人良氏的个人专页

　經過尖沙咀厚福街，屋企咁啱煲咗豬膶牛肉粥，見到有間粥麵茶餐廰，於是走入幫襯；由於係下午時份，所以可以選擇嘅油器都唔多。我揀咗鹹煎餅同炒麵。　鹹煎餅冇南乳味，比我想像中差，仲要賣九蚊一件，不過理解佢位處老尖，要賣幾多件鹹煎餅或者牛脷酥等先可以維到皮？如果係觀塘區或者新界，此舖一早被淘汰矣。　至於嗰碟炒麵冇乜驚喜，十三蚊一盒，又無落芝麻。味道及賣相方面實在係一般，因為鹹煎餅冇落南乳，咁同買條油炸鬼番嚟食乜分別？炒麵亦然，都可以食得落口嘅，兩樣食物之水準都係中下水平。（缺憾係冇提供相片）　我心諗，如果啲粥同油器有水準，賣得貴又何妨？之但係價錢同質素唔成正比，亦係致命傷。　如果呢間舖頭想好似佢哋寶號名稱咁有紅利，就要諗諗同改良下食品質素嘞！…查看更多

　前幾日去完美孚見工，已經下晝三點幾，成個上晝都冇食嘢，就嚟呢間嘢下午茶。　環境都OK，可能係下午茶時間，所以唔駛等位已經有位坐；我身形比較豐滿，但坐喺卡位都好鬆動。　一坐低，個侍應就問你飲乜嘢茶，我求其話香片啦。畢竟食上海嘢都係襯飲香片。　睇個餐牌，都冇乜好食，又唔包餐飲，剩係知道一個排骨擔擔麵，盛惠廿八蚊加一。　嗰碗麵幾大碗，排骨炸得幾鬆脆，可以頂到肚嘅，但係碗麵勁辣，一定要飲嘢，最後要咗杯豆漿，杯豆漿亦同其他食肆嘅冇乜分別。　後嚟埋單先發覺，嗰度要四十八元四角，即係話嗰碗擔擔麵廿八蚊，嗰杯豆漿十六蚊，合共四十四蚊加埋一。好乸脷！　出面飲一支豆漿，甚至汽水都唔駛十六蚊，唔怪得環顧四週都唔見有人叫嘢飲喇。　又係景樂集團旗下，呢間集團我一早領教過，得個貴字，估唔到下午茶都咁離譜。　服務呢就麻麻地啦，畀五十蚊唔駛找多謝都冇句。你啲嘢咁貴唔通仲要我仲畀貼士你咩？　早知要壺普洱喇！（諷刺佢哋離譜）貴都貴過香片！…查看更多

　作為一個九龍仔，好日都唔去大埔，因為要去附近泮涌村開會，所以去咗大埔街市熟食中心搵食。　聽聞學利魚蛋粉喺大埔頗為聞名，咁啱食飯時間仲未滿座，咁就睇下佢有幾好食。　套餐廿四蚊，唔係貴，我叫咗炸墨魚丸炸魚皮雙拼河，飲凍檸茶，只係卅一蚊。　炸墨魚丸以塔門最為馳名，原來塔門都係隸屬於大埔區，所以佢地整之墨丸魚皮河，兩者皆好鬆脆，蘸上特制醬汁，非常好食。　大埔街市熟食中心環境十分乾淨，食嘢價錢又唔貴，唔怪得咁好生意咯。…查看更多

　掛羊頭賣狗肉，原來大家樂咁大間集團都會有。 佢哋晚餐有種叫老火湯套餐，是一煲老火湯加一個白飯及一杯普洱茶，盛惠三十幾蚊。　擒日佢地掛個牌賣粉葛赤小豆鯪魚煲瘦肉，由於媽咪鍾意飲，咪叫個套餐畀佢。　由於我買番屋企，故無即時留意佢啲湯係點。　一食先知道，啲所謂粉葛赤小豆鯪魚煲瘦肉，原來只係青紅蘿蔔煲豬骨，搵舊粉葛搵粒赤小豆都無。　咁咪即係畀佢哋搵咗笨喇。　從之以後，都咪使旨意我再幫襯大家樂呢種餐。…查看更多

　嗰日去修頓中心做嘢，聽聞呢間嘢有蔡瀾、米芝蓮同蘇施黃推介，咪去試下囉。　一坐落，個樓面就問你食乜，大佬呀，雖然你哋啲雲吞麵馳名港九，但都睇吓個餐牌有乜嘢食先得架！最後叫咗碗雲吞麵，睇吓佢有幾好食。　佢哋都有酸蘿蔔畀客任食，同桂林街嘅劉森記一樣，好爽呀！:)　碗麵好快就煮好，個湯幾正，好陣陣地魚嘅香味，有五粒雲吞。其實我嘅favourite係京都炸醬麵，但人地雲吞麵咁正，點都要試吓。　不過碗雲吞麵好揦脷，要廿七蚊一碗，仲貴過旺角池記同中環沾仔記，更加唔好去同劉森記比。　如果大食啲，食埋油菜同炸魚皮，分分鐘一百蚊出門口。　呢啲咪叫做賣名氣囉，如果係隱世食肆，十零蚊都可以食到。…查看更多

　五月十一日係我嘅舊曆生日，我家姐好有心，請埋我同媽咪同佢個朋友，一行四人一齊幫襯呢間酒店。　酒店屬三星級檔次，不過氣氛都不差，但係佈置就幾逼夾下。家姐一嚟到坐低個侍應就叫佢拎張coupon出嚟，氣都未抖順，佢都不知幾谷氣。　佢哋最近推廣緊星（加坡）泰（國）自助晚餐，四個人幫襯為過一百六十蚊一位，台式飲品同埋金威啤酒任飲。家姐覺得幾划算，先至訂位；不過唔食猶自可，食咗把幾火，因為根本所謂星泰自助餐，完全係好取巧。　大家應該會諗，星泰自助晚餐或者會有海南鷄飯、肉骨茶、冬蔭功或蝦餅之類嘅食品，但係呢間酒店完全欠奉。佢哋所謂嘅自助晚餐有：燒牛肉、燒烤多春魚、大蝦、生蠔、以及一般酒店都供應嘅冷盤（如沙律同壽司）同熱葷（如蒸魚同豬腳薑），以及生果甜品等等，除咗喇沙之外，完全冇一樣嘢同新加坡同泰國菜有關係。　嘢食已經唔多，最慘嘅仲係唔經常更換膳食，好似冷盤係有八爪魚仔同螺肉，前者已經畀人食晒，但等咗成粒鐘都冇人更換；啲白斬鷄（權充海南鷄）仲係生嘅:(，。　任飲嘅飲品僅得三種，其中一種仲係啤酒，但不知鬼咁多兒童，你叫啲細路飲乜？　連餐茶都渣個人，飲檸茶無檸檬味，仲要係好難飲嗰隻添。　埋單六百五十幾蚊，仲送返張九五折coupon，不過咁嘅價錢同質素，我諗應該都唔慌會有下一次囉。嗰晚我feel到佢好肉赤，唔駛我畀錢我都有同感。…查看更多

　有四十年歷史嘅牛頭角下邨，快將成為香港人嘅集體回憶，呢個香港碩果僅存的嘅徙置屋邨，吸引唔少龍友去影相，自然有其特色之處。　鑊風十足嘅大牌檔，亦係牛下街坊同街外人公諸同好之地；上個禮拜四同埋幾個朋友去呢度開餐，諗住試下佢地啲鍋貼炸蝦餅同埋蒸扇貝。　一入到去，就聞到一陣好難聞嘅曱甴屎味！相信嗰度都有唔少「小強」匿埋，但好彩冇出現。可能時間尚早，除左我地只有另一檯、一男一女的客人。　後來嗰度人氣多咗，陣味先冇咁勁，但都忍唔住，食完就走。　雖然嗰度啲嘢係特色同幾好食，但係衞生都好重要架！曱甴會傳播疾病架，尤其是而家豬流感咁猖狂，幾好食都係咁話！…查看更多

　以前存記係喺順利邨冬菇亭度，只係喺夜晚先開門做大排檔，後來順利商場新翼起好咗，存記搬咗入新翼，改為全日營業之餘，有時（喺下晝時份）仲會見到一班警察哥哥前來幫襯添。　由於佢哋做埋送外賣，所以我哋有時冇煮飯都有叫外賣，有時都會幫襯下午茶，尤其是佢地下午茶時間嘅炒粉麵，如乾炒牛河同星洲炒米等，飲埋凍飲都只係廿七蚊咋！有時吼正五點幾叫，當晚飯食都不知幾盞。　仲有佢哋啲小菜都幾正，價錢幾公道，佢哋嘅豉油皇煎生蠔同金華雞，我有時都會叫番屋企食㗎。…查看更多

　擒日小弟舊曆生日，家姐咁啱又再在附近辦公事，唯有去呢間都幾墮角嘅酒家試下。其實我以前都有幫襯過呢度前身嘅韓國餐館，可能生意唔好冇做啦。　諗住叫幾個小菜：砵酒焗桶蠔、什菌炒和牛粒、麵醬炒唐生菜同鵲巢海中寶。已經一早問咗樓面有冇桶蠔，況且都唔係平（八十八元），佢話有咪落單囉，誰不知過咗冇幾耐佢話冇蠔喎，都算啦，唯有叫半隻炸子雞啦！　好嘞！諗住叫兩碗白粥，佢又話冇，喂大佬呀，擒日又唔係假期又唔係好夜，六點零鐘啫，呢樣又冇，嗰樣又話冇，我家姐好勞氣，個經理都知衰，起勢咁講對唔住。　至於餸菜啲質量方面，算中規中矩啦，除咗炸子雞啲頭頭尾尾之外，好多都食到清為止。食完飯都有幾楷橙當係飯後果，美中不足嘅係冇糖水送，要自己叫，雖然唔係貴（楊枝甘露都係十二元，芋頭西米露八元），但埋單都要三百幾蚊，雖然唔係小弟找數，但都戥家姐肉赤。　人客到走嗰陣（七點半）都坐唔夠一半，咁嘅服務質量，下次都費事嘞。…查看更多

　我本身住喺順利邨，因此名舫（有時叫咗做「明搶」，因為都幾貴吓）係我地街坊嘅唯一選擇。　一個星期都有三幾次去嗰度飲茶，由於下午茶做特價，大中小點一律七個八，比起早午市都平，故好多時都喺下晝點零鐘上去搵定位，好多識途嘅街坊同師奶都係咁。佢哋星期六都有做特價下午茶，所以都有唔少人捧場。　但係啲點心呢就真係不敢恭維嘞，因為佢地三年前開張至今，點心款式嘅變化都唔係太大，可以話選擇唔多，我今年一月上去飲茶同擒日上去飲茶，啲點心都係一樣，完全無得揀。喂！人地啲舊式茶居都有咩星期美點，佢真情十年如一日，千篇一律。　得嗰二三十種點心，悶到人都癲，唯有炒碟嘢食吓啦，唔睇由自可，睇見啲炒粉麵火都嚟埋，呢樣又冇嗰樣又冇，嚟嚟去去都係乾炒牛河、星洲貴刁咁，我唔識幫襯茶餐廰咩？　為咗催谷生意，佢地有時都要出吓綽頭，例如喺下午茶市，推出十五蚊嘅燒肉，但係都無以前賣十蚊咁正，變相仲少咗添。　住喺順利邨嗰啲，多數都係長者嚟，佢哋好話唔好聽「牛𡁻牡丹」，有得食就算嘞！我就奄尖聲悶，呢樣又彈，嗰樣又唔唔掂。係咁㗎喇，上嚟畀錢佢哋洗㗎。…查看更多

　由於經常喺搭開嘅專線小巴車身，見到呢間酒家賣廣告，況且發現佢地任飲任食打邊爐嘅價錢都幾平，所以喺上兩個禮拜，咪抱住一個試吓嘅心態，心口掛住個勇字，同埋家姐與母親一齊幫襯。　心諗平日傍晚六點嗰段時間都唔會咁多人光顧，加上嗰日天氣都幾暖和，故當日冇訂位都有大把檯，一坐低，個侍應就問食乜嘢湯底，最後我哋要咗鴛鴦鍋，包括一半係皮蛋芫荽，另一半係沙爹汁。　打開張任點任食嘅餐單，發覺都幾多嘢食，包括生蠔同埋蝦咁，任叫唔嬲，而飲品方面，包括有一渣渣嘅橙汁、以及夏枯草同酸梅湯，而罐裝飲品只得一啲綠力飲品，但支裝飲品幾多選擇，又有啤酒，又有汽水，任關選擇，無任歡迎。　我最鍾意係炸魚皮，尤其佢哋好脆，適合打邊爐用，不過就咁食都幾好食架。三個人一齊都係二百幾啫。…查看更多

　上個星期六，對於好似我咁住喺順利邨嘅街坊嚟講，絕對稱得上係黑色星期六。因為順天邨有班修路工人，唔小心掘爛咗地下咸淡水管，慘咯！嗰日一早起身，以為世界末日咁，水又無，又唔可以開熱水爐沖涼，真係想唱番許冠傑嗰支《制水歌》：「又制水的確無樂趣......」　制水啲鋪頭一定唔開㗎啦，唯有同老媽子搭車出觀塘食嘢，不過去到觀塘都唔知食乜，最後都係去番華苑食嘢，因為佢地免收加一，食嘢飲嘢都係同飲餐茶差唔多啫。　去華苑一定要幫襯粟米餅，因為佢哋啲粟米餅係唔同其他印尼餐廳嘅，係傳統一塊塊布滿粟米嘅煎餅，嗰日雖然有少少喉嚨痛，但美食當前，冇辦法吧啦。　我亦好欣賞佢哋啲印尼炒飯同沙爹，卅幾蚊有番咁上下大碟，正一係大件夾抵食也。飲多杯珍多冰，都係盛惠一百蚊鬆啲，就算同埋一大班「鬆啲」（國語音「兄弟」）去幫襯，相信都唔超過二百五蚊。　最美中不足嘅地方係細，嗰日都不知鬼咁多人去幫襯，爆晒棚不特止，仲企滿晒喺出面等添。希望老細可以襯觀塘區重建，搵過一個更大嘅地方，大展鴻圖，我一定會繼續支持佢哋㗎！…查看更多

　我住喺觀塘區差唔多有三十年，幫襯呢佢哋大大話話都有廿幾年嘞！幾蚊碗牛雜河嘅年代，食到今時今日，連曾特首巡視觀塘區都慕名嚟參觀，至於特首有冇食就唔知嘞。　我誠意推介呢間嘢，因為作為觀塘區嘅地膽，一定會介紹你食牛雜河，絕對冇呃你㗎！我最喜歡就係呢間嘢嘅（牛）腸肚河，同埋一定要食炸魚皮，雖然嗰度環境麻麻地，天時暑熱都勁迫人，但仍然客似雲來，平平地廿零卅蚊一餐，於願足矣也。　廿幾年前老闆冇咁肥㗎，我同佢一樣一日肥過一日，個肥肚腩有尊彌勒佛咁大（唔知邊個肥啲？）。相信佢嘅利潤都同我食碗腸肚河一樣咁和味。…查看更多

　擒日天氣好唔穩定，由於到黃大仙探望家姐，特別與家姐同媽咪一行三人，到黃大仙中心原日潮江春酒家、美心集團的八喜晚膳。　三個人食咗七樣嘢：擔擔麵、台灣擔仔麵、三杯雞、灌湯小籠包、安平炸蝦卷、干煸四季豆同埋荳沙鍋餅，職員態度都唔錯，係咁不停斟水，而且上菜速度都好快，但味道和質素就唔敢恭維喇。　首先評論個擔擔麵，離遠睇隻碗好似好大咁，但實際一個人都係得兩箸麵食，不過都叫做ＯＫ喇。跟手嚟個擔仔麵，細細碗，又係一人一箸嗰隻。不過響呢啲地方食麵唔好要求太高喇。　轉頭嚟埋嗰幾樣餸，最差係嗰 個三杯雞，佢餐牌上寫住例牌，以為係一隻雞斬開分半邊或例上嗰隻，誰不知拎到出來原來只是雞髀肉，仲要得嗰 幾嚿，其餘全部都係薑或蒜頭，俾我感覺好搵笨囉。　後尾叫了六個餸 都意猶未盡，叫多個荳沙鍋餅，點知四件類似粥店鹹煎餅的東西端出，味道和外觀都極知唔似。啲 皮又苦，啲 餡一啲 紅荳沙味都冇。　後尾食咗 二百幾蚊，冇下次呀。　…查看更多

　小弟是日放假，故到日上三竿至起身。起身時都已經十一點幾鐘，唔通仲食早餐咩？猛然醒起，屋企樓下間來發午餐都幾抵食喎，卅皮有飯有湯有飲，即時有股衝動，拿拿臨落街買咖喱牛腩飯午餐食。　十二點鐘入到去已經滿座，地盤工友同埋主婦們，早已佔據卡位，故都係買返屋企食好。佢午餐，有十幾款，除咖喱牛腩飯外，仲有炒粉麵，或者豬扒飯、咕嚕肉飯，以供唔同人士需求。我鍾意食佢咖喱牛腩飯，因為牛腩唔肥，咖喱汁多，而且都好大盒，有時仲要同老媽子一齊分享添。　驚喜唔係盒飯，而係佢老火靚湯，今日靚湯係粉葛扁豆煲豬，我最鍾意飲呢種湯，因為自己都經常骨痛，粉葛湯常飲去骨火，而且煲要好花工夫。佢之粉葛湯，並唔係粗製濫造、添加味精之劣品，而係真材實料，湯渣仲有舊靚豬添，煲得十分夠火。佢都有所謂之紅白西湯，即羅宋湯或忌廉湯，但覺得西湯唔係咁好飲，尤其是忌廉湯，假得好似豆粉水咁。　毋怪乎，見親個個地盤工友食午餐時，都叫老火中湯啦。証明唔係淨係小弟Buy呢隻例湯！…查看更多