lamlamly小姐的个人专页

今日就帶啲朋友過嚟試吓呢間我間唔中都會嚟食嘅餐廳，喺區內已經係出晒名嘅平民all day breakfast, 舖頭算係幾大，有兩間地舖，同埋可以坐出面，算係幾chill ga!一個咁嘅all day breakfast閑閑哋都要差唔多成舊水,呢度只係40-50有交易，有平有貴任君選擇 ：） 所以我間中都會想黎食下。炒蛋份量足、多士有埋奶醬、benedic egg 都睇得出有心機整嘅☺️ 咁嘅價錢有咁嘅質素性價比真係超高！同行友人重大讚杯咖啡好飲tim ！…查看更多

同朋友食完晚餐後繼續下場食糖水，大家都唔想諗就搵附近嘅糖水嚟食。呢間發記連鎖店都好出名㗎啦，基本上都穩陣唔會好伏。可能係因為開喺旺角啦個感覺裝修到好有香港嘅特色。講返甜品都係不過不失啦個燉奶都幾香奶味，木瓜雪耳糖水都係OK啦，無話特別超級impressive, 只係不過價錢有少少貴，性價比唔算太高。發記嘅可取之處係選擇比較多，中式西式糖水都有任君選擇。地點就腳啱晒我哋呢啲食完lunch仲想繼續下場傾多陣嘅一大班人。…查看更多

一向鍾意食辣野嘅我，早就想試下呢間麻辣燙！今日嘅lunch 算比較遲，我黎嘅時候係2:30啦，所以店內唔算多人。呢間餐廳算係裝修得唔錯、坐得又幾舒服下。見到裏邊有一個位放咗好多食材，原來呢度係自助嘅。啲食材一包包一串串咁放好晒，等你可以好似自助餐咁自己揀。選擇都算好多下。菜、肉、丸、內臟、粉面都有，目測都有起碼4-50款。揀好之後攞去比服務員俾錢，同埋講要幾辣。因為我未試過呢間唔知佢會唔會超級辣，所以就叫咗小辣姐。俾咗錢坐低後大約5至10分鐘左右就上菜啦！由於個午餐比較遲，所以非常之肚餓我叫咗六個餸！如果冇咁肚餓嘅可以叫少啲餸架，因為份量都幾足。雖然小辣但係我覺得佢都算幾辣。佢唔算好麻但係個辣係好香嘅，入口好香又唔會有後勁嘅嗰種辣。如果鍾意食辣嘅朋友可以試吓中辣或者大辣應該好刺激下 ：）六個餸$52，價錢來講算係中上啦話晒都叫做有啲裝修坐得舒服，性價比算係OK啦。…查看更多

突然心血來潮想去剪頭髮加染髮，所以打算係附近求其食啲野。因為一個人最好都係hea 食個快餐。記得呢間麵店已經開左好多年，又長期好多人坐係入面食野，心諗一定唔會差得去邊。由於係中午12:30，真係超級多人差唔多坐滿曬，不過樓面同廚房都好快手，基本唔洗點等已經有人serve。店外面貼左好多雜誌報紙報導佢地嘅clippings, 好似係主打清湯腩。好啦，就試下佢地嘅推介，叫左個牛腩雲吞米粉醫肚。個湯真係值得一讚，清得黎好濃嘅肉香味，又唔會好油！個牛腩已經煮到好諗，入口即融嘅感覺，而且都係有好香嘅牛肉味！我食到某2-3件有啲好爽口嘅筋，幾有咬口，配合入口即化嘅肉真係天衣無縫！不過雲吞就一般啦，無任何特別之處。我加埋杯凍奶茶，埋單$48，性價比尚算可以啦，都會繼續黎幫襯嘅 😆…查看更多

我地一行3人過咗中午食飯時間，已經三點鐘仲未食野...所以超級肚餓。行過見到呢間餐廳仲有午餐可以嗌，所以入去食飯先。由於有人要減肥，所以我哋3個人叫左2個餐加埋個海南雞例牌share 黎食。由於太心急唔記得幫海南雞影相份量其實都幾細每人得幾舊仔雞，味道都係不過不失啦，唔係好難食、又唔係好食到印象難忘嗰種。餐我地叫咗肉骨茶同埋咖喱煎雞扒蛋包飯。肉骨茶冇乜藥材味反而我哋大家都覺得覺得好似滷水汁.....我食過嘅肉骨茶好似唔係咁嘅味㗎喎....不過如果你當佢係滷水五花肉咁食嘅話，其實都OK嘅😂肉嘅份量都幾多三大舊肉加豆卜。另外一個咖喱煎雞扒蛋包飯都係普通，咖喱同出邊食到嗰啲差唔多味道。煎雞扒其實都幾juicy嘅。蛋算係炒得幾滑。個人會比較推呢個。…查看更多

呢間小店係由一對夫婦開嘅，丈夫係日本人負責廚房，太太負責落單收錢，賣嘅係日式家庭料理。店雖然小小的座位不多，但看得出來有用心裝飾擺設，感覺舒服，好似係日本民宿食緊嘢嘅感覺。我其實一直都有幫襯開，因為隔一排就會懷念佢嘅味道。晚餐啲set 會包埋個湯同3碟前菜，湯係miso soup, 前菜就每次都唔同款的，但都係好味道嘅！今次我叫左個吉列豬排set。佢個miso soup 一飲便知龍與鳳，同出面果啲完全唔同味道。聽講日本人每個家庭都有自己煮miso soup 嘅recipe. 我估呢間嘅味道應該流傳自佢地嘅家族吧。miso soup 入面有蘿蔔、豚肉、菇，好大一碗好豐富的。豬排飯都係保持一貫水準，個汁其實都好影響成個飯，佢係恰到好處，唔會話太甜蓋過其他味道。以呢個價錢可以食到呢個水準，真係無嘢可以挑剔啦。…查看更多

一見到呢個雪糕嘅外型就知道係百味堂！呢間韓國大熱嘅雪糕專賣店係香港其實已經開左好多間分店，但一直我都無機會試試。今日行過K11見到有人攞住，就即刻搜尋店鋪location. 雖然已經食飽午餐，但都係忍唔住買左個classic 牛奶雪糕試試～佢menu其實有好多其他款選擇，但由於我係第一次食，所以都係揀返最basic 嘅就算。食落有啲似雪芭，有奶味但係有冰嘅感覺，唔似平時食到嘅軟雪糕嘅質感。雖然係冰嘅感覺，但又幾滑嘅。不過差唔多成$50個雪糕個人覺得性價比有啲低。除左外賣攞走食，間舖頭隔離仲又啲位可以坐係度慢慢食，同朋友吹水hea時間就最啱啦。…查看更多

今日掉低個仔，久違地終於可以同老公兩個人拍下拖。做完正經野之後就想喺附近搵吓有咩嘢食，發現有呢間新開嘅餐廳。入邊唔算好多人，我哋望過個lunch Menu好似都幾唔錯好多選擇又唔係太貴，我哋就入咗去坐低啦。Menu set 有包有湯有主菜，最後有埋嘢飲嘅。 我哋一人揀咗一個套餐，我就係炸魚薯條、老公揀咗個rib eye。今日嘅湯係黑松露蘑菇湯！超級正、好濃味好香！個包都唔係普通餐包佢係意大利香草包可以點住個湯黎食，又或者你鍾意點佢送嘅醬都得。之後主菜嘅炸魚薯條個炸魚外脆內軟、都幾唔錯，而且奉送粗薯條。呢兩個配搭簡直係一流！而另一款主菜牛扒由於係我唔鍾意食嘅rib eye，我就唔方便評論啦。呢個部位比較多筋肉質實淨啲，牛味比較重一啲，適合鍾意食牛肉味嘅朋友。老公就話覺得算整得唔錯。我哋食嘢期間加插一段小插曲，可以睇得出餐廳嘅職員好細心同埋友善。隔離枱叫咗一個好似多士咁嘅主菜，餐廳職員發現好似有啲太穠，所以主動問佢要唔要幫佢換過一碟全新嘅。呢個舉動都幾貼心值得一讚～…查看更多

呢間餐廳長期都有條人龍排緊隊，好幾次收工想去食都係食唔到。今日平日放假食完午餐之後經過，發現竟然入邊有位直接可以入去，所以二話不說即刻入去試吓先 🤣佢環境都算唔錯，入邊坐得好舒服。平日嘅下午見到入邊啲客有啲係遊客嚟嘅，可能係啲旅遊書都有介紹呢間鋪頭掛。佢啲落單姐姐好搞笑，送啲生煎包上檯時會係咁提你小心爆汁 🤣因為佢好出名我對佢都有啲期望架！可惜食落我覺得都係一般咋....佢個包可能已經煎好放左一段時間，外面已經唔係好夠熱啦，入面雖然都係熱嘅...個底suppose要系脆嘅，但好似頭先講咁，佢放得耐左影響左個口感。味道其實係幾好嘅，所以只能講係不過不失啦。…查看更多

呢排好興黑糖珍珠奶茶，所以特登搵吓附近有冇得飲。食完飯之後最啱飲番一杯台式奶茶、天氣又咁熱飲番杯凍野就最正啦。搜尋過後發現附近有一間叫春風撞奶專賣黑糖珍珠奶茶，話係自製黑糖同珍珠。行去見到人少少我哋即刻就買番杯試吓啦。飲落我覺得有啲太甜，可能係因為啲黑糖嘅關係啦....而問題係，佢冇得好似一般珍珠奶茶咁可以叫少甜或者半糖。由於我自己習慣係叫少甜嘅，而黑糖同珍珠都比較甜....所以呢杯嘢飲對我來講就有啲太甜啦....但其實佢珍珠係好彈牙嘅，食得出同平時果啲唔同。overall 黎講其實算唔錯，茶味都有係度，鍾意甜嘅朋友可以試下。我下次可能會叫黑糖奶茶配仙草，應該甜度減低啲，咁會比較啱我嘅口味。…查看更多

今晚要快速食個晚餐，就揀咗呢間自稱九州第一拉麵金田家黎試吓。睇吓佢有乜咁特別。雖然係晚市時間7點幾，但可能因為係平日，去到餐廳門口見到可以即刻有得入完全唔駛等。不過我哋食完嘅時候八點零就見到有人喺出邊等緊位啦。佢嘅餐單同一般日本拉麵差唔多都係得幾款拉麵可以揀。另外再加幾款小食。話晒係九州拉麵梗係要揀番個豬骨拉麵啦，我地再叫左個柚子辛口拉麵。另外配菜加咗木耳。我哋驚唔夠飽所以叫多咗兩個小食：一個係餃子另一個係薯餅。薯餅其實己有驚喜！佢係北海道男爵薯仔所以我expect佢會有薯仔味～佢有兩塊薯餅：紫薯同埋普通薯仔。兩件都係外脆內軟、入面好滑好creamy。但餃子就比較失色啦....好普通不過不失咁啦。黎到重頭戲啦！！拉麵出場～～兩碗拉麵上嚟見到個湯底好濃好香。柚子辛口個味道比較特別，的確有柚子嘅香，但我自己覺得同辣味唔係好夾。豬骨湯底就好好味啦我會比較推介揀返豬骨湯底。食拉麵佢個面都係好重要嘅！而今田家嘅面雖然係幼麵嚟嘅但唔會太過諗，都係有少少彈牙，所以係幾好食嘅。…查看更多

同一大班朋友食野唔唔到食咩最好就係打邊爐或者大排檔〜氣氛熱鬧大家又可以圍埋一齊坐吹水飲下野〜基本上唔會有人反對〜 不過香港夏天天氣太熱，我地今次就無去大排檔，黎呢間出名豬骨煲湯底ge骨煲王打邊爐啦。我地叫左兩個煲，一個正宗澳門豬骨煲，另一個鴛鴦湯，選了沙爹同鹹菜胡椒。 豬骨煲一黎，果然真材實料，滿滿都系豬骨，白蘿蔔同其他配菜。味道濃鮮，但又唔會太鹹蓋過打邊爐食材GE味道，的確幾好幾出色。另外值得一提GE系鴛鴦湯底個鹹菜胡椒有d出乎意料之外，胡椒味好香，鹹菜都好好味，都叫做清清地不會太濃味。 打邊爐除左個爐之外，最緊要係D咩阿？緊繫D食材要夠新鮮啦！呢樣真係好重要！雖然我無影到所有食材，但一般普通ge手打丸，餃子，菜都算新鮮。而肥牛都系好好好正GE，入口即溶！ 最後我地都有叫d小食......魷魚穌同墨魚餅，但太干味道麻麻，就不太推薦了。 加埋酒水最後埋單每人都系200松d，價錢合理，有機會會再返黎食GE〜…查看更多

去superpark玩前同一大班朋友食下午茶，隨便就揀左呢間係奧海城3期嘅餐廳，見tea set 好多選擇，價錢相宜，環境開揚，野食重幾靚幾Instagramable tim ：）佢啲擺設餐具傢俬都好配合返佢成間餐廳個主題，有一種好舒服嘅感覺，坐喺度傾計真係唔捨得走。朋友叫嘅吉列豬漢堡，塊扒外脆內軟，只係略嫌醬汁較少。豬排焗飯，多汁好味！芝士滿滿、邪惡滿分！本來以為下午茶份量應該唔多，點知超級大一份，肚餓嘅朋友仔叫呢個就啱晒啦。我唔算肚餓，所以就叫左呢個雞翼薯條餐望落好似有啲overcooked, 其實係因為啲香草所以顏色比較深色。雖然略為光左少少，但可以接受。薯條都係熱嘅，外脆內軟，係一般m記果種幼薯條最後壓軸出場嘅就係甜品soufflé pancake我覺得係水準之上，個pancake 係可以動L 嘅好鬆軟入口即化，而且好香蛋味！大家可以一試！唯一唔好處係等得較耐，20-30分鐘左右唔怕等都可以試吓呢一個㗎！…查看更多

因爲推住bb車，所以揀左坐出面諗住易啲照顧BB同餵BB食嘢。但我真係做錯啦....今日打緊1號風球雖然冇落雨但天氣超級悶熱，再加上無風扇，30幾度坐戶外真係唔係人人都受得到，BB都因為天氣太熱好似冇乜胃口食嘢。呢度早餐好多選擇，大約有20幾個揀。我叫咗個菠菜蘑菇煎蛋螺絲粉餐，加埋蕃茄湯底（可以揀清湯），超級大碗！如果唔係坐室外應該真係會好正好嘆。由於太熱，餐飲我叫左凍咖啡。坐室外仲有樣嘢唔好，就係好多烏蠅....成程費黎飛去，好annoying...我再另外加左個蝦餅，原來有成3大塊！！！一見到我已經嚇親，原來呢度啲食物份量咁大！好明顯我同bb係無可能食得晒，所以最後都係打包。講返野食，番茄湯不過不失，可以一讚係菠菜同蘑菇好多，可以食到好多菜，以外食黎講較健康，煎蛋係流心蛋，我鍾意撈埋食，都唔錯。凍啡同平時茶記啲咖啡唔同，比較濃味，有機會下次會試下叫個熱啡，先試到佢咖啡嘅真味道。蝦餅雖然夠脆夠大舊，但唔夠彈牙，勝在夠平、性價比高，可以一試。…查看更多

人都係好自私嘅好驚呢度介紹左之後會越來越多人黎呢度食。本身OpenRice好少人知道呢間隱世美食但附近啲街坊或者附近返工嘅人一定知道呢間回味館。中午時間一定坐到滿晒，有時要等位。我第一次過嚟食都係因為見到佢長期都咁多人所以先諗住試吓，點知一試就愛上了嘢食係超級好嘅但環境就一般啦唔算坐得好舒服，會有啲逼，同埋預咗要搭枱除非你四個人去食啦。佢一般lunch會有五至六個套餐俾你揀，40蚊左右。有埋杯飲品或者冇味精嘅湯，碗湯真係超正超級濃味。最多人揀就係一個蒸魚套餐，佢果碟魚係成條咁上嘅，唔係淨係一舊魚肉。另外啲小炒都係好夠火候，好有鑊氣。而我最鍾意食嘅就係佢嘅胡椒豬肚雞湯泡飯。個湯又係好濃味，胡椒味十足，料超級多，加埋足料鹹酸菜同埋少少杞子吊出個味道，可以話係抵食夾大件。我就算食唔晒啲飯都一定要飲晒個湯。…查看更多