中華一番好好味的个人专页

71放假, 下晝有重要野做之先都要醫肚。幾年前食過, 今日再試, 水準仍舊, 值得回頭幫襯。點左肝醬越南麵包, 慢煮越式手撕豬肉芝士麵包, 蕃薯條, 凍咖啡。越南凍咖啡當然冇問題。咖啡唔會淡而無味, 冰塊融後仍然有咖啡香味, 夏日炎炎正好眠以外, 飲咖啡都係一大享受。蕃薯條好食, 但跟餐加差唔多$30得果幾條, 認真唔夠喉, 性價比麻麻。慢煮越式手撕豬肉芝士麵包。手撕豬肉好食, 唔會柴, 入口啖啖肉, 麵包香脆, 其他TOPPINGS 清新, 配搭一流。不過芝士唔多, 味道唔出。整體已經十分好。肝醬越南麵包。呢個超級好食。肝醬味道配上辣辣地既肉,  麵包香脆, TOPPINGS 清新, 一啖有好多層次同味道, 所有食材絕配得非常好, 冇野可以挑剔咁濟。不過食法包就諗起去越南食咁樣既法包圍番都係幾蚊港紙, 呢間餐廳越南法包配上靚材料盛惠$100, 硬係有種奇怪感覺。總結。法包, 咖啡十分好, 座位舒服, 可以係度休休閒閒歎個brunch/ tea. 值得回頭, 大家去九龍城食泰國野食到悶就去呢間餐廳搓搓their best!…查看更多

家人話好耐冇出去食飯, 所以諗住去酒樓飲茶。但土瓜灣近九龍城一帶得一間酒樓, 又唔好食又勁多人排隊, 見到都怕, 於是走左去附近搵野食。入到呢間餐廳, 有幫我地量體溫, 外面熱到傻, 老細見到我體溫高, 都俾左我入去。不過過左幾分鐘, 佢有再幫我量, 話咁樣保障到大家, 我覺得老闆都算係咁, 盡責。有LUNCH SET, 我地每人點左一份, 包野飲, 每樣都唔洗$100, 係呢一頭都算係抵食既。我點左個BEEF STEW, 伴意粉。意粉份量好多, 不過都係白烚, 個味好淡。BEEF STEW個汁同意粉都唔係好夾。肉好柴, 薯仔一般。我媽點既SALMON 就相當OK, 煎時間恰好, 表面香脆, 裡面肉唔會乾。咖啡一般。總結。大件夾抵食但唔太好食, 我寧願俾多少少錢食D質素好D既野。不過都明白餐廳LUNCH SET 呢個定位, 1分錢1分貨。可能晚餐會好好多。…查看更多

同同事食出去食飯, 食完唔夠1點見仲有時間, 熱死辣辣決定去ifc 行下。去到% arabica, 人頭湧湧。我諗住請佢飲野, 點知佢話兩個麻甩佬咪啦, 我心諗佢咩事.. anyway 我點左杯flat white. 好似$40, 肉赤。雖然人多, 但都係等左5分鐘我既flat white 已經沖好。拉花確實好睇, 港女至愛, 所以我都即刻拎我部SE影低, 2秒之後, 用蓋蓋住, 搖兩下, 拉花生命短暫結束, 常言道牡丹花下死，做鬼也風流, 就係咁。講番杯野, flat white保持一貫水準, 好飲。拎到番公司隔左半粒鐘都保持到熱度, 同呢間鋪頭人氣一樣。雖則好飲, 但我覺得都係有d overprice, 相信有$5-$10係買杯上既%。總結, 人氣高, 好飲但overprice 既咖啡。價錢400%, 好飲度100%, 性價比50%,  如果唔打卡回頭率0%.…查看更多

話說之前疫情肆虐, thanks to wuhan, 禮拜日一家通常叫外賣。但當所有discount code 都用曬, 我地會出去買外賣食, 而老豆只會要法包就夠, 不過指定要呢間。第一次見到呢個法包, 心諗點值$28, 硬到死點會好食, 唔點olive oil 同black vinegar 我寧願食幾個雪芳蛋糕。 點知一試就愛上。法包冇想像中咁硬, 反而呈現外脆內軟既狀態, 食落陣陣麵粉香, 非常好食! 唔點olive oil 同black vinegar就咁食亦都十分ok! 唔怪得老豆咁鍾意, 而且一條份量都大, 當light lunch都ok. 十分推介, 貴得有理!同場加映個橄欖包, $23 好似, 我就覺得麻麻。不過用料靚, 個包仍然係非常鬆軟好食。總如, 貴但係好食, 或者好食但貴, 睇你點睇啦。題外話, 九龍城係發哥經常出沒地點之一, 話唔定你去呢間鋪頭買麵包會見到發哥或者發嫂。咁呢度d麵包就好食又抵食啦。 …查看更多

禮拜五晚去老友度打牌, 收工先去旺角食少少野再決戰四方城。老友係旺角番正, 話呢間車仔麵都唔錯, 可以一試。去到鋪頭, 差唔多坐滿, 原來樓上仲有位, 我地被安排坐樓上。點餐自己填單, 不過佢唔係就咁用紙, 而係有塊膠牌可以落單, 都幾環保呀, 代樹木多謝佢地。選擇都幾多, 叫夠四餸野飲半價。我點左雞翼, 冬菇, 牛舌芯, 油麵。逐樣點評。雞翼正常。冬菇索左汁點都好食, size 正常。牛舌芯驚喜之作, 夠淋, 夠入味, 浸浸湯汁入口一流, 唔怪得老友話呢度必試。偷食左老友點既robert, 冇渣不過唔係特別清甜, 一般。埋單幾錢唔記得, 老友請, 我個碗四十幾好似。總結, 價錢公道, 野食還可以, 邊日係旺角行完街想食車仔麵可以去試試。食完仲可以去先達睇下電話。題外話, 寫寫下諗起上年搭紅van去旺角係車上跌左電話。相信落左車過左十零分鐘就送左去先達, 往事不堪回首, 大家記住落車前check下手機銀包係咪身, 特別係著寬褲既朋友 ...…查看更多

疫情緩和球場重開,同老友去觀塘睇波Boot, 復出迎戰友誼波。睇完就去食晚飯, 老友推介呢間餐廳, 話好chill 又有feel. 去到鋪頭見到入面人頭湧湧, 要攞飛等。不過等位期間可以玩下lift口果部足球機打發時間,。等左十分鐘就有位。餐廳有好多部電視播球場, 適逢球季重開, 一班老細食野睇波就fit曬。餐牌, 杯墊, 裝飾都好有心思, 名正言順運動主題餐廳。我地點左脆烤雞翼同ribs, 當然唔少得啤酒。啤酒$38一pint 抵飲。上菜, 先講脆烤雞翼。雞翼烤得好好, 外面脆, 裡面juicy, 雞翼size 適中, 食得過癮, 值得推薦。到ribs, 點左半份, 美式烤豬肋骨(半條）$178. ribs 都大份, 肉夠入味, 亦都唔會好柴。配菜都發揮正常。結論, 香港sports bar唔多, 呢間the stadium 裝潢擺設有心思, 坐得舒服, 差唔多個個位都可以望到電視。有露天位可以一呼一吸, 秋天上去chill 下嘆杯啤酒, 睇下波, 人生樂事也。…查看更多

禮拜日禮拜後, 走左去九龍城廣場, 曾被稱為死城既場, 去搵野食。本身想食銀咖哩$24淨咖哩飯, 但又想坐得舒服D, 就走左呢間餐廳試試。去到地方好大, 都擺到廿張枱鬆D, 枱與枱都隔得幾開, 呢點做得幾好, 亦係呢間餐廳惟一做得好既地方。入到去俾姐姐叫我坐埋最近廚房果張枱, 但明明成個場都好空。張枱黐立立, 明顯冇洗過, 午市時間, 竟然冇LUNCH個MENU, 要問姐姐先有。Anyway, 叫左個醬烤脆肉清湯米線, 加香芋珍珠奶茶。上菜, 先講下個香芋珍珠奶茶。香芋珍珠奶茶, 珍珠好多粒但冇味, 亦唔Q彈。最大敗筆係珍珠大粒過飲管, 好難啜到, 大力啜又發出好大既怪聲, 食相極差聲音擾民, 我飲緊都覺得唔好意思, 用眼神同隔離食客曬冧。到主菜醬烤脆肉清湯米線。湯底正常, 冇咩味。米線吸收唔到湯味, 稍嫌淋左少少。醬烤脆肉十足豬頸肉,  食落直頭係水煮豬頸肉, 大佬唔係咁下玩我呀。不過肉既份量夠多, 都食得飽。結論, 後悔。埋單$42, 唔算好貴既, 但各樣環境, 服務態度, 食物質素都令我唔會再回頭。…查看更多

鮨岐 黃埔抵食日本野！TGIF ! 一於約班老友friday night 食餐好。但由於我地成班都冇plan 過依乜，當日睇openrice 好多餐廳都full booking, 或者要去到夜晚9點先有位。朋友話想食日本野，係黃埔有間唔錯，又有位，就試試佢。中環過去搭111/101巴士，紅隧落再行過去都係十零分鐘，唔好咁傻仔搭鐵去旺角再轉線。去到餐廳，size 都唔細，仲有兩間房。我地坐出面，一行四人都俾左張六人枱我地，坐得好鬆動。個場唔會太嘈，大家暢所欲言都冇問題。點左唔少野食，今次集中講個扑葉鰻魚飯。本身有朋友想食鰻魚炒飯，但因為扑葉呢兩個字，我地就叫左呢碟會會佢。上菜，鰻魚份糧都夠，夠肥美，冇骨。鰻魚汁正常，唔會太咸，送飯一流。飯亦都軟硬適中，飽滿，有少少扑葉既香氣。非常推介大家食！呢個菜好似$118. 最後埋單位位$224,我覺得幾抵食！…查看更多

上回講到同6ou 朋友食完lunch, 佢就請我飲咖啡，你以為佢好好人？非也，係之前佢偷走見工，我幫佢攞tie 同西裝褸姐，不過慘就慘在都依家都未轉到工，疫情對經濟衝擊真係非同小可。我帶佢去我最鍾意去既cafe, 就係AIA tower 既NINETYs. 依家做緊優惠$30一杯，星期一好似有買一送一優惠，詳請睇番佢地ig 先知。我叫左杯flat white choco. flat white 維持一貫高水準，好飲。個杯既藍色我好鍾意。論質素論包裝論性格比，呢間都好過好多大型連鎖咖啡店，鍾意飲咖啡既不妨試下呢間，支持下呀。見到佢有d course 教人沖咖啡，有興趣有時間都可以去睇下。…查看更多

今日又同個6ou朋友去覓食，不過由於天氣實在太熱，我地去到金鍾灣仔一帶搵野食。去到灣仔一帶，抬頭見到呢間野個名：香港超級餐廳。個名都勁到嚇親人，我地都冇得揀，唯有去會一會。一入到去，發覺樓底超高，可以起兩層咁濟。入面好暗，好似停電咁。排位都鬆動，不過我地原先坐個位冷氣機滴水，正因咁高樓底，一滴果種爆發力令人忍受不住，之後伙記都好好咁安排我地坐另一枱。我點左個黑椒牛柳飯，熱檸水。熱檸水夠熱，夠檸檬。黑椒牛柳飯夠汁送飯，黑椒汁正常，唔會太過辣又唔會淡而無味。飯量可以，食得夠飽。埋單都係$30有多，係灣仔區真係抵到爛。誠意推介！不過6ou 朋友lunch 之後買杯咖啡都$30...真係6ou..…查看更多

父親節，難離難捨想抱緊些，決定買個蛋糕孝敬下老豆。九龍城人每逢佳節買蛋糕都要去Tony Wong, 因為質素咁耐以黎都保持到，雖然價錢貴左好多，但都係我一家既不二之選。今次揀左經典既Gold Medal, 即係朱古力蛋糕。1磅蛋糕盛惠$480,肉赤。蛋糕附上朱古力牌寫住Happy Father's Day, 老豆見到都開心。雖然睇落好細，不過我地一家食完都覺得好飽。蛋糕有唔同layer, 展現出幾種朱古力味既層次同口感，好豐富。而且唔會太膩，可能係加左茶落中間，食落解膩同有種fresh 既感覺。惟一缺點係餅底太厚，係成個蛋糕美中不足既影響。你話值唔值，我覺得係香港要搵一間質素高而穩定既蛋糕店唔係容易事，俾多幾十買個質素保證，我覺得可以。咁當然平多一百幾十作為消費者既我就最開心，不過後果可能係會買多左，食肥左。祝父親節快樂！…查看更多

晏晝同舊同事6uo食飯，佢話帶我去pp 食間平野。我心諗，pp 都有平野，唔係化？一去到呢間門口，勁多人等，我地都等左20分鐘。見到個餐牌，$168食個拌麵，唔是話？我個frd 仲話，記得之前食都係四五十蚊，我懷疑佢古代黎既 ...咁當然唔會點拌麵，揀左佢個牛肩脊炒河，配娃娃菜同珍珠奶茶，感覺上抵個十零廿蚊買到既拌麵掛 ..上菜，娃娃菜份量都ok. 炒河有驚喜，好夠味。牛肉唔會落好多鬆肉粉，有味道有咬口。雖然都仲係覺得唔抵食，不過味道質素唔錯既。珍珠奶茶同甜品都ok, 食到好飽。埋單差唔多$180, 一餐Lunch 當然係唔抵食。不過餐廳環境，食物質素都ok, 坐得舒服食得開心。要等位就不了，趕時間可以一試，唔係既話行遠少少去pp3果頭會有更多更相宜既選擇。…查看更多

今日同朋友出去搵野食，佢話不如去中上環食大排檔，露天既。熱死辣辣搞啲咁既野 .. 不過朋友話想慳d 錢，冇計就跟佢走番轉。去到橫巷就見到呢間大排檔，原來有幕遮頭，而且有把大風扇，坐得浪爽，唔會曬到。見到個廚炒野，已經feel 到陣鑊氣，即刻點番個乾炒牛河試試。上菜，河粉望落唔會油"鈴鈴",份量都夠。食落河粉夠入味，辣椒醬一般，牛就都係落得太多鬆肉粉。整體我覺得好okay, 呢碟河粉好過好多茶記多多聲。埋單$40,真係抵到爛，又唔洗等位。推薦係中環中心附近既人黎食，外賣堂食都得！…查看更多

疫情期間, 減少外出用膳, 決定叫係屋企附近餐廳外賣。睇餐牌見到有BAGEL 立刻心心眼, 因為我好鍾意食BAGEL, 但香港唔多地方有得賣。我ORDER 左個SMOKED SALMON BAGEL 同朱古力流心MUFFIN。SMOKED SALMON BAGEL配沙津, 沙律份量都OK, 都新鮮既。但BAGEL就大為失望。入面既CREAM CHEESE 太少, 令到個BAGEL 有D乾。SMOKED SALMON 正常。但整體都係麻麻, 賣$75我覺得OVERPRICED.反而朱古力流心MUFFIN有驚喜。夠熱, 入面朱古力流心好食, 而MUFFIN 都有朱古力粒, 食落啖啖都充滿濃厚朱古力味。而MUFFIN, 朱古力粒同入面既流心就形成3種唔同朱古力味同質感, 非常好食!!…查看更多

今日又左去搵舊同事食飯, 不過因為天氣熱又焗, 所以去附近WELLINTON STREET 食野。WELLINGTON STREET 出名多食肆, 朋友想食拉麵, 加上我有兩張一幻$50既COUPON, 所以就去食啦。對比上兩星期, 人流多左好多, 之前12點15分入去都係坐滿2成, 今日去都差唔多坐滿。疫情下, 店員會先量食客體溫, 再噴消毒噴劑, 幾細心。 位仲有一張摺左既A4紙。朋友點左拉麵, 我就試下特濃蝦汁义燒拌麵。上菜, 特濃蝦汁义燒拌麵賣相都OK。麵唔會好乾, 而個汁亦都好好食。义燒唔係好似拉麵上果隻薄一片, 因為都有D肥膏，食落唔會"鞋"口。蛋都入面，生熟情度OK。不過紅色既麵酥唔合我個人口味。我地仲叫左其他小食，不過冇影到。總結，如果你有COUPON既話, 一幻折左既價錢係抵食既。原價都還可以, 一般中環拉麵都係$100既價位。不過唔值得排隊食。依家食完都會繼續送COUPON, 1個月內生效期。…查看更多