DorisChung0112的个人专页

好耐之前已經聽過新田購物城，一直無去過，因為交通上唔算方便，今次朋友話揸車去，咁揸車去就無問題，泊車ok。醉辣鮮唔算好大，但感覺舒服，尤其有部分海鮮是由客人自己親手揀，蟹、鮑魚、龍蝦、青口等，好生猛下，幾好玩，影相一流，絕對是打卡位。有朋友試過任食蟹，話十分過癮。之前食過幾間蒸海鮮，比較起來，呢間價錢同質素都算係唔錯，我地叫左$198餐同$268餐，$268餐有半隻龍蝦、半隻蟹，其餘就同$198餐一樣。一上桌的是老火湯，味道尚可，算足料。蒸雞件都好好味，個溫泉蛋就唔係個個夠膽食，朋友講笑話蒸熟埋安全d，我就食埋佢果份。餐廳內有蒸各種海鮮的時間建議，由於朋友比較怕生，所以全部都較耐少少，好彩都保持到鮮味。我勁鍾意蒸蔬菜，d粟米好甜，金菇、生菜、茄子都十分好味，係蕃薯就一般，要蒸好耐。最正係蔬菜是任食，好啱我呢d鍾意菜之人。海鮮類別，我就覺得鮑魚、蟶子、沙白、蜆等最新鮮，滿足～至於元貝，蟹、龍蝦、生蠔、海中蝦都唔錯。個粥底我就覺得咸左少少，都算可以。總括嚟講，係值得一試的。…查看更多

同朋友慶生，朋友揀左尖沙咀這間食和牛的餐廳。位置好方便，在金馬倫道，店鋪唔算大，不過乾淨企理，坐得舒服。一坐下，侍應就送上熱茶，態度熱情。個人好喜歡餐廳的所有碟，真係好靚，睇得出老闆的心思。我地一行4人，點左鵝肝和牛丼、食肉獸、A5吉列和牛咖喱丼、上癮海苔白飯魚脆脆、黑松露牛油果沙律、海膽和牛紫菜taco。食肉獸方面，侍應送上三種點和牛的配料醬，A5和牛真心無得頂，入口即溶，牛味好香，值得一試。白飯魚脆脆好味，不過就貴左少少。鵝肝和牛丼份量都夠，味道濃郁。黑松露牛油果沙律，份量足，幾清新，不錯。海膽和牛紫菜taco味道幾好，是塊紫菜油左少少。A5吉列和牛咖喱丼個人覺得一般，可以俾機會試其他食物。價錢方面偏貴，不過是好味既。…查看更多

朋友住在屯門碼頭啟豐，所以帶我去食下「小茶角」，在啟豐商場入面，店舖唔大，不過環境乾淨企理，坐得舒服。我地叫左兩個餐，一個是「牛魔王」，一個是「屯門牛」，分別配左薯條、薯角，同兩杯飲品。另外加左一個凱撒沙律。先講「牛魔王」，好好味丫～個牛漢堡扒肉汁好正，好香牛味，加埋芝士同埋充滿牛油香的牛角包，邪惡美味到呢～至於「屯門牛」就有炒蛋、蕃茄、煙肉、蘑菇等，層次都好豐富，不過，比較起來，我都係鍾意「牛魔王」多d~至於飲品，我叫左雪山牛古力，味道不錯，相比之下，朋友杯芝士奶蓋百香果冰冰正好多，d芝士味好味到喊，一飲欲罷不能～薯條、薯角味道就一般啦，份量少左d~最後個凱撒沙律就普普通通啦，個人覺得唔洗特別試。埋單$208～…查看更多

同家人行元朗紅磚屋，未行先肚餓，想搵間舒服啲既餐廳坐下，呢間雅閑泰外面有位，大門內原來都仲有唔少位，環境舒服。我地叫左無骨豬手飯、泰式炒金邊粉、黃咖喱牛肉飯、新鮮椰青、泰式奶茶。無骨豬手飯十分好味，份量都足！泰式金邊粉不過不失，起碼唔會似某些餐廳偏甜、肉質硬等問題。黃咖喱牛肉飯好香，牛肉量都夠，起碼我哋share 食都ok~至於不得不讚的是那個新鮮椰青，鮮甜到震！又勁多椰青水，正！我同仔仔都飲到勁滿足。家人叫左泰式奶茶，因為我地一坐低已經聞到個種獨有的茶香，果然無令我地失望，係好飲既～總括而言，值得去食，值得再試。…查看更多

同家人三大一細去南豐紗廠，第二來Fleur食飯，因為食物真係好靚同好味。今次又再叫左Fleur lover 同埋meat lover, 新加fish lover. 先講Fleur lover, 真係好靚丫，見到就覺得賞心悅目，味道都好正，忌廉不太甜，鬆餅鬆軟又飽肚，仲要有新鮮水果加果仁，仲有靚靚食用花，好正丫。至於meat lover ，啱曬我呢啲食肉獸，鹿兒島豬肉真係好好好好味丫！肉質juice, 外脆內軟，加埋紅椰菜，同埋是拉差沙律醬，外面有竹炭麵包邊脆內軟，每次食都覺得超正。今次新加既fish lover 就相對地一般，三文魚煎得唔錯，不過個意大利煎飯就麻麻地，份量好少之餘，味道都一般般。:)如果下次再來，我應該會試其他，唔會再叫fish lover.不過，總括而言，呢間餐廳絕對值得試。…查看更多

行經雅都商場，聽朋友講過話上面有個go go mall,是個food court, 傍晚時分唔多人，就搵下有無好野食。見到一間叫馬拉公公既，就去試下。同朋友叫左檳城肉骨茶飯、白咖喱豬頸肉摻摻。先講白咖喱豬頸肉摻摻，色澤算唔錯，係感覺幾油下，不過呢款菜式係偏油，明既，聞落都幾香，:)至於食落口就都算可以的，豬頸肉略嫌乾身左少少。至於肉骨茶飯，可能之前飲過勁好味的肉骨茶，覺得呢間既肉骨茶一般，味道偏淡，肉的份量ok, 反而奇怪在有好入味既油炸鬼，不過呢，唔知點解個肉骨茶都係有成層油在面。而飲品方面，個薏米水是偏淡的，無乜特別，個白咖啡就幾好飲咁。有兩樣野想讚下，一係張單在肉骨茶旁加忌孕婦，好貼心；二係薏米水用紙飲筒，環保。…查看更多

同朋友行尖沙咀，見到呢間餐廳個名幾得意，又想食台灣野，所以入去試下。睇返資料，呢間餐廳應該是屬黃店，不過我地發現餐廳入面的deco是用簡體，畫上紅領巾，我諗應該係特登掛。算啦，我都睇得明既。不過兩個店員俾人感覺麻麻地，幾 hea下，落單都係兩個係度玩玩下。:(我地最後叫左魯肉便當、蕃茄牛肉麵、滷水拼盤、鹽酥雞扒。先講魯肉便當，魯肉少，這個算，最大問題係d飯濕到係蒸蘿白糕既質地，我忍唔住同店員講個飯既問題，佢話唔好意思，今日比較多人揀飯，話翻煮左幾次，嗯，佢解釋左，不過......其實唔知關咩事。個店員有問不如幫我轉麵，不過我朋友個麵咬落都係似硬硬地既烏冬，所以作罷。到份蕃茄牛肉麵，個湯底味似茄膏開，牛肉無牛肉味，個麵質頭先講左...... 至於個滷水拼盤，我真心未見過滷水滷完d 豬耳同雞翼都仲係淡黃色，蛋同滷豆腐算係可以，蛋算係入味，其他都係白烚既味道，究竟係點會咁既呢？:(至於鹽酥雞扒，真係好油，然而都係無味既，唯一可取係皮都算脆。最後要講埋個黑糖珍珠鮮奶茶，味道係溝左糖既水，珍珠未熟。小插曲，格離枱有3個女仔食，全程都好接受唔到d質素，走嗰時都忍唔住問我地，究竟係佢地味覺問題，定還是真係好難食。自問對食物要求真係唔高，但呢餐真係食完想問句：究竟我食左d乜？…查看更多

去太子附近行街，見到間外觀唔錯的café,見open rice 評語幾好，就試下啦。我地見到羊膝比較特別，所以叫左個巴黎式紅酒慢煮紐西蘭羊膝，又見石燒好似幾特別，所以叫左石燒牛肩胛肉眼扒。先講石燒肉眼扒，好好好味丫！石燒又有特式，上菜時塊扒好似好生咁，不過在個石燒上面，肉眼扒慢慢就熟熟地，我地先諗起唔怪得侍應無問我牛要幾成熟。牛肉質好正丫，汁係另上，因為侍應提左唔好淋上石板上。不過，內心有點點擔心係唔係要快啲食，怕佢好快熟曬。薯條就一般啦。另外，羊膝方面，朋友就幾鍾意，因為佢鍾意羊的臊味，羊膝份量大，伴有肥膏，味道是可以的。:)不過，如果要比較，我個人覺得牛好味好多。餐湯是南瓜湯，偏甜，沙律好普通，反而個甜品芝麻味雪糕唔錯哦。…查看更多

陪屋企人去完仁安覆診，在附近搵左間瑞峰軒茶餐廳坐低，午餐時間都算幾多人，本身想叫牛腩湯麵之類，姐姐話無，所以我地叫左星洲炒米和枝竹炆魚腩飯。上餐速度算快，星洲炒米裏面的蝦都算幾大，肉質ok,份量足夠，唔會太油。枝竹魚腩飯就份量夠，不過係幾油膩，枝竹算係幾腍。:)…查看更多

三人閨密聚餐，想食泰式野，朋友揀左呢間，話因為見佢都算多正評，打算一試。餐廳分開左兩個鋪位，地方尚算大。三個人叫左一個生蝦沙律，味道不過不失，蝦的肉質都可以。另外，叫左個金坊柚子沙律，一個有點怕辣，只食柚子，一個食得辣，覺得好好味；叫左個豬手，原本睇餐牌以為是有點似醬汁的，點知係乾同炸感的，麻麻地；反而份牛肉幾好味，肉質保留到，底下的芽菜都唔錯；另外，叫左泰式金邊粉，味道尚可，口感都ok.送既甜品，椰汁糕，味道有點似大菜糕。…查看更多

住在元朗一年多，每次經過這餐廳，睇到出面的食物相片都想試下，這日終於搵到機會試試。餐廳格局似一般麵店咁，整體感覺乾淨企理，係d姐姐們會時不時就傾下計咁，不過服務係ok既。叫左餐牌封面的兩樣推介麵，酸菜桂花魚麵、養生花膠雞麵。落單後不久就有野食，個碗好大個，份量就一般啦。酸菜桂花魚麵中，桂花魚片好滑好味，麵質就兩碗一樣，酸菜我覺得可以再酸少少。養生花膠雞麵中，有一片花膠，雞件數量ok,肉質唔錯，係個湯有少少油，算係可接受的，仲有紅棗等配料，感覺上都真係幾養生。兩碗麵的湯底都唔錯，雞麵湯底幾好飲。價格接近$70一碗，算係一般。下次想試埋個水煮牛肉，唔知會唔會好辣。…查看更多

同朋友在大圍閒逛，夠鐘食晏，就上open rice 睇下附近有無餐廳介紹，見到呢間餐廳有咁多好評，就去試試。嗯，老實講，只是屬一般，不過不失。餐廳環境一般，當日的侍應是叔叔，都幾有禮貌。不過，食物質素就麻麻。我地叫左一份豬扒包餐、一份雜扒餐。餐湯、沙律一般，豬扒包賣相、味道算不錯，保留到肉汁，口感都可以。:)不過份雜扒就真係麻麻地，有點似快餐廳的質素，肉質有點鞋鞋地。:(真係唔知點解會有咁多好評。總結就係：一般。…查看更多

一間樓上的餐廳，名叫mamaday,實情係好得！首先地點唔錯，在加連威老道行完街，就見到間餐廳，上一層就到，餐廳算大，座位坐得幾舒服。我同朋友坐既枱仲要底下係衣車腳踏（其他又好似唔係），都幾好玩，近窗邊就可以望下樓下條街。個餐牌好搞笑，大家睇下相就知，菜單名都係行搞笑路線。食物方面，我地叫左一個蟹肉蟹籽意粉，一份牛扒，一杯杏仁綠茶。抱歉餐牌的名好搞笑，卻忘記影，又忘記全名。個意粉好俾到貨，又香又多蟹肉！份牛扒肉質好、肉汁豐富，仲配埋蝦片，正！側邊配埋新鮮紅莓，都幾特別。杯茶都好特別，的確無乜杏仁味，不過又有少少咁。個餐有餐湯或沙律，咁我就覺得沙律好d.值得一試，又可encore 的餐廳。…查看更多

在疫情影響下，無左晚餐堂食，唯有當午餐是晚餐去享受。睇得出餐廳老闆好有心去經營餐廳，內部環境都是經過精心設計，就算你喜歡與否，都可以知道經營者有一份心思。這個由店名logo,杯子等都可以見到。點左一份醬燒豬肋骨窩夫、一份燒雞。餐湯比較讓人失望，那種有點粉粉的湯，比起餐廳環境，好唔match.幸好主菜搭救到，豬肋骨肉質鬆軟，入味，比想像中有肉，窩夫的味道也不錯。燒雞水準也不錯。配菜的薯條如果份量多一點會好少少，沙律份量尚可。總體而言，環境舒服，味道尚可，或者下次應該試甜品。…查看更多

行經馬鞍山，由於比較少去，所以見到這間餐廳就隨意入去試下。裏面環境寬敞舒服，侍應服務不錯，有禮貌。:)午餐時段，叫左一個香煎牛柳配紅酒汁，同埋一個WM All day breakfast.兩個餐都有跟餐湯和麵包，估唔到個龍蝦湯味道唔錯，個蕃茄湯就偏酸左少少。牛柳賣相一般，不過味道好，保持到牛味和肉質，算唔錯。All day breakfast 的賣相也算不俗（我見過同類價錢不過擺盤勁差的），裏面的配搭中規中矩，味道幾好。反而，要讚一讚的是餐廳自家製甜品，檸檬cheesecake,好清新！藍莓cheesecake 亦不錯。…查看更多