山區麵包王's Profile

周五晚，兩公婆都唔想煮，出街食就乾手淨腳，近近哋過到嚟太子試吓啲點心店，都無特別刻意搵，隨心晌彌敦道就遇到「熱點點心專門店」，我記得5、6年前到訪過一次，今次算叫做故地重遊，哈哈！餐廳話大唔大，話細唔細，喺柱位多，格局都可以一眼睇晒，左右兩邊喺啲四人卡位，中間就喺啲活動式二人散枱，裝修簡潔，環境四正，牆上就有好多本土風情彩繪，都喺百姓日常場景。雖然全院滿座，人手又似乎唔多，但幾個阿姐都好快手快腳，亦好有禮貌。一張點心紙就羅列晒所有款式，大部分會喺見慣見熟嘅款式，數數吓，都有超過50款之多，睇落定價都算相宜，外賣自取仲有88折添。順帶一提，茗茶每位收$6，全日無加一，只喺標示咗繁忙時間用餐50分鐘，一般而言，食呢類點心專門店都差唔多喺呢個時間左右。楊枝甘露糕 $24打算點嚟當飯後甜品，點知第一道點心就喺佢，所以，就當冷盤啦。入口清甜嘅芒果味都幾濃，糕身本身做得幾挺實，混入西米自然令口感唔錯，最正裡面有唔少柚肉，冰冰涼涼，當前菜冷盤都OK喎！虎皮煎釀尖椒 $29呢個喺老婆至愛，一客有4件，有啲辣，有啲唔辣，無樣睇，煎得好香口，有少少辣勁喺好食啲，而且釀入好多鯪魚肉，打得彈牙，全晚最欣賞嘅點心。何解叫「虎皮」尖椒，因為以高溫油炸後或煎過，青椒嘅表皮焦乾得嚟似虎紋，但似唔似就見仁見智喇。蒜蓉墨魚頭 $36少有食呢款點心，亦非常見，所以，專登點一客試試。相比起其他點心，佢份量唔多，不過，又真喺幾好食，一來啲墨魚頭（其實有唔少喺墨魚鬚）咬落爽口煙韌，二來滿滿蒜香，下面仲熱咗少少粉肚絲，當要唔好錯過啦。香茜牛肉腸 $27腸粉相信喺嚟得飲茶嘅人都會必點菜式，幾款選擇中揀咗香茜牛肉腸，睇落唔覺，但食起嚟腸粉皮有少少厚，不過，都幾滑，至於啲餡料，牛肉落得一啲都無手緊，塞滿晒牛肉，非常足料，有相你睇，而且，加咗芫荽，更添一份清香味。蒜蓉開邊蝦籠仔蒸飯 $48正諗緊嗌盅頭飯定籠仔蒸飯，最後，都喺後者有啲特色，蒜蓉開邊蝦喺老婆較心水嘅口味。其實就唔喺咁覺啲荷葉味，但食落啲飯粒，感覺都有少少荷香，加上飯粒軟熟，淋上秘製豉油，再撈埋啲蒜蓉，齋飯都好好食呀！而啲開邊蝦雖然細隻咗啲，但份量多，個飯都好抵食。薑汁千層糕 $22最後，點都要嗌番個甜品食，就後加薑汁千層糕。一層又一層做得細緻，唔難做，但都喺功夫嘢，入口糕身煙韌而有彈力，又唔黐牙，薑味非常突出，但就唔會重到焫口嘅感覺，幾合小弟胃口，老婆就更鍾意佢夠薑。普遍上，點心專門店嘅定價點都比去酒樓抵食，所以，是夜見咁多捧場客。加上地理位置好，晌太子嘅大街之上，咁旺場都不無道理，服務又唔錯，人少少嚟過吓點心癮都幾唔錯。…Read More

陪老婆過嚟「D2 Place」睇啲嘢，差唔到放飯時間，整本來想晌呢度搵檔嘢食完就想，結果無嘢啱佢，就過嚟「四小龍」睇睇，撞啱有家「魚米」，呢間食魚湯嘢，佢最鍾意。環境方面，裝修都喺簡約風，以一貫茶記嘅格局，卡位佔多，剛好有張角落卡位吉咗，坐埋一邊自成一角。而餐具、調味就放晌枱側櫃桶，餐紙就要問一問侍應攞。掃碼點餐都喺時下流行做法，大勢所趨，最好喺顯示埋個wifi出嚟，方便到一啲電話無數據嘅客人嘛。今次就無影晒個餐牌俾大家參考，加上無帶相機，只喺用心機，所以，隨意影少少，主要亦喺影番自己有嗌嗰部份。鮮魚湯五福臨門米線 $48魚湯米線喺店家誠意推介嘅出品，至於五福喺咩，睇落都唔止5樣餸料，佢都喺個統稱而已，實際有有蛋、魚片、腐皮魚角、腐竹、香菇貢丸、花枝丸、肉燕餃……等等，米線量又多，大大碗確喺幾抵食，亮點喺個鮮魚湯確喺幾得，魚鮮味十足，好鮮甜，所以，我哋飲到無剩，一滴都唔嘥。蔥油鴨脾脆皮南瓜粒飯 $55蔥油向來喺唔少麻甩佬嘅至愛，加埋炸鴨脾同炸南瓜粒，極度邪惡嘅組合，算得上恐襲級。蔥油撈飯好食就唔需要多講，炸南瓜粒好脆口，南瓜粉甜，喺油膩少少，但最失望喺隻鴨脾，本身大大隻好有睇頭，俾埋膠手套可以成隻拎上手食，夠爽呀，醃得又OK，只喺炸得較乾身，肉質有少少韌囉。金桔蜜老婆個米線唔喺餐，飲嘢要加錢，加上佢本身唔好飲嘢，所以，嗌咗杯大家都啱飲，又滋潤嘅金桔蜜，入口確喺幾潤嘅，滿滿金桔香味。如果唔喺隻鴨脾，今餐肯定好高分，依家就拉低咗，整體拉均就中上啦。店員雖然有唔少喺上年紀，但好好招呼，見我哋坐落好耐都未落單，主動問問有無嘢幫，態度又有禮。…Read More

與老友聚一聚，到灣仔食個晏，但就想搵個靜靜哋嘅地方方便傾偈，左搵右搵就揀嚟灣仔嘅「中華小館」，嘆吓高質素嘅中菜。踏進餐廳，環境確喺幾古雅清幽，牆上掛起啲鄉間油畫，帶出一份文化氣息，加上樓底有番一定高，感覺予人舒服閒適:)。唔好以為睇落唔大，其實仲有閣樓，不過，小弟就無上去探個究竟！午市商務套餐，分2、4、6、8、12人，都幾有彈性，而我哋所揀嘅2人套餐包咗滋潤燉湯、燒味雙拼、燒汁班頭腩、翡翠帶子蝦仁、蒜蓉炒菜苗，敬送絲苗白飯及精美甜品，定價$468，另收茶錢$15位及加一服務費，佢哋啲服務幾唔錯，侍應亦好有禮貌。滋潤燉湯初頭以為都喺慣常見到一盅盅嘅燉湯，嚟到喺以紫砂功夫茶壺盛載，非常別緻。打開撈一撈，有雞肉、赤肉、海底椰、金華火腿、螺頭……等等，呷一口，個湯味道濃郁，好夠火喉，而且，好潤喉，飲落非常舒服，此外，啲湯料都幾好食，唔會無晒味。再者，個紫砂壺好保溫，去到中段都仲喺好夠熱。燒味雙拼燒味喺店家嘅招牌嘢，啲套餐自然會包咗，最好喺雙拼，可以試到兩款燒味嘛！先試試蜜汁厚切叉燒王，喺店家嘅得獎之作，入口果然喺超鬆化，8分瘦2分肥，蜜香中帶少少油脂香，最正喺有少少燶邊位。脆皮燒腩仔亦都好正，外皮堅喺卜卜脆，而肉質比預期瘦，無乜肥膏，口感卻非常鬆化，更醃得啱啱好，無過鹹嘅弊病，沾上少少芥辣，極具風味。燒汁班頭腩套餐包咗3款小菜，款款都做出高水準，先分享呢道班頭腩，啲班腩酥炸過，所以，先入口外層頗為脆口，而肉質保持好嫩滑，極具魚鮮味，再者，以燒汁、薑蔥爆炒，甚為惹味。翡翠炒帶子蝦仁一道濃香嘅，跟住呢一道就清清哋，翡翠用上西芹炒得清爽，而帶子、蝦仁都好大隻，兩者都好爽口彈牙，可以講喺鮮味十足。蒜蓉炒菜苗菜苗用上白菜仔苗，炒得恰到好處，一來炒到仲有份爽脆口感，唔會過腍，二來食落好有鑊氣感，加上滿滿蒜香味，簡簡單單嘅炒菜都食得出用心。精選甜品初頭真喺無期望喺咩甜品，以為都喺紅豆沙之類，然而，上到枱原本喺一碗雪耳紅棗桂圓茶，可以講既滋補，又清潤，入口唔算好甜，但食落真喺好舒服。想食精緻嘅粵菜，嚟「中華小館」確喺唔錯，食得出用心製作，用料上乘，環境又幾舒服:)。…Read More

早排出咗銅鑼灣食廚師發板，今日又再過嚟銅鑼灣食日本嘢，不過，簡簡單單同朋友上居酒屋「究極堂」食個丼飯午餐而已。朋友話炮台山都有分店，至於呢家銅鑼灣分店小弟都喺第一次到訪。整個地方唔算大，但環境裝修都好居酒屋格局，環境昏昏暗暗，天花掛上好多和式燈籠，好有深夜食堂嘅感覺，近門口嘅另一邊更可以間為廂房，適合一班人搞飯局，同店員傾開，原來炮台山分店亦有廂房。基本上是日所見都坐滿人，剛好最入嘅吧枱仍有位，唔使等！午市主要喺賣套餐，慳慳哋嘅有蛋包飯、牛肉丼、烏冬……之類，豪啲嘅有刺身丼、刺身定食、壽司定食……之類，正所謂豐儉由人:)。此外，散點餐牌嘅食物亦會全數供應。帶子他他 $38先試試店家嘅炸物，餐牌圖文並茂，見呢一款帶子他他賣相靚仔，就揀咗佢。外層脆漿唔算厚，最緊要喺做到脆而不膩，啲帶子好鮮甜，襯埋啲他他醬，加上三文魚籽，真喺相得益彰。韓式泡菜章魚玉子燒 $78玉子燒似乎喺店家受歡迎嘅菜式，見有唔少客都有點，玉子燒可揀明太子芝士或泡菜章魚，選後者因為未試過咁嘅組合。首先蛋卷嫩滑而富濃郁蛋香，裡面捲住好多泡菜，頗為惹味，加上極具咬口嘅章魚，增加點點海鮮味道。究極丼 $208朋友話辛苦搵嚟志在食，所以，奢華少少嗌咗個「究極丼」，可惜喺海膽剛無貨，但會用番時令刺身補上。睇見份丼真喺好吸引，有帶子、三文魚籽、炙燒左口魚、油甘魚、三文魚、赤身、拖羅蓉、大赤蝦，仲搭上一隻蛋香十足嘅蘭王蛋，外觀非常吸晴。佢話啲刺身好新鮮，味道鮮甜，每款刺身都超好食，真喺無咩挑剔位，夠晒足料，物超所值。究極炎之丼 $128而小弟嘅炎之丼跟朋友嘅差唔多，當然，用料無佢嗰個咁高檔，但一啲都唔失禮，有左口魚、黑鯥、甜蝦、吞拿魚蓉、油甘同帶子，全部都炙燒過，入口帶點點焦香感，同樣食得出食材新鮮，又能一次過試到多款刺身。此外，所有定食都包埋田園沙律同麵豉湯，以一頓午餐而言，已喺豐富至極。成日都講，只要做出水準，不愁無客，兩個丼都食得出用料不賴，所以，午市基本上都可以講全場滿座！…Read More

近半年恆指一直造好，上衝兩萬七，老友話大有斬鑊，點都要食番餐好嘅，是夜就揀嚟銅鑼灣嘅「鮨月」。小弟亦都好耐無食過廚師發板喇，數番對上一次，已經喺2021年5年前嘅事，今晚就同老友一起大快朵頤，一於「脂」味無窮。有別一般食廈樓層，一出電梯就喺餐廳，餐廳入口明顯專登縮咗入去，增加整體私隱度。而踏入用餐區，以一貫和風淺木色為主，裝修簡約，配以柔和燈光，感覺舒服。一張L形板前席，目測所見，大概有14個位，喺食「廚師發辦」嘅指定最佳位置，因為可以睇到師傅切魚生嘅刀功、揑壽司嘅手勢，又可以跟師傅交流。另一邊挨窗嘅喺4人座嘅卡位，最欣賞喺以大屏風前後隔住。吧位櫈下備有竹盤，讓客人可以擺低背包、手袋等隨身物品。晌呢啲高檔餐廳，除咗環境，餐具及服務都喺值得留意嘅一環。一碟、一杯都好古雅，餐巾更繡埋店家名字，之後盛菜嘅器皿亦都賞心悅目。而服務方面，好熨貼，師傅例必先問問有無嘢唔食得，或食物敏感嘅指定動作，店員又不時為我哋添茶及收拾餐具，態度有禮:)。師傅上菜嘅速度，亦喺恰到好處，令人用餐感到悠閒唔急促。店內有兩款廚師發板套餐：「月」、「兆」，前者包括前菜、刺身5點、季節の一品、壽司8貫、卷物、椀物及甜點，定價$1,680；而後者則包括前菜、壽司15貫、卷物、椀物及甜點，定價$1,180。食廚師發板有趣嘅地方喺好似開盲盒咁，唔上到枱都唔知有咩款式，往往都帶嚟驚喜。師傅亦好好人，將兩個套餐打勻，等我哋可以試到多啲款式:)。如果鍾意飲兩杯嘅客人，咁就啱晒，店家提供好多唔同產地嘅清酒，仲有紅白餐酒、香檳、啤酒，當然，為要照顧喺其他客人嘅需要，有提供果汁、汽水、啡茶……等等非酒精飲品。香烤鱈魚乾晌等朋友期間，店員額外送上鱈魚乾作為餐前小食，口感超脆，脆到咯咯聲，好似食薯片咁，沾少少沙律醬、七味粉，更具風味。新鮮即磨山葵、沖繩海鹽見到師傅擺上山葵同海鹽，就知今餐美宴就快開始。前菜3點打頭陣喺前菜3點，分別有新鮮水茄子、北海道魷魚配秋葵、赤水母，食嘅次序都喺跟呢個，由淡至濃，外觀就非常之精緻靚仔，貫徹日本菜一向亮麗嘅賣相。新鮮水茄子口感清爽，中間夾住一片板栗甘露煮，顯示得寧舍香甜；魷魚口感彈牙，上面嘅豉油脆脆喺豉油、炸蒜、芝麻混和，令味道更豐富；赤水母做成醋物，底下佐以青瓜絲，酸香醒胃，口感爽滑。北海道松葉蟹跟住上場喺刺身5點，打頭陣喺松葉蟹，單睇賣相已覺得好正啦，將蟹身、蟹腳拆肉，再加埋蟹膏，先試原味淨食，味道勁鮮甜，蟹味濃郁，之後再唧啲蟹醋，亦可以再沾點豉油提鮮都得，味道層次確喺升一級，更突出蟹嘅鮮甜味。最開心喺拆晒肉，唔晒自己郁手嘛，食得夠爽。北海道生蠔北海道所出嘅生蠔向來甚有保證，而睇見呢隻大過小弟手掌嘅生蠔，色澤亮麗，自然更有信心。入口果然肥美高質，口感綿滑，有淡淡海水嘅天然鹹味，唔過重，好啱食。間八薄切友人就試間八，賣相甚有意境，十分之靚，魚肉薄切透光，肉質爽口，味道屬淡味，另一件捲住海膽，當然更正啦，鍾意嘅可以摘啲紫葉花佐食都得。平靜魚小弟試嘅喺另一款刺身，平靜魚以蘋果木煙燻過，入口有陣陣煙燻香，而肉質帶點爽口感，亦可以以紫葉葉捲住一齊食，別具風味。青森縣黑鮑魚師傅話喺心機菜，因為要以昆布包住蒸6小時，先做到軟腍彈牙，佢更捧出一大盆黑鮑魚，話好受食客鍾意。而作為刺身，更佐以自家製鮑魚肝醬，並配一口白飯。的確，件鮑魚軟腍好有咬口，肝醬濃香甘腴，所以，就用埋啲飯嚟沾上剩餘嘅肝醬，一啲都唔好嘥。北海道赤海膽個小盅好精緻，橙黃鮮艷嘅海膽滿滿鋪晌上面，而下面墊有青瓜絲。師傅話食法可以先試咗少少鹽調味，想重啲就山葵加豉油，海膽口感極之幼滑，味道濃郁甘甜，最後可以加上清新嘅青瓜絲，用紫菜包住一齊食。秋刀魚以為「刺身5點」要完，師傅追加多一道時令秋刀魚俾我哋試，佢話呢期貨特別肥美，魚味特別濃郁，更一片一片砌出橄形，甚有心思。並特別搭配薑蔥豉油，令其味道食起嚟更鮮，超好食。季節の一品品嚐過多道刺身後，呢一道帶刀魚天婦羅亦甚有驚喜，炸得金黃，外層脆漿又薄又脆，入口完全無油膩感，外脆內嫩不在話吓，最心思喺魚肉中間夾住啲蝦膏，好別出心裁嘅一道天婦羅。見侍應送上子薑同濕毛巾，就知喺食壽司嘅時候，前者就作為一道壽司與另一道壽司之間嘅間場，用嚟清清味蕾，而後者就俾客人抹抹手之用，用手直接拎起件壽司嚟食。其實，由開始至今，已見到師傅不時切定啲刺身放晌砧板一旁之上，為做壽司作好準備，將切好嘅攤暖備用，更不時以手背去量吓溫度，盡量攤至最合適嘅溫度俾客人享用，甚為細心。今晚試到嘅壽司款式實在太多，真喺逐樣寫有啲難，再者，壽司唔喺小弟強項。不過，整體而言，高質之外，有啲魚種甚少食到，就算常遇到嘅種類，亦會供應唔同部位俾你試，各有特色、亮點，而且，每件做到啱啱好一口過，飯粒搓得緊致而鬆軟。以下就喺我哋合共所試到嘅款式：鮟鱇魚肝配熊仔威化餅乾：魚肝用咗紅酒慢煮，上面加咗少少青瓜所做嘅奈良漬；左口魚：加咗啲柚子皮；深海池魚：大部份壽司己加咗豉油同山葵；赤貝：師傅會拍打一吓赤貝，好似叫醒佢咁，令其肉質更爽口；北海道帶子：師傅話新鮮貨色就會有一絲絲嘅條紋；黑鯥：火炙過；真鯛：色澤雪白晶瑩；筋子：即喺三文魚籽，喺季節性食材，有埋塊膜，所以叫筋子，攞到返嚟要洗，又要醬油漬；鰈魚裙邊手卷：好重油份，加咗木魚花，包埋紫菜食，無咁膩；銀鱈魚：平時多見西京燒，急凍貨，只有刺身級先可以生食，經醬油漬咗一晚；喜知次：輕輕火炙，逼出油香；醬油漬赤身：醬油可突出到赤身嘅鮮甜味；中拖羅：近背嘅部份；中拖羅：近腩嘅部份，線紋比較突出啲；大拖羅：少少火炙，目的都喺逼出油份，滿口油香；拖羅蓉手卷：卷內有拖羅蓉、芝麻、醃蘿蔔及紫蘇葉，加片金箔即時貴氣晒；布丁蛋師傅預備咗一件焦糖、一件原味嘅自家製布丁蛋，入口蛋味超濃郁，又嫩滑喎，而焦糖口味有一層薄薄焦糖，又脆又有份焦香，自不然更加好食。椀物接近尾聲，怕你唔夠飽（其實食完晒啲壽司，確喺好飽吓），奉上雞白湯配素麵，奶白色嘅雞白湯好香濃，飲落舒服暖胃，尤其上一段時間食咗咁多生冷嘢。甜點、生果最後，以日本哈蜜瓜及抹茶蕨餅作結，前者爽口清甜，而且，甜度十分之高：後者口感軟糯，抹茶味濃，為今餐廚師發板劃上完美句號。雖然唔喺第一次食廚師發板，但每一次無論在食材上，製法上都有驚喜，亦都學咗唔少嘢！…Read More

又喺為屋企裝修要出嚟長沙灣睇睇啲傢俬，梗喺順便食埋飯先返歸啦。但裝修事宜真喺好煩，所以，都無太多心思搵咩地方食嘢，一出間傢俬鋪行幾步無耐，見到呢間「德記粉麵茶餐廳」，有啲人氣，都真喺嘥時間再搵，隨遇而安就食呢間。鋪位呈長形，好深，而地方細細，簡樸嘅裝修，格局好街坊，嚟幫襯嘅亦喺街坊多同工友多。啲餐枱本身已經唔大，挨牆一邊仲放咗筷子同多款調味料，都整齊企理嘅。餐牌睇得出有歷史嘅痕跡，表面就以為只賣粉麵，但其實有唔少選擇，仲包括湯粉麵、各式各樣嘅碟頭飯。此外，好鍾意呢啲老鋪，尤其啲手寫價錢單，依家咩都電子化，呢類單已比較少見。牛筋米 $33老婆話近日行得多，補補腳筋，所以，揀咗碗牛筋米，其實都喺講笑，但佢確喺幾鍾意食牛筋。果然平靚正，碗米粉有好多牛筋，最正喺炆得好入味，柔韌得嚟又好有咬口感，好食。牛腩粗 $33食親粉麵，小弟對粗麵就情有獨鍾，呢碗牛腩粗亦都喺有好多牛腩，件件牛腩咬落都好鬆化，甚具肉香，而且，帶點點油脂香，個湯頭濃而不濁，好唔錯。腐乳通菜 $20老婆食乜嘢都講健康，所以，點都要嗌多一碟菜，而腐乳通菜就覺得比郊外油菜有啲個性，尤其個腐乳汁，夠晒香濃，仲一啲都無手緊，俾咗好多，啲通菜仲幾爽口添。熱奶茶 +$7加$7有杯熱飲，無理由唔要杯熱奶茶過吓口癮架，雖然感覺有機會唔及啲茶記，但色澤幾對辦，茶底亦喺香濃，喺柔滑度差少少而已，但小弟都已經好收貨。目測所見，嚟「德記」嘅人都喺匆匆食完就走，猶如大家嘅飯堂一般，加上定價確喺幾相宜，絕對深得人心！…Read More

老婆話約咗朋友食飯，既然是夜無飯開，要食自己，當然「嗱嗱淋」趁機約啲老友出嚟短聚吓，食餐飯，傾吓偈。地點無所謂，茶記就最無負擔架喇，一來平靚正，二來啱我哋啲麻甩佬。踏入餐廳，一室以湖水藍為主調，樓底亦較高，以茶記而言，空間感很好，加上地方企理，夠光猛。話就話香港經濟唔好，但唔喺講笑，接近坐滿，聽到店員跟顧客啲對話，就知街坊多。基本茶記設定，枱面放咗啲調味包，枱側枱桶就放滿餐具，排列整齊。講到食物，茶記勁就勁在乜都有，由鐵板精選，到常餐、蔥油系列、日式蛋包飯、世一金牌炸雞、西式碟頭、秘製馬來咖喱、皇牌焗飯、意國風情、健康蒸選、鮮魚湯泡飯、小食，以及各款飲品。晌門口仲見到有啲二人小菜套餐、二人蒸餸套餐，定價亦好實惠。羅宋湯啲套餐寫明奉送基本熱飲，不過，落單無耐，店員就奉上例湯，真有心，雖然無得揀，喺羅宋湯，但我哋都啱飲，而且，味道夠濃，酸香醒胃，裡面又多料喎，真唔錯。豉汁蒸倉魚 $70老友向來食嘢比較健康，所以，瞄準晌健康蒸選度揀，餐牌都標明蒸魚需時15分鐘，食好嘢當然等吓無所謂。揀豉汁就特別惹味，條倉魚好大條，望落去色澤閃閃爧，食落去真喺蒸得啱啱好，啲肉無黐骨，而且，肉質挺身而嫩滑，又好有魚嘅鮮甜味，當然啲豉汁都好正，撈飯真喺無得輸。梅柚子梳打 +$9老友話想試特別少少，就揀咗呢一杯梳打，有相你睇，真喺落咗好多柚子蜜，所以，佢話入口已好有柚子香，口感清爽，再將粒話梅篤爛去，再入口帶點酸咪咪嘅感覺，多添加一份酸香感，佢更建議食鐵板餐配呢個一流。花膠三黃雞魚湯泡飯 $62肥隔離枱啲鐵板餐咋咋聲，都想試試店家嘅鐵板餐，不過，顧及老友，我都揀咗個幾健康嘅鮮魚湯泡飯。雖然話泡飯，但上菜時喺湯飯分開上，所以，小弟倒大半碗飯落湯，小半碗就撈豉汁食。講番個泡飯，啲雞真喺幾滑，以為份量唔多，卻喺越食越有咁，個人而言，花膠都OK，再炆腍身啲就更好，且有很多菇菌，而魚湯滲入少少雞油，就更加正，伴上飯，真喺好味。紅豆冰 +$9朝早早餐飲咗咖啡，晏晝午飯整咗杯奶茶，夜晚就節制少少，改試紅豆冰，因為見佢加$9都唔喺貴。杯紅豆冰一睇就知有非常多紅豆，而且，煮得又綿，味道好清甜，撈勻啲奶水，好飲又好食。雖然兩個人試嘅嘢唔多，但都食到有質素，招呼又唔錯，地方企理，食茶記好就好在又無加一，所以，真喺值得翻兜。…Read More

老表剛去完台北一行，話有啲拌手禮醒俾我，順便約出嚟食餐飯，佢就我，所以，就過到嚟中環呢邊聚一聚，中環食飯一向唔易搵位，故此走上少少嘅「歌賦街」，到訪「知延屋」食餐日式丼飯。雖然門外有少少人等位，但剛好上一輪嘅客陸續離座，我哋好快有得入。裝修簡約，但一室深色木系枱櫈，加上牆上吊燈，有種日式嘅懷舊風:)；枱上嘅玻璃杯，更喺滿滿日式復古風格。餐廳主打喺丼飯定食、鍋物定食，前者款式不少，並分唔同嘅份量，豐儉由人，後者有日式昆布柴魚湯或關東風壽喜燒湯可選，而每款定食都包咗時令沙律菜、日式醃菜、味噌湯同日本白米飯；此外，仲有啲滋味小食供選擇。溫馨一提，高峰時段用餐時限為60分鐘。雖然，所賣嘅都喺較傳統嘅日式丼飯、鍋物，但卻有幾款特調飲品，分為雪奶酩系列同梳打系列，彩繪圖片睇落頗為吸引，不過，我哋就無試。除上述嘅一人前，店家仲提供一款二人餐，包指定丼飯定食黑毛和牛丼套餐L份量、鍋物定食（2揀1）、小食（3揀1）、飲品（3揀2），做緊特價$370，計落真喺幾划算。炙燒牛肉丼定食 $108我哋都唔喺咩大食之人，所以，揀個M份量已經好夠。整份定食嘅外觀都幾靚仔，尤其碗丼飯，啲炙燒牛肉鋪到滿滿，打下成隻日本蘭王生蛋，加上一朵食用花同啲芽蔥，賣相別致。開開胃，先食啲沙律菜，襯上一橙一紅車厘茄，淋上柚子醋，簡簡單單，卻清新開胃。熱焫焫嘅味噌湯除咗麵豉味夠香之外，湯底更有少少昆布，味道幾好，食完個沙律再嚟暖和一下腸胃。日式醃菜方面，有本菇、泡菜同海帶，本菇富麻油香，泡菜酸香微辣，海帶爽脆鹹鮮，用嚟伴飯食真唔錯。而啲炙燒牛肉真喺好正，肉質本身已經好嫩滑，經過炙燒，有少少焦香之餘，逼出更出油份，感覺更富油香，拌勻隻雞蛋，沾滿蛋漿嘅牛肉就更加滑口；此外，將啲蛋漿拌飯食，除有蛋香，令本身帶黏糯嘅日本米味道更豐厚。宮崎黑豚肉、日式昆布柴魚鍋定食 $138老表份鍋物定食睇落都好吸引，宮崎黑豚肉大大鍋，份量真不少，而且，啲豚肉好嫩口，又唔會話好肥，鍋底仲有唔少洋蔥、豆腐皮、野菜……等等，至於個昆布柴魚湯味道清香；加$15可以轉烏冬，老表話食得出烏冬唔喺平價貨，唔會有陣陣酸味，入口滑溜，咬落卻好有韌勁，且有麵粉香。餐廳嘅招呼都好唔錯，雖然有時限，不過，無人在外排隊，店員都唔會催客埋單。聽老表講唔少旅遊趣事，可惜放飯時間有限，不過，大家短聚一下都開心嘅，至少都知大家都別來無恙嘛！…Read More

近來因為要搞裝修嘢，所以，不時都嚟到荃灣睇睇家具之類嘢，行到咁上下，咁就要搵飯食啦，晌海之戀遇到「湯加」，都好耐未幫襯過，老婆就好鍾意佢哋嘅百秒鱸魚，我就慳慳哋晌下午茶餐度埋手。從門面已睇到成個場嘅環境，都喺好慣常類似茶記嘅格局，少部份喺卡位，大部份喺4人格，枱側抽櫃擺放餐具。而枱角貼有點餐嘅二維碼，同埋列明注意事項，點先為止確認點餐，以往就聽到唔少客向店員投訴好耐都未嚟嘢，不少情況都喺差最後一步作確認送出。此外，仲印埋wifi出嚟，好多餐廳既然要客人掃碼點餐，理應提供埋wifi，因為有少量上年紀嘅，手機真喺只打出打入，無數據架。另一邊，仲有個茶水間，自行斟凍水、熱水，更備有數款醬料，自由取用，既然自己顧自己，餐廳都無收加一。主餐牌好大本吓，加上小弟打算食下午茶餐，就只影低老婆所嗌嘅百秒鱸魚。而午後時光嘅下午茶餐，就底面兩頁，不過，已經有好多選擇，有輕怡嘅，有大份量嘅，有湯飯DIY，抵在包埋餐飲，又有啲加配小食。平常老婆就只會揀熱檸水，但睇到枱角有張「健康天然果汁」做緊推廣，佢一向都講永健康，加配又有少少優惠，當然一試啦:)。百秒海鱸魚配米線 $69一整條海鱸魚喺原鍋咁上，而米線則另上，非常之大碗，所以，都要幫佢包底。魚肉嫩滑富魚鮮味，魚湯底亦好鮮甜，墊底嘅蘿蔔清甜無渣，米線入口滑溜有米香，時隔咁耐再食，水準一啲都無跌。果醋豬軟骨撈公仔麵配潮汕豬肉丸浸紫菜 $43雖然喺嚟食下午茶餐，但當喺正餐，所以，嗌咗款飽肚嘅撈公仔麵，餐飲仲升級埋特飲。先講講個公仔麵，啲麵條煮得啱啱好喎，爽爽哋身，夠彈牙，加上撈埋啲果醋汁，酸酸甜甜好醒胃；啲豬軟骨都炆煮得正，肉質鬆化又入晒味。跟碗潮汕豬肉丸浸紫菜湯，俾足料喎，豬肉丸好彈牙，絕對唔喺溝粉貨色，而紫菜好爽口，湯頭清甜無欺場，成個餐抵食。仙草紅豆冰 +$9老婆好鍾意食紅豆，所以，升級呢杯仙草紅豆冰，杯嘢亦交足貨，仙草紅豆份量有超過1/3，仙草「滑嘟嘟」，紅豆亦算香甜，不過，紅豆就偏少，大部份都喺仙草，至於個奶水底就OK啦。鮮桑葚葡萄汁 +$13老婆點嘅百秒鮮鱸魚喺散點嘢，唔包餐飲，不過，都有加配優惠，幾款天然果汁就相中呢款。其實鮮桑葚真喺唔知乜嘢，上網睇睇先知其實就喺黑桑子，味酸甜，功效多多，如抗氧化、補血、護眼、助消化、延緩衰老……等，而加埋提子，飲落酸香醒胃，確喺舒服好飲。今次再訪，幾樣嘢都好食，老婆嘅鮮鱸魚固然鮮甜，小弟嘅豬軟骨都好唔錯，加埋兩杯嘢飲都好味道。…Read More

正所謂偷得浮生半日閒，平常周六、公眾假都會專登出街食早餐，但大多數一喺茶記，一喺快餐店。老婆話佢出咗少少獎金，今次就要食餐好，一於食番餐全日早餐啦（都好耐無食喇），晌美孚有供應嘅唔多，第一時間諗起「PHI」。平時就算星期六經過都見唔多人，但今次真喺有啲意外，全場近乎坐滿。一室日系淺木色裝修，配以柔和燈光，感覺蠻寫意舒服:)。我哋被安排坐晌較入位置，有種自成一角感。目測所見，好多家庭客，當然唔少喺街坊，撻住拖鞋落嚟。多年前嚟過食午餐，早餐都喺第一次，話晒比較少花成嚿水食一個影早餐。呢度嘅早餐重點，主要都喺全日早餐同梳乎厘班戟早餐，此外，都有啲意粉類、沙律類早餐。全日早餐梳乎厘（兩件）$75梳乎厘可以揀1、2、3件，老婆原本話食一件就夠（因為佢有麩質敏感，都喺間中偷雞食吓。），但見俾多$13就多一件，當然嗌夠兩件啦，一人一件，而基本嘅組合會包埋煙肉同煎蛋，老婆就再額外加咗牛油果同煙三文魚，整份組合就盛惠$105。啲食材質素高，牛油果夠晒熟，口感綿滑，煙肉煎得脆口，又唔肥，唔好以為煎蛋煎過籠，喺老婆唔鍾意食生蛋黃，呢隻人煎到全熟正正合佢心意；至於件梳乎厘班戟絕對保持水準，淋上糖漿，純甜美味，好有蛋香，口感綿密輕盈。香煎雞扒全日早餐 $92小弟就叫番一個較傳統樣嘅全日早餐，有沙律菜、車厘茄、炒蘑菇、煎太陽蛋、多士同雞扒，唔好話睇落普通，一樣喺有心恩晌裡頭。啲車厘茄應該喺焗過，因為咬落暖暖哋，多汁清甜，用上丹麥多士，食落自然更具酥香感，雞扒仲俾到兩大件，煎得香口，肉質夠嫩，絕對交足貨，咁嘅價算得上性價比高。鮮奶咖啡、朱古力咖啡餐飲可選任何一款意式咖啡，冷熱同價，嚟得呢類咖啡店點可以唔嘆杯靚咖啡吖，小弟就鍾情鮮奶咖啡，而老婆就揀杯咖啡味無咁重嘅朱古力咖啡，兩杯嘅拉花都好唔錯，平滑而花紋細緻。前者沖泡手勢好，晌無攪嘅情況下，每口口感、味道都好一致，順滑醇香；後者濃郁嘅朱古力，帶少少咖啡香，啱晒老婆喜好。我哋入座後嘅早段時間，全座近滿，但只得一位後生女侍應，佢真喺堅，傳菜、沖咖啡、收銀一腳踢，忙到不可開交，但依然有禮且面帶笑容，咁嘅服務真喺讚得一讚！之後多一位後生仔返工，自然運作更流暢，佢都喺好有禮貌，所以，服務方面俾夠佢哋滿分。…Read More

又喺一年嚟一次鑽石山青掃墓，事後就會晌附近搵食，細佬妹對食喺無要求嘅人，茶記就最啱佢哋。雖然，知道附近都有啲好人氣嘅茶記，不過，小弟就唔多喜歡等位，偶然遇到「時代冰室」，就隨遇而安試一試佢。一般茶記格局，無話咩特別唔特別，裝修平實，都喺卡位為主，我哋就揀咗靠窗嘅卡位，一來對住落地大玻璃，光線十足，二來感覺開揚啲。午市時段嘅選擇有特色套餐、全日套餐、超人氣招牌蛋包飯、鐵板熱賣、經典熱賣……等等多個系列。例湯再睇多次餐牌，都只喺話所有套餐只包餐飲，呢碗例湯喺額外免費送，雖然唔值咩錢，亦都只喺普普通通嘅中式例湯，飲落似喺「青紅蘿蔔煲豬骨」好例牌嗰種，但夠老火，亦喺份誠意。日式咖喱雞扒飯 $58日式咖喱向來用上較多蔬果去煮，味道無咁辣之餘，亦有點甜味，細佬嘅雞扒飯就完全反映出日式咖喱嘅精髓，試咗一小口咖喱，確喺唔錯，幾香，而啲雞扒煎得甘香，亦幾軟滑，且份量甚足，睇相都見有唔少件雞扒。咖喱雞脾飯 $61細妹同樣食咖喱，雖然都喺咖喱，但呢個絕對喺港式樣，無論捧出嚟嘅賣相，抑或味道，都好港式，啲咖喱辣度強勁，甚為刺激，而裡面嘅薯仔喺炸咗再煮，所以，唔會又腍又散。至於件雞脾，堅大隻，大隻過隻手掌，試就無試，但細妹就話炸得外皮甘脆，肉滑多汁，唔會炸到「乾爭爭」，正呀喂！招牌和牛漢堡蛋包飯 $63諗住叫得招牌，就一於試試佢，可是，同餐牌嘅賣相就有啲距離，主要喺蛋包飯部份做得有啲hea，「蛋皮」都包唔晒啲飯，好求其煎好片滑蛋冚上去而已，當然，食味方面就唔差，有蛋香又幾滑，至於件漢堡就確唔錯，既有肉香，又有油香，口感鬆化唔死實，同麥記嗰啲喺天與地。熱奶茶細佬妹飲嘅喺凍奶茶，通常掃二維碼落單都會有好多細項可選，估唔到奶茶可以揀濃啲，不過，小弟飲熱奶茶，後而無呢個選項。講番杯熱奶茶，個人嚟通，感覺就淡咗少少，少咗嗰份茶葉嘅幽香味，所以，你見色澤都喺偏淡少少。年年嚟掃墓都順道試吓唔同餐廳，今次嘅「時代」都唔錯，至少喺啱食，啲妹妹招呼好唔錯，依家有禮貌嘅後生女好難得架喇，喺原先坐埋邊啲位有啲污糟，無留意嗰個位喺咪近廁所，有少許異味。…Read More

今次一早出嚟荃灣就唔喺睇早場，而喺陪老婆搞銀行嘢，幸好都好快搞完，就晌附近搵地方食個早餐。遇到「新生記」，清清哋食碗粥都好喎，老婆就話想食糉，啱啦，粥鋪滿足到大家。地方細細，簡樸嘅裝修，好街坊，嚟幫襯嘅亦喺街坊多，最正喺有部大電視播新聞，邊食邊聽早晨新聞。餐牌黃底黑字，分類藍底白字，非常擔搶眼，而選擇非常之多，唔喺誇張，叫人睇得眼花撩亂，而且，佢哋唔止賣粥，仲有湯飯同粉麵供應，真喺一日3餐過嚟食都唔怕悶。此外，好鍾意呢啲老鋪，尤其啲手寫單同菜式簡稱，好有趣，依家咩都電子化，呢類單已比較少見。魚腩粥 $41老婆就好鍾意食魚喇，所以，雖然餐牌有非常多選擇，但佢一眼就相中魚腩粥，上次晌「靠得住」又喺揀魚腩粥。店家啲粥都好夠份量，而且，有唔少料，魚腩堅喺大大件，老婆就話好鮮甜，粥底又夠綿滑。公司粥 $36公司三文治聽得多，算小弟才疏，公司粥都喺第一次遇上，就當盲盒試試佢。粥到，撈一撈，其實就喺艇仔粥+皮蛋瘦肉粥+魚片粥放埋一齊，非常多料，師傅絕無手緊，啲料好似食極都有，抵食。牛脷酥 $11去到粥鋪，小弟對牛脷酥情有獨鍾，有油炸鬼嘅酥脆，但又有陣甜甜哋嘅味道，最貼心喺幫我剪成細件啲，夾起就食，新鮮炸起即食，更喺特別香脆可口，部份沾粥再食，又另一番風味。五香鹹肉糉 $22而老婆情有獨鍾就喺糉，雖然鹹肉糉就唔似得裹蒸糉咁多料，但正正喺咁先啱佢，因為佢主要想食就喺啲糯米同綠豆，加少少鹹蛋黃，而呢隻都算合格，加上少豬肉肥膏，一夾就丟走，小弟就略嫌鹹蛋比較乾身，無乜油。本來嚟食早餐，但因為搞完銀行嘢都10:00am，食埋餐粥都近11:00am，而啲份量真喺好堅，仲加埋今次食糉，勁飽肚嘢，所以，最後一餐當兩餐，妟晝餐飯都慳番，哈哈！…Read More

咁多國家菜系中，日本菜算喺較多食嘅之一，然而，日本菜中，就以日式放題比較少食，大抵無以前咁食得，就好似自助餐都食少咗。最近，有朋友就極力推介呢一間新開嘅放題店「極．大瀛喜」，所以，就趁機同朋友嚟聚一聚狂野哋食番餐。成日話香港飲食業生意唔好，但嚟到真喺好大反差。先講個環境，地方好大，樓底又高，最欣賞喺間開唔同區域，分為A、B、C、D……朋友嚟到都易搵啲。雖然以金色為主調，有種金碧輝煌之感，但一啲都唔俗氣，通道、座位都好闊落，令用餐體驗更好:)。我哋揀食中午，平啲吖嘛，12:00pm開始陸續入座，一區一區坐滿，最後，近乎全院滿座。星期六、日、假期午市做到5:30pm，我哋食完離開時一樣見有人入座。而且，可以食足3小時，夠晒時間慢慢嘆。餐環境講咗咁多，順便介紹埋自助食物區，就晌入門口左邊，地方都好大，通道同樣闊落，唔怕人撞人。掃視一番，絕對令人花多眼亂，非常多元化，睇相你都見，照顧到唔同年紀層嘅人，包括有30多款冷盤小食、沙律，以及自助餐常見嘅凍海鮮，仲有燒味、炸物、熱湯、點心、生果、甜品、雪糕雪條、軟雪糕搭多種配料、自助茶啡、果汁、自家製健康飲品，同埋一大櫃多到數唔晒嘅飲品。淨喺呢個自助區都可以食飽人啦！除咗出面自助食物區之外，呢一款「放題A」可以點嘅食物分類有刺身、創作刺身、串燒、燒物、卷物、軍艦、壽司、創作壽司、火炙壽司、炸物、天婦羅、一品料理、煮物、蒸焗鐵板燒系列……等等，相信計計埋埋晒有超過百款食物。價錢就分日子、分時段，自行研究研究。如果貪心少少想食多啲貴價菜式，可以選「放題B」，等同「放題A」加多$80，就有近10款特別嘅菜式任點任食，例如：拖羅、北海道帶子吞拿魚蓉魚籽杯、上湯芝士焗龍蝦伊麵底、油鹽焗奄仔蟹……等等，等陣再分享！掃二維碼落單成為趨勢，一來減省人手，亦減少人為出錯，二來點咗乜可以睇番，一清二楚少咗啲爭拗，好老實，今日成餐飯都無漏單，至多有一、兩款食物上得較遲。更值得一讚嘅喺，有咩要注意晌單度都溫馨提示埋，所以，頭2.5小時主要食二維碼落單嘢，剩番30分鐘，就主攻自助區嘅甜品！飲品喺自助食物推影完相，第一件事就喺順手攞埋嘢飲，小弟一起手就先試柑桔青檸汁同洛神花檸檬茶，兩者都喺自家製，喂！有誠意喎，前者酸香清新，後者酸爽清香！放題B精選既然選咗「放題B」，第一轉就梗喺試晒所有菜式啦，包括：鱈魚乾海膽吞拿魚蓉Taco、拖羅、火炙A5和牛伴海膽、海膽三文魚籽親子杯、北海道帶子吞拿魚蓉魚籽杯、鯛魚薄切、魚籽醬配餅乾、上湯芝士焗龍蝦伊麵底、油鹽焗奄仔蟹、皇子糯米乳豬。款款都賣相精緻，一啲都睇唔出喺放題出品，同晌日式餐廳食嘅無分別，而且，用料新鮮，食材嘅配搭亦有心思，個人推薦鱈魚乾海膽吞拿魚蓉Taco、北海道帶子吞拿魚蓉魚籽杯、火炙A5和牛伴海膽，當然其他都好食，但呢3款晌食材配搭上好有驚喜，味道豐富。刺身、創作刺身食放題，唔易飽肚又較回本，唔使多講都喺刺身啦，10多款就揀啲少食、又貴價啲，包括松葉蟹腳、大赤蝦、藍鰭吞拿魚、北海道鮮帶子、北寄貝、象拔蚌，師傅更擺得好靚仔，更以冰鎮住，絕不馬虎。整體食落質素唔錯，蟹腳有海水嘅鹹鮮味，魚生鮮味十足，貝類又具咬口，值回票價。另一分類嘅創作刺身，都試咗4款：酒醉鮑魚、醬油乳山蠔、泰式虎蝦及櫻桃鵝肝，款款都做得的的骰骰，而且食得出食材高質，味道、口感都上佳。串燒、燒物、炸物再落嚟呢一轉就試啲熱氣嘢，一口氣點咗6款大家都最想食嘅：鹽燒牛舌、香草燒羊鞍、燒溫室甜菠蘿、極品金枕頭榴槤燒、榴槤炸彈及3.6牛乳脆皮鮮奶。牛舌、羊鞍真喺無得彈，燒得恰到好處，濃濃嘅獨有味道，而兩款榴槤嘢食，真喺滿足到我哋好榴槤之人。凍海鮮食完幾輪嘢，又加一堆熱氣嘢，喺時候回回氣，所以，出去自助區拎咗少少凍海鮮謏返嚟過過場，估唔到又幾唔錯喎，蝦肉、螺肉都好爽口鮮甜，而青口口感柔軟，唔會好似擦紙膠咁韌。蒸、焗、鐵板燒呢個系列其實都好吸引，不過，去到近尾聲，真喺食唔落咁多，仲要留肚同甜品搏殺，故此，精選咗3款一試，包括：甘鯛立鱗燒伴黑松露忌廉汁、金銀蒜蓉粉絲蒸蟶子皇、川式珍寶生蠔燒。以前食過立鱗燒，專登嗌嚟俾朋友一試，佢大讚好正，魚鱗脆到不得了，而蟶子鮮甜惹味，生蠔辣而不嗆，蠔味夠濃。甜品大募集小弟向來都好鍾意食甜品，所以，臨尾點都要留番兩乘空間俾甜品，先試噝二維碼落單嘅海燕窩椰汁燉木瓜同法式麵包開心果誘惑，前者燉得夠火喉，木瓜又腍又甜，加埋椰汁，好潤；而後者賣相極具打卡感，麵包外脆內軟，襯上雲呢拿雪糕同開心果醬，絕對喺甜魔誘惑。終極一戰喺晌自助區拎番嚟嘅「拼盤」，有Häagen-Dazs雪糕、Dreyer’s雪糕、榴槤雪條、榴槤大福、芒果糯米糍、芝士撻、芝士餅、焗榴槤布甸及蜜瓜軟雪糕配Nutella榛子朱古力醬，原來呢部Nutella機暫時喺全港獨有，加咗當然好食好多，至於其他甜品，都同樣好味，實在大滿足。今餐真喺食得稱心滿意，不單地方大，環境好，食物選擇多，供應充滿，而且，上菜快，又無漏單，招呼好好，啲店員好有禮。由頭領放到尾，除咗我哋嘅食力有番咗上下，點菜策略亦得宜，自知無可能試晒所有嘢，重點出擊啲心水菜式，先可以食得咁盡興！…Read More

又到星期五晚，喺完咗一個星期工作而最輕鬆嘅晚上，所以，兩公婆就懶煮出街食，亦想食餐好嘅慰勞吓自己。今次近近哋過嚟長沙灣尾食吓日本嘢，呢間「Yuyu Sushi」喺住晌附近嘅親友推介，讚其性價比高，其實之前晌樓上嘅酒家同一班親戚食做節飯時已留意過呢間餐廳。走進餐廳，一室燈光柔和，傳統日式淺木色系裝修，左右兩排喺4人座，中間兩行喺卡位，最鍾意喺啲間板加咗啲小屏風，同前前後後及隔離位都遮一遮，私隱度都高啲。我哋被安排坐晌卡位，感覺寧舍闊落，晌呢區嚟講，絕對喺頗舒適嘅居酒屋之一:)。餐廳尾喺壽司吧枱，如果單純嚟食壽司，又想跟師傅交流吓，喺理想位置。而事後想搵廁所時，發現壽司吧傍有條通道，可以通去另一邊用餐區，猶如一個半開放嘅私人廂房。雖然，餐廳嘅名字用上壽司，但翻一翻餐牌你就知點會得壽司咁簡單，如居酒屋般，種類包羅萬有，選擇非常之多，更喺圖文並茂，包括：晚市定食、刺身、壽司、卷物、手卷、前菜、沙律、湯品、串燒、天婦羅、揚物、鍋物、一品料理、食事、冰淇淋……等等一應俱全，定價亦好親民，所以，老婆話今餐食得豐富啲！用上二維碼下單，清清楚楚，減少錯誤或爭拗，呢個都喺飲食業嘅趨勢，加上介面易用，點餐方便。之不過，壽司都喺其主打，依家仲有啲推廣，任揀每4款手握壽司就有8折，可謂食得更抵。此外，晌唔同時段，店家仲提供多種優惠，例如午市唔收加一，學生午市定食減$10，歡樂時光啤酒、清酒半價，外賣自助9折……等等。食日本嘢，除欣賞食物之外，啲餐具都比較靚，值得多欣賞一下。講咗咁多，依家就去片，睇吓今晚我哋食咗乜，先嚟串燒，再試試啲定食！雞軟骨串 $26/兩串、活鰻白燒 $48雞軟骨純粹過過口癮，咬落咯咯聲，軟中帶韌，配啤酒就最過癮；而活鰻白燒喺店長推介，活鰻比起一啲冰鮮貨自然更優質，而且，雖然簡單燒香，唔加任何醬汁，但正正咁樣先突出活鰻嘅原味道，，味道油潤，口感更彈牙，外皮更脆口。牛舌 $48話時話，小弟確喺幾鍾意食燒牛舌，晌小弟嘅日本菜食評中，不時見其蹤影。啲牛舌燒到有啲焦香，咬落有韌勁，極具咬口，加上牛舌獨特嘅味道，再沾上少少芥辣，更具風味。田園沙律、味噌湯、茶碗蒸所有晚市定食都列明會奉送前菜、味噌湯、茶碗蒸，先講講啲沙律，都喺簡簡單單嘅沙律菜、日本青瓜、車厘茄伴胡麻醬，用料新鮮，清爽好食，叫人開開胃先；味噌湯除咗麵豉味好香濃之外，湯底更有唔少昆布，味道豐富，食完個沙律再嚟暖和一下腸胃，喺好好嘅配搭。而茶碗蒸好有誠意，唔單止蒸得滑溜，又好有蛋香，裡面仲有好多料，包括冬菇、雞肉、銀杏、蟹柳。銀鱈魚西京燒定食 $158老婆食日本嘢，壽司、剌身唔啱佢，佢最心水就喺銀雪魚西京燒，近乎遇到餐廳有供應呢道菜式，佢都會點，今次也不例外，而佢食過好幾間日本餐廳嘅銀鱈魚，呢間可以講最抵食，因為呢個價俾到足兩大件，坊喺少有。件銀鱈魚唔單止燒得外皮焦香，肉質細緻嫩滑，極富油香，絕對喺高質素嘅貨色，沾上少少沙律醬，風味更佳，而飯粒黏糯有米香，一口白飯，一口銀鱈魚，佢話絕對喺大滿足。事後店長問吓我哋對食物滿唔滿意，先知店家嘅銀鱈魚喺醃足兩日先再嚟燒，誠意十足。特上壽司定食 $205既然呢度明顯主打壽司，小弟就揀番款壽司定食，餐牌中共有兩款：精選壽司定食和特上壽司定食，相中後者，標明有吞拿魚中腩、帆立貝、海膽、鰻魚、鯛魚、甘蝦、油甘魚、三文魚、魷魚同青瓜卷共10款，喺一份非常豐富嘅壽司定食。啲魚生睇落好有光澤，雖然有話最好嘅次序喺由味淡食到味濃，不過，放鬆心情食，隨意盲選個次序，一樣好有特別嘅豋體驗。整體嚟講，食落的確好新鮮，唔同嘅魚生，有唔同嘅味道同口感，可謂各有亮點，如果要我揀最好食嘅，真喺好難落手，因為好幾款魚生都好高質；此外，幾鍾意飯粒細細，一啖過放晒入口，而飯粒捏得鬆軟，唔死實，師傅手勢好。冧酒提子雪糕、抹茶雪糕 @$18甜品一環就唔多選擇，就只有共4款口味嘅冰淇淋，有啲售罄，但剛好剩番嘅冧酒提子雪糕、抹茶雪糕都啱我哋口味，尤其老婆都算得上喺抹茶控。冧酒提子雪糕入口滲出陣陣冧酒香，卻唔太嗆喉，加上提子可以增加口感，而抹茶雪糕嘅抹茶味好突出，又富奶香，口感軟滑，唔會有冰感，老婆大讚超好食。今餐食得好豐富，加上各樣菜色都表現出色，讓我哋都感到大滿足。再者，環境舒服，侍應有禮貌，亦會主動幫忙、收拾用餐後嘅碗碟，令整晚用餐嘅體驗都好暢快，值得翻兜再幫襯嘅小店:)。…Read More

過咗小暑，都未到大暑，但近排啲氣溫已日日高升，加上天雨，又熱又濕，最好莫過於買杯凍飲返屋企慢慢嘆。路過「登打士街」見到「茶茶Go」，好耐之前試過其金鍠楊枝甘露，覺得有料到，再者，佢哋喺嚟自台灣嘅品牌，質素有番咁上下，今次就再試試店家其他嘢飲。飲品選擇十分之多，大類別分為牛乳入茶、4.3牛乳、純茶、一品咖啡、酸奶雪見沙、風味冬瓜茶、鮮果歲月時、台式茶沙冰及梳打。鋪面一角貼咗張「本季至Top銷售榜」，如果無心水嘅，又可以不妨着眼於此。除咗茶飲，仲有啲甜點，例如巴斯克芝士蛋糕、盒子蛋糕。晌牆上見到有一款「虎皮卷」，覺得幾特別，可惜賣晒，所以，退二求其次，選番上次都試過嘅「紫菜肉鬆小貝」。逮丸芋頭2號 $42黑糖鮮奶飲得多，反而芋頭鮮奶印象中好似未試過，加上又喺店家嘅招牌，所以，今次就轉轉試一試芋頭鮮奶。餐牌標明用上4.3牛乳，奶味自然夠香濃，杯底沉咗唔少芋泥，香滑細膩，芋頭味濃，此外，仲有唔少煙韌嘅芋圓，大大一整杯飲完都幾有飽足感。若葉百香玉子 $36老婆最鍾意百香果果茶，所以，呢一款鮮果茶飲喺佢嘅不二之選。以綠茶作為茶底，加入新鮮嘅百香果，味道冰涼清爽、酸酸甜甜，飲落零負擔，加上大量手工愛玉凍，爽爽滑滑，飲吓啜吓，絕對喺消暑奇「冰」！紫菜肉鬆小貝 $38一份有4件，唔好睇佢好似唔大件，其實，拎上手即刻感到好墜手，好有重量。蛋糕嘅口感幾軟滑，又幾有蛋香，裡面捲住啲蛋黃醬，再加上成件蛋糕四面都黐滿紫菜同肉鬆，味道鹹鹹甜甜，又帶點酸香味，難得又夾到喎。只喺飲杯凍飲，食個小貝蛋糕，簡簡單單嘅生活一樣叫人好開心。…Read More