hoiwun37的个人专页

台味係我由細食到大既餐廳，經歷過佢幾次轉手，但次次都係換湯唔換藥。無論係餐牌定野食味道，統統都無變過！我最推介既豬頸肉肉燥飯，呢個飯份量真係超多(FOR女仔黎講)，絕對可以同人share！一片片豬頸肉 ，大約都有10片，配上一個酸酸地既醬汁，味道似醋，又帶點泰式感覺，兩樣夾埋好好味！肉燥方面，鐘意佢落好多菇，令到成個肉燥都好香。不過飯我就嫌佢濕左ｄ，唔夠硬身。屋企人叫左個焗飯，白汁芝士雞皇飯。由於即叫即焗，所以都要等15分鐘到先有得食。飯量唔算多，但有芝士所以都幾漏，好易飽。個人覺得白汁唔夠creamy，雞皇份量都唔太多，要評分我既話就一般啦！最鐘意佢呢到係，轉台式飲品都係加兩蚊，大大杯珍珠奶茶都係兩蚊咋！抵到喊！…查看更多

夏日炎炎，每個人手頭上都總有一杯飲品，大埔墟火車站呢間天仁都排滿左人買野飲！由於今日氣溫有成三十度，今次都想揀返杯fresh既飲品飲！於是我同朋友就決定share一杯香橙綠茶。叫之前其實好懷疑佢match唔match，不過太熱真係唔想飲奶，所以就試下佢啦。一拎到杯飲品，發現天仁轉左個杯，換上左膠杯，同橙汁個形象都幾夾。飲落去，整體都算好新鮮，感覺似係用左鮮橙，因為有種澀澀地既橙味，唔係好糖水個種假橙味。茶底夾左綠茶又係好fresh既，清清地，絕對係我既夏日之選。…查看更多

天水圍糖水店唔多，食台式甜品更係少之有少。呢日經過天瑞，發現開左間食芋圓既糖水，即刻對佢心心眼。可能係閒日夜晚啦，唔算多人食。夜晚十一點黎到，本身諗住堂食，但見佢都開始執緊野，亦開始只做外賣，唯有買返屋企食啦。一睇menu，好多個糖水都好吸引，第一次食就梗係要試下佢個招牌大甲芋圓！而朋友就叫左個綠豆沙芋圓，兩個糖水合共都係$53，廿幾蚊一碗，價錢幾合理喎！招牌大甲芋圓，一開就見到大大舊芋頭，芋圓都有十幾粒，有大有細。大既入面有餡，細既就無餡。我個人就鐘意無餡多ｄ，因為芋圓本身己經好飽，有餡就仲飽，搞唔掂！連我咁鐘意食芋圓，都竟然會食剩d芋圓，就知幾飽。成碗芋頭味都幾濃，不過西米就少左ｄ，唔係啖啖都食到西米。朋友食既綠豆沙，合格既！值得一讚係海帶超多！而且唔太甜，岩晒深夜一食，無咁罪惡感。…查看更多

朝早返工，通常趕時間，都會係地鐵站買個包食就算。山崎既麻薯波波系列一向都係我既最愛！麻薯波波煙煙韌韌，口感好好食，而且細細粒，可以因應肚餓程度揀買幾多粒。佢set好左$9.5三粒，單獨買就$3.5一粒 。有時六粒又食唔晒，三粒又唔夠，我通常就會3+1咁買。個人最推介朱古力味，朱古力味夠晒濃，但又唔會好甜喎，仲會有朱古力粒添！芝士味就真係好芝士，如果食４粒芝士味會好飽，所以我個人介紹，三粒朱古力味加一粒芝左味，就岩岩好。溫馨提示：WEEKDAY 朝早9點左右，朱古力味同芝士味就會賣晒，經常都係得返綠茶、芝麻同士多啤梨味。　希望葵興地鐵站店可以入定多d朱古力味同芝士味啦，成日唔夠人快，黎到都見到賣晒，好失望。…查看更多

葵芳有唔少食店，但有得坐既唔多，一樓就有間韓國菜有得坐，今日終於黎試左佢個LUNCH啦。LUNCHTIME黎食都有LUNCH MENU，價錢就大約$50到啦，正正常常。我地叫左個便當SET，叫左個燒豬肉便當，佢配有３款小食同泡菜，辣豬肉份量都幾多，豬肉真係幾辣下，幾開胃！同埋幾多菜下，唔會感覺剩係食肉，FOR女仔黎講，都幾大份下架！ 另外同朋友SHARE紫菜包飯，味道合格，不過唔太特別。泡菜豆腐湯，一上台既時候我地嚇左一嚇，因為超紅超多油，以為會好辣。我地「筆」走晒Ｄ油，個樣即刻正常Ｄ，不過其實飲落去味道又幾好，辣度岩岩好！芝士雞蛋卷，味道較啖，亦不算特別。…查看更多

聰嫂甜品既分店佈滿各區，長期多人。可能因為元朗多糖水啦，競爭大，所以元朗既間經常有位！去親聰嫂，一定要點我最愛既龍眼冰。平時我好怕食冰，因為怕凍親Ｄ牙，不過龍眼冰係我唯一既例外。佢最吸引之處，就係清清地，唔太甜，而家食到陣陣龍眼既清香。甜味亦唔人工，感覺好似真係食緊粒龍眼緊。不過呢Ｄ龍眼冰有個缺點，就係唔可以食食下佢，食其他甜品，再食返龍眼冰。因為龍眼冰味道太清，一食其他甜品，味道就會蓋過晒佢！不過員工有D趕客，一食完甜品，就即刻收走我同朋友Ｄ碗，但當時其實無人等位架，店內都有空位。有時食甜品其實都係至在同朋友傾下計，如果甜品店唔係太多人食既話，希望唔好趕人走啦 >_<…查看更多

入長洲，個個唔係食大魚蛋，就係食芒果糯米池，今次同朋友入長洲想舒舒服服坐下，輕鬆一下，於是揀左入呢間好地道茶餐廳。下午茶時間，我地揀左好多大路野，估唔到有驚喜呀！西多士岩岩炸起，熱辣辣，脆卜卜，佢最特別之處係配煉奶，而唔係糖漿，呢個配搭唔係周圍有，好特別！朋友分別叫左草莓同藍莓多士，多士烘得好脆，而且用上厚多士，勁有咬口！黎到長洲，點都要叫下海鮮，輕食黎講，我地叫左雲吞同魚皮。雲吞皮夠薄，鮮蝦大大隻，好配無食過Ｄ咁有誠意既蝦餃！魚皮係自家炸，好鬆脆，陣陣魚皮香，當小食一流！平時去長洲可能唔易發現到佢，因為佢既位置較遠，近球場空地個面。不過係一間好有心既老字號小店，有機會去長洲要再去食！…查看更多

呢間邊爐真係無令我失望，好味兼抵食！今次我地BOOK左台食晚上7:30，7:30去到時未算好FULL，仲有唔少空台，不過愈晏就愈多人黎食啦，成場爆滿呀！餐廳既格局係舊式火鍋店，唔好預坐得超舒服，但勝在好有FEEL！湯底我地叫左蕃茄薯仔拼沙嗲，蕃茄薯仔湯底一上台嚇親，勁多料，佢係用新鮮材料即時煲個湯底，但由於料太多，要等佢煲起個入味既湯底都要幾耐下，所以我地一開始都係專心食沙嗲湯底。沙嗲湯底好香，又唔會太辣又唔會太咸，而且佢又唔會有煲燶既問題，由頭食到落尾都係咁濃味，一絕！蕃茄薯仔湯底都唔輸蝕，雖然等得耐，但係值架！個蕃茄勁甜，而且目測佢落左兩大個蕃茄落半煲，勁有誠意！佢既材料，基本上想食既都有齊。特別推介下Ｄ肉呀，好新鮮！牛方面我地叫左本地牛同雪花肥牛，兩款都好有牛味呀！本地牛就有口感Ｄ，煙韌Ｄ，不過相對瘦Ｄ。雪花肥牛賣相己經岩打卡，每片既雪花都勁靚呀，肥瘦岩岩好！其他食材我就唔特別講啦，都係基本野，不過款款都係份量多，而且質素唔差！唯一想講係蝦滑同墨魚滑麻麻，下次可以唔叫。另外，每款肉底都有大量菜托底，仲要係唔同款又新鮮既，可以慳返叫菜既錢，勁貼心！唯一缺點就係餐廳地點遠左Ｄ，係旺角站行過去行左成廿分鐘，奧運站相對近Ｄ，但都要步行一段距離架。…查看更多

東哥點心，係我元朗深夜既選擇，因為佢開24，而且點心食極都唔厭！東哥既點心，中規中矩啦。特別鐘意佢個荷葉鳳爪排骨飯，好香，而且好大個，如果自己食一個可以當一餐呀。另外我都幾鐘意金錢肚，好入味，好香，大大塊辣椒好SPICY，而且肚既份量幾多下～蝦餃亦係我幾鐘意既點心之一，皮薄蝦多大舊！不過某Ｄ點心唔夠熱，感覺上唔夠新鮮，特別係流沙奶黃包，唔夠流！好想叫佢拎入去再蒸返熱佢。至於燒賣同牛肉球就合格啦，無乜太大驚喜，合格既。…查看更多

好多人都向我推介呢南豐紗廠間珍珠奶茶，呢日假期紗廠人山人海，但我同朋友都忍唔住，一齊去左朝聖。知道佢係銅鑼灣都有分店，不過荃灣呢間大好多，仲有大量座位坐，行到累坐低飲杯野就岩晒啦。因為飲品本身無落糖，所以你可以自己再選擇糖份，呢個做法都幾SWEET，我同朋友都揀左微糖，下次有機會要試下無糖先。我叫左奶霜藍伯爵，茶底好清幾香，好岩女仔飲，唔怪得之叫英文名叫lady grey。奶霜比較杰，不過都夠咸味！奶霜上仲好有心咁擺左幾塊花瓣係上面，成杯飲品少女感十足。另外我就加左茶香珍珠，唔用黑糖改用茶黎浸珍珠，無咁甜，而家形珠有陣陣清香味，好鐘意！ 朋友叫左奶霜泰晤士，加鐵觀音茶凍。見佢英文都係寫EARL GREY，不過呢杯偏苦澀，我個人認為可以加到上半糖。鐵觀音茶凍係JELLY，幾特別，本身以為EARL GREY+鐵觀音可能唔太MATCH，但原來又唔會喎！不過佢價錢都係偏貴，一杯己經成$40蚊！ …查看更多

呢日慶祝母親節,屋企人鐘意食中餐,所以近近地就揀左屋企附近既上海菜!一入到去坐，經理己經同我講片皮鴨買剩2隻，問我要唔要一隻，於是我就拿拿臨叫左一隻先。片皮鴨係會即場幫你切，隻鴨都幾細隻下，切左出黎大約只有12片到。不過佢算平，$138連一打薄餅同配料，有青瓜蜜瓜同醬料。薄餅薄到透光，片皮鴨好有油香，幾好食喎！由於一鴨兩味，另外一味我地叫左鴨絲粉皮，粉皮幾有咬口，呢碟野炒得幾香口，但個人認為如果可以加Ｄ辣既話效果更佳。奶油津白幾有驚喜，好CREAMY，汁同菜既比例岩岩好。上海炒年糕一上台就覺得個色水差咁Ｄ，所以味道都係差咁Ｄ，有Ｄ失望。醉雞同樣唔夠入味。松子魚味道就幾好，又夠多汁，不過細條左Ｄ！仲有叫左小籠包同生煎包，兩樣都合格，不過就唔好期望超好食啦。全晚最失望一定係甜品MENU，本身餐牌上己經得好少選擇，連高力豆沙、豆沙鍋餅呢Ｄ基本甜品都無，我同屋企人睇中左佢既薑汁糕，但結果叫個時賣晒，但我明明個時只係夜晚八點左右。希望甜品方面可以改善下啦。…查看更多

其實九龍城點止泰國菜出名，清真牛肉館同樣出色，一樣值得推介。個人最喜歡佢既牛肉餅，每次食都會爆汁，勁JUICY，但要超級小心食先得，因為有Ｄ熱得制，仲唔小心辣到個咀。另外一定要食係咖哩羊腩，咖哩好香，唔會太辣，配埋陣陣羊羶，最岩送飯或點薄餅。咖哩羊腩可以散叫可以配飯叫，個人推介配飯叫。朋友最愛食呢到既賽旁蟹，先係佢賣相好完整，而且入面蟹肉超多，真材實粉。海哲雞絲就比較大條，好粗身，呢個唔算超特別，唔一定要食。…查看更多

美心今年推出幾個母親節SPECIAL蛋糕，賣相就唔算超特別，不過價錢唔貴，而且蛋糕主打士多啤梨，我同屋企人都好鐘意士多啤梨，所以今年就決定揀美心蛋糕啦！最後我揀左瑰麗雜莓蛋糕，雖然賣相佢唔係最靚個個，但勝在細細個，岩岩好。如果係三日前訂蛋糕，仲會有EARLY BIRD優惠！蛋糕新鮮生果唔算多，不過入面有一層果食落士多啤梨JELLY都幾有咬口。海綿蛋糕夾雜士多啤梨MOUSSES，士多啤梨味好出，岩晒士多啤梨味控！…查看更多

民華既常餐都算係我幾喜歡既常餐之一，雖然佢都係配搭都係一眾配搭，但我鐘意佢係湯粉幾特別。常餐多士可以揀烘定唔烘，即烘多士上台脆卜卜。揀左炒蛋後仲可以配多樣材料，我就揀左餐肉夾包食。面食方面我揀左蕃茄叉燒通，蕃茄湯好濃味，加埋辣油會更惹味，仲可以用黎點包，叉燒亦好多，數落都有５塊以上，幾有誠意。朋友就食左個蒸飯加奶油多，蒸飯就唔算太特別，不過用瓷碗蒸既。佢重點推介奶油多，因為真係奶夠多，油多厚，超級邪惡好味之選。…查看更多

放假先黎落大雨，出唔到街玩，最好梗係搵間café chill下啦。呢間café都幾隱世下，係一個唔太起眼既舊式商場入面，我同朋友唔熟路，都搵左一陣路先到。兩點鐘黎到，坐無虛席。上網見到話佢到最出名係burger，我地當然要叫返個啦，叫左是日推介既牛油果塔可牛堡，另外再叫左個fish&chip，飲品方面就飲左杯latte 同flat white。呢到環境唔算超級正，因為地方比較細，所以台同台之間既距離好近，我絕對相信隔離台係會聽晒我同朋友講乜。不過就算地方細，呢到都唔會話食完就趕人走，任坐唔嬲，所以都岩同朋友叫杯飲品傾下計坐下。講返野食先，牛油果塔可牛堡，size都幾大下，好厚既一層。本身就咁睇，我唔係好見到有牛油果，反而最搶鏡係有一層墨西哥薯片。一食落口，ｄ牛油果就爆晒出黎啦，而且墨西哥薯片令漢堡有種好香辣既感覺，加埋芥末醬，好開胃！配菜仲可以揀薯條或沙律，薯條份量都幾多下，一個人食晒應該會好飽。另外既炸魚薯條，上台叫己經見到炸魚非常大碌，以為炸炒會好多，點知又唔會喎。反炸皮好薄，食落係啖啖肉！而且對女仔黎講，個炸魚又係超巨型，一定要share呀！唔小心發現叫左好多薯條，但薯條同樣出色，熱辣辣，好脆口，每條都好有薯肉！飲品方面就叫左latte同flat white，可以轉做skimmed milk底，飲品不過不失，size第一隻，唔係好大杯，我杯latte上台時亦唔夠熱，不過價錢唔貴。食完發現，佢無收加一！以呢個質黎講，好抵呀，一定會encore！…查看更多