SeeHoHin的个人专页

用餐時間：普通星期6 0700-0800staycation免費包既自助餐，分左3個時段，而我地就因為通宵所以食左最早嗰輪。呢個時段除左我地之外靜係得一臺客，所以包場咁濟，自然坐低攞野都好舒服。呢個自助餐選擇好多，質素都幾好。中式有點心，豆角嗰啲；西式有薯餅，漢堡扒，炒蛋嗰啲，款式都幾齊；日式就有芝麻八爪魚，螺肉，冷麵嗰啲，早餐黎講都算特別。飲品方面就每人包一杯餐飲，不過出面都可以任飲牛奶，豆漿，咖啡嗰啲。整體黎講我覺得呢個自助早餐係幾好，選擇多，質素幾好，環境又舒服，唯一問題係收碟比較慢。…查看更多

用餐時間：普通星期5  1830呢個自助晚餐係staycation包埋既晚餐，所以係免費。餐廳格調幾好，可惜2人座位空間比較細，基本只可以每次放2隻碟，不過好彩店員收碟速度都幾快。餐廳凍海鮮部分做得幾出色，新鮮，而且size都夠，有啲蟹腳仲長過隻碟。呢度其中一個重點係有和牛食，而佢既做法就係和牛多士。和牛薄片配埋燒汁，沙律菜，方包係幾夾幾好食。而燒牛肉都做得唔錯，唔會乾或者太熟。刺身方面除左款式多有8款，仲要幾新鮮幾好食。熱檸茶都整得幾精緻。本身我對自助餐既甜品都麻麻地中意，所以就唔係食左好多，不過質素都唔錯既。我食左既甜品分別係葡撻，奶凍，班蘭窩夫同埋movenpick。呢個自助餐除左有凍海鮮同埋和牛，亦都有生蠔同埋鵝肝，不過因為我唔係太鍾意所以無試到生蠔同鵝肝。整體上呢個自助餐既食物係無問題既，如果環境空間可以大翻啲就會更好。…查看更多

用餐時間：普通星期二1900餐廳環境唔錯，乾淨+有格調。呢個套餐有3款唔同牛肉，食落味道係有明顯分別。我個人就覺得3款牛肉既味道都幾好。店員話本身已經可以直接食，但係如果覺得唔夠熱或者想食熟啲都可以叫佢哋比個鍋我地自己處理下。呢度既吉列豬排比其他餐廳食到既更加出色，仲配埋幾款唔同既醬汁。呢兩個餐都可以無限追加味增湯，白飯同埋沙律菜，不過嗰日我地食完第一輪已經夠飽，所以唔洗追加任何野。最後埋單連加一係$403，兩個人平均每人$202。呢間餐廳食物質素比其他同類型既餐廳好，不過價錢都相對貴左少少，不過整體上性價比係唔錯既。最後一提，餐廳環境又靚又闊落，店員服務態度都好好，所以成餐飯都食得幾舒服既。…查看更多

用餐時間：普通星期5 1345今日2個人叫左2個lunch set。整體味道唔錯，不過我覺得落曬全部糖漿都好似唔夠甜。味道同檸檬碳酸飲品大致相同。呢個意粉好好食！意粉好幼好creamy，配埋三文魚籽食味道好夾，係我食過既意粉其中一個最好食。呢個飯質素普通。首先係佢啱啱黎到我幫佢影相嗰陣我已經feel到佢就黎會跌，我影完之後佢果然跌曬落啲咖哩到。而味道就正常發揮。呢度部分座位都唔係坐得咁舒服，而我地就係其中之一。我地比人安排坐係窗邊位，嗰度既臺比較窄，而且張高凳都坐得唔舒服，所以如果唔好彩比人安排坐嗰度應該會影響用餐體驗。最後埋單連加一係$273，兩個人平均每人$137。呢度食物質素唔錯，希望下次可以試到呢度主打既甜品！不過餐廳要改善既地方係部分座位坐得唔舒服既問題。…查看更多

用餐時間：普通星期6 1900最近餐廳做緊買1送1優惠，我覺得佢個優惠有啲難理解，但我地嗰晚就係散叫左兩杯飲品，之後主菜就有買一送一優惠。呢杯奶蓋茶比較特別既係加左個芒果雪葩落杯野到，雖然溝埋一齊味道無乜特別，但係就咁食個芒果雪葩既話甜甜地唔酸幾好食。外觀幾靚，味道都好飲，不過味道無乜驚喜。呢隻薯波係配茄汁同芝士醬食，薯波上面仲有啲煙肉碎，味道正常發揮。呢個芝士焗長通粉入面有蜆肉，蝦肉，蟹柳，味道正常發揮。呢個意大利飯好重南瓜味。蟹肉既擺盤都幾有心思，係牛油果中間開左個窿再放啲蟹肉入呢個凹陷位。不過我覺得太重南瓜味既意大利飯我唔係好鍾意。最後埋單連加一係$364，兩個人平均每人$182。呢間餐廳食物質素幾好，又食得又睇得，不過我覺得佢哋個廁所既位置有啲尷尬，係正餐廳中間，搞到我用得唔係好自在！…查看更多

用餐時間：普通星期三 1845今晚揀左一份二人慢煮套餐。餐廳環境幾有色調，餐具都幾靚！左邊係我嗰杯荔枝特飲，味道唔會好甜，淡淡地幾好飲。不過佢呢種杯無比到飲管我地，所以飲落幾唔方便。我覺得呢個係我食過其中一個最好食既沙律。佢隻醬汁同沙律幾夾，不過最驚喜既係原來溫泉蛋配沙律食既味道係咁特別。呢個意粉好足料，尤其係芝士，身為一個芝士迷我食得好滿足！呢塊扒應該唔係咩貴價扒，所以味道正常發揮我已經接受。隔離既豬都無乜驚喜，同平時食既豬仔骨嗰啲無咩分別，不過係唔錯既。最後埋單連加一係$405，兩個人平均每人$203。呢度環境幾好，食物質素都同樣唔錯，可以改善既地方係如果二人套餐份量多翻啲就好，因為最後食完都唔飽。…查看更多

用餐時間：普通星期二 2030作為一間行中高級路線既日本餐廳黎講，空間真係比較窄，坐得好逼，有好大改善空間！份量算多，鮮甜既松葉蟹肉擺滿曬成個碗，蟹肉整體上都高質，除左間唔中食到少少蟹殼碎之外。呢碗飯其中一個值得欣賞既地方係佢用左醋飯黎整，變相我地就唔洗自己調味啲飯，食得方便好多！帆立貝雖然唔多，但係好新鮮，連我平時麻麻地帆立貝既都食得開心。5舊火炙壽司分別係吞拿魚赤身，三文魚，左口魚，魷魚，熟蝦。飯都係用醋飯整既。味道幾好。新鮮整出黎既炸蝦卷，係好食過放左好耐既炸蝦卷好多。蝦肉新鮮，飯已經整左做醋飯，唔需要點醬油。配埋沙律醬食味道一流。新整出黎既雞翼，點都唔會差得去邊！不過味道普通，無乜驚喜。最後埋單連加一$418，兩個人平均每人$209。餐廳食物性價比真係唔錯，不過需要改善既地方係座位可以整得闊啲，等食客坐得舒服啲。…查看更多

用餐時間：普通星期1 1900-2100呢度鴛鴦湯底唔洗加錢，所以就試下麻辣搭沙爹。湯底同其他平價火鍋一樣都係偏淡。餐廳空間比較逼，坐落唔係好舒服。除左海鮮同肉類之外，其他野都係係自助區攞。選擇係幾多既，個人比較鍾意既材料係鴨血同埋午餐肉。雪糕有dreyers 大桶裝，亦都有細細地既杯裝雪糕。飲品有自製既飲品，亦都有外購既飲品，整體都算齊。甜品就係小杯裝嗰啲，不過我覺得平價放題店既甜品質素多數都係麻麻地，所以我就無食到。牛肉有3種，分別係牛梅花，牛小排，安格斯牛。個人覺得牛小排最好，其他兩種都係麻麻地，所以都係主要食牛小排。海鮮試左蝦，八爪魚，脆肉鯇。蝦同八爪魚淥完縮水到超細隻，個人唔推介。而脆肉鯇比較多細骨，我呢啲唔鍾意吐骨既人就唔會鍾意。最後埋單免加一係$474，3個人平均每人$158。作為一間平價放題黎講，我覺得佢哋係合格既，尤其係牛肉水準確實唔錯。…查看更多

用餐時間：普通星期5 1500今日特登揀左優惠時段 1430-1730黎食，有7折優惠。(唔包括星期6，日，假期)餐廳環境幾闊落，坐落舒服既。呢個湯比較重味精，不過免費黎講真係唔要求得幾多。炒飯賣相幾靚既，不過味道我就覺得麻麻，平時好少食炒飯會落青椒，黃椒，紅椒嗰啲野，所以我覺得唔係好夾，味道一般。黃咖哩做得幾好食，不過牛肋條味道一般。手抓餅係配咖哩食既，不過因為保唔到溫，所以味道一般。濃心魚腐配一隻類似千島醬既醬黎食幾夾。通菜炒得唔算好入味，而且保唔到溫，所以味道一般。泰式奶茶同一般既港式奶茶味道唔同，我覺得幾新奇又好飲，值得一試。糯米飯外觀好可愛。味道都唔錯，椰汁份量適中，芒果好甜，美中不足係啲糯米飯痴埋曬一舊，好難咬。最後埋單免加一係$199，兩個人平均每人$100。其實性價比黎講真係唔錯，咁平都可以食到咁多野。不過餐廳明顯要提升下食物質素，大多數食物都有好大既改善空間。…查看更多

用餐時間：普通星期4 1900-2100我地今日試左$348既放題套餐。餐廳內在環境幾靜，而且有氣氛，衛生情況都幾好，不過美中不足係個抽油煙機性能比較差，我成日食食下都會比啲油煙攻入隻眼，好影響用餐體驗！餐廳放題主要包括日式料理同埋日式燒肉兩環，前者主要食下沙律，刺身，壽司，鍋物嗰啲，而後者就主要有肉類，海鮮類。餐廳既沙律係整得唔錯，我一個人都食左4-5碗沙律。餐廳既刺身都做得唔錯，除左新鮮之外，份量都幾大，尤其係三文魚，比其他放題店慷慨好多。不過刺身同壽司種類真係偏少，如果可以增加翻多啲款式就會好好多。今日既牛肉主要係美國牛，個人比較推介既有牛小排，牛胸腹，封門柳。牛肉雖然係比較低級既美國牛而唔係日本和牛同澳洲和牛，不過其實同其他美國牛比質素真係算高，所以食落都覺得幾好食既。而海鮮類有蝦，帆立貝，魷魚筒，廣島蠔呢啲。蝦就比較細隻，個人覺得一般。牛油帆立貝就真係幾大隻，抵食既。其他兩樣就一般般但都可以試少少。比較失色既就係餐廳無提供任何甜品，而飲品方面選擇都真係幾少，主要都係得汽水，幾款果汁，梳打水咁，所以呢兩方面真係好有進步空間。我同朋友都係2月生日，所以兩個都有7折優惠。所以我就好推介當月生日既食客黎試下，因為真係幾抵食。最後埋單連加一$557，兩個人平均每人$279。餐廳整體食物質素都幾好，可惜每個方面選擇都真係偏少，希望餐廳可以完善一下餐牌內容。…查看更多

用餐時間：普通星期1 1700-1930今日食早輪2.5個鐘，有8折優惠。餐廳環境乾淨，而我今日兩個人都坐到卡位，唔洗好似相入面其他人咁坐得咁逼。湯底選擇好多，而且每款睇落都幾高質，真係好難揀！最後揀左番茄湯底，睇黎我無揀錯，因為湯底真係好入味，好高質。唔似其他放題店淡淡地就當一個湯底。呢個應該係我食過最好既番茄湯底。火鍋材料整體黎講都係高質，比較推介既食物有火鍋花膠，脆肉鯇，鴨血，所有牛肉片。餐廳飲品選擇都唔錯，有熱有凍，有基本既外購飲品，都有餐廳自製既凍茶類飲品，我個人就比較推介餐廳自製既茶類飲品。醬料區質素都幾好，尤其係豉油，食落好特別而且好食過其他火鍋放題店。最後每人都有一個雪糕，有hagen daaz，有dreyers。我最後就揀左第一次食既dreyers芝士撻味脆皮，呢隻味真係好好食。最後埋單連加一$537，兩個人平均每人$269。呢間火鍋放題算係高質，不過如果食物種類可以多翻啲就好，尤其係肉類既選擇。…查看更多

用餐時間：普通星期4 1900今日係第一日開翻晚市，於是就同朋友黎食下久違既晚市火鍋放題。兩個人坐卡位係坐得幾舒服，因為空間比較多。餃子造型可愛，味道都唔錯。雖然火鍋放題有天婦羅醬係比較少見，有驚喜，但係天婦羅炸粉比較多，而且保唔到溫度，所以唔好食。扇貝未解凍就已經攞比客人，但係好彩食落味道都可以接受。牛肩胛真係好瘦，仲要碟碟都係咁瘦，對於一餐火鍋黎講係好令人失望。雪糕種類，配料選擇都幾多。我今日就靜係試左豆腐味，個人覺得質素都唔錯既。不過抵鬧既地方係雪糕區衛生情況好一般，我睇見好幾隻膠羹都有茶漬。最後埋單連加一就係$458，兩個人平均每人$229。餐廳既食物選擇都幾多，冷盤，壽司，熱食，鍋物呢啲都有好多選擇。而飲品，甜品方面選擇都一樣咁豐富。如果餐廳可以改善一下火鍋材料既質素既話，相信會更加抵食。…查看更多

用餐時間：普通星期二 1500今日個menu其實係本身既dinner menu黎，不過禁晚市堂食就當係個early dinner 咁食。餐包賣相幾好，尤其係個牛油，不過我覺得食落味道有少少失望，我唔係好肯定佢係咩醬黎，不過食落麻麻地夾。凍檸水做得相當唔錯，賣相幾好，溫度都夠凍，而且甜度可以自己控制，鍾意落幾多糖漿都可以。其實我個人覺得凍檸水要做得好真係唔難，奈何好多餐廳真係連咁基本既凍檸水都經常令人失望，所以呢度做得咁好都值得一讚。我人生食過最好既飯之一。賣相好靚，有日式溝意式既感覺。飯食落好creamy，一啲都唔乾身，配埋蟹籽更加爽口，口感好豐富。蟹膏雖然唔明顯，但都食得出有嗰陣味。整體黎講我都搵唔到有咩可以改善既地方，真係好好食。造型好可愛，捲埋一條。一開始熱食係幾好，不過放多左一陣之後啲cheese開始凝固翻，啲麵就痴埋曬一舊好難分開。cheese味好重，同平時食開既重忌廉味卡邦尼口味差好遠。其實趁熱食嗰陣係幾好，不過如果放耐左真係會越黎越差，所以呢個麵真係要趁熱食先得。每個主菜可以用優惠價 $35追加一份甜品。提拉米蘇做得好出色，好creamy好好食。隔離既手指餅就比較特別，可以點齋啡食。不過我唔飲咖啡，所以就直接食算，不過就咁食都好好食，本身面頭既白糖已經令到餅乾夠曬甜，所以可以做到唔點任何野都好食。最後埋單連加一$529，兩個人平均每人$265。dinner黎講其實真係唔算貴，而且睇埋食物質素咁高黎講，真係無浪費到我時間特登係九龍區搭咁耐車入屯門食。今日試完之後，終於領悟到點解呢間餐廳要book三個月先有得食，呢度性價比真係幾高！不過餐廳環境比較窄，臺放得好逼先勉強擺得曬全部野。如果呢方面都可以改善到相信可以令餐廳提升多一個層次。服務質素都幾好既，店員每次上菜都會詳細介紹翻每道菜既由來同埋食法。…查看更多

用餐時間：紅日星期一 1300今日叫左個set for two。我叫左杯少冰凍檸水，佢直情無比冰我，飲落一啲都唔凍，幾難飲下，我飲左幾啖就放棄左。有味既得面頭既芝士同煙肉，下面主角西蘭花淡而無味，我地都係食左1，2舊就放棄左。呢個做得唔錯，吉列豬扒，薯仔份量好多，咖哩都幾好食，算係做得比較好既食物。味道又係停留係表面既芝士，下面既意粉無左芝士就無乜味。鴨胸就正常發揮。士多啤梨蛋糕 (評分:3/5) : 士多啤梨得一粒，不過蛋糕整體口感都ok，中間夾雜左啲士多啤梨味既啫喱。焦糖燉蛋 (2/5) : 本身食開暖暖地既焦糖燉蛋，但係呢個都幾凍身下，所以我覺得幾麻麻。餐廳衛生好一般，窗邊啲灰塵完全無打算清理咁，好影響食慾。除左窗邊位之外，廁所個鎖都生曬銹，掂完之後成手銹鐵味，好影響印象分。最後埋單連加一$350，兩個人平均$175。老實講收得呢個價錢希望餐廳可以改善下食物質素同埋環境。…查看更多

用餐時間： 假期星期日 1315餐廳本身唔算方便，係上環站行過黎要上兩條大樓梯，我朋友行完之後都見頭暈。情人節嗰日餐廳只會提供情人節menu，每人$288，包3道菜。牛角包本身偏乾，點住龍蝦湯食就唔會覺得乾身，而且別有一番風味。牛角包上面啲蟹籽同平時食開橙色既有啲唔同，不過都好食既。入面既蟹膏漿都好正，味道好似真係食緊蟹膏咁。外觀一流，味道都幾好，雞肉唔會乾身，鴨肝份量好足，而且橙色嗰隻醬甜甜地幾好食。第一次食威靈頓牛，不過有啲失望。牛肉比較熟，目測可能有7成以上，而我既理想係5成左右，所以食落有啲鞋。控制唔好熟度應該係一個比較低級既犯錯。不過酥皮係做得唔錯，唔會話一整就散曬。酥皮同牛中間有一層蘑菇蓉，同gordan ramsey做法幾似。用杯去整個芝士蛋糕係個幾特別既做法，不過佢係面頭既藍莓醬落得有啲多，搞到食落去係幾酸下，如果少翻啲藍莓醬會好好多。呢個焦糖燉蛋整得相當唔錯。燉蛋同棉花糖原來幾夾，而焦糖燉蛋本身除左靚之外，食落味道都好好。餐廳好窩心，情人節當日每位女士都會送一支玫瑰，而且幾靚同埋有花香味。店員服務態度好好，我既同行朋友啱啱黎到唔舒服，店員除左主動比左杯水佢之外，之後仲有問候翻佢，好窩心。而且其餘時間都服務態度好好，好有禮貌，值得讚賞。有一樣做得麻麻既係環境比較窄，有啲影響左用餐既氣氛。最後埋單連加一係$686，兩個人平均每人$343。…查看更多