davcmlam的个人专页

因事關係，有幾年冇寫食評呀！ 心血來潮想寫今日食晏經過 。剛好喺西環，泊低架車，同老人家去咗生記滷味食晏。知道好出名但未試過，叫咗鹅片（$260，唔平），另有半只雞，同豆腐、旦。 鹵水果然味道深厚，當中有一陣獨特香味。雞就真係做到食雞有雞味，得！ 可惜一邊食一邊驚抄牌，冇影相😕…查看更多

以前冇耐都嚟榮華食晚飯，冇嚟一段日子，發現已經轉咗做圍村菜，於是星期日訂枱試下。訂枱時已講明分兩個時段，六點個輪要八點還枱。依時到達後見到已經全院滿座，十分旺場。菜式係張點餸紙上列晒出嚟，每款65蚊，因得五個人，叫嘅餸數量有限，所以未能每樣名物都試。一番仔細考慮後揀咗頭抽五味雞、盆菜豬肉、梅菜芯蒸勝瓜、咸檸檬蒸烏頭同鳳凰蟹肉炒長遠。另外重叫咗一個白雲鳳爪做餐前小食。而後來重加咗個馬拉糕作飯後點心(但其實已有免費糖水送)。食品方面，比較失色嘅係個白雲鳳爪，味道一般，大路貨色，而且未完全解凍，所以入面重有少少冰。但其他餸菜都好味。煮雞嘅豉油汁微帶甜，配合頗滑嘅雞肉，十分討好，而且份量亦不少。盆菜豬肉係五花腩，擺明係高脂肪，但係最難得係肥而不膩，配合個帶甜嘅汁液，同豬肉非常夾，唔怕肥用D汁嚟撈飯應該好正。炒長遠真係最出色嗰味，只係簡簡單單炒粉絲，但配上蛋花同少少蟹肉，味道清鮮，炒得乾身唔油，十分正。而個蒸烏頭亦係另一驚喜，主要係魚夠鮮甜冇泥味，尤其係魚腩部份，入口嘅魚油熔化咗，d魚鮮嘅香味籠罩成個口腔。最後要提嘅梅菜芯蒸勝瓜嘅梅菜唔會太咸，配上清甜嘅勝瓜啱啱好。當然亦要提呢處另一名物 – 豬油撈飯。白飯我哋要鉢仔蒸，飯係偏乾身爽口嘅蝦仔飯。跟飯送嚟另有一樽豬油同一樽頭抽豉油等你自己撈，因為怕肥，所以只係落咗少少豬油，再淋上一D頭抽，撈埋一齊，豬油同豉油令飯身冇咁乾，油香四溢，好食。除咗送嘅糖水外，另外叫嘅馬拉糕係作為壓軸。馬拉糕蛋香十足，口感夠鬆軟，味道好食，但稍覺不足嘅係感覺似蛋糕多過傳統馬拉糕。呢到用簡單嘅基本日常食材，煮出好味特出嘅菜式，厨師嘅功夫值得俾個like。因為自己帶紅酒，開瓶費要20蚊，幾抵。埋單平均每位只係百零蚊，抵到笑，值得encore! 下次要再嚟試其他名物。…查看更多

星期六下午又同老婆找地方食飯，經過門口覺得幾吸引，坐低試下!入到店內方知係夫妻檔經營，負責招呼嘅女店主先問想要暖水定凍水，夠細心，一讚。因為係星期六嘅關係，只有a la carte 嘅 menu。但有3款好似set咁，老婆要咗c款，係雞扒飯。我就要咗個係餐牌上嘅蕃茄醬海鮮Linguine($52)，另外老婆要咗個焦糖燉蛋，我就要咗個咖啡。太太嘅雞扒飯我試咗d雞扒，味道比較普通，唔係咁突出。而我嘅Linguine要稍等一陣，不過味道真係幾得，茄醬味道唔太酸而有番茄香味，同麵加埋d茄醬好食，而且份量頗多，我食量唔細都夠飽。另外海鮮有蝦、青口、帶子、墨魚仔同魚。先食d 魚，魚唔係大厚身，但保持到嫩滑而有魚味，比出面一般嘅魚柳厚身但冇乜味而又"鞋"好食得多，而墨魚仔、帶子同蝦都好好味，唯一比較失色嘅係青口，青口係帶殼，size較細，但問題係太鹹，係成個菜比較差嘅一個環節。但總體可以食得出厨師嘅心機。個燉蛋我冇試，但老婆話係凍嘅，見佢食得幾滋味，味道應該幾好。我杯咖啡水準都幾好。呢到嘅價錢幾抵，只係比快餐店高一d，但食品味道高出幾班，可見店主真係想做d好嘅食物，並非只係以賺錢為目標，值得支持。…查看更多

星期六下午同屋企人搵地方食晏，行過海光街時老婆發現呢到開咗間Turkish嘅餐廳，老婆話想食而我又未食過土耳其菜，於是試下新嘢。可能新開關係，人唔係咁多，打開餐牌睇下，主要係Doner Kebab 燒烤為主。老婆同阿仔要咗Doner Kebab roll，一個係羊另一個係牛，我叫咗個牛Doner Kebab 配飯同菜。落柯打後先奉上麵包同油醋，麵包外脆內嫩而夠熱又有麥香，點d油醋十分討好。我嘅主菜有烤牛加上少少菜，同一d飯，可能因為係用rotating roast 嘅關係，肉質較乾，但味道都ok，而飯就幾合我心意，粒粒分明有飯味，而且帶d香料味。枱上有三種分別係薄荷、蒜頭同辣味嘅sauce，個樣有d 似印度菜用嚟點薄脆個隻汁。試咗薄荷味道唔特出，但辣味就幾醒胃，用嚟點肉可以令肉唔會太乾。太太同阿仔嘅doner roll有French Fries 伴碟，份量不少但因為冇試所以唔知味道如何。另外老婆叫咗土耳其紅茶而我同阿仔就叫咗蘋果茶，紅茶試咗一啖，但覺太濃，not my cup of tea。蘋果茶甜度ok但唔覺好有特式。總體嚟講食品水準都可以，招呼同地方都幾好，價錢亦唔算貴。可以一試。…查看更多

之前喺到食過二次晏，覺得都幾好食，而且價錢公道，於是星期日晚拉隊嚟試下。一共七人，叫咗個六個餐($528)，因為大食關係，重加咗半隻山東燒雞，同一個叉子燒餅餐。六人餐份量幾足，如果冇記錯計計埋埋有八樣嘢。三冷盤有醉雞、拍黃瓜同海蜇，每樣水準唔錯，特別係醉雞酒味夠香，而雞肉亦頗嫩滑。松子魚個汁甜酸平衡剛好，魚亦唔會炸得過火；雲吞雞份量足，湯亦頗鮮。有一味芙蓉菜卷係用菜葉包住蛋白，煮熟再打個獻，因為太飽冇食到，但見到都幾花功夫。湯包因為得六只所以我冇食，但有食過嘅話幾好，個湯汁夠鮮。有xo醬蛋白炒飯，有少少辣，十分惹味，飯亦炒得好功夫，不油而粒粒分明，我自己食咗成半碟，所以好飽。甜品係高力豆沙，因為唔食甜品所以唔知味道，但同枱人都話好。個餐六個人食份量應好足。山東燒雞好食，個汁嘅蒜味夠香而唔會太搶，雞肉亦保持到唔鞋，水準作。而叉子燒餅上碟時熱辣辣，表面充滿芝麻，芝麻香味再加埋肉絲嘅味道，個個話好食。而隨餐嘅酸辣湯就好一般。呢間小店食品水準唔錯而有誠意，而且價錢公道。招呼就好家庭式；地方企理乾淨但細，最大張枱只剛坐到七個人，一家人普通食飯都係幾好嘅選擇。…查看更多

剛開張時曾到呢到食晏，但發覺係茶餐廳式嘅做法，乜食品都有d，當時叫咗個香茅雞亦飯，但水準真係好普通，所以提唔起興趣再去幫襯。但近日見到夜市改咗，加咗有打冷，於是尋日假期去試下晚飯，睇下水準如何。首先叫咗茶，竟然係用某外地牌子嘅茶包。睇菜牌呢到河鮮都係主打，所以叫咗個欖角蒸廋身鯇魚，另外重叫咗香腸墨魚、欖菜肉碎四季豆同菜甫煎蛋。個鯇魚大概4份1條，真係幾廋，但幾有鮮味，唔係雪咗一排冇嚟味道嘅貨式，加埋葱絲同欖角嘅香味，幾討好，印象唔錯。至於個香腸墨魚，有豆腐同一d花生墊底，份量唔少；香腸當然冇特別可講，但墨魚都幾新鮮，彈牙得嚟唔靭，同埋個滷水幾好味，所以豆腐同花生都好食。而個菜甫煎蛋就真係正：唔太油但煎得夠香，菜甫同肉碎份量剛好，出乎意料好味。個四季豆係一般，但個欖菜真係幾好，唔係剩得個咸字，而係帶有欖香而微甜。三個人叫咗四個餸加埋啤酒粥飯都係$90個人，算抵。而且地方企理同埋招呼都唔錯，街坊菜館算食得過。…查看更多

一家三口打邊爐，行過呢到老婆提議不如試下。地方裝修精緻坐得又舒服:)，而招呼亦好到位。要咗個冬瓜田雞煱，另外點咗手切本地牛、羊片、鴕鳥肉(老婆要叫，事後後悔)、脆肉鯇魚腩、四寶丸，混合丸、木耳、菇、菜同米粉。個湯底食田雞冬瓜各有幾舊，但食唔出有乜嘢特別，同普通清湯差唔多，可能叫其他湯底重好。牛肉幾有肉味，肥瘦適中，羊肉冇乜驚喜；但鴕鳥肉非常差，睇落d顏色黑黑咁，而食落味道唔知點形容，好似冇哂味道，結果成半碟冇食到，千祈唔好叫呢樣:(。四寶丸各樣都有特色，鮮甜彈牙，而混合丸好似係豬肉丸溝其他肉，唔係太啱口味。而脆肉鯇估唔到咁好食，一般脆肉鯇魚味較薄，但呢到d魚腩都好有魚味，我食到最尾飽咗都忍唔住要食哂。而其他都係一般大路嘢，好難講有乜好唔好。呢處嘅setting較適合三五知己而要個精緻地方聚會，一大班人要熱鬧或者家庭聚會可能唔係咁啱。而且價錢亦算偏高，因為我今次冇食過海鮮或好特別嘅嘢都要成三百幾蚊個人。但總體仍可俾個笑臉。…查看更多

星期六晚9點後唔駛等位，每人可選自己嘅鐘意嘅茶，幾好:)。叫咗一d大路嘢如馬蘭頭、醉雞、小籠包、炒年糕等。食品水準只可講唔錯，但冇特別，而小籠包我食個陣已放了一陣，唔夠熱，包嘅皮較厚咗小小，而且肉汁唔係好夠，比較普通。如果一心要食特出嘅小籠包可能會有小小失望。但招呼幾好，而價錢亦算合理。算唔錯啦。…查看更多

因在和民等不到位，所以誤打誤撞入嚟呢到。五個人叫了五個餸同一個沙薑雞腳。雞腳先入口，感覺味道甚淡，可能因健康飲食嘅考慮而冇咁咸，但失去東江菜味濃易餸飯嘅特點。另外五個餸有鹽焗雞、金銀旦莧菜、梅菜蒸鯇魚、白果腐竹炆豬肚同白飯魚煎旦，但都有類似情況，包括鹽焗雞都較淡。除味較淡外平心而論水準唔錯，尤其是豬肚有d出乎意料咁好：腐竹夠入味而豬肚好食，但唔夠地道係冇客家式嘅辣椒醬，只有一般酒樓嘅辣"豆瓣醬"。所以總括講食品水準ok，而招呼而幾週到，一般家庭食飯而唔係太貴嘅好選擇。…查看更多

星期六下午入到嚟，唔駛等位，但座低一望，同平時去開嘅韓國餐館唔同，發覺座上客好多西方人士，反而狀似韓國人嘅不多。三個人，分別叫咗兩個湯麵同一個牛肋骨湯，另外重叫咗個炆豬腩肉辣生菜包。先上咗六七款前菜，不外係kimchee、甜薯、豆腐等大路嘢，一般。我叫咗嘅辣海鮮湯麵到，上面有好多蔬菜，但海鮮好少，只得一"隻"唔完整嘅青口，三隻細細隻嘅蝦、一d魷魚"碎"同一d 疑似獅子狗魚旦嘅幼條。夾起麵一望，太座已經話咁似辛拉麵，飲一啖湯，果然有濃厚嘅辛拉麵湯包味，麵身煮得比較淋，唔係好啱自己口味；而太太叫嘅牛肋骨湯据佢講亦只係麻麻。開始有d失望。好彩個豬腩肉生菜包挽回一d分數，豬肉加埋辣嘅醃菜，點d醬，包係生菜嚟食，味道口感俱佳。其中最正係醃咗嘅生蒜，又辣又脆，好食。呢處食品水準只算係一般，但以價位嚟講，完全唔可算係物有所值。如果唔係個生菜包，我毫不猶豫會俾喊面。但亦相信唔會再嚟。…查看更多

接近9點半到，夜晚宵夜時段收188一位。入座後已經放了一盆牛拚盤、一盆豚肉拚盤及一個海鮮拚盤。每人有三款醬汁，一種應該係鼓油汁、一種少少酸，好似有柚子，同埋一種係辣嘅。牛方面有三款，最好食係牛柳粒，燒好後只加dd鹽而唔好點汁，入口溶化又食到牛肉嘅原味同油香，但後來再加叫覺得冇咁好味。豚肉方面幾正，就其是個隻帶少少軟骨嘅豚肉片，肉有甜味而有軟骨又少少咬口。而海鮮嘅魷魚鬚同多春魚較普通，但虎蝦同帶子都幾好，尤其是蝦肉幾甜幾彈牙。不過食完三盆食品後都幾飽。所以其他嘅食品叫咗好少，主要係一d蔬菜同加咗d牛肉同雞亦，味道都唔係太大驚喜，其中嘅有機菠蘿燒咗嚟食幾過癮。另外重叫咗一d 刺身，沙律同天婦羅等，味道ok。甜品每人有一杯雪糕送。我自己就叫咗一個清酒同二杯啤酒，因價錢有半價，幾抵。燒肉因為係用紅外線爐，的確係冇乜煙，唔會食到一身味。招呼方面唔錯，落單都幾快同應該冇漏單，叫人加水都幾快反應。食品方面水準唔係差，但缺少一d令人覺得特別正嘅，但如果鐘意燒肉會覺得唔錯。…查看更多

以前外父時常到這裡晚飯嘆炸子雞同翅，但好幾年冇嚟，星期日晚突然老婆大人想去北角食晚飯，就想到呢到，於是一行十人拉隊嚟到。一行入嚟從裝修已到充滿懷舊feel，菜式更不在話下，於是叫咗一d傳統嘅餸菜:生腸：細細個係街邊嘅滷水檔已到好鐘食嘅嘢，但近年好少搵到好食嘅。呢到嘅生腸爽脆而不帶異味，點d芥辣真係食唔停口。蝦多士：必食菜式之一，多士脆而不油膩，直情好似係用焗爐焗出嚟咁；蝦肉甜而彈牙，兩者配搭口味同味覺都一流。炸子雞：真功夫表現，我先食一件最難處理嘅雞胸，先講層皮，果然係卜卜脆又唔肥，正；到雞胸肉，雖然先天所限，但亦不算太鞋，仍然頗juicy，到再食雞脾位，真係外脆肉嫩，但又唔會煮唔熟，雞味亦濃郁，回味無窮!生魚片兩味：差d已經遺忘咗嘅懷舊菜式，以前久不久都會係d小館子食到，但現家已變成特色菜，呢到嘅價錢亦唔算平，兩味好似要收成二百幾蚊，雖則生魚唔係乜嘢貴價魚。生魚嘅特有鮮甜係呢兩個餸表露無遺。魚骨腩湯，加入芥菜，另加薑片少少胡椒粉吊味，湯夠甜；而炒球更加食到生魚的甜味，比食一d普通咸水魚更正。鵪鶉鬆：老婆嘅心頭愛，但我興趣不大所以冇食。另外重叫咗藕餅、薑酒炒芥蘭等好幾味菜式，味道都好正，而且份量十足，到後來重担心食唔晒。甜品方面自不然叫咗西米布甸，不過略嫌個面唔夠焦香，但甜度適中亦有西米同蛋香，不愧係招牌菜式之一，另外重加送咗個類似紅豆同喳喳嘅糖水，我唔鐘意食甜嘢所以冇試，但同枱嘅人讚不絶口，話起晒沙亦唔太甜。呢餐食品十分滿意，尤其是有機會食到一d懷舊菜式，價錢亦算合理，值得推介。…查看更多

嚟呢到食過三幾次，發覺佢嘅價錢好抵，而水準亦算交足貨。晚飯孖寶百幾蚊二款，其中次次都食嘅灼蝦加青班好得，蝦份量足彈牙夠甜，條魚幾大，我估有成斤幾；而魚都幾新鮮，連食魚好講究嘅外父都話ok。另外佢d套餐同一d特價小菜都好抵，雖然係一般大路貨式，但三四十蚊碟而且份量不少，味道都唔差。詳細價錢唔記得，但次次價錢都係70-80蚊一個人(連下欄加一同埋貼士)，以星期日嘅價錢嚟計算抵食，去茶記叫個小茶加杯嘢飲分分鐘差唔多價錢，而且坐嘅地方好企理，招呼幾好，值得推薦。…查看更多

平常嘅週日晚飯，選了家中附近嘅呢間泰菜館，叫了好幾樣嘢，有一d唔記得，但個咖哩軟殼蟹脆脆包真係好真，尤其是個包，外脆內軟，點D咖嘢汁好食到唔停得口，所以再encore咗一個包。另外都叫咗一d大路嘅菜式好似泰式炒菜、魚餅同燒雞，不過其他嘅已經唔記得。食品嘅水準都算幾好，價錢亦唔算貴，食得過。…查看更多

行街經過，心血來潮想食辣，正是想做就去做，但堂食其實係企係街邊食，所以要有心理準備，但因為唔太肚餓，只要了一個口水雞絲撈麵。麵比較幼身，食落口覺得都夠Q咬口。口水雞絲份量不多，但其實重點不在雞在於D口水雞汁，自問喜歡食辣，所以覺得辣度重未夠，但個汁的而且確夠香，而且可以食到由唔同嘅香料做成，過關；但可能因為係口水雞嘅關係，味道唔係太麻，所以試唔到係咪真係"麻:辣王。有待下次有機會再品評。…查看更多