好耐d野食就一次過上齊，醬料係放喺枱面上俾客人自行取用，十分方便。首先襯熱試一試個肉骨茶，雖然係隨餐附送，但俾料都幾大方，有廋肉、菇同埋豆卜，湯濃味而唔咸，胡椒味比藥材味突出。油飯偏軟淋，油香十足，單獨食都可以食哂成碗。至於主角海南雞，好嫩好滑，肥廋剛好，連皮食都冇問題，燒雞個皮就再香口d，同埋切得大舊d，加上冇骨，大大啖咁食非常滿足。簡單菜心同樣好食，去一去油飯既油膩感，成個套餐配搭完美，又可以一次過食到海南雞同肉骨茶，推薦。…查看更多

夜晚同男友撐枱腳，佢話想食泰國野，仲點名推介呢間餐廳，去到望到入面差唔多滿座，我相信係值得期待既一餐。佢地個menu密密麻麻寫滿兩大版，亦有2人餐、3人餐等等可以揀，我地得2個人食唔到多，最後嗌左3樣。泰式生蝦 (大) － 印象中有9隻定10隻，隻隻都啖啖肉，超滿足!! 辣醬好開胃，佢唔算好辣，但食完會有陣辣味留喺條脷，蒜頭係分開放既，岩哂我呢d每次食生蝦都要特登夾走蒜頭既人，底下有用保鮮紙隔住既冰，食到最後都keep到夠凍夠爽口，小缺點係偶有一兩隻蝦個蝦身仲痴住少少殼。炒金邊粉 － 呢碟粉大碟到夠2個人食飽，係正常size既兩倍，喺街外食既金邊粉一般通病係太乾，呢度完全冇呢個問題，同時佢又做到唔油，食完之後碟底一滴油都冇，讚。豬頸肉飯 － 賣相普通但味道唔普通，豬頸肉肥瘦適中，切得有d厚度，保留到口感，唔配醬汁都已經好好食，至於個飯我就欣賞佢夠乾身，質感似酒樓鳳爪排骨飯個飯咁，有d硬度再配上鼓油，十分滋味。總結，呢間泰式餐廳味道超出價錢，絕對會encore。…查看更多

阿妹話屯門vcity開左但馬屋，咁岩我地又有日平日既下午得閒，一於就試下啦。當日3點幾，店入面得4, 5枱客，我同妹都唔太餓，所以只揀左60分鐘定量放題 (即係得一碟牛，其他菜丸菇同雪糕都係任食)，呢度係一人一鍋，我地分別嗌左甘露湯同美肌湯，甘露湯即係甜醬油，但佢有別其他同類型放題，佢個湯入面係冇任何料既，亦冇送雞蛋，而美肌湯就有小量料 (冇仔細睇係咩) 同一舊仔雞肉，我地都覺得個湯底幾普通下。自取區唔算大，但俾人一種好新鮮既感覺，有冷風喺度吹，某幾款丸仲係硬邦邦痴住d冰，基本打邊爐款既蔬菜類都齊，丸類有幾款係比較特別既，例如馬蹄魚滑同芝士豆腐。雪糕係haagen dazs，當日有4隻味同2款淋醬，d雪糕雪到超級硬，要用好大力先筆到，小朋友要靠大人幫手，我諗應該係好事黎？醬料區基本野齊全，枱面整潔。唔記得影飲品櫃，成個櫃都係罐裝，有汽水jolly shandy同茶，亦有熱水同茶包，順便一提，佢係冇飲管提供既，雖然飲罐裝係有d唔方便，不過我都支持環保既。睇睇d牛肉先，我地個套餐係第二平既嚴選牛肉，有牛味，但冇咩肥膏所以口感偏鞋，同其他放題店相對平既牛質素差唔多，一碟6大片都算係咁。印象較深刻既邊爐料有彈牙實身既貢丸同罕見既羽衣甘籃，唯一唔好食既係烏冬，喺自取區夾個陣已經好易斷，熟左之後完全淋到冇哂口感，重點係餐廳冇湯勺，d麵要逐條夾上黎，加上冇湯勺俾人隔油，呢個真係身為火鍋店既一大不足。不過餐廳既服務係值得一讚既，有位侍應幫我地加湯個陣彈左幾滴落地下，我地冇特別理會，點知過一陣佢就行返過黎清潔返，非常難得。…查看更多

男友話帶我去一間火鍋店食好野，但去到先知full booking，唯有轉戰其他餐廳，本身都諗住搵返同類型既，但行過呢間餐廳見到幾多人，環境又唔錯，重點係我地都想飲啤酒，岩眼緣就唔理咁多坐左入去先算喇!店面非常大，格局上分開左餐廳同bar，餐廳個邊就會坐得舒服d，有卡位，bar就係坐高腳椅，配高身小圓枱，兩邊都有大電視播緊球賽。一坐低即刻望下周圍d人食咩先，見到大部分人都有嗌德國豬手，我成功說服唔太好豬手既男友試下，豬手個set包2杯啤酒，岩哂我地心水，另外再嗌左份五成熟西冷加薯條。坐一陣啤酒就到，好大杯，我地其實唔識點既啤酒先叫好飲，印象中呢個牌子我地都冇飲過，飲落順口，感覺唔錯。雖然食客好多，又播緊球賽，但唔會有種好嘈雜既氣氛，唔洗嗌破喉嚨咁傾計，甚至有好幾枱客人係一家大小咁黎，侍應友善，上菜時會同你傾一兩句，我好中意個環境。賣相非常吸引，配菜俾得唔孤寒，橙色既係南瓜蓉，想像唔到咁甜 (褒意)，西冷好嫩好好食，個人覺得佢係熟過五成，男朋友唔中意食咁生就覺得呢個程度岩岩好，碟邊有汁但我地都冇試到，就咁食個牛已經好夠肉汁，亦夠牛味，好高質。我唔記得幫豬手影獨照，呢個角度可能睇唔清，佢係骨肉分離咁上枱既，肉大概切開左6, 7大舊，比例上肥肉都幾少，但瘦肉部分一d都唔鞋，輕輕一咬已經可以分開一絲絲，重點係豬皮，又薄又脆，味道唔會過咸，食完唔口渴，連唔好呢味既男友都讚好，連條骨頭上面連住既少少肉都唔放過刮埋落黎食。薯條係另外加既，同主菜分開上，只係薯條送黎時我地張枱已擺滿，侍應先幫我地倒埋落西冷度，份量好多，味道正常。冇做reseach、冇朋友介紹既情況下食到好野既感覺真係特別開心，同埋見到隔離枱小朋友食兒童餐好可愛，整餐飯令人心情愉快～…查看更多

同男朋友喺聯和墟搵食，食完晚餐消化左陣佢又話想食甜品，仲要指明想食芒果河粉，但係我地上網search完都唔見邊間甜水舖有賣，咁就隨便揀間喺附近架啦。中式甜品黎講價錢偏貴，我嗌左好耐冇食既熱芝麻糊，而男朋友就嗌左芒果椰汁西米涼粉。賣相唔吸引，份量唔算少，我試味前男友話味道正常，但我一食就覺得涼粉偏淋，芒果就偏硬偏酸 (可能唔當造?)，要求唔高既話係會覺得冇咩大問題既。我既芝麻糊比涼粉遲好多上枱，睇相可能會覺得佢好濃郁，但食落口感比起佢個樣睇落係稀好多，食多幾啖就開始頂唔順佢既甜味，冇誇張，真係甜到喉嚨痛，甜得黎又冇我期望既芝麻味，係一碗好差既芝麻糊，一向甚少浪費食物既我食左不足三分一就要棄糊。 我見佢餐牌係主打有機菜、羽衣甘藍之類，或者我選擇喺度食甜品一開始就已經係個錯誤。…查看更多

因為男友ot而冇人陪既我，決定今晚做電燈膽痴住朋友同佢男友一齊搵食，呢間cafe seoul爆滿兼有人等位，即時吸引左我地既目光，揭揭餐牌見到價錢唔貴 (比起其他韓國餐廳)，即管等下位啦!當時係平日既8點半左右，最後只等左10分鐘就入得，因為喺店外已經一早睇好餐牌，所以一坐低就可以即刻落單，而店員亦手腳好快地遞上免費既小菜同茶水，小菜係泡菜同豆芽，隔離枱2個人就一碟，我地3個人就有2碟，幾大方唔孤寒。最先上枱既係泡菜煎餅，三小塊，但佢地加埋係會比其他餐廳既一大塊大，味道唔錯，亦唔油，推薦。已經撈好左先記得影相既石頭鍋飯，上枱時俾埋辣醬同湯，不過我唔係好肯定個湯係跟呢個飯定係其他菜式，冇印象餐牌有寫，個飯表面睇落係全素，但食落會食到少少牛肉碎，我鐘意佢個冬菇唔係切到一絲絲而係一片片，而且飯量都夠多。呢個係蜜糖醬油炸雞，甜度對我黎講甜左少少少少，醬油味唔突出，肉質juicy，食完之後唔會有一種好熱氣既感覺，下次再黎我會試下其他味道。最後既牛肉紫菜卷我地三人一致認為麻麻地，牛肉好un，飯粒乾身偏硬，個卷易散，不過麻油味幾香。呢間餐廳性價比高，大機會encore，多d人一齊食可以嗌多幾款share，不過店面唔大，要有心理準備等位喇。…查看更多