angelloyinglam的个人专页

由於openrice有六折優惠，所以就預訂咗座位嚟食，去到都有好多人食，證明呢間餐廳有番咁上下口碑，我同朋友分別叫咗一個三文治同一個意粉。分量都好大份，而且有六折優惠，所以就超值咗好多，但係要留意飲品同甜品係冇六折，所以呢度就貴返，三文魚黑松露意粉好足料，啖啖都食到松露嘅香味。而飲品就有一個水泡裝住，感覺好有趣，而且亦都可以帶走嘅水泡返屋企。 最後叫咗一個心太軟同芝士蛋糕，心太軟嘅朱古力味好濃，芝士蛋糕都唔錯，但係份量偏少，如果可以嘅話就另外畀朱古力醬客人淋上去。…查看更多

夜晚口痕想食日式餐廳，但已經差唔多九點，有餐廳已經準備閂門，見到呢度有一間日式餐廳就上去睇下，喺門口見到價錢都幾平就行到入去食。見到餐單上嘅選擇都好多元化，有壽喜燒有刺身飯，有天丼等等。我就選擇咗火炙刺身飯，然後加大約二十幾蚊左右就可以有一個餐，有埋麵豉湯，沙律同埋茶碗蒸。火炙刺身飯刺身比較少，如果可以多番少少刺身同燒耐小小會開心啲，因為食落去有啲刺身比較韌，沙律菜同麵豉湯正常水準，茶碗蒸蒸得比較老，同有啲太實， 希望下次去可以改善下。…查看更多

適逢到信德中心時為放飯時間，人龍絡繹不絕， 見到有老媽拌麵，突然有食台灣面嘅衝動，就行咗入去食。由於依間分店應該主要做外賣生意，所以堂食位只有大概四至五個。叫咗一份清燉牛肉麵，然後可以加18蚊有冷泡茶同埋一份燙青菜，可能因為節省人手，所以就算係堂食所有餐具都係用即棄餐具，感覺有少少唔環保。清燉牛肉麵麵底比較少，如果比較大食嘅朋友就可能要加一加底，牛肉有三舊，尚算大塊，不過好彩有一份好大份嘅燙青菜，所以就飽反啲，跟餐嘢飲我揀咗鳳梨茶，菠蘿切碎咗令入口更加容易，不過可能冇搖勻，所以會有啲茶冇菠蘿味。…查看更多

有親人告知有網站推出買一送一套票，以大約三百多元就能品嘗八道菜式，仲可以喺1881度食，感覺很超值所以就即刻買咗。購買過程好方便，只需要選擇用餐日嘅日期同時間，就可以唔使再打電話去預約，直接去到食就可以。餐廳侍應好有禮貌，唔會好急咁樣放低曬咁多樣嘢食，會見你差唔多食咗一道菜，先放得下一樣而菜式，份量都啱啱好夠飽，唔會因為價錢比較平而有所減少。而我最鍾意就係食佢嘅灌湯餃，因為湯非常清甜，而且亦都有灌湯餃入面嘅材料亦都好豐富，乳鴿亦都十分之熱辣辣同脆口，十分之推薦大家嚟食!…查看更多

呢座大廈本身都有好多好嘢食，但由於撞正食飯時段，好多餐廳都冇曬位，見到呢度有位就入咗嚟食，午市餐單有唔同選擇，有飯，有意粉，有沙律，我今日就揀咗漢堡包嚟食。不過見到價錢相比起其他同區餐廳都算係比較中上嘅價錢。 漢堡包份量都好大，漢堡包嘅牛肉感受到係好新鮮製作，而且啲肉色唔係冷藏肉嘅黑黑實實嘅顏色，而且配埋薯條一個人食就點都夠曬飽，而且餐亦都包湯或者沙律，我認為沙律醋同蔬菜好夾，另外都可以配嘢飲。餐廳都好貼心，喺女厠入面亦都放置咗一啲衛生用品，有需要嘅女生用應付燃眉之需。…查看更多

琴日由四小龍行去美孚，尤於行到比較近美孚巴士廠，加上天氣炎熱，所以為咗更快祭祀五臟廟，決定到最近嘅曼克頓山食飯，一去到見到元氣比較多人，所以就上到樓上搵食，本身諗住食意樂，但係見到隔離間漁樂四十蚊左右就有一個迷你海南雞飯配碗仔翅，仲包埋紅豆冰🤩見到好似好吸引，就即刻衝去排隊，但可能好多居民都知道呢度有下午茶，所以都要排隊，但係排咗十分鐘之後就可以入座啦，嗌咗海南雞飯餐之外，都嗌咗個超平嘅河粉餐，都係四十蚊左右仲包埋紅豆冰，不過朋友表示冇興趣，所以都係加多幾蚊飲凍檸茶就算。海南雞有一啲部分比較鞋，要用多啲時間去咬，但啲飯配埋佢哋嘅豉油就幾好食碗仔翅都唔錯，不過我建議可以麻油另上，咁就可以方便啲唔食麻油嘅朋友，紅豆冰略嫌淡味，如果可以多番少少紅豆就更加好。…查看更多

今日到咗黃大仙中心搵食，見到依間今日唔使點等枱就入咗去食，大概等咗十分鐘就可以入座， 午餐嘅選擇好多，有飯有意粉有pizza甚至有拉麵，可以適合自己同朋友唔同嘅需求，方便各自唔同選擇，但可能因為防疫問題，所以啲位都分得比較開，而且有啲位坐得比較迫夾，兩人座位要打側身先可以入到😭， 今日嗌咗 pizza，烏冬同埋一份薯角，再加白汁煮蜆。份量適中，150蚊食到飽一飽都算唔錯，不過略嫌pizza太多汁，員工態度十分之好，喺埋單嘅時候好清晰可以知道一定要用八達通先可以有泊車優惠。 埋單只可以揀用八達通或者現金，平時用開信用卡嘅朋友要注意一下。…查看更多

康瑞芋圓不嬲都好出名，係冇得堂食嘅時間都可以外賣食。今次都係外賣，外賣更好嘅地方係唔使等，平時等堂食都可能要等成半個鐘頭先入到去，等外賣就等幾分鐘已經有。而外賣價錢同堂食一樣都係26蚊，26蚊可以食到頂級足料又好味嘅芋圓真係爽。康瑞芋圓亦都有唔同嘅味道可以選擇，而今次就買咗椰汁西米露芋圓同埋蜜棗雪耳芋圓，蜜棗雪耳糖水芋圓非常滋潤，適合唱完歌嘅朋友食。除咗芋圓之外，佢哋嘅湯圓其實都好好食，大家可以下次都試下。…查看更多

呢間餐廳算開咗冇耐，見到佢有一個定食套餐，所以就入咗去食。入到去都有唔同牛肉豬肉雞肉套餐都有，三個人分別叫咗壽喜燒牛，生薑豬，同照燒雞套餐。不過套餐只係有麵豉湯，唔包飲品，如果百幾蚊一個套餐就有啲唔太化算。壽喜燒餐味道算唔錯，而且份量上算大份，就算幾大食都有一定嘅飽肚感，不過入到門口見到佢哋已經一早將一啲小菜同配菜放曬喺餐盤上，而且冇冚，衛生上可能未必咁好。不過餐廳算細心，會分開放蔥或者芝麻，等唔食芝麻糊或者蔥嘅朋友唔使夾返出嚟。…查看更多

本身想食同一棟大廈樓上嘅餐廳，但係因為等升降機等得太耐，所以就轉咗落嚟呢間餐廳食。環境闊落，而且亦有卡位坐，枱上面亦有兩隻蟹仔喺個兜仔度切合返餐廳嘅主題， 而且凳隔離亦有兩隻蟹嘅公仔喺度邊畀你攬住食。今日嗌咗蟹飯套餐同一個烏冬餐，另加一份蟹子沙律同天婦羅，有嗌餐下可再追加餃子同埋蟹餅。份量偏小，比較大食嘅未必夠飽，蟹飯套餐亦包括麵豉湯同前菜等，烏冬套餐則有蟹肉拌蟹膏，蒸蛋等等，蟹蒸蛋十分之好味。食物擺盤精緻，食嘅時候亦都有視覺嘅享受。…查看更多

去完迪士尼後，搭車到最近的青衣城搵食。呢間餐廳曾經喺元朗嘅分店幫襯過，我覺得唔錯，所以就再嚟呢度幫襯。一如既往，呢間餐廳都係好多人排隊，所以今次都係要等至少20分鐘先入到。照舊嗌咗一個，冷烏冬配天婦羅，再加一個茶碗蒸同兩嚿茄子。烏冬分量偏少，烏冬配上凍冰冰嘅麵汁，再加脆卜卜新鮮炸起嘅天婦羅，味道甚佳。烏冬餐唔包嘢飲，價錢有點偏貴。但出奇地茶碗蒸幾好食，下次再去嘅時候可以再嗌。呢間餐廳有用餐時間限制，所以如果係希望可以同朋友長談嘅話，就未必係適合嘅地方。…查看更多

海景嘉福酒店staycation包三餐， 其中晚餐可以六點入座或者八點三😛咁我就揀咗八點三入座。一入到去店員就好有禮貌帶我哋去位，然後放下兩杯氣泡酒同一堆麵包，麵包十分脆口，質素唔錯。然後就有一個蟹肉凱撒沙律，蟹肉分量相對較少。 然後就上大蝦意大利飯，隻蝦都十分爽口，而且飯嘅份量都十分之飽肚。最後奉上 一個咖啡杯咁大嘅tiramisu，為呢個晚餐畫下完美嘅句號。中途都會有店員問下食物啱唔啱胃口🙏食飯嘅過程中，店員都會睇你食飯嘅進度先再決定會唔會放低下一道菜，唔會有趕住要你走嘅感覺，十分好😛…查看更多

先講環境，空間比起別天神寬敞好多，而且位置數量亦都較多，歡迎各位同學成群結隊去食， 即使係坐吧枱位都感受到寬敞嘅感覺，而且凳下面有位置畀你放袋，安排貼心佢而家有大學生買一送一優惠，絕對值得懲罰， 然後嗌多咗一個章魚燒先講拉麵， 相比起別天神我覺得佢嘅湯底係冇咁濃，但係有一種清甜嘅感覺， 而我覺得飲落去係比別天神濃濃嘅感覺舒服好多，麵嘅份量亦都係好足夠，一碗其實已經可以夠飽，而湯底加咗蒜蓉之後味道係濃好多，適合鍾意重口味嘅各位同學價錢：75蚊章魚燒方面，由於係即叫即製，所以係熱辣辣，而外皮亦都係脆卜卜，一個章魚燒入面大概有兩個章魚粒，而加醬令到章魚燒豐富咗口感，所以我認為章魚燒係絕對值得推薦價錢 ：35蚊唯一批評就係拉麵唔包溫泉蛋，要加十蚊，感覺上溫泉蛋嘅味道同口感冇別天神咁好， 性價比會比別天神低少少要注意嘅係間拉麵舖只係接受現金所以就要帶定足夠嘅現金去食，而別天神可以接受幾個付款方式，包括支付寶，八達通，信用卡等等較為方便…查看更多

今日叫咗蠔仔泡飯，乾炒牛河同埋雲吞麵，性價比非常高，全部份量都是10分大份首先講蠔仔泡飯，完全意想不到地見到有好多蠔，而且一啲都唔腥，但食嘅時候食到洗唔乾淨嘅蠔殼醉，有點失分，肉醉份量亦10分足夠，10分入面比個7分佢la!!!然後講乾炒牛河，有獲氣同河粉份量10分足夠，唔算好油最後講雲吞麵,雲吞好大舊，麵條有彈牙之感，湯底飲完都唔覺得口乾…查看更多

叫咗生牛肉河，春卷，茄汁牛腩同椰汁三色冰生牛肉河k多牛肉，總體尚算足料春卷:嚟到熱辣辣，唔會凍冰冰，春卷好脆，茄汁牛腩:唔算太食到茄汁味，但牛腩都算幾大嚿，同埋附送嘅發酵餅唔係好夠用椰汁三色冰:尚算足料價錢:頗貴環境一般，要坐得比較迫，如果空間可以大番小小會好d…查看更多