Melody Lau的个人专页

最重要的先說：我地一行二人，幾星期前就訂定枱，晚市幫襯佢嘅Omakase, 但其中一道由廚房預備嘅熟食龍蝦，竟然上碟時仲有一條腸未清理，看最底附圖：講真，我無諗過比呢個價錢（$18xx/head)會遇到咁嘅情況囉。畢竟我唔係去緊大排檔！雖然當我向員工反映後，佢哋有提議比過份新嘅我，但我真心無胃口兼無心機，仲要餐飯係慶祝生日架大佬！好嘞，講埋次要d嘅，我地一入去，職員對晒留座資料同電話，然後安排左我地坐吧枱某個位置（叫A位啦）但當我地坐定定揀緊叫邊個餐時，就話比錯左位我地坐，然後調左我哋去同一張吧枱另一個位置（叫B位）原本都好奇有咩分別，都係座番同一張吧枱之嘛，後來發現原來負責serve A位嘅師傅明顯手勢純熟好多，而serve B 位，即係我地調位後同另一pair客嘅師傅，就好似學師咁嘅質素，切野睇住佢切得有點辛苦同切爛左，然後放落底去上碟當無嘢。另外離譜嘅係，一d用作裝飾嘅小食材例如食用花，小葉之類，（放左中間個碗度由兩位師傅共用），碗裡面嘅野，係立立亂，又有類似紙巾物件，每次要揾野裝飾就裡裡外外番黎復去咁揾，我開頭以為嗰碗野係待丟嘅食物垃圾！不過我要強調，serve B位嘅師傅係全程態度無問題，好有禮貌，亦睇得出佢好努力同用心去準備食物比我地。只係功夫未到家。總括而言，呢個價錢，絕對有好多更好嘅選擇，呢度比唔到值呢個價位嘅質素我，所以唔會有下次。刺身質素中規中矩，無邊樣特別出色，無驚喜…查看更多

因為要去深水埗買野所以同家人去左西九龍中心揾地方醫肚，見到呢間店寫住無味精，所以就試吓。我地叫左蓮藕餅拼朱扒飯同花生豬手飯。每個飯都送一盅細嘅無味精靚湯。豬手入晒味又夠林，朱扒係薄身嘅，入晒味唔會硬。蓮藕餅足料，啖啖都食到馬蹄好爽口。個湯好濃郁，無味精，真係如佢哋嘅賣點，有家嘅感覺。由於太肚餓所以唔記得影相，四、五十蚊個飯已經包埋足料靚湯，絕對超值！個湯如果單買大盅size都只係$28！太過份！😆…查看更多

知道呢間係人龍店，想試好耐。見難得有日放早，就6點去睇吓會唔會好啲。又好彩喎，真係唔駛排隊可直入。食物水準其實算係中規中矩，我唔駛排隊所以都覺得可以。但肯定唔係值得要排長龍去食嗰隻。食物質素都令我唔排除有再去可能，不過嗰位唔知係店主定店員嘅大叔，就令我唔會想再去。店内有一位叔叔，一位嬸嬸同兩個後生。我唔知佢哋係一家幾口定係點，但大叔會好大聲咁用粗口鬧其他店員，偏偏佢又負責主理大部分食物，所以佢係企正係客面前個bar枱廚房度大聲鬧出嚟。佢黑住面，整完碟野上比客時超悔氣，亦無講聲呢碟係咩咩之類。這並不是我對一般小店所expect嘅服務態度，而食物只是中規中矩，所以如有其他選擇的話，應該不會再幫襯。（其他幾位店員嘅態度係完全無問題嘅）…查看更多

星期六點幾鐘在D2 place附近，求其揾間野開餐，點知中晒伏。一入店內，見大概六成滿，向最先見到嘅男侍應示意兩位，佢睇到但無指示我地應該座邊，我以為係座位任揀，於是自己揀左個位座，點知呢刻個男侍應就要求我地座佢指示嘅位置。咁我地都乖乖轉位。呢位男侍應由落單到上菜都係黑口黑面的。有趣嘅係，我地自己討論點樣配搭d套餐時，另一位女侍應埋黎比意見話我地應該點點點，雖然有點熱心過龍，但總算出於好心，所以都無咩所謂。我點的是香矛豬扒湯粉，一上枱見到個賣相已知中伏，一食落口，湯底得個咸字，無其他味，豬扒好似已被浸在湯内一段長時間咁，係唔香口同埋鞋口嘅。跟餐嘅小食春卷林林地兼有油益味。一碗難食湯粉連三粒春卷加杯飲品承惠$65。個人覺得唔值。唔會有下次。…查看更多

一早訂左枱於某星期日晚上6:30pm, 入到去講番訂枱資料，店員望都無望張訂枱紙(佢成張訂枱紙貼在柱位當眼處，我一眼就望到自己個booking)。就話你呢個人數，上樓上啦。但明明地下呢層只得兩枱客。原來佢間店係嗰種夾硬於樓頂加個好矮嘅閣樓嗰d。上到去，另一個店員問我地幾位，然後叫一枱已經開左茶準備叫餸嘅客座另一張細d嘅枱，然後我地座人地呢張，明顯座位安排完全亂黎。全層座位好迫，頭先被轉枱嘅客係要對正部分體式冷氣個出風位食飯，部冷氣係近到就在座底後嘅頭頂位，佢地狂話凍，但可能心知大家都靠呢部冷氣，佢地完全無要求熄細d或其他，好偉大。我同後面張枱個客係互相肩並肩而唔係背對背，有枱客直頭係要座入一個樓頂係斜三角突出黎嘅貨倉位，都幾離譜！講番食物，以為佢個脆豬手好出名係必試，點知，落完單唔夠一分鐘已出菜，已心諗不妙，結果皮韌完全唔脆。😖😖其他餸菜不值一提，全部都好油，成晚唯一好味嘅係冰鎮咕嚕肉。食到後期，大概係我地入座後一個鐘左右，見有顧客同店員交渉，然後望住我地張枱，跟住老闆親身上黎，話唔好意思，然後攞左我地張食物咭，簽個字，然後話免晒我地叫嘅白飯，話唔好意思，對唔住，然後攞左我地張單去埋單。就係咁，我地就被埋單趕走嘞！😡😡我地除左O咀，就係比錢走人，連嘈都唔想嘈！離開時見到樓下嗰層已經座滿晒，而擠迫程度原來仲衰過樓上，仲要好熱，我見全場好多人都攞住個餐牌撥涼，原全貼錢買難受！…查看更多

本身自己都幫襯過唔少燒肉或日式放題，但呢間野差嘅程度可以話攞硬冠軍！放題限時兩小時，第一個人準時到達，向門口店員表示左其他朋友未到，店員即時話，其實無論你幾點齊人或幾點先座入去，都會由你原本訂枱時間開始計時。平時其他店多數係不論你齊唔齊人，你一入座就計時，好合理。但呢間竟然咁計，我真O晒咀。食物質素仲驚嚇，刺身極不新鮮，叫完第一輸根本唔敢再叫！部分用作燒烤嘅肉同粟米直頭有陣叔味。連碟生菜都係好似平時街市菜檔臨收檔前$5一份嘅菜尾咁嘅質素。炸尤魚圈硬到我以為自己食緊條粗橡根！😑😑😑最離譜係我地由一座底就落單嘅海鮮類食物同埋佢要求我地全枱人like facebook又share條片先會送嘅海鮮拼盤一直都無黎過。😡😡😡😡😡😡我地本身邊食住其他野邊等，過左一個鐘都無黎，我地就開始追單，前後揾左五至六個不同員工追單，個個都話幫我地睇睇，可惜到夠鐘我地要埋單時都係一碟都無黎過！😡😡😡😡😡😡連加一，三佰幾蚊一個人放題其實唔係貴，但質素都唔係差成咁囉！同樣價錢仲有大把其他更好選擇！…查看更多

我地一行二人係正價幫襯晚市，叫左兩個丼飯，同一個小食，一個蒸蛋。一碗係牛肉丼，一個係海膽吞拿魚蓉，牛肉飯d牛肉ok嘅，不過碗飯好硬，直頭好似生米咁，但魚生丼碗飯就正常，魚生質素平平。我地兩個丼飯係一齊share黎食，兩個都覺得牛肉飯嘅飯明顯又硬又生又難食，但因為我地趕時間，所以無叫佢地退換。同埋可能都算係新開張關係，大部分人都好生手，不過態度就ok嘅。講真，同區或同樣價錢有好多更好選擇，所以應該唔會有下次。…查看更多

叫左個二人餐，連加一$600，唔算貴亦唔係特別平。但服務態度就不可接受。話說我座嘅係一張長枱，中間枱面放塊又細又通窿嘅版仔就當分隔開同你旁邊搭枱嘅陌生人。好多食店都會咁做，我亦接受，不過呢間就同隔離位好近，所以隔左幫助不大，都算。但最大問題係，中途無端端有職員拿走左我地同隔離之間塊版，完全無交待咩事，我望住個職員攞塊版去邊，原來係比遠處第二枱客做間隔！咁都得？唔通我地就唔係客，唔駛同隔離間開？我睇到o晒咀唔識反應。全晚就無遮無掩咁同隔離一齊食。中途雖然有女職員主動埋黎加茶，但佢竟然係用好似人地平時催人還錢咁嘅手勢，攤開手版，郁下手指，示意我要攞隻杯比佢，一粒字都唔講。我平時見食店職員唔夠手長，都會主動自己攞隻杯比佢，但未試過比人咁樣命令比杯佢囉。另外，我地個位比較近bar枱，但唔知點解成晚都傳來陣陣垃圾酸臭味。總括而言，食物好普通，有隻蝦係梅嘅添，同樣價錢有好多更好選擇。黎一次都嫌多。…查看更多

見食評講到好正，一直好想試呢間店，今次終於專程去試。好彩夠早到，完全唔駛等位。或者期望過高，食完難免失望。是日兩人分別叫左佰幾蚊嘅龍蝦肉餅同幾十蚊嘅土魷肉餅，講真，絕對唔特別，無話特別好食，同其他茶記質素差唔多，份量亦同一般無咩分別，唔明點解咁多好評。最突出嘅反而係服務，大部分職員落單，上菜時都係黑口黑面，令人相當唔舒服。店內播放歌曲嘅聲浪亦太大，很吵耳。長條形無背靠嘅座椅亦座得唔太舒服。唯一要讚嘅係個原盅燉湯，味道唔錯亦唔貴。總結如題，試一次夠晒，仲要係唔駛等位先好試。…查看更多

見openrice報道話呢間係什麼女生主義又話粉紅餐廳好似幾特別，所以就襯順路黎試下，點知.....先講個裝修，報導話好elegant,但我當場感覺係剛好相反，座位仲要同隔離枱相當親密，再黎餐具又再令人相當失望，嗰d原本應該係粉紅色嘅餐具，部分已經脫色脫左大半，我寧願你比番平時茶記嗰d銀色餐具我無咁嬲！入座時話繁忙時段限時用餐時間係個半鐘，絕對無問題，好多餐廳都有限時，問題係佢上菜速度係超慢，由落左單到黎第一樣野係足足隔左25分鐘！最先黎係意粉，反而餐湯同沙律仲遲過佢！我地叫左$358嘅二人餐，報導話係用三層high tea 架上菜嘅，但最終隔離枱係三層架，我地唔係，無人解釋過點解，我亦無心機問。講番食物，個意粉又咸又硬，咸到唔想食落去，我地兩人千辛萬苦先食得完，唔知點解會自稱係一間少油少鹽嘅店囉！牛油果蘋果沙律本身細份得可憐，牛油果唔知係咪做左個醬汁，肉眼唔太覺眼。龍蝦玉子燒甜到以為自己食緊甜品！個牛肉粒同薯條相比之下算係正常！簡單總結：想貼錢買難受的首選！（注意：晚上6點後有最低消費要求，$100/head)P.S. 半開放式廚房，望入去，全部大廚望落都係90後甚至00後…查看更多

已經超過成個月前去幫襯，不過一直太忙到而家先寫到食評，所以部分細節可能已經有點不太記得。當晚一行八人去食生日飯嘅，老實講，見openrice全部都係好評，但去到發現又唔滿座，其實反而有點擔心嘅。首先要講講，當日下午，佢地有人打電話比我，問我有咩海鮮或特別野想食，然後會幫我去街市入貨，一聽到，就覺得唔錯喎，咁肯定d海鮮會新鮮呀！佢地係以套餐每位幾錢咁計，主要有兩款，價錢不同。本身有兩款火煱湯底可以選擇。我地可以一半人叫a,一半人叫b款，都幾方便。我地8人亦唔一定叫8個餐，可以叫少個餐自己想加side order先加都得，又加左分！由於我地其中一人唔太舒服無胃口，所以我地就叫少左個餐，再另加左幾隻扇貝。套餐內記得有花甲，蝦，龍蠆腩，肥牛，豬肉片，手打蝦滑同烏冬，好記得d蝦上枱時用個細煲蓋蓋住，後來知點解嘞，因為蝦新鮮到狂跳，有次連個蓋都跳開埋，好搞笑。最難忘係個龍躉腩，自己平時有買過街市d龍躉黎打邊爐嘅，但從未試過咁濃咁好味！最後仲有糖水或雪糕送嘅，我地大部分人揀左糖水，好彩係咁揀，因為連個湯丸糖水都超好味，個糖水係等左一段時間先到，有識食嘅人士食完話粒湯丸應該係即叫即制，唔係現成利x湯丸。個糖水底亦好多材料，好有驚喜。整體成餐飯都好滿意，店員keep住照顧我地嘅需要，亦感受到店方對食物質素嘅堅持同誠意，雖然位置唔算好近鐵路站，但絕對會再幫襯！…查看更多

某天晚上路過太子揾食，見呢間車仔麵店走懷舊風，於是被吸引入去幫襯。車仔麵餸每款由$9至$12不等。我地兩人，一個叫左4餸，一個叫左5餸，另加一枝汽水同油菜一碟，埋單$140，扺唔扺食就見人見置。共9款餸包括魚蛋、鹵水豆腐、冬菇、蝴蝶腩、貢丸、咖喱尤魚、傳統牛腩、日式溏心蛋，仲有樣唔記得。咖哩尤魚個味其實唔錯，不過佢地用左以碟仔另上嘅方法，所以就咁食係凍嘅，自己浸落湯然後先食就會影響左個味啦當然。大致上全部食物味道都ok嘅，都試得過，但唔算特別好食，某些食物份量亦偏少。如果係要排隊或等好耐位嘅情況又唔太值得。…查看更多

見咁多好評，一心去試下呢間店，點知由一入門口就被無視，兩個員工都見到我地入黎，但就繼續執食客已離開嘅枱，到我考慮走時，其中一個示意我座某張枱。已經扣左分。到我想落單時，只得番一個店員，見佢路過我張枱，立刻舉手加講'唔該', 佢無應我，唔知佢睇唔睇到我，所以我keep住隻手高舉，到佢再行近時又再叫佢，佢漂左我一眼，答等等，然後繼續去執兩張無人座嘅枱，攞布清潔，仲去碟櫃攞埋碟擺埋位，然後去搞個啤酒機，然後先黎同我落單。當時係完全無人等緊入座，唔明點解執枱係優先過幫客落單。不過公道d咁講，個店員唔係為左偷懶而唔理我，而係做野先後次序問題。叫左個二人套餐，首先黎前菜枝豆已經出事，面頭白雪雪密密麻麻，我以為未溶晒雪，點知原來全部都係鹽，咸死。但最底嗰d又一粒鹽都無，好明顯求其落完鹽就連撈均都費事就上枱比客。串燒雞亦-好鞋同無味串燒黑豚豬肉-好韌，咬唔到 串燒墨魚丸-正常一口和牛-咸死人鰻魚飯-好夠熱，但個鰻魚汁無咩味豬軟骨拉面-無咩味唔覺呢間店邊樣野特別好食，所以不入推介之列…查看更多

星期日到呢間新開無幾耐嘅酒樓試下，見佢裝修得幾光鮮，點知中伏。講食物質素前，想提提，呢間野好勁，勁在下至上菜員，中至知客，上至經理，每一個都係超黑面同態度惡劣，最後會講講。食物：蝦餃-皮厚蝦極少（$18兩隻）黑松露燒賣-肉鞋亦好咸 （$18兩隻）牛肉蒸腸粉-皮厚如棉被鮑汁鳳爪-鳳爪完全無味，明顯係整熟左之後先淋番個汁錦路雲吞-d炸雲吞係林而唔係脆嘅炸煎堆-唯一一樣堅好食嘅，皮脆不太油發現有漏單情況，所以叫部長印張已叫嘅點心清單黎睇，雖黑面但照做，對完確定比漏左碟點心我地，就求其揾個侍應講，指住張清單，圈左邊碟無黎到要取消，然後同我地埋單，佢問我，咁你取消左未？我話未呀，所以咪而家通知你然後埋單囉。我地同時交代其實我地最終少左個人，所以開位時寫在點心咭上人數要減一，因為要計茶錢嘛，佢竟然質問：咁點解你開位時唔講？我地話因為係有個人開位後先臨時黎唔到，佢係念念有詞講左幾隻唔知咩字，然後'gip'左一聲先走。全個飲茶過程大家都好唔開心，因為無論我地係叫侍應攞野沖茶又好，或者上菜姨姨上菜時嘅面口，都係好似我地去左佢門口乞食咁，所以成個感覺都好差。咁我無可能比錢受氣啫，所以唔會再幫襯。…查看更多

見有好多好評，於是帶著期望專程去食晏，點知失望而回。叫左個lobster roll套餐，除左個主題包，仲包左湯同沙律，承惠$198再加一。先黎個沙律，係基本沙律菜加上油醋汁。d菜新鮮清潔，但個汁好重油味，蓋晒醋味，食到我一口油，好想放棄。但唔想浪費食物，所以照食晒。餐湯以一個好細嘅杯盛載，大概半滿，直接用杯仔飲，如果計份量，我覺得大概係三湯匙左右啦。份量其次，問題係個湯味道好淡。到最重要嘅龍蝦roll嘞，外面係一片牛油多士包住好多龍蝦肉。個包好香牛油味，但d龍蝦肉肉質就麻麻地。另外用$10叫左杯蘋果汁，雖然加左好多冰令到個蘋果汁超淡味，但賣相係好靚嘅，咁$10咁平，仲想點？我在香港同日本都有食過唔同店嘅龍蝦包，呢度嘅唔係特別好食亦唔係特別平，暫時諗唔到自己再幫襯或者要推介比朋友嘅理由。…查看更多