食＿為＿先的个人专页

唔知大家之前有無食過同類蒸氣鍋，總是覺得同「🥘❤️」好相似，不過佢較優勝嘅地方係多了一個打邊爐嘅食法，所以價錢亦相對地提高了一點，可以理解嘅，以佢嘅食材亦覺得比呢個價錢係值得嘅。當日我哋一行6人，因為預早已訂位(記得一定要訂位呀！)，所以是無限時任食，坐低後首先一位女職員來介紹佢哋今晚有新鮮竹蔗茅根精，亦有其他罐裝飲品，之後就問我哋需唔需要先來一個刺身，老實不客氣問她是否包埋㗎？她說不是，是需要另外叫，由於我哋是第一次來食，我哋未知佢哋嘅食物份量，所以我哋話不需要了！她亦好好招呼話唔叫都唔緊要，因為佢哋嘅食材好新鮮，所以問我哋要唔要。跟著叫我們選蒸鍋的食材及打邊爐嘅湯底，其實佢哋本身就已經包了：每人一燉湯，記住唔好食啲湯渣，食咗一陣食唔落之後嘅嘢食，因為個湯勁多湯渣。花甲鮮甜多汁，份量都足夠。龍蝦新鮮可口。之後就是8揀4嘅食材，佢嘅食材係會變嘅，所以未必每次一樣本來是想選鮑魚(因每枱只可以選4款相同嘅食材)，但由於我哋其中一位一食鮑魚會胃痛，所以我哋只好選其他，最後我哋選了！扇貝、聖子、蠔、象牙蚌。我哋覺得扇貝、聖子同蠔(大隻多汁)都選得好正確，象牙蚌相對就遜色了一點。食到呢個時候就會轉打邊爐，豬、牛、羊這些都是任叫嘅，雖然是任食牛，但質素都唔差，有牛香呢盤影出來好似賣相麻麻，但我哋之後再叫了一次牛，嗰個賣相靚仔好多，似即叫即刨，豬就好似無乜味，羊就睇你鍾唔鍾意食有羊騷味嘅羊，在外圍亦有一些火鍋食材自選，我哋選了水魷、金菇、牛拍葉、鵝腸、響鈴、粟米，鮮冬菇...在一邊打邊爐嘅時間佢亦繼續蒸其他食物，包括蝦丸(彈牙)、豬肉球(好重肉味)及金針蟲草花蒸雞蒸到尾聲時會蒸埋甜品紅棗糕(啱我口味，唔太甜)就會在蒸鍋嗰邊煮粥底，由於是用剛才所有食材所蒸出來的蒸氣回流嘅水來煮，成鍋粥都十分鮮甜。見佢嘅雪糕寫住香港名牌，唔知係咪香港製造，味道都不錯，而且亦有多款口味有奶茶、芒果、朱古力、豆腐、雲呢拿...食埋雪糕就完滿了今晚嘅晚餐，大家都飽到攬住個肚落樓。樓面小姐在我哋臨走時叫我哋多啲來食，我其實食到中段時間已經約緊另一班朋友來食，其實我都掙扎咗一段時間，究竟寫唔寫今次食評好，因為驚食完今次之後佢生意火了自己會好難訂位，因眼見佢哋嘅地方唔係太大，招呼都唔錯，每個蒸嘅食物都由佢哋職員幫手控制時間，所以食到最合適嘅烹調時間，但我一向係食到好嘢一定要同大家分享，所以我都希望佢哋可以一路keep到呢個水準，提提大家如果星期五、六、日，公眾假期及前夕會加收$30一位。題外話佢哋嘅地理位置應該唔係咁易搵，所以如果無去開嗰頭嘅朋友可能都需要啲時間搵一搵。…查看更多

今次食評要先由訂座講起我大約預早兩星期前打電話去預訂，電話接通後聽電話嘅係一位不是講廣東話嘅女士(我要以英語來溝通，估計係咁啱呢位職員聽電話，因為上到去都見有幾個職員係講廣東話)，正常程序留名、留電話、留電郵，完成後即時會收到佢哋嘅Whatsapp，裡面會叫你要用信用卡在限時內交留位訂金，大概係要在你改時間或者no show時要用嚟扣錢，在訂位前一天會另外send email比你確認訂位情況是否繼續，食完後都有一個email 叫你反饋意見，成個訂位流程我覺得好流暢同合理亦好有系統。到達食肆入內後唔會太擠迫，與鄰坐保持足夠空間，最先接待我們的是一位男職員，他先問我哋有無嚟食過，如果無嘅話就同我哋講解一吓佢哋嘅流程，介紹了有早鳥優惠，七點前埋單每位可以平$50，由於我哋係訂了5點進餐，我哋考慮過兩小時應該都可以食到想食嘅嘢，所以我哋決定七點前埋單，佢哋之後會先上一盤豬牛肉、菇，你亦可以用QR Code自行加食物在場內亦有飲品(種類不多，大約有7-8款罐裝，5-6款盒裝)同雪糕(無埋去睇到係咩牌字)供應，另每位食客有一份醬油蝦及蟹，而第一盤食物是會由他們的職員負責燒烤，之後就由食客自己燒，老實講佢嚟嘅第一盤嘅肉已經係全晚最好食嘅肉，但質量都係覺得好一般，之後我點嘅肉質素就更次一級了！(從照片中可看到食物質素)另外我哋叫了帶子、牛骨湯、安格斯牛、牛肩、海蝦、牛𦟌、豚肉，炸雞...等等。我哋已特登詢問在場職員在嘟QR Code後有問我有幾多人進餐，而在每種食物下單時又問我嘅數量，咁個數量係我嘅進餐人數嘅倍數嗎？當時同我講不是，仲話如果是肉你撳一就是來一片，我哋有3個人，諗住每人每樣食物先來一片，但來到時佢係每樣食物來了6份，即其實佢哋係每份兩片，到食到一小時後才發現我叫嘅海蝦沒有來，追了一次，話幫我跟，跟到影都唔見了！到最後半小時我嘅同伴問我哋唔係仲有醬油蝦同蟹咩？我哋至醒起，原來佢哋係唔會主動送上來的，係要你自己主動叫佢比佢哋至會拎出來，亦唔會提你未叫，個醬油蝦每人兩隻我覺得唔錯，但個蟹我真係唔知佢點計，我哋3個人佢比一隻醬油蟹，而且隻蟹唔係幾正，無膏又瘦又細隻(唔記得影相)，時間啱啱好食到七點埋單，我哋覺得兩小時已經好足夠了！…查看更多

一上到去感覺坐位舒適，環境企理。坐下後有職員過來詢問是飲茶還是放題，我同朋友一早傾好咗是來食放題的，所以我同職員講是放題，之後她就遞上放題的點心餐牌和火鍋餐牌，並問我哋要唔要先叫啲點心食住先再介紹埋出面飲品區同調味料區。飲品除特別嗰幾款外，全部都可以在雪櫃自取，而特別嗰幾款就可以叫職員幫手落單。（不需另外收費）我記得來招呼我們的服務員一來自我介紹，之後再介紹一次佢哋成個用餐過程，先上刺身後會轉雞煲最後會轉火鍋，刺身就每枱只有一份，而雞煲同火鍋都可以無限添食，即妳可以食完雞煲再加雞煲唔轉火鍋，但就唔可以雞煲、火鍋、雞煲、火鍋咁轉來轉去，啲刺身好新鮮，特別推薦蝦刺身，又大隻又鮮甜，到火鍋時有海鮮拼盤，裡面有鮑魚、蠔、聖子、花甲...我哋淨係海鮮都叫了三轉，真係食海鮮都食到飽，仲有牛同豬，由於佢嘅海鮮實在太出色，所以牛同豬就變得平凡不過了！由於放題是不限時，所以好適合一班朋友邊食邊傾今次朋友真係無介紹錯朋友話有折所以最後每位比佢寫出來個價錢更平…查看更多

阿女話今年生日想食自助餐，她生日正正在聖誕與除夕之間嘅其中一日，一諗已經估價錢唔會平，佢仲話諗好咗在尖沙咀食，我當時第一個反應係「嘩！嘩！嘩！」今次實大出血了！她早一個星期在網上預購當天晚餐時段的自助餐，酒店的開始時間是下午六時，我們訂了下午六時半，到達後見已有約八成入坐，食品不是宇宙級的種類但絕對是可以食得你好飽。首先阿女出去拎嘢食，我見佢拎咗即開生蠔、翡翠螺、小龍蝦、帶子、赤貝、牡丹蝦刺身，我當然都唔執輸，比佢嘅份量再拎埋凍蝦、長腳蟹、青口、藍青口、八爪魚刺身。第一口食生蠔「嘩！嘩！嘩！」好鮮甜又回甘，呢個價錢比我食到生蠔仲要質素唔差我第一個反應係呢間酒店嘅自助餐我一定要推介比我啲朋友。最開心係我每次出去拎生蠔時個廚師已經好好的為妳安排了一碟四隻，上面咪講咗我到達時已經有八成人入坐，但我去到拎生蠔嘅位置，最多都只係需要等1-2位，試過有一次係唔需要排隊就可以拎到，呢個真係要大力啲讚佢哋嘅安排，唔係話乜，有好幾間出名食自助餐嘅食肆都係因為拎所有食物都係要排長龍而令我唔想再去幫襯。熟食佢哋有羊架、牛扒、和牛粒、片皮鴨、龍脷魚、天婦羅、串燒、Pizza、韭菜豬紅、豬皮蘿蔔魚蛋...仲有鵝肝多士呢個驚喜。甜品雖然佢哋應該唔係主打食甜品，相信都唔會令一眾甜品愛好者失望，有朱古力噴泉、豆腐花、雪芭、多款蛋糕同甜點，仲會在每一小時出一次即整梳乎厘。餐飲佢亦有別於一般酒店每人免費一杯餐飲的做法，而係有一個茶水間可自行無限量添飲咖啡或茶、果汁、罐裝汽水...等等。還要讚多一樣嘢係佢哋每個崗位嘅服務態度都好好，不論是前枱登記、廚師、在大廳負責收碟、斟水嘅各人都好盡責，見我一食完淨低隻碟「吉」咗會即時前來收走，唔會積聚一堆碟叫人收都無人理。總結：今次呢餐是一個非常開心嘅夜晚…查看更多

首先想講講點解會搵工呢間小店食飯因為在YouTube 睇咗「三叔公園」介紹就上來OpenRice尋找這間食肆，有興趣可瀏覽以下頻道： https://youtu.be/03Ppr7dMdPQ講明跟著三叔去開餐，當然要食佢哋的推介食品啦！其實睇片時覺得好好味，好想即刻去食，但電話book位時，已經排到一個月之後了！令我更期待今晚這一餐。說老實他的地址真係要花點時間才找到。來到店後，發現店舖面積不算很大，約有5張四人枱加1張十人枱，上餸速度適中，因為我哋一行四人，被安排了一張四人四方枱，所以佢哋每次上送都會等妳上一個餸食得八八九九才上餸。第一度餸係醉鴿，非常入味，而且好香酒味第二度係凍鮑魚，無諗過隻鮑魚可以極得噉冧第三度係滷水鵝片拼墨魚，墨魚爽口，嘩個滷水鵝片，真係我食過噉多滷水鵝片嚟講最好味，佢啲滷水汁入晒味而且唔會得種死咸味，食落去真係好似「味吉陽一」噉要叫一句“好好味呀！”第四度係蠔餅，當初睇片時佢哋係噉話好Juicy唔明，炸物點Juicy，但自己食入口嗰刻就明白晒了！佢炸到外脆內軟，軟就係個蠔煮到剛剛熟仍然保留到蠔本身的水份第五度係炒飯，同枱食飯的朋友當中有唔食蔥嘅，佢哋一見到就話點解有噉多蔥，不過我哋每人都食了兩碗，而且佢哋食嗰陣亦無再話啲蔥，好似個飯已經將啲蔥融入了裡面一樣，佢哋仲一路食一路講好味最後一個餸係醉鵝肝，佢哋話今晚個鵝肝將佢一向對鵝肝的印象顛覆咗，我以為會好油，點知嚟到食入口後，好滑好甜最後要多謝三叔的好介紹，因為朋友同我都非常滿意今晚的食肆，嚟緊又睇吓跟唔跟到佢哋去開餐先。…查看更多

公司食飯聚餐，有得二選一的食物一早已叫大家揀好食咩食物同餐廳講咗先，大家諗住去到就可以食啦！我哋一共有四枱人，我噉啱就係坐第四枱，眼見前面三枱已經食到第三次而自己嗰枱最早應該有的小食都未有嘅時候，問店員詢問都不會太過份吧！點知個男服務員的態度真係令我大問眼界，佢竟然同我哋講，等吓啦！有次序㗎嘛！What?我哋都已經等到人哋食緊第三轉至問啦！個次序係咪要等嗰三枱食晒我哋嗰枱至開始！好喇！萬眾期待嘅...冷盤「海蜇青瓜」終於登場，基於大家都已經好肚餓，不需一刻已經把它消滅咗，但其實係好咸好咸，啲青瓜有醋味在外面，但一啲都唔入味，食完個青瓜，陳百強先生的歌又再次嚮起，等寂寞到夜深...餐廳老闆終於出手喇！一嚟就放低三條魚入去蒸，蒸好當然係好想快啲食啦！食完後條魚的評價係「無味」唔明點解一條新鮮魚可以無味，真係諗唔通。之後再上的元貝、刀貝蜆無乜特別，想講一講鮑魚同蠔，鮑魚我咬了一口之後要點醬油，大家都明點解啦！因為完全無味，蠔仲犀利蒸前蒸後兩個樣，好似玩魔術噉，蒸完之後變咗蠔豉噉大粒。睇咗噉大段嘢好似都係有彈無讚，唔會如果一間餐廳真係噉嘅話，應該都好快摺得喇！值得讚嘅海鮮都有膏蟹、龍蝦、虎蝦，膏蟹真係頂晒角，龍蝦上到枱仲識同我講Bye Bye，虎蝦彈牙鮮甜。鏡頭一轉嚟到肉食部份，豬骨濃汁貢丸、爆漿瀨尿牛丸、芝芯小籠飽、蝦蟹棗、蟲草花雞，安格斯牛、黑毛豬同雜菜，係失敗到一個點，普通街市貢丸同漿爆牛丸，橡膠牛同豬，鞋口蟲草花雞，雜菜唔爽甜。但最後個粥底又幾好味。全晚的食材100分滿分，我會比佢有55分，但個侍應嘅態度要扣30分，即全晚得分只有25分，我相信你哋睇到呢到都明我個標題的意思了！有時食物質素唔得服務態度都可以幫間食店攞到唔少分，但呢間食肆真係令我大開眼界，我最後只諗到差差同差。…查看更多

一定要講咗啲緊要嘢先，朋友在美食平台見推介可五折購買呢間餐廳的餐劵，最終以$244買了原價$488的餐劵，但大家一定要小心睇清楚所有條款，因為假期前夕每位要另外+$22再有+$60醬油錢+$31任飲最後每人要$357，同原本的打算有好大出入，而且同唔經美食平台買餐劵結賬的價錢差不多。講翻餐廳啲嘢食先，係新鮮好味嘅，而且佢哋每樣食材都會幫你放入去蒸，所以時間啱啱好，可以食到最美味的味道，特別想推介蠔，因為好多時都會怕唔熟煮過晒時間，但佢哋好專業，真係講起都流口水，其次係佢哋啲熟食都唔差，我哋叫了春卷，不過唔食芫荽嘅人就未必鍾意，但我同行中有三個都唔食芫荽但佢都都話可以接受，至於個八寶飯唔知點解佢比我哋揀啲配料有咸有甜，成件事好似好怪，但出到嚟食入口又可以接受喎，跟住叫了肥牛都好味嘅，但因為其實食海鮮都已經好到有八成飽再食埋個飯已經無乜空間食得落啲肥牛，所以如果想食肥牛嘅人仕最好都係淺嘗個飯就好了！順帶一提當晚無聖子，佢哋問我哋可以換鮑魚定扇貝，其實兩樣都無咩所謂，但我哋最後揀咗鮑魚，覺得無揀錯，因為啲鮑魚係出到嚟仲在郁。…查看更多

在西九龍中心的Food court有一間小店，平民價錢酒店水準，可能會有人問有無咁誇張呀！首先行到去前面見到佢影啲相已經相當吸引，而且價錢絕對係大眾化之後見到個 #夏日激賞推介#梗係第一時間叫個“法式焦糖燉蛋”嚟試吓啦！而我朋友由細到大都至愛芒果，所以點可以唔叫呢個“鮮芒果達人盛宴”呀！講少少嘢比你哋知，我嗰個焦糖燉蛋老闆好用心，即時幫我用火槍燒出焦糖，食落口時真係做到外脆內軟，外熱內凍，好有層次，還有就係老闆多次叮囑我哋食完要還翻個碗給他，因為嗰個係特別為焦糖燉蛋而買㗎，唔係一般即棄器皿，其實佢好食的程度應該可以從我朋友張芒果盛宴見到，因為佢未開始食，我已經忍唔住口食了一半至於我朋友個鮮芒果達人盛宴，老闆真係落足料，芒果又買得好甜，朋友食得非常滿意，呢次係我要去學術交流前的一次約會，多謝老闆給了我一個非常好的回憶，交流完我要再翻嚟食埋你其他甜品❤️…查看更多

限聚-限聚形容呢晚食飯的心情真是沒錯相約成年沒見的朋友食飯就是因為呢個限聚攪到本來一個由七個人組成的群組要變成得翻四個人才可以一齊食飯有人曾提議分兩張枱食咪得囉！其實如果要食到咁不如簡簡單單四個人食算吧！Outback出品一向都不會有太大問題，我們每人叫了一個晚餐，共叫了3個牛柳配龍蝦尾加1個澳洲M3/5和牛，本來有個朋友話唔係好肚餓，可能只會食小小，但最終佢成個餐食晒👍🏼因為其實傾吓傾吓妳就會不自覺的食晒，不過噚晚唔知係咪坐正個風位，全晚吹住好大風的冷氣，食到震騰騰。侍應細心醒目👍🏼👍🏼因為我哋有位朋友遲來，叫我哋幫她叫住餐先，但沒有講要湯定沙律，牛柳幾成熟，同埋四選二的自選特色配菜食咩，侍應話不如幫我哋三個新落order先，等到我朋友一來到時他便好主動的幫我朋友落單👍🏼👍🏼👍🏼…查看更多

今日與同事一齊食晏，對他們的軟殼蟹漢堡念念不忘，一心諗住再來尋找軟殼蟹的故事，但坐低看看餐牌，點解唔見隻蟹腳😭😭最後叫了茄汁肉醬漢堡，好彩都好好味，個肉醬好有肉汁唔會乾爭爭，不過今次個蕃薯條就有啲失望，太乾同無味，同之前食過相差好遠，同事叫了煙肉薯粒迷你鑊仔，我見佢個鑊仔嚟到時上面有隻溫泉蛋，好似都幾正😍想講講今日負責招呼的侍應態度嘛嘛地有少少黑面，我哋叫餐茶時已經問係咪有窩夫可以上埋，等了大約三個字後眼見隔離入坐只有兩個字嗰位女士的窩夫都送上來了，但我哋的仍未見到蹤影，更想請其幫手跟跟，發現應該是剛才落餐茶時漏了幫我哋落埋個窩夫，只是好敷衍的話幫我哋去睇睇，但見佢係行咗去幫人落order😠如果第一次嚟食就遇到咁樣的待遇，相信今日我唔會再幫襯。…查看更多

隨著中秋節過後又到食大閘蟹的季節，今次找來一間100分鐘任食大閘蟹的食府，本身我哋想book六點嗰個時段，但訂位時話已額滿，就只好改八點入座的時段，諗住早點去尖沙咀行吓街睇吓嘢，夠鐘至上去，但由於中港城真係無嘢行，好多舖頭都在七點幾已經關門，我哋在商場裡遊蕩了個幾鐘都只是七點半，咪膽粗粗搭扶手電梯上到平台層，間酒樓在電梯後面，如果唔識路都最好睇一睇地圖，入到酒樓問可否現在入座，個侍應話可以，我哋咪即時坐下，剛好他們有大閘蟹出籠，首先每人派兩隻，大閘蟹不算太大，大約三至三両半一隻，蟹膏就睇妳彩數，我朋友食嗰兩隻都是沒有膏，之後就陸續傳上其他食物，啤酒汽水任飲。佢哋唔係話妳食完兩隻就落order再送上大閘蟹，而是佢哋會一大籠蒸好之後，好似賣點心車咁推住架車行走全場，對我呢啲一向食蟹好慢的人嚟講，咁樣做是沒有太大問題，但我的朋友在我仲食緊第一隻時，佢已經食完三隻(因為我食得太慢，我叫佢食埋我第一輪嗰隻先)，如果唔係咁樣派遞的話其實我朋友應該可以食到八至十隻，現在全晚我食咗四隻，佢哋一個食咗五隻一個食咗六隻，到最後有薑茶飲用。正常的味精羹較少膏:)超級肥鮑魚好琳太咸無乜味可以接受可能由於我哋早了半小時入座，上一個時段啲客差不多食完，下一個時段啲客又未到，所以廚房有時間煮熱其他食物，我哋坐低不久除了椰汁桂花糕外其餘食物已經全部上晒，我見有啲八時才入席的到九點半還在追緊雞翼，炒飯。所以食後小貼士係如果可以就預早少少去坐低先，因為佢都係照計100分鐘，但由於佢哋十點就關門，所以八點嗰個時段已經可以話係最後入座，我哋可以坐到差不多十點才走，另順帶一提係，佢哋係先付錢後食嘢，所以食完真係可以拍拍籮柚就走得。…查看更多

放工去邊好，這間位於觀塘工廠的餐廳都是一個不錯的選擇，可以揀選限時任食扒，或者唔係咁大食的可以好似我哋叫他們的晚餐亦可，現在做緊晚市優惠，二人餐半價，四人餐七折。今次我哋三個人就叫了一個二人餐再另外散叫一些小食。雞中翼燒得恰到好處，唔會太乾無晒水份眼見個意粉份量好似好少，但食吓食吓又好似啱啱好，做人唔好眼闊肚窄雞軟骨應該唔會有可能整得唔好食😂燒茄子比想像中大份，燒得好熟好琳但又唔會爛溶溶👍🏼安格斯牛扒反而有點失望，因為朋友要食比較熟所以叫了七成，但塊扒比較“UN”好多根，同埋無乜牛香燒雞泡魚乾做得不錯，試過有間食過乾過我塊面，呢間燒得唔錯，有少少濕潤😋沙律正常😃紫薯湯好香好甜👍🏼👍🏼 Terimisu、泡芙 甜品做得幾好😋餐廳環境舒適，如果經常在觀塘打滾的應該會好易找到，鄰近港鐵站，對於我呢啲方向白痴，教了我一次點行之後都識行回原路走要點讚餐廳的貼心舉動，最後張相裡看見的甜品是二人餐的食物，點解會有三個呢？就是餐廳職員見我們有三個人送多一份甜品給我們，利申我們之前絕對是沒有要求過的，他們主動真的令我們很驚喜，多謝您們😘…查看更多

這家店舖的地址不是太容易找到就算我住在銅鑼灣的朋友都不能一時三刻就說出正確位置米酒是原身支裝即場在面前將其轉入個酒壺方便攪拌和盛載五花腩香口，略嫌薄了一點如果有生菜包住食更好，而這裡是需加錢落單才有生菜海鮮煎餅餡料足夠，味道可口唔會太厚粉醬炸雞有分原味和有醬汁的，炸粉薄原味是雞槌，有醬汁的是雞肉(無骨)啖啖肉薯仔豬骨鍋，薯仔份量不多個鍋好大，鍾意飲湯的一定夠飽豬皮好味，要注意燒烤時間，隨時會燒焦泡菜煎餅，味道一般這個粉醬太厚…查看更多

最近因為疫情少了約朋友出來食飯，見現在放寬了限聚令至四人，咁啱朋友又放假，一於約出來食餐飯，咁難得至可以飯聚，當然唔可以求求其其食一餐啦！🥳🥳我叫了一個$188而朋友就叫了三個$198的一人餐，其實兩者最大分別是想唔想食牛，我呢日就想食海鮮多啲😋佢哋每道菜都煮到剛剛好，食材又夠新鮮，真係好好味🤤🤤咁開心當然另外叫了🍺🍺🍹🍹飲啦！睇佢個份量好似唔多，每樣一件，但如果你唔係超級大食，應該都會夠飽，仲要係有得同廚師交流，唔係淨係坐係度食食食，是日午餐食得相當開心。😂😂呢間餐廳我幾年前都嚟過食晚餐，當然價錢就不是午餐呢個咁抵食的錢碼啦！所以今次午餐以食鐵板燒來計，這個價錢真係物超所值，下次再放假都想再來食多次。💕😍😍實在抵擋不了的美味，在9月23號再次光顧今次更加令我要對這店舖的職員給予高度讚賞由於朋友好想來一試，但只可以在兩點後才趕到來，在訂位時已被通知Last order是兩點半，當天下著黃雨，我打算先來取位，來到時是一點九，還有45分鐘才到訂坐時間，平時一般食肆會叫我企埋一邊，但他們很好，對我說鐵板燒坐位暫時未有，不如先往店內坐下好過企在門口咁辛苦，之後就被安排了我坐在食刺身的坐位，等了大約20分鐘鐵板燒的位亦安排好了，便幫我轉入鐵板燒的坐位，而且在整個用餐過程中所有店員都非常有禮貌，完全沒有感受到想我們快啲食完快啲走，唔好阻住我哋收工的態度。…查看更多

睇個名以為會食到講呢個字😂😂上網見到佢哋賣廣告話中環呢間啱啱裝修完重開有優惠，當然約埋三五知幾嚟一試啦！我哋揀了鴛鴦鍋(麻辣拼蜂巢豆腐)做湯底，因為咁鴨血可以無限添加，個湯底好正好夠味，我本身唔食得辣，但食鴨血唔食麻辣就唔好味，所以至要叫鴛鴦鍋，因為我其他食物要在唔辣嗰邊淥。😅😅佢哋食物有好多都可以叫一份或半份，但要知道半份的意思是三件，即一份就是六件，如果好似我哋四個人就要睇吓會唔會有一啲人唔食就叫半份，食物質素都好平均，大致上我哋叫嘅咁多種食物都無中伏。😋🤤😋🤤😋🤤埋單嗰陣就要小心睇單，因為唔知點解佢計咗我哋五個人，而且漏咗比當時的推廣折扣，所以呢個係當晚對呢間食肆為一的污點。🥺🥺🧐🧐🧐🧐🧐…查看更多