sam783的个人专页

聽朋友講灣仔開咗間新嘅日本餐廳超好食，有一日行街行到9:00 call咗餐廳有位，咁就即刻上咗去食啦！望一望個Menu價錢唔平，屬於中高級日式餐廳路線。我就叫咗個ozakaya roll 同埋海膽骨髓飯，係我嘅朋友極力推介。先講吓個海膽飯，牛骨髓熱辣辣上枱，然後一啖啖將佢哋刮入海膽飯裏面撈埋一齊，果然骨髓同海膽好夾，好umami, 有豐厚嘅層次，有強烈嘅海膽味，其實兩個人可以share一碗，因為食到中間已經好飽，好膩但係又好食！至於個roll, 好厚好大個，裏面有超多魚生，有油甘魚三文魚吞拿魚飛魚子，係超級好食同埋抵，我忍唔住叫咗兩個。值得推薦！…查看更多

我平時一向都唔鍾意食熟蠔，生蠔OK嘅，今次嚟到依間拉麵鋪，主打食蠔拉麵，俾咗我一個超級驚喜。佢哋有兩款湯選擇，一款清湯一碗濃湯，我同朋友一人一碗作比較。起初幾鍾意清湯比較清甜容易入口，對比之下，濃湯明顯較重蠔味，比較油膩肥美。至於拉麵，好入味，軟硬度適中，蠔好新鮮，完全唔腥，對於我唔鍾意食蠔嘅人，確實係另一番感覺。可惜嘅係食唔到佢哋嘅沾麵，因為一早已經賣晒，我估計應該會好好食。價錢方面偏貴但可以接受。…查看更多

聽過依間餐廳好耐，好想好想試吓，今日終於有機會，提早打電話去book, 唔需要等！雖然話係菲律賓菜，我諗Menu上面嘅食物好多都係平時我哋喺香港食到嘅嘢。我就點咗佢哋嘅鮮蝦貝殼粉rose prawn同埋moo salpicao. 其實味道一般啦，冇乜驚喜，佢哋嘅椰菜花飯，令人比較感覺新鮮啦，對想cut carbs嘅朋友可能比較吸引！但係佢哋最好食嘅其實係ice cream sandwich, 我就揀咗芋頭味，令我諗返起以前喺菲律賓食芋頭雪糕嗰種風味，芋頭雪糕同埋夾餅配合得天衣無縫，爽脆得來有冰冷嘅感覺，實在係一個非常之好嘅甜品，極力推薦！…查看更多

Foodo手工意粉聽過好多朋友講都話好食，今次終於有機會去試。叫咗個蕃茄手工意粉配虎蝦，意粉爽口彈牙蕃茄味道重，依度嘅手工意粉比起出邊街嘅手工意粉更加好食，聽講係用日本麵粉同埋雞蛋整，口感一流，樸實精巧。唯一不足之處份量有啲少，但係嗌多個炸雞，熱辣辣脆皮肉嫩滑，超好食。最後嗌多個甜品焦糖脆脆蛋糕，焦糖味爽脆配上軟林林嘅蛋糕，味道一流。職員服務態度良好，我哋一行八個人，佢幫我哋夾枱，落單上菜快，服務周到。…查看更多

Sake放題168冇限時，我諗依個係全香港最抵飲嘅deal, 求醉必選，可以飲到你飽。出面嘅sake放題，至少都要200-300，仲要有限時，呢度個sake款式有好多，又凍又熱，有薰有醇有熟，除咗sake，仲有梅酒水果酒選擇，尤其是佢哋嘅柚子酒超好飲，超易入口，簡直係抵到爛。最重要係佢哋冇限時，如果你7:00入座可以飲到去12點，名副其實飲飽食醉。服務亦都一流，員工隨傳隨到，唔會揼波鐘，亦有好好嘅推介。佢哋啲串燒都超級好食，價錢合理，特別推介佢哋嘅燒茄子同埋蠔，超級好食，蒜蓉味重惹味，送酒一流。…查看更多

大坑最出名嘅莫過於順興茶餐廳，今次排隊唔係等咗好耐，職員服務周到，坐低叫咗個招牌三寶飯凍檸茶同埋一碗豬紅蘿蔔勁辣魚蛋車仔麵加凍奶茶。我差唔多兩年冇食，佢哋依然保持水準，招牌三寶飯有牛肉有蝦有叉燒，配上特製嘅豉油，超級好食！炒蛋啱啱好唔會老，牛肉蝦同埋叉燒嘅配搭同炒蛋融為一體，可以話全香港冇一間餐廳可以做到。至於車仔麵，竟然有驚喜，勁辣魚蛋果然真係好勁辣，豬紅好爽唔會散，蘿蔔好入味，配上米粉吸晒啲辣味，辣到可以同譚仔比較。佢哋另外都可以揀腸粉作為車仔麵個底，相信係唔錯嘅選擇可以下次試。…查看更多