LungCH的个人专页

終於兩個人一齊嚟食the Pantry，班戟當然要share食先開心。主角之一係煎封門柳伴白菌燒汁闊條麵。一睇就知道係Bf會叫嘅嘢食。闊條麵好掛汁，白菌汁好香，配埋少少牛肉汁。封門柳點咗medium，肉質嫩滑。配阿根廷青醬，歐芹及大蒜味令牛扒食落唔會膩。另一款選擇咗fusion菜：冬蔭意大利飯。味道重東南亞味，用咗不同香料例如薄荷葉令到整個飯都好香口。海鮮絕對唔馬虎，每一樣都先香煎，有珍珠帶子、虎蝦、青口，同比目魚柳。連唔鍾意食魚嘅Bf 都大贊比目魚煎得香脆。最後到主角之中嘅主角，係期待已久嘅焙茶疏乎厘班戟。Ricotta 厚班戟口感鬆軟，好似食緊muji棉花糖咁樣，食幾多嚿都唔會膩。再加埋焙茶醬簡直係天作之合！焙茶醬好濃郁，勁有茶味，估唔到配埋柑橘會咁夾，濃得黎帶點清新。每一啖都要鋪滿咗焙茶醬。連埋朱古力脆米食更增加口感。班戟絕對要encore！…查看更多

臨近聖誕，尖沙咀已經人來人往。避開少少人潮，係尖東站旁有正宗意大利菜，可以慢慢品嘗。點咗兩個3-course set，Set 1係 意式烤雞（半隻）配蔬菜及意式雜錦豆湯，Set 2係蜆肉意大利麵及招牌IBP意式沙律。兩個set都配有一客Gelato。招牌IBP意式沙律用上新鮮嘅沙律菜、雞蛋、風乾番茄、吞拿魚等等，用意大利黑醋作dressing。味道酸酸甜甜中，帶少少鹹味，整體清新開胃。意式雜錦豆湯含紅腰豆、鷹嘴豆等等，夠濃郁。意式烤雞（半隻）配蔬菜，半隻都十分足料。嫩滑雞髀簡單用香草、胡椒調味都惹味。蔬菜經過烤焗，配埋雞肉食唔會膩。蜆肉意大利麵有驚喜。蜆肉隻隻飽滿，有海水鮮味。鮮甜味再加番茄、橄欖油已經成為classic及令人回味嘅汁。麵用較扁身意粉，容易掛汁之於，有彈性。大推Hazelnut gelato！好重hazelnut 味，由於係gelato，所以食落較輕盈，令人一啖接一啖。焦糖味唔會死甜，甜度剛剛好，會品嘗到焦糖嘅香。一球都只係$38，下次經過尖東要再食其他味，例如開心果。…查看更多

又係一個冇圖嘅食評，實在太匆忙食飯，影唔切相。可以係lunch time食到好西，好感動，決定要寫食評。由於趕時間，所以冇點睇menu就點豬頸肉便當，同埋阿里山麥香烏龍茶，唔趕但最重要快。豬頸肉便當喺一兜過，入邊有齊粟米、菜、炒粉絲。豬頸肉薄切，肥瘦適中，啖落有油香，邪惡但好味。燒亦燒得惹味，面頭帶有少少燒汁配飯食令人回味無窮。係屯門區內暫時令人印象深刻嘅台式餐廳。烏龍茶正常，五分甜已經足夠，解渴一流。…查看更多

半年冇見當然要搵間高質餐廳，一路食一路更新大家近況，於是二訪Homeland。點咗Pizza set，好豐富，有齊沙律、湯、pizza同主菜。湯升級咗鮮打法式龍蝦湯配蒜蓉包，滿滿濃濃龍蝦味，重口味之選。泰式柚子墨魚仔沙律好清新，每隻墨魚仔都肥美。Pizza有4款選擇，選擇咗最特別嘅秘製北京烤鴨 Pizza。味道出奇地夾，Pizza底有填鴨嘅甜醬，完美還原呢度北京名菜，面頭仲有啲京北京填鴨京蔥，所以唔會好膩。Pizza係偏薄，軟熟，好啱包住鴨肉食。肉，全部都係肉，主菜點咗香煎澳洲安格斯肉眼扒配薯菜。肉眼扒煎得好靚，橫切面係粉嫩嘅五成熟，食落去有肉汁。有驚喜係薯菜，薯蓉好細滑，簡單得來好味，而蔬菜都係經過烤焗，更加香口。食咗太多肉，所以點多咗個菜食，朋友都話我變咗。芝士焗香蒜西蘭花，啖啖西蘭花啖啖芝士好滿足。飲品點咗清新嘅凍粒粒白桃綠茶，而要輪班開夜嘅朋友就點咗Latte，希望佢食完呢餐之後繼續加油返工。…查看更多

葵芳原來除咗葵廣有得食小食，原來隔離新都會有新開主打小食、港式美食嘅餐廳，可以坐低慢慢享受。掃街拼盤有麥皮蝦芒果沙律脆筒、碗仔翅、特特大鱼蛋、山椒鹹蛋雞翼、蝦頭油菜燒賣賣同埋新煎釀三寶，極豐富。煎釀三寶配柑橘腐乳醬好清新。麥皮蝦好脆口。麻辣牛根腩配蔥油溏心蛋飯，牛筋腩大大嚿，好足料。麻辣好惹味，配埋蔥油溏心蛋飯簡單而好味。雞蛋仔101畫室，可以用朱古力醬去畫畫。芋頭西米椰皇蛋白，蛋白好滑，配埋椰子，感覺好養生。楊枝甘露果凍碗口感好多元化，有齊鮮芒果、金柚肉、芒果布丁、椰青果凍、手工小圓子、水晶珠，好岩鐘意chewy嘅我。點咗兩杯特飲。草莓鮮奶唔係藥水草莓味，有草莓嘅鮮甜味。而苦瓜香檸茉莉清甜得黎，帶少少苦澀。…查看更多

同朋友食嘢，我建議呢間泰式餐廳，原來佢之前經過元朗都已經有留意，心有靈犀咗。朋友點咗炭燒豬頸肉煎蛋飯。第一口食落去有淡淡蜜糖燒烤香味，好惹味。豬頸肉厚切，口感好正，唔會燒到乾身，仲有少少肉汁。淨係為豬頸肉都值得encore。乾炒大蝦金邊粉炒得好乾身，條條分明。金邊粉調味好足，青檸嘅酸味、和是拉差辣椒嘅微辣、魚露鮮鹹味配合得好好。旁邊仲有勁多花生，真係還原泰國食嘅金邊粉。當然唔少得海，有足足三隻爽口新鮮大蝦。仲加$25點咗個小食share，黃金蝦餅。蝦餅好爽口彈牙，入邊真係見到切粒蝦件。飲品方面，珍多冰有驚喜，上面配咗椰奶奶泡，似奶蓋嘅感覺。椰奶份量好充足，唔會似坊間咁食到最後冇晒味。朋友就點咗泰式檸檬茶。佢兩個月前去完泰國，直稱同泰國嘅一模一樣。…查看更多

創新fusion 菜已經花心機，同時要cocktail做得驚艷係難上加難，但Ciclo 完全做到💯。Starter: Tuna Tartare用新鮮炸魚皮同埋特製牛油果蓉，配上微辣吞拿魚，無論口感定味道都一流。 Starter: Uni Lobster Bisque Arancini喺傳統西西里小食上，配上一層薄薄嘅sour cream增加北海道海膽鮮味。一切落去會見到似拉絲嘅效果，十分creamy，食落有龍蝦味。Main: Crispy Beef Short Rib用上牛味濃、口感嫩滑嘅牛坑腩，真係呈現到外脆內嫩滑嘅口感，好欣賞廚師燒到外皮微燶嘅效果。自家製牛奶薯蓉細滑，帶有牛奶微甜味，所以作為好甜之人嘅我食到停唔到。紅酒山楂汁為呢道菜補足咗微酸味，不過個人覺得牛坑腩本身已經濃味，加咗面頭嘅榛子醬，層次已經足夠。Pasta: Drunken Crab Pasta又係可以展示到佢fusion菜嘅功架嘅一味菜。用咗花雕酒去烹調意粉再加上炸蒜片同埋辣椒，聽落去好中式，但食落又唔會格格不入。松葉蟹肉帶有鮮味、微鹹，令人齒頰留香。Cocktail: Tom Yum（前）& Koko Ringo （後）兩款Cocktail都不謀而合，帶有泰式異國風情。Tom Yum顧名思義就係用咗泰式冬陰功作為概念，係餐廳員工隱藏嘅推介。聞落去已經有冬陰功嘅味道，飲落其實唔會太Exotic。整體因為lime、coconut而好Refreshing。而後者就比較Fruity同埋有花香多少少，特別之處仲用上咗斑斕，但斑斕味唔會太出。整體好容易入口，連較少飲酒嘅文青朋友都好鐘意。Dessert: Pistachio lemon cream cheese dessert原本想點Apple pie作為甜品，原來已經靜悄悄甜品list，但呢個開心果檸檬撻低調得來都高質。文青友人讚賞開心果味好濃郁。我都覺開心果同檸檬味道配合得恰到好處，整體nutty得黎夠清新，食完個甜品都唔會覺得太膩。最後講下裝修同環境。裝修以黑色格調為主，有型摩登。店舖播上歐美Pop song，聲量唔會過大，好適合同朋友傾偈。店員全部友善熱情，上菜前都會簡介每味菜嘅特色。…查看更多

食兩餸飯食得耐，決定轉一轉口味，買日式外賣返屋企食。係景峰有間抵食壽司刺身外賣專門店，拉麵都只係$35起。最後點咗兩個主食雜錦魚生飯同和風牛肉飯，再加小食雞軟骨粒，同埋唔少得刺身細拼盤。一開始就比雜錦魚生飯同刺身細拼盤驚訝到，加加埋埋好多片魚生。刺身細拼盤一啲都唔少，總共有時令8款刺身，包括三文魚、油甘魚、吞拿魚、希靈魚、赤貝、甜蝦等等，每款3片。每片都極厚身。刺身全部都好新鮮，顏色都係有光澤，色澤唔會渾濁暗淡，味道十分鮮甜。個人都愛三文魚，有魚油甘香。赤貝爽口，都好正。雜錦魚生飯係大片片刺身，同樣分量十足，仲有蟹子、肉鬆拌飯，$88真係好抵食。和風牛肉飯有從前吉野家嘅味道，有淡淡洋蔥味。雞軟骨粒分量多，一口一啖，粒粒都脆卜卜。有個隱藏醬料係將少少wasabi 加到沙律醬，減少膩感。除咗刺身、日式外賣店，仲係一個少少美食雜貨店，有唔同醬料，仲有韓國大熱嘅牛角包壓脆餅。整體有下次，買壽司刺身仲有8折coupon。…查看更多

作為大西北居民，一早已經聽過「法國小屋」大名。今日難得係元朗學完舞，就買外賣獎勵下自己。小食方面，點咗千層芝士薯片。千層芝士薯片配酸忌廉食唔會膩。一層層薯片切得厚度適中，中間夾著啲芝士，焗得惹味。主菜有唔同pasta，價錢都好實惠。點咗明太子蟹肉意粉同芝士肉醬長尖通粉。意粉本身的質地非常彈牙，煮得岩岩好。醬汁好creamy，而每條意粉都有明太子味。長尖通粉表面呈螺旋狀，可以更好地吸醬。肉醬方面疑似用咗牛肉，所以味道比坊間濃，加埋唔同香料，例如蒜、百里香等，為長尖通粉好香口。最最重要係甜品，必食招牌咸牛油焦糖窩夫。攞到返屋企，啲窩夫仲係暖笠笠，窩夫邊仍保持脆身，相信如果堂食仲脆。窩夫厚身而內軟，有蛋香同咸咸地嘅牛油香，加埋少少焦糖作點綴更口味。窩夫果然Simple is the best。下次黎元朗會堂食encore窩夫! …查看更多

放工肚餓去葵廣醫肚，貪方便同快咁去食車仔麵，估唔到有意外驚喜。車仔麵配料有多達52款，選擇困難症又發作。$52三餸麵，結果再加兩款餸，因為實在樣樣都想食啲。作為食肉獸，點咗五香豬頸肉、豬大腸、牛腩、滷水豆腐同埋菜肉雲吞，配粗麵。其實可以改配腸粉，見對面位女士食腸粉，可惜本人麻麻腸粉。五餸麵好豐富，岩曬極餓嘅我。個人最愛係五香豬頸肉同豆腐。豬頸肉肥瘦適中，食落唔會肥膩或者成口油，口感偏爽口。炸過嘅豆腐再吸滷水汁，好入味，帶少少甜味，唔會死鹹 。豆腐有厚度，咬落夠實在。菜肉雲吞食落新鮮。豬大腸清洗及烹飪處理得好，唔會有內臟味。牛腩嫩，仲有一兩舊牛根。湯底係特製小辣，惹味，但唔夠辣，早知叫辣啲。不過可以加辣菜甫。簡單又滿足嘅一餐，下次黎葵廣除咗掃街仲可以食車仔麵。…查看更多

元朗有幾間收題，今次第一次黎到大馬路附件嘅緣聚。比預期之中有驚喜，有上百款選擇。 第一輪點刺身、壽司呢啲回本重點先。每件刺身都生鮮，厚切有滿足感。火灸壽司雖然得5-6款，但貴精不貴多，火灸脆薯牛肉壽司夠甘香。生蠔亦係回本之選。熱食串燒有驚喜，樣樣都試，變咗個串燒拼盤，有雞軟骨、蜜糖一口腸、慢煮牛舌、免治雞肉、豬頸肉。串燒夠火後，香脆入味。雞軟骨卜卜脆好正，最正係慢煮牛舌串。連阿爸都同意。咬落去嗰陣時，感覺到肉質極嫩。熱食有煮牛舌，比串燒肉質更加軟腍。同時，點咗炒牛柳粒，味道香濃惹味，重洋蔥黑椒味。小食選擇多，有玉子燒、香芋球、薯蓉、炸雞等。最鐘意係蝦多士，中間蝦滑爽口彈牙，外邊煎炸的卜卜脆，口感一流。薯仔沙律賣相好可愛。飲品升級後有酒，亦有特飲，例如抹茶紅豆冰。整體遠超期望，尤其牛舌，有下次！…查看更多

放假喇！同朋友一早訂了枱去到堅尼地城食西餐。一入去，就上餐包。餐包有3款選擇，分別係五殼包、無花果包及意大利香草包。醬料都有兩款，我最愛嘅牛油果醬同香濃嘅蒜蓉牛油。麵包嚟講最鍾意無花果，本身已經有淡淡甜味，唔需要配任何醬。而香草包質地最鬆軟，各有特色。主菜點咗慢煮和牛牛面頰配意式玉米糕，因為想食平時少見嘅意式玉米糕。玉米糕配松露呠酒燒醬，味道剛剛好。原木朋友擔心牛面頰會容易煮得老，口感變嚡。但呢度嘅和牛牛面頰採用慢煮方法，肉質嫩滑，用刀輕輕一切就可以。味道上，慢煮亦有助鎖起肉汁，和牛牛味突出。另一主菜係黑醋醬鮮拆空運法國膏蟹意大利飯，朋友試咁一口，就已經大讚，蟹味鮮甜，令risotto醬生色不少。黑醋味用黎吊味，更突出添海鮮味。意大利飯煮得正宗，外表軟滑但中心仍保留些微硬度。星期六晚要飲返杯cocktail。Cocktail選擇都唔少，仲好別出心裁。個人鍾意sweet and sour，所以點咗梅花十三， 用vodka底，再加梅、柑橘、熱情果等。飲落比平時梅酒更有層次，有淡淡柑嘅果酸味，好易入口。…查看更多

新年前夕，當然要同BFF去食餐omakase開年。茶碗蒸好似布丁咁滑嫩，雞蛋同高湯比例剛好。高湯有淡淡海鮮鮮甜味，茶碗蒸內藏原隻大蝦。平時少食鱈魚白子，難得時令有機會一試。白子用鹽油水焯至半生熟，上面配上蘿蔔蓉。調味用上日本辣椒同醋，能辟去魚腥的味道，更能為白子提鮮。 池魚以煙燻處理，令表面有油脂，但食落唔會膩。肉質嫩滑，味道甘甜。長崎蠔肉質creamy，細膩而飽滿。配上橘子jelly，更突顯蠔味道清甜，冇金屬味。根據店員介紹磯煮鮑魚花了兩日時間用用醬汁及昆布炆，十分入味。另外設有鮑魚醬，味道偏甜，同單食鮑魚係唔同風味。由於用慢火煮，肉質仍保持鮮嫩彈牙。握壽司有銀雪魚、鮮蝦同拖羅。店員細心建議我地依次序食，由淡去到濃味。 醋鯖魚壽司賣相有心思，經輕輕燒後，用白昆布包上。右口魚邊手卷極有油甘味，配上櫻花蝦，味道有層次。馬糞海膽鮮甜而沒有澀味，果然係大海嘅味道。一口食完整而飽滿嘅海膽好滿足。午餐仲包括有烤青魚、烏冬同埋日式甜品。美食一輪接一輪。Omakase好似開盲盒咁，令一餐嘅期待感大增，過程嘅享受確實一流。…查看更多

天氣凍，上堂前食碗熱辣辣嘅世一花甲粉。花甲粉嘅主角當然係花甲，有滿滿花甲，差唔多一打。鮮嫩的花甲完全沒有任何腥味，好鮮肥。粉絲吸曬花甲同湯嘅精華。湯底係微麻辣的增添了一絲刺激感，冬天食最正，令人回味無窮。花甲粉仲加入了新鮮的蔬菜同豆腐，增添了口感的層次。果然係世一。炸魷魚鬚有驚喜，魷魚炸完都係大大條，好完整，魷魚夠厚身。炸得香口乾脆，食落外脆內彈牙。上面有少少辣粉，食落更加惹味。如果配啤酒就好。麻辣花雕牛肉球厚實足料，唔會食落成舊粉。麻辣辣度同樣有得調，小辣唔係太辣，下次可以進取啲。…查看更多

假日chill一chill，同朋友去荃灣食飯兼整蛋糕。咁岩見到愉景新城有烘焙店，一日有幾班，預岩有搗蛋大怪獸蛋糕班，係簡單嘅忌廉夾心海錦蛋糕。製作過程唔繁複，工作人員一早準備好材料一步一步教我哋點製造。過程中亦都會教授一啲整蛋糕小技巧，尤其適合好似我位朋友嘅新手。蛋糕有自由創作嘅部份，可以拼貼怪獸嘅眼耳口鼻，同埋自行選擇怪獸頭髮色同髮形狀。抹忌廉最好玩，亦係最巧功夫，好難咁平均抹。一步步見到個蛋糕形成有滿足感。除咗係因為自己做，客觀黎講個蛋糕都好好味，個雞蛋蛋糕部分係香濃，有空氣感得來有質感。有得食有得玩真好。…查看更多