根本奄尖的个人专页

諗左好耐生日揀咩蛋糕好，今日對法式甜品完全改觀，一直覺得法式甜品得個樣，呢間係有樣有實力，我仲有少少鍾意左佢。好鍾意甜品既我，一口氣買左3樣野試晒佢1. Macaron 15粒（另外送多6粒比我） ～ 心思思想試呢間既 Macaron 好耐，但因為$22一粒幾貴架，生日大晒嘛，咁我就買晒15款味，蛋糕姐姐話放雪櫃可放5日，5日內食晒佢，今日食左5粒，只有4粒食出咩味，其中一粒只有甜味，質感唔錯，外層鬆內層軟，係我食過最好味既Macaron，我會鎖定自己喜歡既味道，第日再返食2.Creme Burlee ～ 自己燉蛋自己燒，有得玩有得食，我最鍾意，質地軟滑，味道略甜，喜歡甜食的你應該啱口味。3.Creme Burlee Cake ～ 呢個蛋糕好，好軟滑，甜度適中，比 Creme Burlee 冇咁甜，食到焦糖香味，唔會漏，有自己特式既蛋糕，應該冇人抄到喇。呢個係一定要試。最後要讚埋兩位蛋糕姐姐，好優雅好襯呢間舖，一位好有耐心介紹甜品比我，一位幫我寫生日牌（啲字好靚）細心地包好生日牌&蛋糕&甜品～ 欣賞態度親切…查看更多

嚟灣仔食野選擇多，有時唔知食咩好一定諗起食祥興記既生煎包，蔥油麵，唔單止有水準，重要係水準穩定。有招牌、鮮蝦、黑松露三款生煎包，當中我最愛招牌生煎包，生煎包多汁多肉，皮薄香脆，食時要小心燙口，牆上有提示教你點樣食生煎包。蔥油麵亦都唔好放過，一定要食，麵條質地滑口，蔥花唔少夠香。咖哩牛肉粉絲既肉係牛展嚟，牛展夠諗又入味，有幾粒豆卜吸下啲咖哩湯超正；另外餛飩都唔可以睇少，皮好滑，只係菜肉餡既菜太碎。不過要注意呢度係自助立食店，食完要自行清理。另外，如果係繁忙時間，就要諗好先買野，人手唔夠時仲要等下架。…查看更多

我喜愛食甜品，甜品對我來說不能只有甜味，能夠做到多層次又有其特色，這裏是我最欣賞的一間。今日選擇了非繁忙時間食甜品，人流不多，地方亦清潔，乳酪選擇了 Love Green Tea, 有8種配料，由頂食到落底都有唔同口感綠茶芝麻脆脆 - 香脆朱古力脆珠 - 份量不多不少，剛好綠茶麻糬 - 粘糯有咬口，綠茶味再濃些會更好綠茶朱古力 - 好正綠茶布甸 - 綠茶味唔夠，呢度扣分朱古力班尼餅 - 濃朱古力曲奇餅咁囉自家制脆粒 - 餅碎芒果粒 - 芒果當做，超甜主角乳酪新鮮夠，又多又實淨。整體上每樣配料都精心製作，同乳酪夾得好味，畢竟個價錢都幾貴下，就係呢份心思令我難忘，一再回味。…查看更多

旺角茶餐廳太多，華星冰室食評算不俗，今早決定早點起身嚟食個早餐先返工。由於已太多人在此放相，所以無拍照，但埋單後打算寫食評才發現餐牌今個8月加了價，未能提供最新資料，有點愧疚。餐牌選擇不多，只有早餐，老外早餐&營養餐選擇，可揀炒蛋或煎蛋。我揀了早餐$36.0，火腿通+煎雙蛋+牛油厚多+奶茶。通粉好好食夠彈牙，濃湯好味；厚多塗滿牛油夠香，送上時仍有餘溫煎蛋一般，唔係脆邊果種奶茶夠滑，茶味單簿唔夠金香。(奶茶係我至愛所以要求會高啲。）值得讚係一班伙記，茶餐廳都可以搵到好有禮貌，有笑容既員工，由落單到收銀，全程親切招待，所以好多熟客，一坐低就叫野食，唔洗睇。…查看更多

想搵食我多數睇食評，呢間完全冇負評，於是尊誠到訪一試。由於今晚人少，只得兩個人，我倆對鷄煲由其鍾愛，所以就點了雞煲半隻，炸豆腐，金銀蛋莧菜。點菜時，男服務員不太殷勤，只見他對啤酒客招待熱情。雞煲好滋味，雞滑唔辣，蔥頭多，配菜多，好夠味。（上載唔到雞煲）炸豆腐外脆內軟。金銀蛋莧菜莧菜有益，味道剛剛好。太多野未試食，所以會再返嚟試其他。…查看更多

搞盡腦汁同亞女搞下生日高興下，蛋糕係生日活動既靈魂，由細食到佢大既餅店食到悶，來來去去都係咁上下款，咁上下味，今年想比啲驚喜佢，呢款賣點夠港式風味，又係佢平時最鍾意食既牛丸河，唔洗擔心佢唔興奮。果然啲細路見到就嘩嘩聲，好開心咁影相，又send 比朋友睇，做到呢個效果已經值回票價。講到味道方面，仍有進步空間~底層係芒果味 mousse+蛋糕，唔會太甜，清清地，面層有河粉滑流流，似糖水舖果啲扮河粉物體湯汁，可樂啫喱朱古力牛丸，對朱古力有要求就唔好食喇。紅椒，糖製，超甜小記，我們一家只在孩子生日才買蛋糕，因此很感謝創作這款蛋糕的師父，給我的孩子留下難忘的生日。…查看更多

今日打風後預告中午落波要返工，早少少出門食啲野就開工。我想幫襯果間茶餐廳12點幾仲未開，於是上旺角新世紀食代館試下搵食，行左個圈揀左呢間點心，佢有好多幾吸引嘅點心，於是試叫兩籠，燒汁釀茄子&芥末咸水角。職員態度麻麻，唔想做咁，一邊玩手機一邊傾計又一邊落單，所以要重重覆覆咁落單，扣晒分。先講芥末咸水角，外皮夠脆，粉粘糯，略厚，餡用菇粒加微微芥末味，整體只算合格。至於燒汁釀茄子，睇見就流口水，食落有點失望，肉實，汁太多所以略咸，建議汁另上，隨食客喜好自己點燻點。總結: 唔好期望咁高，有機會我會再試下其他點心。…查看更多

一心試試新開的平民價錢西餐廳，有自助水吧，免加一服務費，裝修舒適，坐位闊落，格局加晒分。食物方面亦物超所值，雖然無套餐，但單叫亦不貴，叫了鐵板肉眼扒，鐵板洋蔥豬扒珍寶腸，煙三文魚天使麵(漏影相)，肉醬局薯條，熱狗多士。鐵板肉眼扒 - 七成熟，有肉質肉汁，配菜有薯仔粟米，好味，$52仲想點。鐵板洋蔥豬扒珍寶腸 - 豬扒鬆軟，珍寶腸夠實淨有口感，配菜除了薯仔粟米仲有洋蔥，$38又多又平。煙三文魚天使麵 - 味道中規中矩，麵線乾身但唔硬啱啱好。$38都好值得食，推!肉醬焗薯條 - 肉醬汁好味，可惜薯條因為比肉醬蓋住，所以唔脆。但只係$18貴過麥記薯條少少，低食。熱狗多士 - 簡簡單單已好好食，熱辣辣，因為係新鮮即整，正! 1碟兩件。我地三個人食，平均每人$54，食到呢種水準真係算唔錯喇，呢度如果保持到水準，將會係我常去飯堂。:)…查看更多

呢間餐廳我間中都會幫襯，水準唔穩定，食評都係負評多，但同區茶餐廳環境想坐得闊落舒服，都係得呢間。今日5:45想食下午茶，入去嗱嗱淋點個餐，穩穩陣陣叫個炸雞肶茶餐($23.-)，原本係配紅豆冰，我唔飲凍野，轉熱奶茶。等左7分鍾左右個餐就到喇 - 生炸雞肶，已有味，外皮炸得脆脆，入面炸熟晒，炸熟晒好緊要，有啲餐廳炸唔熟，食食下又要換，好掃興:)。今次超出我的期望，要寫番個好評比佢，只係就住呢個餐寫就好高分喇。…查看更多

早前路經此地見有日式食肆新舖開張，今晚懶得煮就嚟試一試。店舖小小，只有兩張四人枱，兩張六人枱，不用等位。我地三個人，叫了一份煎雞定食，吉列朱扒手打烏冬，一份日式煎餃子(5隻)，一份中雞翼(四隻)。等左幾分鐘，先嚟個餃子，皮薄夠脆多肉:)。照燒雞扒定食…雞扒香脆好味，飯同雞扒都有灑上七味粉，好味呀！麵豉湯都好多料，好認真既食物。:)吉列豬扒手打烏冬……大大份，個豬扒真係要讚下佢，有肉質有口感，夠鬆軟，半肥瘦啱啱好，唔會太乾太油，值得試。烏冬相反就未算最好食。:)鹽燒雞中翼，外皮香脆可口。:)唯一弱點係出餐太慢，可能係用心制作啦，趕時間就唔好嚟喇。:(…查看更多

放工後帶埋兩個細路去聯和墟搵食，原本想食西餐，但想去果間又無開，四圍行搵到呢間小店，見到有珍珠奶茶，所以就停低睇下仲有咩食，原來入面都坐滿人，要等一陣。有位喇，入到店內，原來係要先買票，後上菜，不過都好快:)。紅燒豬手乾麵，麵質不錯，份量亦多，豬手略為不夠，因為骨又大又多，但味道好，少食多滋味。吉列炸蝦乾麵，炸蝦中規中舉，算合格。唐揚炸雞湯麵，炸雞另上，味道不錯，大小適中。另外叫了小食，花枝丸($18)及雞軟骨串(加$7有兩串)，花枝丸真材實料，有花枝粒，雞軟骨夠香脆。相反我對珍珠奶茶就要求高一點，珍珠唔夠煙靭，奶茶偏甜。店內員工很有禮貌，臨走時問了店員開業多久，原來已開業一年，這間小店直得推介，支持這些用心的小店。…查看更多

睇住呢間店舖裝修開業，次次去北區球場路經呢間蛇店食肆都好想食，原來係同區搬遷過嚟新位置，今日有啲寒寒地想食碗腊味糯米飯，又比佢店舖既介紹吸引，再加碗龜令湯清濕解毒一下，期待已久既心情，搵個位坐低就就開始今次既試食喇。 先嚟碗龜令湯，少少杰杰地，味道唔太濃，易入口，細路都啱飲，清濕解毒，一流。 :) 腊味糯米飯好多料，腊腸，潤腸，花生，蝦米仔，蔥菜，蔥花。軟硬適中，食到落碗底都唔油，好健康。 食既時候，一路食一路睇佢牆上面介紹食蛇好處既資料，臨走都買左包蛇膽陳皮，老細(我估佢係)教我食一角仔保健，佢地服務態度都好好，雖然地方細細但乾淨整齊，食肆衛生好重要，可令食客安心，今次經驗所得，我會再嚟試下其他食物……I will be back :) …查看更多

難得約埋班朋友飯聚, 要揀個地方都有難度, 地點要放便, 又想坐得舒適兼傾到計, 日本嘢又啱大家胃口, 仲要係放題, 就唔洗驚浪費食物, 食咁多叫咁多。我都係第一次食放題, 落單叫野食有少少亂, 有位侍應話數字1代表1人份量(1人份量係4件, 就係咁第一轉比左好多我地), 另一位又話係1塊, 最後澄清左數字喺以件數計, 飲嘢任叫, 我就叫左罐日本啤酒, 味道好淡. 食物方面都OK啦, 串燒:脆肉瓜, 菠蘿等蔬菜頪好味, 但帶子, 牛脷就唔得喇, 好乾好硬。 壽司:一般刺身:我最愛既三文魚竟然好淡味, 真係唔知係邊度嚟嘅貨色, 小食: 羊扒同雞翼係今晚最掂嘅食物, 可惜係肉類實在唔食得太多, 而我第二鐘愛嘅豆腐竟然比佢整到油淰淰, 好可惜!甜品: 雪糕有4款味道, 朱古力有粒粒香濃, 曲奇奶味濃, 芝麻味無試, 綠茶味無晒, 雖然唔太多嘢揀, 但要有嘅都有, 係人手唔夠, 繁忙時段出得太慢, 甚至漏單. :)整體都滿意…查看更多

一早就陪亞女去大尾督玩水上活動, 佢一落左水我就同亞仔去醫下個肚, 曾經喺呢度食過午餐, 今次就試下早餐, 亞仔叫早餐B - 腸仔火腿公仔麵+朱古力熱飲, 我:)就叫早餐A - 腸仔煎蛋+牛油多士+凍檸荼少甜。A餐 - 份量多, 有3條腸仔 + 兩隻煎蛋, 太陽蛋煎得剛好, 腸仔我覺得咸左少少:(, 多士就唔夠趣但牛油香, 檸茶味道適中.:)B餐 - 1條腸仔 + 兩塊火腿, 亞仔話麵餸都好食, 但湯就淡, 朱古力香濃好味.可能唔係繁忙時間所以服務亦算不錯, 快手同有禮貌, 走時亦給預笑容, 同繁忙時段唔同.衞生不錯, 枱面有厠紙供應, 下次同亞女早 d 入大尾督食番個靚早先玩。原本諗住都係食個普普通通早餐啫, 所以無影相, 就算無相都要讚下支持下佢地。 …查看更多

今次係第二次去呢度食嘢, 第一次去就係上OPENRICE睇下大家既介紹時認識呢間餐廳, 見佢一個負評都無, 即管就試下啦! 佢仲令我決意寫食評造福一眾搵食艱難的同路人。上次去時冷氣位有滴水現象, 今次已經無事喇，有進步:)。環境舒適，落地玻璃景有休閒感覺。侍應人手亦見足夠，因為寫食評關係就影低個餐牌，點知侍應姐姐見狀，就比左份外送資料我，服務慇勤。今次揀左個意大利人最愛Pizza, 芝士忌廉菠菜三文魚意粉, 芝士忌廉乾蕃茄煙肉魚柳飯, 啤酒漿炸魷魚圈, 一杯熱咖啡, 一杯凍檸茶。先嚟個啤酒漿炸魷魚圈，改用咗墨魚仔，味道似椒鹽味，略油，一碟8隻，感覺同個餐牌名唔同。跟住Pizza同意粉都一齊嚟，叫左個魚柳飯但比左個意粉，所以試唔到飯的口感如何，上次意粉係用扁意粉，好好味有嚼勁，今次就用普通意粉，口感都有水準，不但滑而且被濃濃既芝士汁包圍住每一條意粉，菠菜三文魚味道配搭得宜，菠菜味夠濃夠滑，三文魚夠多；魚柳飯變咗意粉雖然扣左少少分，但厚切既魚柳就同佢攞番d分喇，魚柳好滑，乾蕃茄係我第一次食，原來味道幾咸下，相反煙肉唔太咸，整體意粉足料，好味！Pizza材料: 風乾火腿，火箭菜，蕃茄汁，Grana芝士，水牛芝士，我地揀左薄批，個皮一啲都唔油，最特別係火箭菜既味道，有香濃草味，連帶個火腿咸味都變得清新咗，老公話有苦味，但呢種味就係佢吸引人既地方，Grana芝士就略為少了點兒，但將價就貨嚟講都明既！咖啡係即磨，味道還可以，至於凍檸茶亞女就話味道啱啱好。整體上食物種類唔算多，但勝在有Heart，亦標榜係意式餐廳，所以食物配料亦不是隨處可見，Pizza、意粉意料之外咁好食，但小食方面一般，以呢個價錢就唔值喇，仍有改善空間。地點遍遠，真係靠做街坊生意。環境清靜舒適，侍應服務很好，亦無收加一。直得推介的一間食肆。…查看更多