ktigger的个人专页

頭先去越北食，上一次即係前幾個星期日，食同一個香茅厚切雞扒紅飯，同上次食嘅感覺一樣好難食，今次食係因為諗住俾多次機會佢，點知一樣令人失望。塊雞扒我懷疑唔知浸過啲乜，發大到不合理地發脹，食落冇雞味，口感亦唔係好似雞肉…啲醃製味怪怪地…至於個飯聲稱係紅飯唔知用咩撈嘅飯又唔係茄汁味唔知想點，Overall食落個飯同塊雞扒係酸酸地，啲飯雖然係一粒粒一啲都唔煙靭，冇咬口。雖然而家午餐$58喺粉中呢一套未必有好多選擇，但最近睇咗咁多內地預製菜資訊，呢一間硬係覺得同魚仔菜嘅質素冇乜分別，食咗都驚好多元素落咗肚，都係冇下次。…查看更多

食完糖水硬係想食啲嘢但又食唔到咁多嘢，於是搵有咩小食，發現都係大眾化嘅香港一般小食——唔係腸粉魚蛋燒賣，就係煎煎炸炸嘅熱氣嘢。喺聯和墟竟然比我搵到呢間上海小食，少到可以只買一件蔥油餅、一個菜肉包同埋一隻鍋貼，本身只係想食鍋貼，點知去到見到就樣樣都想試。復活節假期成個聯和墟好似死城咁，但去到舖面已經有三四個人排緊隊，已經知呢間小店唔簡單。鋪面佢只係擺幾款剛才提及嘅小點——呢度只賣五款食物，蔥油餅、牛肉包、菜肉包、鍋貼、韭菜餅，本身想食鍋貼，但老闆娘話要等10分鐘，結果冇等，就買現成嘅韭菜餅同埋菜肉包。老闆娘隨手喺個櫃度拎韭菜餅同菜肉包出嚟放喺膠袋度，仲以為已經擺咗好耐吹凍晒，點知兩件拎上手仲係熱嘅！即刻加晒分。然後即刻試食咗個菜肉包，入邊啲菜同肉好明顯係新鮮包嘅，冇急凍過，同埋味道較重油味，識到粒粒肉同埋菜，唔會好似急凍嗰種用晒嘅感覺。至於韭菜餅，因為隔咗一日先食，所以就冇乜特別，為一值得一提嘅係，見韭菜餅雖然係煎嘅，但係完全一啲都唔油，同埋包係較厚，如果想食脆身類似荃灣民豐果種就完全兩回事。總結嚟講，呢間都係平靚正新鮮家庭式味道嘅首選，希望喺逆市之下呢啲小店可以撐得住，繼續加油！…查看更多

復活節前夕搵好嘢食，有人被慫恿就去咗呢間交加街垃圾收集站隔離都煮得出好麵嘅雞白湯麵店試試。簡而言之，食物整體不錯，可惜格局、服務同員工就唔得。首先鋪位細細原感覺好日本地道小店，晚上6:45分入座完全冇人等，轉頭就有個菲傭般阿姐不斷用半鹹淡英文催落單，人地第一次嚟食梗係想睇清楚有咩食，佢就再行埋嚟指迫人睇佢餐牌上嘅相。再望清楚全店四個員工三個都係東南亞人，完全以為去錯泰國定菲律賓定南亞餐廳，所以唔好期望有日本餐廳應有嘅招呼和整潔。好啦叫完五分鐘左右就上菜，又係落單果位阿姐做埋傳菜，一嘢飛碗麵埋嚟，佢完全係食雲吞麵啲阿姐態度。然後剛食晒就狗衝埋嚟收你啲碗，人哋食到隻餃子好多肥豬肉要吐都收埋人隻碟。其實門外係冇人等。總結係，食物可以，而家其他好多拉麵店都做得好好，本想撐小店，但整體服務真心唔得，接受去日本餐廳食雲吞麵或港式茶餐廳fusion服務的話, 可試。2碗麵一碟餃子埋單$243。食雲吞麵係$50。…查看更多

FISH AND CHICKS假期間為隻貓貓撲有得照腹腔超聲波嘅獸醫太少，由城大VMC撲到嚟堅尼地城，等候貓貓照超聲波結果期間，喺呢個陌生環境自然地往海邊打算亂逛放鬆一下心情，見有情侶喺海邊長櫈食Fish and chips，好奇下搵咗吓，原來呢間英國料理近在眼前，二話不說就入去試試。坐位不多，當時接近4時約有7-8張枱已半滿，由於係公眾假期，所有食物都A-la-cart。餐牌上有多種fish選擇，我哋揀咗個女友話最好食嘅石頭魚，佢係資深fish and chips食家，由冰島食到英國，返嚟兩年冇得去歐洲食，喺呢度望一望向海嘅面面，加上室內裝潢，的確有令人去咗旅行嘅味道—除咗餐廳內嘅都係黑髮黃皮膚。另外仲試咗炸洋蔥圈、煙三文魚沙律、1664、薑汁檸檬梳打～一瞬間有瘦版Abercrombie & Fitch的待應端上fish and chips，外觀如英國食嘅90%相似，第一口最吸引嘅反而係薯條，default係扁平嘅闊薯條，可以轉幼薯條，以為會好淋，食落十分脆口不油膩，頗驚喜。另炸洋蔥圈都十分推薦，份量可供四人食，每條同樣香脆唔會好油淋淋，我哋兩個都食飽晒都仍可繼續清晒啲炸洋蔥圈～至於煙三文魚沙律雖然係普通嘢，但因為佢只會加少量醋，主力用檸檬汁，令食油炸食物後食個沙律後油膩感盡消。飲品方面都不錯，薑汁檸檬梳打味道並冇隨住冰融化而變得好淡口，唔鐘意飲凍飲嘅我都因為佢啲薑味同檸檬味幫助消油膩感而飲晒咁滯～總結而言，呢間海邊小店所賣嘅食物、飲品、環境都很好，冇去旅行想透吓氣嘅好地方不二之選。…查看更多

好耐冇行荃豐，晚飯時間路經未推玻璃門已見鋪內有長人龍，於是抱好奇心態，又唔知有咩好食嘅情況下，行完街返轉頭幫襯咗盒牛蒡紫米卷拎返老遠嘅屋企食。返到家開盒食已經是兩個小時，開盒前的確會俾佢包裝賣相吸引，當時覺得成$55盒應該只係金玉其外，但食第一啖後，各種卷內嘅蔬菜甜味、爽脆、紫菜香味、紫米煙韌口感混合為一，而且一啲都唔漏，因為啲蔬菜好juicy同新鮮，食得出冇味精，的確有去咗一轉韓國嘅感覺。難怪見其他客個個都一大袋咁take away, 我仲諗我買得呢盒手卷真係相形見絀。總結，喺香港有heart賣食物嘅鋪頭，香港人自然會用腳投票，唔太肚餓嘅買手卷有選擇，肚餓嘅買一碗飯+湯亦有選擇，之後嚟荃灣，會再幫襯～…查看更多

Lunchtime見咁多人排隊，見入面靚靚哋又咁多好評，見啲價錢貴深水埗主要食肆貴一大截(普遍只係$4-50，但呢間要$6-過$100），心諗應該水準唔錯，點知叫咗嘢食見到碟飯，真係令我四個同事都O晒咀。碟飯仲慘過頹飯，一塊魚加白飯同鼓油，份量同味道只係可以，女仔食完都唔飽，半條菜都冇，真心唔抵食！強烈懷疑其他好評嘅照片係打手，另兩個同事食牛扒，根本同去BBQ果塊嘅厚度冇分別，即係薄到可以义住嚟燒果種。好可惜只係影咗自己果碟，另一個同事叫燒春雞，等到大家食晒都未有得食，終於到時出現嘅竟然係同一隻大家樂下午茶炸脾都大隻過佢嘅春雞半脾隻加兩粒，堅係兩粒菜，一粒椰菜加一粒西蘭花。總結，大伏，去深水埗真係唔好貪鋪面顏值，去支持返啲老小店先最有質素。…查看更多

剛從台北回港不久，靈魂仍在當地神遊，尤其懷念九份吃的阿柑姨芋圓，粒粒新鮮軟軔 ，地瓜圓有地瓜味、芋圓真有芋頭味，配合紅豆碎雪作調羹，一大碗吃下也不覺膩。最近開了此新店便心血來潮外帶一碗試試看，始終不地道，所以其實心內都不抱好吃的期望。外賣打開後觀感的確大打折扣，天氣炎熱，雪溶了大半，糖水多得看不見芋圓，得蹈一下才見。:份量方面，當然與九份地道的相差甚遠，然而這兒的芋圓甚有本地特色，加入了雪泥，像雪糕又不是雪糕，入口清甜不膩，因此另有一番滋味～種類如所料不多，只有地瓜、芋頭、三色包餡芋圓，然而吃下去仍會有種莫名感動~此等廉宜卻可讓人感受一下回到台北的情懷，算十分不錯！全店最昂貴的甜品都只是$33，在甜品界開始被發記、滿記壟斷時，大家可多多支持此類特色小店~…查看更多

約左女友食午飯，因為係黃大仙返工，附近完全冇咩好食，覺得唔太遠既新蒲崗應該有選擇，因而預早上open rice搵有咩好食，見呢間總評唔錯，亦冇人劣評，決定試下。點知原來果度距離黃大仙地鐵站係好遠，又難搵，成個lunch hour冇左25分鐘。咁趕就即睇下有咩食就叫，原來都係冇咩好選擇，只有兩張好似車仔麵點菜既紙仔，雖然有飯有麵，但食麵(即米線)可選既配菜真係得好少，價錢又唔平(剩麵包芽菜等米線配菜盛惠$20)，加野每項$4-5元一份，仲要得好少，我加左玉子豆腐($4,得4粒，冇味)同肥牛($5,得3塊，煮得過熟冇牛味又韌到爆)...d位又坐得超迫又唔舒服，坐全店中間位，點知係風口位，冷氣超凍又冇得俾你調，隔離枱order完，d阿姐傳菜時不斷係你專心食緊野時一碗二碗麵傳火炬咁遞黎遞去，於是成餐飯難食之餘又凍又要就佢傳菜食下又停下!!真係谷鬼氣!!埋單時先發現，碗米線加左2味野食，一碗$29，連飲熱奶茶都要加$2、凍檸茶加$4，2人共$64!!早知去普通餐廳食個快靚正常餐都$50有找!!平均每人$30多元lunch食咁既質素既食物，真係「物超所值」食物質素遠低於所值價格!要食米線，真係全港得荃灣果間雲貴川食得過，雖然環境唔好，但起碼食物質素等都令你食得順氣好多!以後唔使我再幫襯!…查看更多

晚上要去城門谷跑步既關係，再去呢間闊別接近兩年既屋邨小食店。冇黎咁耐，唔係因為唔好食、唔抵食，而係我已經唔係附近住。以前我和中學好多同學仔都住住係附近，不時都會記得呢間又平靚正既小食店!呢度有好多街邊既小食之外，又有餐蛋麵、飯、車仔麵、糖水，小小一間鋪就有咁多款野食~正~特別推介炸雞亦，好有home made feel，唔太燶又好脆!加埋淮鹽仲好味~呢種小店真係越來越買少見少，大家要多d支持呢種老店呀!~…查看更多