合興牛腩牛什粉麵 (已搬遷)

　我住喺觀塘區差唔多有三十年，幫襯呢佢哋大大話話都有廿幾年嘞！幾蚊碗牛雜河嘅年代，食到今時今日，連曾特首巡視觀塘區都慕名嚟參觀，至於特首有冇食就唔知嘞。
　我誠意推介呢間嘢，因為作為觀塘區嘅地膽，一定會介紹你食牛雜河，絕對冇呃你㗎！我最喜歡就係呢間嘢嘅（牛）腸肚河，同埋一定要食炸魚皮，雖然嗰度環境麻麻地，天時暑熱都勁迫人，但仍然客似雲來，平平地廿零卅蚊一餐，於願足矣也。
　廿幾年前老闆冇咁肥㗎，我同佢一樣一日肥過一日，個肥肚腩有尊彌勒佛咁大（唔知邊個肥啲？）。相信佢嘅利潤都同我食碗腸肚河一樣咁和味。