FEEDYOURSOUL的个人专页

前幾日需要入屯門幫朋友取件，順道尋覓吓附近邊度有特色小店，見到呢間專食烏冬嘅日式小店，非常愛食烏冬嘅我二話不說就過去探究一下，去到發現該區人流比起市中心較少，但由於鋪外燈籠裝飾同埋布廉圖案都頗為搶眼，所以都容易見到。店內座位大約只有十個左右，空間雖然比較細，但裝修有特色，全店以黑色同埋日本傳統般若鬼神面具等作為主題，牆上有句霓虹燈牌字句：「沖啡靠斷估，工作無痛苦」，大概亦係表達出作為專業咖啡師店主嘅心聲，有趣有趣。而值得一提嘅係，當日眼見店內只有一個人，由落單，烹調，介紹等全部都係佢負責，雖然唔清楚佢會否係店主本人，但該店員的確相當有禮貌同埋用心，每枱由創作理念，餐牌去到上菜每樣都十分詳細地介紹，值得欣賞。餐牌上選擇簡單，分別有主食，飲品同埋甜品可以選擇，先講主食，主食裡面有三款唔同湯底嘅烏冬選擇，選擇完湯底後，就可以選擇「頂立海系列」，唔同嘅「頂立海」即指湯底裡面有唔同份量嘅配料，可以隨自己嘅食量同埋喜好去選擇，個人就選擇咗「海老魂」同埋「純頂立($80)」。上菜時托盤上除咗烏冬麵外，亦有兩款前菜甜點，一款係水晶紅豆餅連紫蘇葉，一款係明太子蟹籽沙律，兩款均好好味，特別其水晶紅豆餅，以為佢係甜，但原來上面有啲帶鹹味嘅醬汁，連葉一齊食又有另一番風味。店員介紹湯底原來係佢哋以龍蝦殻同埋鮮蝦頭每日早上自家熬製，難怪一入口覺得湯底鮮甜得嚟有陣濃郁嘅蝦味，配料方面，有腐皮，木耳，粟米，筍，叉燒同埋鳴門卷，平常日式拉麵嘅配料配搭於烏冬麵裡面又相當夾，特別係該塊腐皮，吸收哂湯式嘅精華，好香甜。烏冬麵嘅軟硬度亦足夠，煙靭彈牙，食畢感覺彷如回到疫情前去日本嘅小店食過嘅傳統烏龍麵。甜品方面，點咗好耐無食過嘅「燒布丁($65)」，店員介紹佢哋嘅燒布丁同坊間唔同，食落的確如此，布丁以海綿蛋糕做底，上面嘅布丁雖然滑溜，但切開又頗為實淨，咬落有口感，而上面糖漿嘅亦帶苦澀嘅咖啡味，中和咗甜味。另外，飲品我亦點咗「自家製水出咖啡($60)」同埋「Lemonade($50)」，意想不到嘅係原來兩款均係罐裝款式，而且係店鋪自家出品包裝。由於咖啡配烏冬係佢哋嘅特色之一，飲完咖啡再飲湯底，有淡淡嘅朱古力幽香，所以其味道未有令我相當驚艷，覺得係意料中事，反而係其「Lemonade」更為驚喜，店員介紹佢哋嘅「Lemonade」係用檸檬皮，檸檬同埋豆蔻去發酵再製成汽水，飲落果真好香檸檸皮，酸酸甜甜之餘又帶果香，清新感十足。雖然店內座位的確唔多，而且由於只有一個人工作，所以等候時間大約都要十至十五分鐘，但個人認為店員嘅服務態度同埋食物質素已經值回等待嘅時間，細節上到每款食物都感受到用心之處，有種相當貼地嘅人情味，經過嘅朋友絕對值得到訪一試。…查看更多

前幾日因為今星期打風既關係，天氣非常悶熱，於迪士尼玩完成日已有餓意，想喺附近用餐，上網一搜尋就搵到呢間位於東涌喜來登酒店旁邊嘅西餐廳，見圖片同環境相當唔錯，所以就到訪一試。一到達已經覺得彷如去到外地旅遊，有幾間餐廳同店鋪自成一角，而且當日徬晚有夕陽加持，成個地方都非常有異國風情嘅感覺，雖然有其他餐廳，但以呢間面積最大，而且有頗多戶外座位，左手邊更加有幾張打卡嘅鳥籠座位，而且裡面嘅裝修亦非常有設計感，座位寬敞，令人感覺放鬆。 雖有餓意，但又因為太悶熱既關係胃口一般，只想享用清爽口感嘅食物，所以我哋分別點咗「三文魚他他($168)」，「半打生蠔($230)」同埋「香辣蟹肉魷魚墨汁扁麵條 ($168)」。三文魚他他口感清爽而且魚香味重，用咗Greek Yourt同檸檬汁作為調味，非常清新開胃。生蠔方面，蠔肉飽滿，質感偏爽兼具海水味，屬正常發揮。而三道菜裡面，香辣蟹肉魷魚墨汁扁麵條係最令我覺得驚艷，只用咗辣椒，洋蔥同埋橄欖油作主要調味，火候方面控制得相當唔錯，蒜同辣椒嘅香氣完整被橄欖油吸收，每條麵條都緊緊被包覆住，而且麵條彈性亦掌握得好，香氣四溢又惹味，辣度又夠勁，蟹肉肉質未算爽彈但亦不失鮮味，完全有驚喜。擺盤上面亦花過心思，賣相同埋味道都頗為高質。呢度整體氣氛非常悠閒，而且幾個外籍員工服務態度亦相當殷勤，令人有種舒適自在嘅感覺。個人雖然平時比較少過黎東涌呢邊，但今次驚喜地發現呢邊有一間環境同食物都頗為高質嘅西餐廳，下次可以再訪!…查看更多

「爆丼屋」呢個名對大家應該絕對唔陌生，其主打豐富配料鋪滿於丼飯上面，震憾視覺同味覺，由於旺角分店經常全場爆滿，所以我個人一直都未有機會試，呢幾日適逢經過Mega Box，驚見佢開咗分店，所以二話不說就馬上入去試試呢間傳說嘅究竟。一入到去已經覺得呢間分店環境頗為寬敞，由於樓底高嘅關係，空間感亦頗重，四圍以灰色同木系傢具作為主題，亦有落地玻璃採光，所以整體感覺簡約乾淨又光猛。點完餐後好快已經有麵豉湯送到，麵豉湯裡面有唔小魚肉，而且昆布味重，更有暖胃之作用。當日分別叫咗「三重大極上丼($398)」同埋「三色海膽盛丼($358)」，前者有海膽，蟹肉同埋拖羅；後者則係全碗都係海膽。由於只聞其相，未見過真身，所以真身嚟到面前時的確有震憾視覺之感，皆因實在非常豐富。三重大極上丼裡面有大約七塊拖羅，而且入口更稍有即融嘅感覺，油脂分佈相當唔錯，而上面嘅海膽口感亦頗為Creamy，旁邊嘅蟹肉更加多到滿瀉，基本上每一啖飯都會食到滿滿配料。另一碗三色海膽盛丼同樣係相當豐富，雖然只有海膽一種配料，但其實亦分別有三種品種，分別係加拿大，韓國同日本嘅海膽，所以可以食到三種唔同味道，一種海水味濃得嚟帶微甘，一種口感奶滑得嚟又濃郁，另一種則非常鮮甜，連同海膽上面嘅生蛋黃一齊攪拌，口感變得更為濃稠豐富。當晚更加做緊優惠生啤買一送一，一邊食一邊飲更加滿足。見到佢其實相當多款式嘅丼飯，除咗刺身丼外，亦有幾款熟食嘅丼飯，而且配料有好多唔同種類嘅Mix & Match，相當豐富，下次會再訪試埋其他款式。…查看更多

以前公司舊址位於觀塘，所以對嗰邊嘅工廈都略有認識，知道邊幾幢工廈特別多嘢食，而中海日升中心就係其中一幢比較出名多嘢食嘅大廈，上面除咗係辦公室外，更加有多間唔同嘅小店，每次到Lunch時間就會好多上班族於該處覓食。今次適逢經過觀塘，馬上就諗起呢幢大廈，見到佢新開咗一間由三個年輕人主理，而且人氣非常高企嘅台式料理，正好一解我想到訪台灣嘅旅行癮。店鋪位於中海日升中心2樓，上樓梯轉右行到最入就會見到。一望上門口右邊位置有佢哋嘅鋪名燈牌，看似無特別，但仔細一睇會發現，「壹」字旁邊刻有「每 都進步1%」，未知係咪取「壹」嘅諧音，想表達「每日都進步1%」呢？店內整體裝修簡潔明亮，而且地方頗為寬敞，位與位之間有一段距離，坐得都幾舒適。個人特別喜歡右邊牆身嘅幾幅小掛畫同埋旁邊三個進行沖調動作嘅線條人物，盞鬼之餘，呢個沖調嘅動作亦有一種呢三個年輕人一齊為鋪頭努力嘅感覺。餐牌上面嘅食物種類相當多，令人目不暇給，店員再提示我哋除咗餐牌外，亦可掃描埋QR Code，裡面有更多款菜式可以選擇，所以如果選擇困難症嘅朋友真係要花多啲時間先可以揀到。· 特盛薑蔥魯肉飯($𝟳𝟴)  :呢碗飯相當足料，除咗滿瀉嘅薑蔥同埋魯肉外，旁邊仲有幾塊台灣腸同埋雜菜絲，裡面亦有酸菜同兩粒鵪鶉蛋，非常豐富。魯肉嘅口感夠哂濕潤而且帶小小肥肉，旁邊嘅配菜都夠哂新鮮爽口，鵪鶉蛋亦滷得剛好入味，各方面都唔錯。不過，薑蔥配魯肉飯呢個配搭雖然的確好新奇特別，但由於兩款均係非常重口味嘅嘢，兩樣配料嘅份量要拿掐得較準確，今次員工太慷慨，落嘅薑蔥實在太多，有稍為蓋過魯肉汁嘅香味，令飯粒變得有啲太鹹，如果薑蔥可以稍為調整下份量就更美味。·  蘇子青瓜手撕雞($𝟮𝟱)：坊間好多都係以麻醬，花生醬等作為手撕雞嘅拌醬，呢度就以「蘇子粉」去做拌醬，相當特別。一入口已食到非常濃郁又帶小許孜然粉味道，雞肉亦夠嫩滑，份量十足。·台北夜市小食拼盤 ($𝟯𝟲)：小食拼盤裡面有三款小食：台灣腸，花枝丸同埋鹽酥雞。以椒鹽粉作調味，三款均炸得頗為香脆。個人比較喜歡花枝丸，雖然並非好彈牙嘅一種，但香脆得嚟亦幾有咬口。·秘製厚切排骨($𝟯𝟴)：外脆內軟，炸粉厚薄適中，炸得夠酥脆之餘，裡面嘅排骨肉汁咬落有Juicy感。·拉絲芝士火腿蛋餅 ($𝟯𝟵)：枱面上嘅食物太多，所以都放咗一陣先食，可能因為咁，所以食時無咗芝士拉絲嘅效果，但係咬落仍然食到非常濃郁嘅芝士火腿餡料。蛋餅外皮唔會太厚，加埋千島醬嘅加持，整體惹味又唔錯。·零冰感全手作芋頭鮮奶($𝟮𝟭)：零冰感果然係完全無加到冰塊入去，但又做到好冰凍嘅效果，飲落相當透心涼。裡面嘅芋泥非常高質，新鮮幼滑得嚟，又保留到小許芋頭嘅口感，甜度適中，而且鮮奶味道同樣香濃，飲完成杯都完全無罪惡感。整體嚟講，呢度嘅食物質素唔錯，如果調味方面稍為輕手返少少就更佳，更可以適合唔同類型嘅朋友仔。不過性價比真係相當高，各款食物嘅份量亦十足，絕對係觀塘返工朋友嘅名物，如果係附近返工或者經過嘅朋友不妨一試。…查看更多

近呢幾年開始，唔小舊區都開始進行活化發展，陸陸續續有好多有特色嘅小店同Cafe開始進駐，個人覺得呢個改變未嘗唔係一件好事，可以令到好多人會因此而發掘到好多舊區嘅美，而且亦令好多舊區變得更有生氣，土瓜灣亦係其中一個。呢間On the Hill Coffee Bar 早早已經係我口袋必去名單嘅其中一員，佢有三間分店，今次我就揀咗去土瓜灣呢間。鋪頭以白色大理石為主調，一大塊落地大玻璃作為採光，燈光亦夠明亮，整體乾淨舒服，感覺悠閒。• 𝗡𝗼𝗿𝘄𝗮𝘆 𝗦𝗺𝗼𝗸𝗲𝗱 𝗦𝗮𝗹𝗺𝗼𝗻 𝘄𝗶𝘁𝗵 𝗮𝘃𝗼𝗰𝗮𝗱𝗼($𝟳𝟴)：早前見過佢哋有另一個三文魚，牛油果同埋青瓜分別都係以切粒形式上嘅Bagel，但今次到訪唔見有，可能近來餐牌有變，只見有呢款「挪威煙三文魚切片＋牛油果蓉Bagel」。個人覺得前者幾有特色，如果真係轉咗而家呢款就較為普通。Bagel係店鋪自家製的，口感唔錯，未到好煙韌，但亦唔會話好難以切開。煙三文魚就做成玫瑰花嘅形狀，雖然唔算好嫩滑，但亦帶有微微煙熏味道，惟牛油果蓉太少，味道唔夠，俾煙三文魚嘅味道搶過牛油果嘅味道，整體不過不失。• 老闆絕不妥協𝗖𝗵𝗲𝗲𝘀𝗲 𝗖𝗮𝗸𝗲($𝟱𝟰)：呢道甜品個名非常搞笑，應該係想表達老闆對於呢份Cheese Cake嘅用料同埋味道係絕對唔會妥協嘅意思。皆因呢款Cheese Cake係店主「嘔心瀝血」之作，因為佢想研發一款係品嚐甜吃途中又唔會影響到咖啡味道嘅Cheese Cake，所以呢款Cheese Cake有別一般坊間味道濃厚嘅紐約芝士蛋糕，甜味之中微微帶酸，芝士嘅醇香味適中，質感相當柔軟而細滑，餅底係牛油味濃郁嘅曲奇，蛋糕面上仲有啲焦糖脆脆，兩者鬆化又唔會過硬，成個蛋糕感覺輕盈，食完都唔覺得有膩感，相當好味。• 𝗗𝗲𝗹𝘂𝘅𝗲 𝗗𝗶𝗿𝘁𝘆($𝟲𝟴)：呢度嘅Dirty，實在係我飲過最喜歡的，令我回味無窮。首先外觀，層次相當分明，同普通「髒髒」Dirty有啲唔一樣，亦絕對係飲得出嘅分別。佢哋以自家製提練嘅濃縮牛奶再加入Espersso，Espresso味道香濃帶少少果香，所以第一啖飲落已經有相當香濃嘅咖啡味，第二啖則飲到好香甜嘅奶味，再不停大啖呷，冷暖感交雜，加上牛奶底非常厚實，實在係一種講唔出嘅好飲。如果喜歡Dirty嘅朋友必定要嚟到訪一試，實在會有震驚嘅感覺，但佢哋屬於每日限量供應，亦算係隱藏版款式，如果假日時間可能就要早少少到訪。• 𝗕𝗹𝗮𝗰𝗸($𝟮𝟴)：據聞店主其中一個絕不妥協嘅位就係堅持選用Fruity豆，所以佢嘅咖啡都偏果香味重，飲落仲帶少少堅果香，基本正常水準。呢度俾人一種好悠閒嘅感覺，店員親切有禮，而且相信店家對用料同埋咖啡的確有一種「絕不妥協」嘅精神，所以但願呢度繼續「永不妥協」，好讓我可以閒時到訪支持，而且如果同朋友嚟傾偈嘆啡實在係一個好舒服嘅享受，非常推薦大家過嚟。…查看更多

第一次聽到朋友講起「多賀野」呢個名，熟悉但又記唔起。上網一睇，馬上恍然大悟。皆因幾年前遊東京前，上網做資料搜集用於計劃行程，曾經見過其名，係當地屬於一間名氣響嘅拉麵店。而之所以名氣響，全因為佢獲獎無數，其中包括連續四年獲得東京米芝蓮推介，Tabelog全日本拉麵大獎等。驟耳一聽，的確係一條來頭不小嘅過江龍。根據店家官方資料介紹，佢哋嘅賣點係堅持每日新鮮製造麵條，當中更用咗4款日本麵粉去製作麵糰，製作麵條嘅員工亦會根據當日嘅溫度同濕度去調整水份，絕對唔會使用任何添加劑，所以麵條嘅口感唔會過韌之餘，亦有淡淡麥香。今次去嘅沙田店，係繼K11 Musea後，多賀野在港嘅第二間分店。位置於新城市廣場地下，其舊址為「豚王拉麵」。該區域屬於廣場裡面人流極旺嘅位置，所以從剛開業至今，仍然見到好多人排隊。所以今次亦揀平日下午時份到訪，唔需要排隊就可以入到去。店內裝修以木系為主調，空間感大，燈光柔和，布質嘅櫈坐落舒適，全店感覺有和風特色之餘亦帶優雅。店內廚房屬於開放式設計，如坐吧枱位置則可以觀賞師傅烹調過程。本來我哋被安排較入嘅二人座位，但由於我哋點嘅食物較多，所以店員亦非常熱心為我哋換咗一個較大嘅卡位位置。當日我哋分別叫咗兩款拉麵，三款小食。餐牌上選擇唔小，除咗佢哋嘅招牌拉麵，沾麵外，亦有幾款唔同嘅飯品，一品料理等。價錢定位方面比較進取，所以相當期待有一定程度嘅美味。🔸極上蟹皇沾麵($188)：呢款沾麵係皇牌推介，睇落頗為吸引。一上枱感覺非常豐富，賣相吸引，份量亦足。盤上有全隻炸軟殻蟹，麵條放於木製筲箕裡，旁邊有蟹膏同埋少許蟹肉做伴碟，深黃帶橙色嘅沾麵汁睇落非常濃郁，一舀起，香氣即撲鼻而來，入口一試，同眼見一樣，湯汁非常濃厚，除有鮮甜嘅蟹黃味之外，魚湯味道亦非常豐腴，每舀一口，份量唔小嘅蟹肉碎令到全個湯汁食落更有嚼勁，層次感十足。軟殻蟹亦絕不欺場，炸得外脆內軟，而且帶少許鹹香；麵條用咗帶有小麥粒嘅粗麵，質地煙韌又彈牙，放入湯汁裡完全吸收哂湯汁，連同旁邊嘅蟹膏同蟹肉碎一齊食，絕對有齒頰留香之感，食完後竟絲毫無覺得腬嘅感覺，實在高分。🔸香蔥山椒叉燒拉麵($138)：呢個拉麵特別之處在於香辛味道係店家獨門比例調製，雖然係一碗叉燒拉麵，但調味上面落咗唔小功夫。碗上有大量香蔥，花山椒，胡椒同埋唐辛子，湯底辣度厲害，一入口會有少許涸喉，但愈食愈惹味。兩片叉燒肉質嫩滑，麵條選用幼身麵，口感彈牙，嚼辣嘅朋友必定會喜歡。🔸日式炸豆腐($48)：呢份炸豆腐令我非常難忘，回味無窮。其一碟有四小磚，我個人忍唔住食咗三磚。炸衣非常透薄，上面有小許柴魚片同埋蘿蔔蓉，上枱時香口又熱呼呼，連同下面嘅鏗魚汁一齊食，一冷一熱，口感一流，必試。🔸自家製吉列和牛芝士丸($72)：一客有三粒，每粒大小亦適中，外層呈金黃色而且炸至恰到好處，香脆無比之餘亦毫無油膩感。裡面嘅和牛肉味香濃有層次感，帶濃厚油脂香，加埋已經半溶化嘅芝士，非常有驚喜。🔸自家製原味炸雞($52)：同樣一客有三件，外皮炸得香口酥脆，雞肉肉質亦相當軟嫩，咬落肉汁瞬間於口裡面爆發。惟味道方面有少少稍為偏淡，如果點埋旁邊酸酸甜甜嘅麻醬醬汁，味道就剛好。近年來，好多間「過江龍」拉麵店進駐香港，唔少亦被評為嚟到香港，價錢貴幾倍，不值一試。個人覺得雖然好多間都定價偏高，但隨住香港租金偏貴，而且過江龍食店嘅食材均由日本直送到港，運費成本等亦需要作出調整，所以比起本店貴幾倍亦無可厚非，只係在於享用食物者覺得值得與否。睇過網上評論，多賀野同樣曾經被指為較普通，定價又偏貴等。K11 Musea分店個人未曾試過，但佢哋今次於沙田再下一城，就令我一試驚喜。無論從用餐體驗，環境，員工服務態度，抑或食物品質等都令人感覺高分及絕對值得再訪，嚟緊必定會再回頭試其他口味嘅麵款。…查看更多

君悅酒店裡面嘅「茶園」近年叫好又叫座，下午茶及晚市自助餐均被網友及媒體稱譽為全港最好食，訂座經常爆滿，相當犀利。下午茶方面，我喺較早前已經有幸嘗試過兩次，個人其實對呢類型嘅甜點並無特別鍾情，兩次均屬於陪友伴享用性質，但試完後覺得味道的確唔錯，而且賣相精緻，好適合打卡。但相比下午茶，個人其實對佢嘅晚市自助餐更加有興趣，所以趁住上個月臨近聖誕節，一次過訂咗兩日，帶屋企人享受聖誕大餐之餘，亦可以從兩次到訪中比較一下質素嘅分別。今次適逢聖誕節，甫入到大堂已經感受到濃厚嘅聖誕氣氛，令人心情都特別興奮，胃口大開！茶園位於君悅酒店嘅閣樓位置，沿住大堂嘅長樓梯直上一層，就會到達糖果屋，糖果屋左手邊再上一層小梯級就會到達茶園。順帶一講，糖果屋有提供一系列手工朱古力、糖果、甜點等嘅禮物籃，亦有客製化蛋糕預訂，櫃檯同店內都有唔少造型可愛，做工又精緻嘅餐點擺設，值得停低觀賞一下，好似適逢聖誕節，就會有啲聖誕造型嘅糖果等放喺櫃檯，十分可愛。而如果玩Staycation package，裡面嘅外賣下午茶亦多數都會喺度包裝同埋提取。全個用餐區域雖然唔算好大，但枱與枱之間非常寬敞，而自助取餐位置則稍為少許擠逼，雖未至於水洩不通，不過喺受歡迎嘅菜式位置都需要小心，可能會較易會同人有輕微身體碰撞。餐廳整體裝飾同燈光等都偏向華麗典雅，走輕歐陸風，加上景觀開揚，如果好似我今次咁可以坐到靠側邊欄桿位置，都係一種享受，因為用餐時既可睇到酒店周圍嘅裝飾，亦都係一個相當靚嘅打卡位，梳化座位都坐得相當舒適，環境方面非常唔錯。坊間大部份自助餐菜式種類均係採用多國菜形式呈現，以款式同選擇多去吸引食客，但茶園相反，專心只做歐陸式自助餐，貴精不貴多，同好多自助餐有明顯嘅分別。第一次到訪，我將全場所有食物均淺嚐咗少許，由於不能盡錄，只能分享部份。先從凍盤開始，大部份冷盤嘅凍肉同沙律菜質素都正常，而且種類亦較多，款式亦較出面罕有，例如係「鄉村肉凍」同埋「香草豬肉批」，兩者均相當唔錯，口感實在。但凍肉中個人最喜愛係「巴馬臣火腿」同埋 「煙燻鴨胸」，前者唔會過鹹，配嘅哈蜜瓜亦好爽甜；後者肉質鮮嫩，有淡淡煙燻味同油香充斥口腔。另外，沙律菜亦毫不遜色，所有都好新鮮，食落爽脆，特別係兩款分別以蘋果作為配菜嘅沙律 - 「楓糖醬汁＋香梨青豆沙律」同埋「蘋果西芹核桃沙律」，清爽開胃，必試。海鮮方面，生蠔嘅口感屬於清爽型，雖然較細隻但勝在新鮮，師傅一直不停開，加上自助形式任取，愛食蠔嘅朋友行多幾轉都絕對會滿足；蟹腳同凍蝦肉質正常無霉味，味道唔算好鮮甜，但都有鮮味。而我特別喜歡嘅翡翠螺咬落彈牙又有螺肉味，整體質素唔錯。非常愛食熱葷嘅我，覺得呢度嘅熱葷整體嚟講都不過不失，味道唔算太突出，但款式特別，可以每樣淺嚐一下。不過要數最矚目嘅就必定係「威靈頓牛柳」，全晚不斷出爐，座落喺熱食區嘅正中央位置，有盞大燈光打落去，閃閃發光，令人垂涎欲滴。個人覺得佢嘅酥皮味道夠香又保持酥脆，牛柳雖有小許偏嚡，但牛味濃郁，所以算做得唔錯。除咗「威靈頓牛柳」，「鵝肝多士」亦係非常受歡迎嘅熱葷之一，鵝肝每舊都好厚身，而且油脂香，內層嫩滑，下面嘅蘋果塊同多士味道亦配合得宜，味道一流，難怪同行友人食咗四塊。另外，第一次到訪時，當晚嘅熱湯款式為「牛尾湯」，牛尾湯非常清甜入味，當晚飲咗兩大碗，令我非常回味，好期待下一次嚟到可以再嚐，可惜第二次嚟到時款式更換咗為「龍蝦湯」，而該龍蝦湯實在令人失望，味道偏鹹帶小酸，整體味道有種說不出嘅怪異，幸好只係舀咗少許先淺嚐一下，如果唔係就做成浪費了。茶園晚市自助餐其中一樣重頭戲必定係每位客人都可以享有一份「即煮原隻龍蝦」，而且有三種烹調方式可以選擇，分別係白灼、香草牛油燒烤同埋芝士烤焗。由於同桌有幾位友人，所以可互相分享試哂三款味道。龍蝦肉質爽口彈牙亦新鮮，而三種方法中個人最愛係白灼，因為白灼可以食到其龍蝦肉嘅鮮甜，香草牛油燒烤同芝士烤焗嘅調味實在頗為濃郁，會有小許遮蓋咗龍蝦肉本身嘅鮮甜，個人更愛原汁原味啲，不過其實三款口味都色味俱佳，隨個人口味。大食特食完，雖然已經好飽，就當然要填飽埋另一個胃，呢度嘅甜品區同取餐區有一段小距離，經過中間嘅用餐座位就會見到一列嘅甜品區。甜品選擇頗多，淨係自家製雪葩同雪糕已有12種口味，蛋糕類甜品有8款，仲有即製窩夫同Pancake，係甜品控嘅天堂。蛋糕類甜品中，除咗瑪德蓮蛋糕同法式酒桶蛋糕之外，其他個人都幾喜歡，特別係經典朱古力蛋糕同埋榛子巴黎泡芺，兩者都非常好味，前者朱古力味濃郁又唔會過甜，後者榛子味重，而且質感軟滑。前面提到個人唔太喜歡呢度嘅瑪德蓮蛋糕同法式酒桶蛋糕，因為兩款味道均太甜而且質感偏硬，前者唔夠綿滑，後者雖有濕潤感但都唔夠柔軟。雪糕方面，以「鹹蛋肉鬆」，「麥芽啤酒」同埋「芒果糯米飯」三款口味最為特別，三款分別都加咗肉鬆，餅乾碎粒同埋糯米飯粒，真材實料，但相對嚟講，個人覺得鹹蛋肉鬆味比較難接受，可能因為雪糕嘅質感同肉鬆混合，而且鹹蛋味道同甜品實在有啲唔夾，所以個人感覺一般。反而麥芽啤酒味就特別得嚟又容易接受，酒味夾雜住小許鹹味同餅乾碎粒，有啲似啤酒加海鹽雪糕嘅感覺，整體上好夾。另外，餐飲除咗咖啡同普通紅茶外，其中可選擇嘅更包括有十幾種款式選擇嘅「君悅酒店專屬茗茶」，總會揀到一款心水，而且佢哋採用嘅茶具相當精緻，用餐完畢之後嘆嘆茶，傾吓偈實在係唔錯嘅享受，而水果方面款式雖然唔太多，但大部份都新鮮。總括嚟講，感覺呢度雖然只做歐陸式自助餐，選擇可能較少，但可以叫做貴精不貴多，菜式都有一定嘅水準。更值得一讚嘅係，員工會頻密地留意住取餐區嘅食物，適當時候就作出替換，以保持新鮮同埋避免有空置嘅情況出現，而且全部都殷勤有禮，場內更加有人即席演奏鋼琴，無論係服務定係整體格調都令人非常舒服，值得一訪。…查看更多

呢間從日本大阪過江龍嚟嘅「○𝐝𝐞▽ 鯛白湯らーめん」鯛魚拉麵店非常高人氣，以鯛魚湯出名，主打3款特色拉麵，據聞魚湯極其濃厚，我一直非常想試吓其獨特之處，無奈上年開業至今都繼續有人排隊，今次終於趁前排天氣開始轉涼，排隊唔會排到身水身汗嘅時候過嚟拜訪一下。最後連埋門外落單嘅時間，我哋都只不過等咗大約半小時，星期日下午時份嚟講，個人覺得係可以接受嘅等候時間。店鋪門面以白色牆身配落地玻璃設計，整體裝修用咗較為溫暖嘅木系做主題，全店有啲位置採用咗隱藏式用燈，側邊近窗座位上亦有做咗比較明亮嘅燈光，所以整體感覺簡約得嚟又帶啲高雅。店內最先望到嘅中央位置係開放式廚房，如果坐吧檯就可以一目了然望到師傅喺面前製作拉麵嘅過程。另外佢哋嘅用餐配套相當唔錯，檯面有放咗獨立包裝嘅濕毛巾，口罩套同埋圍裙，頗為貼心。拉麵湯底獨沽一味，只賣鯛魚湯，種類就有三款，分別係「鯛沾麵」，「鯛白湯」，「鯛清湯」。另外亦有三款小食同埋一款飯類可以選擇。🔸鯛白湯拉麵($𝟏𝟑𝟖)：餐牌上有介紹到湯底採用咗「天然真鯛」同埋「水」再加埋幾種貝類熬製8小時而成。一上枱魚香撲鼻，湯底呈泡狀，配料放係中間位置，有少少紅色調味粉末作為顏色點綴，整體賣相吸晴，亦令人感覺有心思。配料方面有薄切叉燒，鯛魚肉碎，洋蔥粒同埋蘆荀粒。碗邊有啲柚子醬，相信係專俾客人食到中後期如果開始覺得太腬，可以放落湯裡面解膩。一入口我極為驚艷，因為湯底魚味相當濃郁，繼續食落去更加覺得口感的確好幼滑豐腴，裡面更加有唔小嘅鯛魚肉碎，味道鮮甜，我幾乎全碗湯飲哂。麵條方面選用咗幼身直麵，口感偏軟腍但不失彈牙，配料嘅薄切叉燒質感嫩滑，連湯一齊食都食到佢嘅肉味濃厚，加埋洋蔥粒同蘆荀粒，整體口感豐富，每一口都好滿足。🔸櫻木煙燻溏心蛋($𝟏𝟓)：呢度嘅三款拉麵同樣無加入蛋作為其中一樣配料，如果想要蛋需要另外加錢。呢度嘅蛋以櫻木屑輕輕煙燻過蛋嘅邊緣，除咗蛋嘅邊位之外，成隻蛋嘅煙燻味道都唔太重，不過火候剛好，金黃色嘅半熟蛋黃比例完美，加返落個湯裡面一齊食感覺更加完整。🔸鯛沾麵($𝟏𝟒𝟖)：坐窗口位置嘅我哋，當呢碗沾麵上枱時即刻引嚟外面排隊嘅人注目，因為佢呈現嘅方式頗為霸氣，一縷縷輕煙從金色嘅碗裡面冒出，視覺上相當吸晴。湯底方面比鯛白湯更為濃厚亦更鹹，入口有回甘嘅感覺，可能因為咁，旁邊亦提供咗一小舊青檸，應該係當覺得太鹹時可以將青檸吱入湯底裡面中和。而湯底嘅配料就有唔小嘅豚肉碎，洋蔥粒同蘆筍粒，每舀一啖湯同時亦會舀到配料碎，所以食落都幾有嚼口。沾麵嘅麵條係佢哋店鋪原創嘅波浪形麵條，睇落同關廟刀削麵好似，但沾麵嘅口感更實在，亦更煙韌。🔸炸鯛魚皮($𝟒𝟖)：一份有兩片，咬落相當香脆，毫無油膩感或油膱味，單食或點旁邊嘅蠔肉橄欖油都同樣惹味。不過味道雖然唔錯，比普通炸魚皮更香口，但又未到相當驚艷。🔸日式炸雞($𝟒𝟖)：呢度嘅炸雞聲稱係得到「日本唐揚協會」認可，一碟有三大舊，即點即炸。外皮唔算好薄但口感夠香脆，肉質嫩滑之餘肉汁亦好豐富，一咬落肉汁瞬間喺口裡面爆發。旁邊有啲薑黃粉配埋，味道帶小辣，個人就喜歡唔點嘅原汁原味多啲。呢度已成為個人心中香港拉麵Top 5嘅其中一位，因為店家無論係麵條，湯頭或配料上面都相當講究，感覺有認真去研究每個細節可以點樣為食客帶嚟更豐富更唔同嘅體驗，而個人認為佢由味道，口感，賣相呈現同份量方面均係近乎無可挑剔。雖然以拉麵嚟講價錢偏貴，不過香港較少有專食鯛魚湯拉麵嘅麵店，如果同樣喜歡濃厚魚湯嘅朋友，個人覺得絕對值得一試👍🏻！…查看更多

相信喜歡飲咖啡嘅朋友都對Cupping Room唔會陌生，佢係本港人氣咖啡店，有多達7間唔同分店，主要遍佈喺港島區，亦有一間喺尖沙咀海港城。呢間Doubleshot係其中一間新嘅概念店，走嘅路線稍為偏向高檔少少，夜晚更加有埋酒吧，食物多元化而且都幾有特色。早排剛裝修完時人氣極旺，週末如果想嚟呢度基本上可以叫做困難重重，所以當時只係Bookmark咗，諗住適逢閒日或過咗一排有機會就試吓，今次終於有機會。到達樓下就會見到「Doubleshot」嘅燈牌鑲喺灰白色牆上，然後上一條長樓梯就會到餐廳，沿途上樓梯覺得條樓梯都幾有味道，應該都係影相位之一。餐廳環境寬敞，整體裝修走復古路線，以墨綠色同杏白色作為主調，有落地大玻璃，日光會微微透入，可惜因為我大約下午2點左右到，午飯人流未散，所有靠窗位置同埋梳化位均係滿座，只能夠坐另一邊近廚房區嘅藤椅位置。🔸𝐊𝐚𝐭𝐬𝐮-𝐒𝐚𝐧𝐝𝐨($𝟏𝟓𝟖)：呢份炸豬扒三文治，據聞係人氣必點嘅菜式，價錢$158，價錢偏高，所以對佢嘅期望亦高。麵包烘得剛剛好，夠香脆，而炸豬扒肉質雖然唔算嚡口但都炸得偏乾身，食落喉嚨感覺會較乾涸，但中間嘅一小片芥末蛋黃醬同埋小小蔥花令佢加咗唔小分，因為均勻塗抹後發現味道好夾之餘亦稍有緩解返豬扒太乾身嘅情況，如果無呢一小片嘅醬料，就係相對賣得比較貴嘅普通炸豬扒三文治。🔸𝐑𝐨𝐚𝐬𝐭𝐞𝐝 𝐂𝐚𝐮𝐥𝐢𝐟𝐥𝐨𝐰𝐞𝐫：Weekday嘅LunchSet裡面會包埋一個前菜，當中有四款可以選擇，其中就揀咗呢款烤椰菜花。椰菜花好爽口新鮮，輕輕用香料粉烤過而且烤得好香，幾乎食到停唔到口。🔸𝐏𝐚𝐭𝐭𝐲 𝐌𝐞𝐥𝐭($𝟏𝟓𝟖)：如果同Katsu-Sando兩者選擇，我會毫不猶豫地揀呢款Patty Melt為必點菜式，因為同一個價錢，但Patty Melt 驚艷太多。中間嘅牛肉漢堡扒肉質嫩滑之餘又好Juicy，加埋滿瀉嘅車打芝士同埋炒過嘅洋蔥粒，每一啖都係滿足感。最驚喜係佢嘅麵包用咗Brioche奶油麵包，本身包身已經好鬆軟又好重牛油味，加上烤得好香脆，完全係錦上添花。另外連旁邊嘅薯條都炸得好脆口，稍稍用鹽同小小蔥調過味，唔駛點醬汁都夠味，係偏幼身咗少少，如果粗身啲就更滋味。🔸𝐁𝐫𝐞𝐚𝐤𝐟𝐚𝐬𝐭 𝐂𝐚𝐫𝐛𝐨𝐧𝐚𝐫𝐚($𝟏𝟔𝟖)：喺呢度食到出色又正宗嘅Carbonara，實在非常驚喜。麵條蛋香味濃郁，整體嘅口感相當稠糊，個人最愛咁稠糊但又非忌廉做嘅Carbonara。而最驚喜係佢加咗一隻蛋係意粉上面，蛋液流出加埋厚切煙肉嘅油脂，蛋汁均勻掛哂喺麵條上，但又唔會太漏，簡直想暴風吸入式地獨霸全碟意粉。🔸𝐋𝐨𝐧𝐠 𝐁𝐥𝐚𝐜𝐤($𝟒𝟓)：個人一直幾喜歡Cupping Room嘅咖啡，呢度嘅Long Black味道入口最初偏酸但最後有股回甘，雖然味道唔錯，但就覺得同其他分店嘅Long Black有所分別，一查原來因為中環呢間分店轉咗用時令單一個產區出嘅咖啡豆，所以味道可能同其他分店有所唔同。中西區愈來愈多有特色嘅咖啡店，但呢度嘅食物同環境都會令人有所記憶，餐牌上選擇雖然唔算好多，但亦幾有特色。而且餐廳環境舒適，如果能夠坐喺梳化位置，相信可以渡過一個非常寫意嘅下午。另外據聞晚餐都相當唔錯，下次再嚟一試。…查看更多

呢排天氣都非常涼爽，好適合出遠門，近呢幾年都無去過長洲，所以今日就過嚟放鬆一下。提起長洲，好多人都會諗起佢嘅大魚蛋同芒果糯米糍等，但當我行完食完呢啲特色小食之後，都係想坐低慢活一下，就突然諗起長洲海鮮都係香港食海鮮嘅推薦地方之一，出名又平又好食，所以就行到去碼頭沿岸一帶嘅「海鮮街」度覓食吓。去到海鮮街一帶，即使係下午時份，聚集人流都好多，而且沿途叫賣嘅聲音都係此起彼落。兜兜轉轉之下，我哋去到呢間「新潮發海鮮菜館」，餐牌上面嘅套餐好多款式同埋相當吸引，而且餐廳幾乎坐滿哂人，但剛巧有個空嘅位置可以對住海景，所以我哋就決定毫不猶疑選擇佢。餐牌上面無論係海鮮定係小菜嘅菜式選擇都花多眼亂，而且價錢超值，有唔同價位嘅套餐可供選擇，套餐可以自由搭配小炒，肉類或者海鮮等，最後我哋選擇咗$328 四餸套餐。落單後，侍應姐姐就已經將一大盆栗米魚肚羹放喺我哋面前，原來點菜後就會有湯羹同油菜送埋，加埋即係$328會有六款嘢食，真係覺得非常驚喜。🔸栗米魚肚羹(免費)：我哋3個人每人足足可以分到各2碗，又大又足料。而且雖然係跟餐送，但係質素絕對唔錯，湯羹夠哂竭身，栗米香甜，裡面魚肚份量夠多之餘又夠爽口，真材實料。🔸生菜(免費)：好多小菜館所贈送嘅大多數係會有菜黃或者邊位有爛嘅情況出現，但呢碟生菜有驚喜，大碟得嚟生菜亦夠新鮮爽口，雖然稍為有少少偏油，但仍然保持到翠綠，喺可以接受嘅範圍內。🔸蒜蒸蟶子：係小型品種嘅純蟶子肉配蒜蓉粉絲蒸，底部以空殻墊高，蟶子肉爽口新鮮無霉味，上面鋪滿粉絲同蒜蓉，粉絲吸收哂蒜茸同埋汁料嘅香味，非常惹味。🔸避風塘魷魚：一上枱香氣四溢，非常吸引，上面嘅避風塘蒜茸炸得恰到好處，每一舊嘅外皮都炸得脆口又啱啱好，肉質又夠哂爽彈。食完魷魚仲可以逐粒蒜蓉夾起食，好滋味。🔸肓鰽(清蒸/豉汁)：個人都幾喜歡食肓鰽，肓鰽係一般小菜館裡面好常見，但聽老一輩講，肓鰽魚一定係即撈上即食，先可以品嚐到佢最正宗嘅味道，肉味會好鮮滑，如果隔夜就會無咁美味。呢度嘅肓鰽食落肉質嫩滑，我哋揀咗豉汁蒸，但豉汁蒸都無遮蓋到佢魚嘅鮮甜味道，所以必然係新鮮嘅。🔸椒鹽骨：鑊氣非常足夠，炸得乾爽無油之餘又新鮮熱辣，啖啖肉又夠香，味道適中唔會過鹹，連旁邊嘅洋蔥絲都好好食，係一種好傳統小菜店裡面生炒椒鹽骨嘅味道。呢四道小菜份量唔算話好多，大約係例牌嘅份量左右，勝在一次過可以品嚐到好多唔同海鮮，明碼實價，選擇亦多，而且質素亦有一定水準，性價比非常高。海鮮街裡面有咁多間海鮮小菜館，都有一定嘅競爭，但呢度嘅質素係令人感到可以再次Encore，而且店員服務相當殷勤，整體感覺滿足。…查看更多

本人稱得上算係烏冬嘅狂熱粉絲😋，由細到大最鐘意食烏冬，好喜歡佢夠哂煙韌，做法又多。早前有報導介紹過幾間高質嘅烏冬專門店，呢間鰹烏冬就係其中一間。據聞老闆特登去過四國學做烏冬，所有烏冬更加係每日自家新鮮製造，網上評論亦一致偏好，所以自己都帶住非常期待嘅心去試。餐廳以木色裝修為主，門口位置有加上布簾，外觀設計的確有啲似日本嘅烏龍麵店，但入到去就覺得環境有待改善。無論係自助裝水區定係一眼望入去嘅廚房等，都有種較為殘舊同埋唔太乾淨嘅感覺，員工收拾時都係成個膠盆放上枱，再輕輕一抹就算，令人感覺唔太衛生。當日係平日下午時份去到，有烏冬套餐提供，套餐可以叫一款麵食加一款小食。烏冬嘅口感的確係有嚼勁，夠長又夠粗，亦有烏冬嘅麥香味道，但就有小小偏硬，需要啲牙力嚼爛。烹調嘅時間可能要煮多一至兩分鐘比較適中，煙韌度可以再改善。🔸掛湯烏冬 配 關東煮 ($𝟕𝟏)：呢度嘅掛湯烏冬原來即係釜揚烏冬，掛湯烏冬係佢哋鋪頭改嘅名。釜揚烏冬係讚岐烏冬裡面一個較特別嘅類別，傳統做法係熱鍋(釜)裡面搯起烏冬，然後以煮烏冬嘅水用木盤浸泡住。食法就係將旁邊嘅配料連埋醬油撈起一齊食，有少少似沾麵嘅食法。呢度同樣提供蘿蔔泥，蔥花同埋芥末可以放落醬汁，但醬汁味道偏淡，而且烏冬已浸泡一段時間，但仍然係偏硬嘅狀態，有啲煮唔透嘅感覺。🔻關東煮：不過不失，用嘅係較為濃味嘅醬油湯，雖然碗裡各樣食物都入哂味，但食材上例如係蒟蒻同埋燒魚卷等等嘅口感都相當一般，有種放咗一段時間再放入個湯裡面嘅感覺。🔸醬油烏冬 配 骨付雞($𝟖𝟒)：醬油烏冬用嘅係鰹魚醬油，雖然烏冬麵質都係偏硬，但係醬油味道濃郁，份量亦唔會多到浸過烏冬因而變得好鹹，加埋海帶芽，蔥花同埋蘿蔔泥等，整體味道唔錯又夠清新。🔻骨付雞：基本上見到每枱都必點一份。骨付雞係四國名物，即係帶骨嘅烤雞髀，傳統嘅有分老雞同小雞，老雞口感比較堅韌同埋有咬勁，小雞就口感嫩滑之餘肉汁亦豐富啲。呢度如果係依照四國正宗嘅做法，應該就係用小雞做。雞髀火候控制適中，烤得啱啱好，調味方面就用咗芝麻，蜜糖同七味粉，唔會過鹹，雞皮亦夠哂香脆，肉質軟嫩汁多。🔸天婦羅廣島牡蠣($𝟕𝟎)＋天婦羅雞件($𝟒𝟐)：兩款嘅粉漿均係薄薄一層，有少少鹽味做調味，唔會有太油膩感。廣島蠔同埋雞件都夠哂嫩口多汁，火候發揮得相當唔錯。個人覺得呢度嘅烏冬嘅味道幾香有質素，亦睇得出有心思去諗好多唔同配搭，可能今次到訪時適逢平日下午時份，人手較少，所以煮嘅時間比較趕急導致有麵條偏硬嘅情況出現。不過據聞經常好多人要排好耐隊，值唔值得就見仁見智，但個人覺得如果行過都可以一試。…查看更多

身邊朋友都好喜歡墨西哥菜，喜歡佢嘅味道多元化，餡料又夠豐富，所以自己都有Bookmark低唔小墨西哥餐廳。上網見到呢間位於諾士佛臺嘅墨西哥菜有唔少好評，決定過嚟試吓。諾士佛臺一向五光十色，人來人往，有唔少特色多國菜餐廳同酒吧，雖然因為疫情關係沉寂咗一排，但今次再嚟到，已經見到回復昔日嘅喧鬧🍻。餐廳位置並非一上到諾士佛臺就見到，需要經過前面幾間酒吧，入到步行街嘅偏中間位置先會見到。餐廳位於「諾士佛臺6號」嘅大廈，大廈樓上係一間小型酒店，可能因為咁大堂位置比較光猛寧靜，所以當𨋢門到達3樓，聽到非常激昂嘅音樂時，形成相當大嘅反差😂。餐廳整體裝修都幾有特色，牆上面有啲墨西哥風情嘅編織掛飾同掛畫，雖然燈光偏暗，不過同時亦更營造到氣氛。每張枱上面都有盞小燈，可以方便睇餐牌睇得清楚啲。缺點在於樓底較低同埋環境唔算大，坐得較為擠逼，同後面枱會近乎椅背對椅背。值得一提嘅係餐廳亦有室外位置俾客人Shisha同飲嘢，環境仲幾浪漫。🔹𝐓𝐮𝐧𝐚 𝐂𝐞𝐯𝐢𝐜𝐡𝐞($𝟏𝟑𝟖)：叫咗呢款吞拿魚刺身沙律做前菜，沙律菜新鮮，吞拿魚肉質都唔會太霉，上面有啲魚籽粒，醬汁酸酸甜甜帶小小辣，所以都幾開胃。🔹𝐓𝐚𝐜𝐨 𝐜𝐨𝐦𝐛𝐨 - 𝟓 𝐩𝐢𝐞𝐜𝐞𝐬($𝟏𝟖𝟖)：佢分別有3份同5份可以揀，我哋分別都揀咗雞魚豬3款5份嚟試。🔻𝐓𝐚𝐜𝐨 𝐃𝐎𝐍 𝐒𝐀𝐋𝐕𝐀𝐃𝐎𝐑：魚係炸過嘅，炸得偏乾身，配料就有少少紅辣椒絲同埋莎莎醬。🔻𝐓𝐚𝐜𝐨 𝐄𝐋 𝐒𝐀𝐍𝐓𝐎：豬肉係手撕成一條條上，肉質夠嫩有汁。而Chipotle Sauce同黃椒洋蔥加埋都幾夾。🔻𝐓𝐚𝐜𝐨 𝐄𝐃𝐃𝐈𝐄 𝐆𝐔𝐄𝐑𝐑𝐄𝐑𝐎：雞同豬食落嘅醬汁味道差唔多，雞肉亦係手撕，但個人喜歡豬肉出嚟嘅口感多過雞肉，因為雞肉就有啲偏嚡口。其實佢嘅Taco味道配料幾夾，有辣味有酸味，但就係唔夠味道，有啲偏淡，但感覺可能係專登嘅，俾你可以加返佢枱上放嘅幾支墨西哥醬汁。個餅皮就偏厚，食落會感覺到有啲麵粉味道嘅感覺。🔹𝐓𝐚𝐜𝐨 𝐁𝐨𝐦𝐛($𝟔𝟓)：呢款無得夾埋其他味道一齊叫，不過睇相就好吸引，所以雖然已經有5份Taco，都再叫多兩份嚟試，但真係喜出望外。餡料好豐富，有鵝肝，拖羅蓉之餘上面仲有舊海膽。配料就有黃椒絲，紅椒碎同埋少少洋蔥，最盞鬼係佢嘅醬汁係沙律醬，睇落好似唔係好啱擺埋一齊，但食落好夾，口感清新😋。餅皮方面，可能因為呢款Taco Bomb嘅餅皮係佢哋自己手造餅皮，食落同上面幾款Taco嘅餅皮真係有所分別，更薄更軟。🔹𝐁𝐮𝐫𝐫𝐢𝐭𝐨 - 𝐂𝐡𝐢𝐜𝐤𝐞𝐧($𝟏𝟒𝟖)：佢分別有牛雞同蔬菜三款揀；米粒係長形米粒，軟硬適中，口感唔錯。裡面嘅餡料就有啲豆泥，芝士雞肉同埋小小辣椒，加上佢嘅醬汁小辣帶酸，幾惹味。🔹𝐂𝐡𝐮𝐫𝐫𝐨𝐬($𝟕𝟖)：好多枱最後都會點呢個，上枱夠熱，外層炸得都幾酥脆亦無油膩感，但就有小小黏牙感，唔夠柔軟。旁邊嘅朱古力醬味道都唔算濃郁，如果朱古力味重返少少就會更美味。感覺上呢度係幾正宗嘅墨西哥菜餐廳，氣氛唔錯，選擇亦多，不過各款菜式方面份量都唔算好大，如果3-4人Share嘅朋友可能要叫多少少。…查看更多

「グリル滿天星」總店位於東京，係非常受當地食客歡迎嘅一間日式蛋包飯專門店，而「滑蛋式蛋包飯」就係佢哋品牌首創，更係佢哋鎮店之寶。上兩星期，呢條過江龍終於游到嚟香港，據聞香港店都係繼續以日本直送優質食材去烹調，希望可以將招牌菜式完整地從日本帶嚟香港，原汁原味咁話，真係聽到都相當吸引。由於喺附近工作關係，基本上每日都會經過呢度，從佢上兩星期開始試業至今，近午餐同埋晚飯時段都係相當多人排隊，人龍經常都去到轉角樓梯上小小位置。今次得好朋友落力排隊一個鐘等我一齊食午餐，所以我都有幸咁快就試到。餐廳空間唔算好大，裝修簡樸，氣氛同格調均同傳統日本洋食屋相似，牆身就以「蛋」做設計，眼見全場座位大部份都係四人座位，所以座位都偏闊落而且坐得好舒服，而落單方式就係掃瞄QR Code。由於而家處於試業期間，所以餐廳就無開放到全部座位，可能就係因為咁，等候時間相對就較長。佢哋其實仲有好多款唔同菜式，例如日式咖哩，三文治，甜品等選擇，但我哋第一次到訪就好想先試招牌菜，所以二話不說，我哋兩個都分別叫咗佢哋兩款唔同嘅蛋包飯。其實兩款蛋包飯嘅主菜雖然唔一樣，但其實佢哋嘅靈魂 -「蛋」同埋「飯」都一樣出色。前者喺食材上已經非常有誠意，用咗蘭王雞蛋，蛋味固然相當香濃，招牌滑蛋式蛋包飯亦係名不虛傳，蛋漿的確非常嫩滑流心，而且上面都有啲蝦同帶子做返啲配搭。後者並唔係一般炒飯/焗飯咁簡單，一入口已經相當喜歡，日本米咬落粒粒分明，軟硬度適中，茄汁味道雖然唔重但好香，襯埋蛋上面嘅蝦同帶子，層次感豐富，好好味。不過要留意一點就係佢飯底有好多人都唔喜歡嘅青豆，由於個人無特別討厭，所以非常能夠接受。🔸滿天星肉汁漢堡扒蛋包飯 ($𝟐𝟑𝟖)：落枱時店員會介紹碟裡面分別係兩款醬汁，一款專門蘸漢堡扒嘅「燒汁」，另一款專配蛋包飯嘅係「茄汁燒汁」，但其實兩款汁嘅味道非常相似。漢堡扒肉味濃厚又多肉汁，熟度亦剛好。🔸蒲燒鰻魚蛋包飯($𝟐𝟒𝟖)：呢款係香港限定招牌菜式，日本總店都未曾出現過，原條蒲燒鰻魚放喺蛋包飯上面，賣相相當吸引，但其實有啲略為失望，蒲燒鰻魚味道較淡，無太香鰻魚味，睇落雖然較為肥美，但其實切落去偏薄身，亦因為味道較淡嘅關係，如果連埋蛋包飯一齊食就只能夠食到蛋味。佢嘅蒲燒鰻魚的確令我有所失望，但係蛋包飯嘅主要靈魂：「蛋」同「飯」都做得如此出色，當中工序嘅繁複同埋技巧絕對需要一定嘅造詣，其實令我都感覺到滿足。性價比方面個人認為的確唔算得上好高，但亦都係可以一訪嘅店。不過而家初開業可能排隊時間真係會較長，如果想試或者都要一定嘅心理準備，唔想太哂腳力或者留到熱潮減退後先試都未嘗不可。…查看更多

一直對中式傳統糖水特別鐘情，貪佢好味之餘又健康。而九龍城裡面嘅地茂館甜品喺我心中一直穩固地佔據我最喜愛糖水店嘅頭五位，除咗因為佢哋嘅中式甜品的確非常地道好味，價錢又親民之外，亦同我好耐之前係報道了解過佢哋嘅背景有關。地茂館由1990年開張，所有糖水都係自家手製，一切過程包括磨豆、炒芝麻甚至隔渣嘅網袋都係親自製造，可謂真才實料。個女唔忍心無人繼承爸爸經營咗二十幾年嘅甜品店同時亦希望將中式糖水繼續傳承，所以接手，從學習到與時並進其實都並非一件易事，地茂館咁多年都有咁多捧場客，絕對係兩代人嘅堅持所得嘅。自己近年雖然對甜點嘅熱誠大減，已經一段長時間無到訪，但今次再訪時仍然係十分興奮。今次到訪，見到店面有翻新過，無特別大整修，改變嘅只係燈光更加明亮，餐牌上嘅字體印得更加清晰，仍然保留住以前原汁原味。餐牌上面糖水種類好多，基本上你諗到嘅中式糖水呢度都會有，每款糖水都可以加錢加唔同配料(例如蓮子，薏米白果，湯丸等)，今次食完晚飯先嚟，只能夠叫兩款品嚐。🔸蛋白燉鮮奶(熱)($𝟐𝟕)：燉嘅熟度啱啱好，質感順滑軟身，奶味香濃，糖份適中，唔會過甜，食完後奶味喺口裡面瀰漫，做得相當有水準。🔸軟滑糖不甩($𝟏𝟗)：每次嚟到一定係必食之選，上枱微暖嘅糯米丸係自家手打，夠哂軟糯，唔會過硬或者過軟，食落煙煙韌韌之餘味道仲有小小微甜，配埋加咗糖粉嘅花生碎真係絕配，無改錯名，果然係軟滑。呢個價錢有9粒，實在太抵食。追求踏實味道嘅人應該都會對地茂館愛不釋手，傳統中式糖水店喺現今社會已經買少見少，能夠多年保持水準，價錢仲一直都咁親民，實在令人不得不愛👍🏻🙏🏻。…查看更多

今次嚟到天文臺道呢間新開嘅居酒屋，因為同朋友慶祝生日比較多人，驚嘈到人或傾唔到偈，所以早咗打去預訂房間。職員當時表示有min charge，如果無問題就可以為我哋預留房間，但去到當日，佢再打嚟同我表示今晚嘅房間位置原來早就預留咗俾其他人😅，不過可以安排返一個較隱蔽嘅位置再外加屏風，會有返一定私隱度同埋傾到偈，所以我哋都ok。餐廳裝修以日本鬼怪同時尚日本風做主題，門口位置有一條樓梯上一層，我哋坐嘅位置牆身有啲日本特色嘅畫同埋藍色嘅霓虹燈，燈光偏暗，的確幾適合一班朋友飲嘢傾偈。當晚叫咗好多款食物不過因為飲咗比較多酒，所以只講吓我食咗嘅其中幾款。其實基本上全部食過嘅我都唔覺得好好食，非常普通。🔹海膽松葉蟹蓋甲羅燒 ($128)：由於我坐另一邊，朋友燒完先拎過嚟舀俾我，所以我無影到相。佢係即場有職員燒俾你嘅，儀式感係幾重，亦好啱打卡。不過雖然係有好重蟹膏味，但係腥味亦都好重，唔需要細嚼，係一入口一嘴嚼已經一股腥味湧出嚟。🔹自家制免治雞肉軟骨：口感唔錯，食到有層次感，外皮小脆，軟骨位置都幾有咬口，肉都唔鬆散。🔹燒日本蠔($128)：隻蠔size幾大隻，但就無咩燒過嘅香味，比較普通。🔹燒雞皮：燒得幾香脆，帶啲焦香，酥脆不膩嘅。食物質素嚟講整體嚟講只能以普通嚟形容，無咩大驚喜，價錢方面性價比亦唔高。但服務方面先係我唔會再回頭嘅其中一個原因🙅🏻‍♀️。利申：同枱朋友每次都非常有禮貌地唔該等，所以絕非西客。佢哋職員一直就以一種「同你好熟可以輕佻」嘅態度去應對客人。可能開張無耐，佢哋人手不足，對於客人分開麻煩佢哋做兩件事時，係會有比較差嘅反應。例如當落完單，我哋再提出麻煩幫忙開酒時；或者係放低食物，我哋再想加單時，就會叫我哋：「等等啦；忙緊；轉頭啦」。而去到甲羅燒部分，我提出個蟹膏味道好腥，職員竟然問我：「腥？哦，你唔食海鮮嘅？」無即時處理客人疑問之餘，仲問返我轉頭，實在令我充滿問號。當晚朋友生日我哋有自攜蛋糕🎂，由於幾位朋友都分別有醉意，又趕去下一場，所以就唔記得拎返個蛋糕。第二日下午朋友醒起，因為我哋都無收到過餐廳電話問我哋個蛋糕點處理等，諗住蛋糕仍然會喺餐廳裡面，所以親身去到想拎返個蛋糕，但餐廳職員竟然話：「吓，尋晚俾返你哋啦，你哋切咗啦喎。」我哋當然好肯定係無切到呢個蛋糕啦，所以叫佢哋再諗吓同埋睇吓，之後職員先話：「Sorry，我哋以為你哋唔要，尋晚掉咗個蛋糕。」呢個舉動令我哋都幾無奈，除咗係無打電話俾我哋確認就掉咗個蛋糕之外，仲要第一時間係想否認，最後即使佢有叫我哋出示返蛋糕單Refund返俾我哋都好，我哋對呢間餐廳印象已經好差，唔會想再回頭😵‍💫。…查看更多