wmyemily的个人专页

川菜這些年在香港越開越多，質素很多時跟價錢也就不一定成正比。這家在佐敦的雲貴川店小小，已在佐敦多年，我也幫襯過好多次了，在很多人眼中覺得比較簡陋，但食物卻是一流啊!!! 這些年來吃過多少川店也好，總有時候會特別掛念這裡的食物，要特意來吃一趟。我每次都一定要點口水雞，我覺得係全港最好食之一。雞肉嫩滑又大份，汁又辣又麻，不像其他一些口水雞得個油字但個汁係淡味而雞肉又實的的咁，呢度既口水雞永遠無敵呀！再叫了三絲冷麵，麵條爽口彈牙，稍嫌火腿絲少左啲，但芽菜同韮菜入哂味撈埋個辣汁正係好好食呀~另外再點個夫妻肺片，大大碟，無論牛栢葉肺片或牛筋都好多，最緊要個麻辣汁好味！又麻又辣，食完個咀腫哂超爽~呢度我食親都叫中辣，每次都滿足地離開！希望這小店長做長有呢！…查看更多

每每去到蘭桂芳多數都係食日本野、意大利或法國餐, 不然就是去bar喝酒食bar food。之前見朋加話試過好食, 對於我呢個鍾意越南野食既人黎講仲要有酒飲!! 實在難以抗拒, 終於搵日黎試。佢本身地方原來唔大, 真係冇book枱既話friday或weekend應該未必有得walk-in。我地今晚多人食, 所以好開心可以點好多野食, 又叫左幾支酒, 真係盡興~當晚叫左招牌肉丸、炸春卷、炸蝦餅、牛油蒜香雞翼、櫻花蝦炒通菜、扎肉法包、三色扎肉米紙卷、再黎個超級宿醉回魂粉, 超飽!!肉丸肉味香又多汁~春卷熱辣脆口但份量較少份量, 我們要叫兩份呢蝦餅又熱又香又彈牙!雞翼蒜味牛油味香口~扎肉法包多料惹味, 店主亦貼心幫我們切好足夠多人分食呢三色扎肉紙米卷包得扎實又好味, 但個人認為黑松露的味太強, 蓋過了本身的味道, 其他兩款帶子和鵝肝醬, 我戒食鵝肝及同類食品所以只吃了帶子, 是我覺得三款中最鮮又好味。通菜有櫻花蝦既鮮辣又香氣滿溢~再黎高潮回魂粉, 蝦肉大隻、牛丸彈牙、安格斯牛肉味濃、湯底熱但牛味稍嫌不足, 粉滑粉量夠!整晚真係飲飽食醉, 感到非常滿足~…查看更多

一路都覺得, 中國點心同wine係超夾的!! 硬係覺得香港可以食點心既酒吧唔多... 一路都聽聞dim dum library 但未有機會試, 今日剛好有事去金鐘又中間有時間食少少野, 就襯機會去幫襯一下。其實我好鐘意坐bar枱, 覺得好relax又可以望住bartender整野飲, 自己一個人更加喜愛坐呢個位置。去到冇咩人, 坐得幾舒服。可能冇happy hour, 所以5-6點都唔算多人, 坐坐下就多左人入黎食dinner了。點左一杯sauvignon blanc, 因為之後可能再食晚飯但又肚餓, 就點左蝦餃、菜苗餃同埋佢最出名既擔擔湯包。其實好掙扎要唔要點原味湯包, 但既然佢話呢度最出名係擔擔味, 咁我就試下啦。我估係即叫即蒸 (呢個級數既餐廳都應該係咁既), 等左一陣就黎左蝦餃同菜苗餃, 我叫的是普通的水晶蝦餃, 大大粒冇痴埋一齊, 亦沒有一夾就爛, 吃下去蝦肉爽口好味, 係稍覺得蝦餃大粒左少少, 冇辦法一啖食哂。菜苗餃望落精緻, 有半隻蝦放係餃上面以為會食得好論盡, 但又唔會, 佢唔會一咬就散開哂, 我覺得手工好好呀! 菜足蝦甜, 好味呀。另外至出名既擔擔湯包都上埋了, 對於食得辣既我黎講, 當然唔算辣, 有少少花生加少辣, 係擔擔麵的味道, 但.... 超鹹!!! 湯包佢本身既湯係精髓, 佢係好多湯汁, 但太鹹了!!! 我覺得原味應該好啲 (雖然我冇食到)。辣味既湯包當然係gimmick, 但味道...似乎要改善一下了。整體感覺不錯, 亦不是非常昂貴, 以這類餐廳格調來說是可以接受。要找天來這裡試其他點心了~!!…查看更多

見不同openrice的comment都是說及晚市, 雖未有機會一試, 但今日見冇咩新店好試, 就看下午有何好吃。來到已時下午茶時間, 有午餐或下午茶可點。很多都看似很美味啊, 跟我看到晚市的comment不同, 午市及下午茶是亞洲和西式的港式fusion 哈哈~ 既然第一次來試, 就點一些經濟一點的先試試看, 點了下午茶, 兩人合起來不過$90, 非常實惠。同行點了喇沙雞扒麵、我就點了蕃茄天使麵配豬扒。可能新店關係, 伙記有點手忙腳亂, 但很有禮貌, 也不錯啦。我的餐本來是配西多但來了多士, 我也不太介意, 伙記發現後想再加西多士給我, 我怕吃不完就禮貌地拒絕了, 不過對他們有禮的態度很有印象。同行點的喇沙來了, 喝了一口湯, 非常ok!! 我吃辣的, 這湯喝下去很辣呀!! 不是平常只有微微微微的辣加重椰奶味。很對我口味, 開始後悔沒有點喇沙.... 麵底不是傳統的油麵或米粉, 雞扒燒得很嫩不會乾柴, 很喜歡。我的蕃茄天使麵不錯, 湯底濃郁多蔬菜, 豬扒另上但帶有醬汁, 我覺得兩者不太配合, 結果分開吃, 但豬扒燒得很好也沒有乾柴, 但相比下, 雞扒應該較好吃。這次試過之後, 真的非常有興趣來試一趟晚市了~!! 希望keep到水準啦~…查看更多

台灣牛肉麵無論在台灣或以前在香港都是平民食物, 當然, 台灣的好幾家有名的都是香港人熱點, 跟日本拉麵一樣, 食過當地的就覺得香港的唔夠好食了。但近幾年過江龍越黎越多, 各種食物開始唔駛飛過去係香港都陸續有得食, 當然, 水準如何各人評價不一, 但比起以前, 的確現在幸福多了。日本拉麵熱叫做暫緩了, 隨之而來是越南牛肉河, 而近來台灣的牛肉麵也在香港越開越多。今年最多人留意一定是何家千金開的牛肉麵店, 我當然非常想試囉, 但一見勁長龍就打消念頭, 直到最近見少人排隊了, 就決定一試啦。星期五晚上居然不用排隊就可以入來, 或者真是港人嘗鮮的熱潮已過。店員有很禮啊, 雖然我未齊人但怕我太熱, 就著我先入座等候。入座後不久就點菜了, 本來想點個紅燒牛肉麵, 但見有麻辣牛肉麵, 還是忍不住點了麻辣中辣三合一牛肉麵+麻辣鴨血+肉燥燙青菜。先來個麻辣鴨血, 鴨血口感好, 不會一夾就散, 但麻辣味不夠, 沒有入味。再來個肉燥燙青菜, 一般香港都會很多油而且汁多得浸過菜, 但這裡沒有過份油膩, 肉燥不會很肥又甜甜鹹鹹的, 非常喜歡。再來主角, 麻辣牛肉麵三合一, 有牛腱、牛筋、牛肚。很豐富! 超多肉的, 我都吃不完要分出去, 牛筋非常軟淋, 很喜歡。因為最近減肥的關係, 沒有點拉麵但點了冬粉, 量剛好又入味。湯頭就老實說, 或者因為麻辣關係, 但個人覺得牛味不夠厚重, 與台灣吃過的牛肉麵/甚或麻辣味的還是有點距離。同行的甚至覺得與某款台灣即食麵的湯頭很相近, 而麻辣味就麻不足。老實說, 98蚊一碗, 確實貴, 但考慮到在銅鑼灣及灣仔間地舖, 也明白為何要這種價錢。有一樣不太OK就是, 可能夏天的關係, 真的很熱, 店內冷氣不太夠, 而且自動門不斷開開關關, 基本上有冷氣都變得冇冷氣了, 開門後街上的熱氣都衝入內了, 再加上吃著熱食, 越食越熱, 老實說, 夏天真的不太能享受。當晚我們吃完已滿頭大汗, 快快就埋單走了。第一次不算太覺得要回頭, 但我還是想再試一次紅燒牛肉麵, 希望能試一次真味。但或許要等冬天或涼一點再試了....…查看更多

聽聞呢間又有辣食又有海鮮盤, 中哂我, 於是就訂位去食啦。黎到早左, 我兩個人食, 本來安排我坐廚房出口位, 咁岩就有人推車出黎撞到張櫈, 咁點坐呢? 於是我堅持下就換左前一張枱, 不過, 真係都迫呀, 呢個真係香港土地不足同租金高既問題了, 唉。一坐低已經知要食咩, 點左兩人份8款海鮮、麻辣中辣, 再加四款小食: 土豆粉、豆卜、冬瓜片、白蘿蔔。啤酒當然唔少得啦!!之後就有伙記放低兩個貌似保險套既膠手套同濕紙巾, 幾得意既, 都係gimmick野呃like啦。可能得兩人份, 所以冇openrice見到啲相咁勁, 但都幾大份呀, 伙記點著左個火放好個盤就倒麻辣湯落去。本身我見海鮮都係熟哂但當然我就等佢慶熱左先再食啦,  一邊等就一邊係咁勁影相, 但.... 等左我估有10分鐘, 點點滾熱既樣都冇, 我仲係度諗, 係咪個冷氣直吹我張枱所以熱得慢呢? 又或者, 可能因為佢個火只得一條芯所以咁大個盤有排都熱唔起.....? 呢個時候有類似經理既伙記埋黎, 話其實海鮮已熟食得架啦, 海鮮係應該「暖食」, 因為滾得耐會霉.... 我覺得係有啲奇既係, 呢個話哂都係中式食法, 中式野永遠係熱食好食, 點會暖好食呢? 佢既食法好似食雞煲或者係食烤魚, 都係熟左但會放係電爐、gas爐上勁火去整熱佢食, 熱辣辣先好食架嘛!不過經理咁講我地又等左好耐好餓就食啦, 當然, 食落口真係暖身啦, 因為個火太細熱唔起成兜海鮮。我地點左麻辣中辣, 食落冇咩麻味, 辣度似小辣多過中辣 (唔排除我食得辣所以覺得唔夠辣既...) 對食開麻辣四川野既我黎講就唔太夠味勒。至於最重要既海鮮.... 我有少少失望。量係好多, 我亦都預左辣味會有機會蓋過海鮮既鮮味, 但食落口感你就知唔係好新鮮, 好多都不是爽口, 係淋身, 因為好似蝦呀、貴妃蚌呢啲一咬落去就知, 我唔可以話唔好食但可能將價就貨, 3百幾蚊一位又咁多款, 未必真係做到下下勁靚。有個意外發生左, 就係話說我食個蟹鉗時, 以為好易咬開啦, 一咬.....!!! 個鉗啲勾原來好勁好細!! 勾住左我既肉!! 嚇到我又痛到我....!! 冷靜落黎慢慢勾番出黎, 好在幾下之後俾我整番到個鉗出黎... 但我咁大個人食蟹第一次勾到我咁痛仲要勾住牙肉咁耐幾乎整唔番出口腔!! 真係嚇到了....!! 之後我即刻叫伙記俾個鉗我夾蟹。我覺得我自己咬到係我唔小心啦, 但其實個海鮮盤點都一定有蟹既, 點解唔每枱都放定個鉗係度俾人用呢? 個蟹唔係大隻係會有個錯覺用口咬得爛架... 呢下真係要改進啦。加左既小食, 最正係豆卜同土豆粉, 索哂汁點食都咁正既。但白蘿蔔同冬瓜片因為有啲切得厚身有啲薄身, 變成厚身既因為個兜整極都未滾熱, 所以都好難煲得淋.... 呢下就差少少勒。其實兩個人食完成兜海鮮加小食已經好飽, 我就冇再試佢既串串了, 再加上可能早埋單有75折確實係驚喜, 不過食物質素同個環境未必能令我再回頭, 都係一試就夠。…查看更多

呢期興食船麵, 話說行開尖沙咀經過見到泰麵膳, 記得佢係sell船麵, 就趁機入去試轉啦。之前食過灣仔好貴果間, 覺得overpriced左, 呢間既船麵就經濟得多, 幾十蚊一個餐仲要有小食飲品。點左安格斯牛肉船麵, 湯底顏色深不見底係我呢啲濃味人至愛, 飲落好濃牛味+八角花椒等香料既味道, 聽聞有豬骨湯底混入添但我又未係好飲到....麵底可以揀幾款唔同既麵, 聽左個伙記話黃麵好食而我又未食過於是點左黃麵, 食落好似我地中式既蛋麵texture但煙韌少少, 索哂湯汁食好正呀。安格斯牛不錯, 以呢個價錢黎講食物質素都公道。小食點左豬頸肉, 個汁好香口少少辣, 豬頸肉爽口燒得好香。尖沙咀呢個價錢又有呢個質素, 坐得又舒服, 好過食灣仔果間又要排隊又要俾舊幾水食啦....…查看更多

聞說大坑開左間澳洲菜，其實澳洲本身既菜式係跟英國為主，又因為移民國家既關係就集各國之大成，所以都想黎試一試。黎到叫個生蠔先，好鮮味，海水味夠又爽口，正。朋友係好愛Burratta，雖然我一般但都冇所謂啦。佢有honey、stone fruit加埋，食落又幾fresh 既。　我都係鐘意食肥膩野，見到有bone marrow一定要點啦。嘩，燒得好香，bone marrow肥到呢...加埋佢既toaste有mushroom mayo加埋一齊食，好味~再嗌多個Pasta - Chilli Crab Angel Hair，好好食呀，係嫌個汁勁得制，變得好水。多蟹肉又鮮味。選擇係唔算好多，但價錢同食物質素都成正比呢。…查看更多

見好多日本人食，星期五happy Friday 決定一試。好彩一早訂左位，當晚7點幾後已不斷有人想walk-in都冇得入，中環真係唔訂位好難有飯開。坐低左見朋友未到，就叫個sake先啦，呢度係幾多不同既sake選擇，忘了我飲既係咩了...等緊朋友但又肚餓就黎個前菜先，叫左個燒明太子同芥末魷魚，覺得明太子燒得乾左少少。朋友黎到，就點野食啦。去親居酒屋或食串燒都會想點個免治雞肉棒食，好多地方都冇加蛋，呢個會扣分。好在呢度有呢，食得好滿意。煎蛋卷又係我去居酒屋一定要點的，基本上食呢個都知間野得唔得。可惜，個蛋卷略嫌乾身，唔好濕潤，唔係特別好食。再點左個雞軟骨，燒得好好，好香。加個佢出名既沖繩苦瓜炒雞蛋豆腐，好食既。其實仲點左條魚同埋類似燒pork belly，但因為唔太記得係咩黎，費事寫勒。但整晚個印象係，酒係好飲，但食物唔叫好出色，個價錢亦都唔平，所以有得揀既話，真係仲有好多選擇，未必會特別再黎。…查看更多

由唔知幾時開始，一碗Pho由$30-40幾蚊碗變成而家郁啲$80-90蚊碗既湯粉，過百蚊都係閒事。亦都越黎越多外國回流既香港人掛住外國既湯河味道，於是係香港開店希望食得番。當年我係澳洲讀書都係食好多當地越南華僑煮既地道越南食物，莫講話係Pho啦，好多食物都響香港食唔番呢。呢間既店主又係響加拿大回流返黎，但價錢係so far最親民。點左個安格斯生牛肉湯河，特別既係個湯底帶有小小藥材味，但又未算好濃牛湯味，個粉就幾滑呢。主菜生牛肉話係安格斯牛，不會太薄食落牛味香濃有嚼頭。加左個越式蔗蝦，都彈牙好食既。總體味道就不過不失啦，價錢$45一碗細碗未必夠，加個小食就應該先夠飽勒~…查看更多

不嬲鐘意食辣既我地，見到有麻辣粥仲唔走去試？平時食粥少去海皇粥店，今次就試下啦！點左麻辣豬膶肉丸粥中辣，我地叫左兩碗就各送一款小食，於是加個齋腸粉和+$5 upgrade去麻辣叉燒炒麵，再外加一個個XO醬煎蘿蔔糕，唔怕唔飽啦？先上左個齋腸粉和蘿蔔糕，腸粉雖浸響豉油到但未至於勁鹹，腸粉好滑，豉油鹹甜適中，我加埋甜醬辣醬食真係食唔停口。(肥死啦!!)XO醬蘿蔔糕就似蒸多過煎，一夾就散，但都食到一條條蘿蔔既，只係個XO醬只得死鹹，比較一般。終於黎主角，第一啖食落似係打邊爐既麻辣湯煮一樣，我開頭以為自己會遇到劣食，但食落又不差喎，唔太有想像中既違和感。個豬膶同肉丸就正正常常，冇咩特別。不過我越食越驚，因為諗到真係好似飲麻辣湯既感覺，即刻覺得碗粥😍超高鈉！所以最後都唔敢食哂...最後黎埋個麻辣叉燒炒麵，鹹到一個點！我食得鹹都覺得頂唔到，食到啲醬明顯都未炒開，食兩啖就放棄了....呢類食物我都係當獵奇經驗，一次就夠了~…查看更多

我未試過食越南錦麗，不過我相信好食既去到邊都會得人欣賞既。當錦麗響apm開果陣，我都排過一陣去食，當時覺得係不錯但又未去到人地講超好味既地步，心諗可能自己食得少所以覺得無謂comment，但之後香港越開越多唔同小店，食得多左自不然開始有少少要求。(不過我覺得十幾年前我響澳洲食既，香港到而家都仲未有店可以追到個水準。)好啦，話說去銅鑼灣行街，癮起想食碗Pho，但又冇新店，見錦麗響世貿開左就去再試下，以為唔駛點排啦，點知都要第3-4張枱先有位，果然仲係幾hit喎。坐低就叫左綜合牛肉粉，上之前俾左啲青檸同芽菜和香草，但可能擺耐左，啲芽菜望落少霉。碗粉黎到見個賣相好好，湯係ok既但飲落感覺似係味精湯，最出事係啲河粉一夾上黎係一餅野，未煮散，我估啲河粉因時間關係一早煮好，一有order就倒個湯落去？所以個湯都好快就涼左.... 肉量係多既，牛丸牛肉味道普通，成件事比我果陣去佢apm店初開果陣退步左好多。另點左個炸春卷，又係出事，個肉餡冇咩味，但最大問題係佢唔脆，淋哂，咁點得呢？個粉又煮定個炸春卷又好明顯炸左好耐，咁真係好失望。最好食係個牛油雞翼，個雞翼牛油味香又炸到外脆但內裡仲嫩肉多汁，叫成餐飯有番個安慰。有機會好想去越南試一次正宗錦麗，我估質素應該完全不同掛？…查看更多

這間越南粉店據說又是北美帶來的口味， 一上去果然見座無虛席，都係門口等左一陣先有位坐。特色係有個menu解釋不同香料既特色同香氣，仲會有成兜香料俾你自己加落去，但.... 我果晚冇既? 可能真係人多漏左俾我，不過唔緊要，我本身唔係太鐘意落香草。佢既牛肉河有好多不同size，有regular有large，又有XL同XXL... 好多得揀，我就點regular算啦~Regular黎到都好大碗呢，女仔一定夠食有突。湯頭清甜，雖然冇傳聞中既香草俾我地加落去，不過我本身都只鐘意檸檬汁加鮮辣椒，不錯呀~本身係用金邊粉，我本身係澳洲讀書果陣食既越南粉好多都係金邊粉行先，呢個係我情意結所以我加分，金邊粉有樣野唔好係會好易索哂湯成碗野結哂，但呢度不會煮到一餅野索哂湯，份量岩岩好，唯獨話係安格斯牛但牛肉太少... 其他都不錯啊另外點左個platter食，估唔到個蝦餅係驚喜！極彈牙，食得出係手打喎！其他正常啦，仲食左個蝦cold roll冇影到相，但一夾就散，個米紙包唔緊啲餡，咁又唔得喎.....佢既牛油果smoothie我就唔敢嗌啦, 因為硬係覺得成杯飲好肥, 但我叫左個蕃茄冰沙，幾清新又唔太甜，有人會怕生蕃茄既腥但我其實幾愛，所以呢杯好岩我飲。以銅鑼灣價錢黎講佢不算貴，比起同區另一間都係加拿大黎既Pho，Fuhn又好食啲過，可以再黎呢！…查看更多

一路都覺得，如果有多D飲酒既地方係有中餐食就好勒！我成日覺得酒同中菜特別係點心好夾架~黎到呢間聽聞係城中一位出名女廚師開既fusion酒吧餐廳，希望飲到好酒又食到好野啦！見人人都讚呢度既手工雞蛋仔，唔好甜既我都試下，原來係鹹點黎架!! 我影得唔好，但成晚最有驚喜又好食既真係呢個鹹雞蛋仔~ 甜既雞蛋仔從來不是我favorite，但呢個充滿咸香又脆，食唔停口，個whip係錦上添花!! 食完極想encore呀!!!我同朋友都好愛食餃，佢既香煎素餃入面勁多我最愛既香菇，再加上個餃底部充滿醋汁，一食已愛上。上面係酸酸味味既芹菜頭昆布，好清爽，對我呢個勁愛酸野既人簡直想連碟呑落肚😂佢其中一個出名既係個黃酒雞，個雞肉超嫩滑！就算不是脾肉都勁滑皮薄唔肥，但黃酒味太弱，可能本身雞肉比想像中咸，再加上冬菇湯味濃，蓋過了黃酒味了。飯份量較少，加上變成湯飯(本身以為炒飯底)，食完好似唔太夠喉咁喉咁~不過有個地方可以有好酒有美味既中式bar food食，都真係令人好開心，下次要再黎試其他食物呢！…查看更多

一直想試呢間fusion酒吧，但之前見親都好多人，終於搵日平日黃昏去就少人啲了~因為未到6pm只能點bar food & snacks食，點左幾樣聽聞係出名既小食食下先大坑薯條出色，帶有花椒香而不辣佢其中一個出名小食係麻婆Burrata，可能我唔係Burrata cheese既friend，凍食麻婆醬mix呢個芝士食，唔係太岩我...個Jer Jer buffalo wings撈blue cheese sauce好食呢，既有buffalo wings 既酸酸辣辣，又撈埋blue cheese既鹹香，好惹味！再點左個炸雞配南乳醬，炸雞熱辣脆口，點埋南乳醬有減油膩感覺又加少少鹹甜感，送酒一流。食到咁其實已經食唔落dinner，但一到6pm我地都要即刻order dinner menu既其中一個signature dish賽螃蟹麵。用上海麵代替蛋白，蟹肉加蛋撈醋食埋出奇地配搭，雖然已好飽但都幾啖食哂，不止賣相可呃like味道更幾出色呢！古巴Ice Tea我試左一啖，清新唔太甜幾好飲我自己就整杯sparkling wine消暑啦其實呢度係應飲手工啤酒既，不過太易飽又肥啲，都係下次再試~…查看更多