sandy_meow的個人專頁

今日黎到觀塘順便係呢區搵食，話曬觀塘有好多隱藏小店！呢間係小巴站附近，成條街都好旺又多食肆，呢間既裝修用左希臘式設計，成間都係藍同白，仲有海邊同藍白小屋，都係希臘Santorini 既景色！晚市set dinner有唔少選擇，豐儉由人，我地想試肉眼扒或燒春雞，可惜都已經賣曬，無緣食到，只好左2份意粉。全部set都跟餐湯同沙律，今日既湯係粟米忌廉湯，飲返D野暖下身先～沙律幾有心思，有煙三文魚、沙律菜、藜麥等等，仲有水果梨片，加埋vinegar 非常清新！配搭多，味道無咁寡！第一個意粉係拿破崙Salami 鮮蝦意粉，味道唔錯，無蕃茄汁咁酸又夠掛麵！呢個係Parma Ham, 黑松露意大利雲吞配香草蒜蓉多士，呢個比較出色，意大利雲吞既皮比較有口感，有手造既質感，煮得啱啱好，有al dente 感覺，而且配上不多不少又富有蛋香既忌廉汁，仲有好香既黑松露味，蘆筍又夠清爽，有無Parma Ham都咁好食！多士都夠脆！Set包一杯餐飲，飲朱古力、好立克、檸蜜等等熱飲都要加$8/杯，平時呢D普通飲品都會包埋～另外如果有得加錢食甜品就更好喇！如果有機會可以試到其他肉類既主菜就會好D~因爲只係食過意粉類，好難全面評論各方面既味道，但就呢2款意粉，意大利雲吞Ravioli 可以一試！ 環境都幾舒服，多D支持本地小店！…查看更多

呢間bookmark左好耐，終於試到了！原來就係丹麥餅店後面，店舖好細，一到飯市就要排隊，可能我8點半先到，排隊唔算耐，大概20分鐘就有檯，門口就有大大個餐牌可諗定食乜！故名思義，呢度係炸豬扒既專門店，仲有幾款豬扒以外既選擇～除左飯之外，仲可以揀撈麵！最近新推出黃金鹹蛋燕麥豬扒，仲揀左肉燥汁豬扒撈粗麵！豬扒一黎到！好大塊呀！肉汁流緊出黎！非常厚切，並唔係太人工既鬆化，啱啱炸起更香口送飯！而撈粗麵既汁好濃，有炸蒜撈埋更香！不過個人覺得炸豬扒肉燥汁更加襯白飯！因為撈麵已有調味會顯得一齊食味道略鹹～而個鹹蛋燕麥豬扒係分開上，另外加左煎蛋，豬扒依然咁大份！燕麥有好多，而鹹蛋調到太甜，無錯，鹹蛋略為甜左D，不過加左燕麥多左口感，又無咁油膩，最好就係開心share加埋煎蛋流出黎既蛋汁簡直一絕🤤半夜諗起肚仔會打鼓辣汁海蜇份量都唔少，不過又係味道濃左D🙈好鐘意呢度既厚切豬扒！如果第一次食都係食返招牌炸豬扒配飯好D！銅鑼灣難得既平價有heart小店～預左要排長龍…查看更多

幾個月前係深圳食過好好味又好出名既酸菜魚後，開始有D掛住酸菜魚果種味道，就搵到呢間新開既廚十三！呢幢大廈都有唔少餐廳，而呢間廚十三一入去都有格調，有好多黑白懷舊既漫畫但插入酸菜魚既內容，風格非常熟悉！係國內食過類似既你懂的😏唔講咁多，我地叫左一份大份既酸菜魚，有2條鱸魚，適合3-4人食，最多可以加3款配件，揀左藕片、金菇、粉絲！等左10分鐘左右就黎喇！超！級！大！份！食開酸菜魚、水煮魚都係用咁大個碗，但呢個連份量都好大！真心唔係講笑！連配件都份量足！賣相非常吸引，睇到熱辣辣既辣椒花椒藤椒向你揮手，上面仲有菊花瓣，見到都食慾大增！魚片係爐魚，非常嫩滑！絕大部分都無骨，但食到有一兩舊有幼骨，所以都係要小心D食～2條魚既份量真係幾多，金菇唔算多但粉絲就最多，又索到湯汁既味！其實味道唔算好辣，好有麻香，食多幾舊個口開始有麻既感覺，魚都係要趁熱同飯一齊食！呢個菜叫隔壁小孩X哭了（唔識寫😂），其實即係椰菜煲，一上檯椰菜絲係生既，waiter會係檯上用gas爐用煲仔即場煮熟，有個漏斗計時煮3分鐘食得！味道都幾清，有少少蠟肉調味，少油既煮法，可以去油膩感！酥炸無臉男，即係酥炸肉條，即刻炸起非常香口！炸面唔厚，少少脆唔過硬，香口野有邊個唔鐘意！2-3個人食啱啱好～飲品係同waiter落單，試左酸梅汁同王老吉，酸梅汁好足料味道夠酸夠濃！其實呢個份量3個人share更適合！價錢方面之前望過，已有心理準備一定貴少少，不過佢既酸菜魚係香港算好正宗，味道不錯，慳返D時間留返係香港食都絕對OK! …查看更多

放工後既星期二，又同男朋友約會，西環、西營盤高街都係平時候鐘意去既地方，覺得寧靜D、無咁逼，而今晚揀左西灣河，先知呢度有個咁靚既碼頭！渡輪碼頭非常懷舊，仲有營運去鯉魚門、觀塘、同埋少見既東龍州！碼頭一帶都有唔少西餐廳面向海濱長廊，但呢間埠先係真正全視角海景，因為佢正正係碼頭旁邊，無隔開一條馬路，望住無敵海景之餘仲見到渡輪埋岸落船！望住美景，邊飲啤酒邊食串燒都係唔錯既選擇，埠主打食日本串燒，食完可以叫飯糰/ 烏冬等等作結尾～我地叫左12串串燒，覺得啱啱好，可能我地都比較大食😂 串燒逐一燒好就會送上黎，餐廳好舒服，安排每檯有熱石頭既燒烤架，作用係將送上既每一串串燒都保溫，唔會咁快就凍，幾細心既安排！仲提供店內使用既海藻鹽作為調味！首先送上既蘆筍豚肉卷、雞皮、京都絹豆腐，呢3串都燒得好好，用燒得少少脆身既豚肉包住嫩綠既蘆筍！而雞皮我平時絕對唔會叫，怕成口都係油，今次搏下點知佢燒得咁掂！雞皮燒得薯片咁脆，一咬就咔咔聲！半滴油都無！超正～送酒一流！👍🏻 燒京都絹豆腐係店員推介，佢話燒到外皮酥脆好好食，我都覺得咁軟身既豆腐可以串起仲燒得好之餘仲要推介，咁要試試啦！點知真係好驚喜！外皮非常之脆，應該搽左醬油去燒，而裡面仲保留到咁滑！之後有雞軟骨、月見紫蘇免治雞肉棒、大蔥豬面頰，最特別既係雞肉棒，跟生蛋黃混合醬油作沾醬，免治雞肉做得好好，同出面食開唔同，肉質更札實，啖啖都係無添加雞肉，而雞肉更加入紫蘇葉絲，大大增加香氣！加蛋液入口更滑，算唔算係親子雞棒？之後係串燒必點既燒雞翼～人人自細都鐘意食架啦～雞翼處理得好好，仲保留肉汁唔乾，應該有醃過，連雞翼骨都燒得好香！大啡菇又係勁juicy，正～仲有日式燒肉必備牛舌！呢度牛舌一串3件勁厚切，唔係一般既薄薄幾片，外香內嫩，燒到裡面勁juicy！鰻魚控忍唔住叫燒鰻魚，啖啖肉無骨，少少幼骨可以入口的，連埋皮又有多個口感，鰻魚既魚油加燒功令鰻魚燒得好靚，肥美得黎又有鰻魚既彈性，簡單加海藻鹽調味已經好好食，同樣係鰻魚控既你一定要點！而糖心鵪鶉蛋外層加左醬油，所以絕對夠味！裡面超級糖心，好味！鵪鶉蛋更細粒，覺得更滋味！最後成全愛食蟹之人，叫左松葉蟹鍋燒烏冬，用舊式日本煮鍋，烏冬係稻庭，彈牙，鐘意佢清清地，松葉蟹啖啖肉，最後食返熱辣辣既烏冬真係好舒服！成晚飲住酒，食下串燒，望下海景，飯後行下海濱長廊，為忙碌既生活減下壓，就算唔出走旅行都可以有同樣享受！加上呢度日本師傅燒烤功力了得，有日本人都黎呢度飲清酒食串燒，絕對值得黎試！…查看更多

星期六下午，又係做完運動但又想舒舒服服渡過週末，搵左呢間附近又新開既sushi roll，貪佢清新得黎又健康飽肚！舖面光猛，裡面座位闊落企理，飲品櫃行入少少就係cashier點餐既地方，飲品都係日本運到既！除左有固定既壽司卷款式，仲可以自選所有肉類、蔬菜、副料、Topping、醬汁，自由揀自己想食既壽司卷！當然，呢度主打係外國式既大壽司卷，一份4件，每件都有掌心咁大，一定夠飽！另外仲有正常size壽司卷、一客3件壽司，而雪櫃仲有魚生沙津、壽司便當等等，可以 grap and go 夠曬方便！我地揀左6號，感覺唔錯既Sea Monster，佢既搭配我地每一款都好鐘意，除左炸蝦、蟹棒之外，Topping用左櫻花蝦、炸蒜片、紫薯粉，賣相非常吸睛！而House Special Sauce味道酸甜，食得清爽又開胃👍🏻相反，自選既大壽司卷相對上外型無佢果D款式咁出眾😂，我揀左鰻魚、蘆筍、沙律菜、腐皮、牛油果、三色芝蔴、Wasabi Mayo，整體感覺更清新輕怡，完全無Sea Monster咁豐富啖啖肉，可能我揀左腐皮原來唔係太夾😂不過材料都非常新鮮，尤其牛油果、沙律菜同蘆筍，都食到原本既味。Wasabi Mayo無想像中咁有Wasabi味，感覺似食Mayonnaise Light版，如果wasabi味多dd，應該整體味道更明顯！跟住有一份8件正常size 既壽司卷，呢個係9號Black Magma，裡面有吞拿魚蓉，上面鋪左帶子粒同蟹子，襯黑芝蔴汁，呢款唔屬於濃味但又有豐富既海鮮，如果鐘意食魚生實鐘意，黑芝蔴汁亦做得幾出色，唔會搶左帶子既味！之後仲有11號Philadelphia，唔多講，3大賣點：牛油果、三文魚、cream cheese😍 三樣我都好鐘意食，相信有好多人都鐘意食呢款，樣樣都咁creamy！實物賣相同圖片一模一樣架！見到d 沙律醬同牛油果已經急不及待想試！三文魚就好肥好香！呢個一定係邪惡之選！正正正！每碟壽司卷都有幾塊醃蘿蔔，可以清一清口腔，好清爽又脆！壽司卷用牛油紙墊底先上碟，又有提供獨立豉汁跟wasabi碟，香港確實好少呢個形式既快餐店，係度做野既上班族唔係淨得中式港式快餐，仲可以揀咁健康既日式快餐！唔使每日食茶餐廳或者捱貴野～當我地都覺得呢個idea係外國普遍都見到，wrap & go 大大件sushi roll 健康lunch box係外國各地都好流行，問下問下原來老闆真係係加拿大食慣，特登引入返黎香港！中環仲可以賣到呢個價錢，其實唔容易，如果開晏少少，有時晚餐諗唔到食乜，選擇黎呢度食都唔錯！***個人介紹揀推薦既壽司卷固定款式，佢地既配搭做得好好，每款都有佢既特色，又適合有選擇困難症既人士😂…查看更多

做完運動，近近地行過去佐敦食個簡單晚餐，男朋友話佢之前試過唔錯帶我去試下呢間熊拉麵呢條街比較多食肆，競爭自然大，不過呢頭又好似無拉麵，呢間睇門口都知正宗日本拉麵，內裡都同日本街上食到既拉麵店完全一樣！門口仲掛住個大燈籠，遠處都睇見！最主要分3款湯底：豬骨湯、豬骨魚介湯、赤湯（辣），我比較喜歡單純豬骨湯唔加任何野，比較品嚐到本身湯底既豬骨湯原味，而佢試期間限定既咖哩豚骨拉麵！我果碗拉麵加左糖心蛋，唔會好大碗，份量對我黎講啱啱好！湯帶有膠質，但唔會過分地厚同油膩，啖曬成碗都唔覺滯，唔錯！拉麵就用幼身拉麵，揀左硬身麵底但黎到都係正常較身，好彩唔會太淋都啱口感！叉燒有火灸過，帶點灸燒香，肥瘦度幾好，唔係成啖肥肉！糖心蛋係流心蛋黃既，有蛋香！好食！佢果碗咖哩拉麵相對上濃味好多，咖哩湯汁好濃身，加上粗身拉麵掛到好多湯，配料有比較少見既蘿蔔絲同蕃茄粒，應該係配合夏天想加D清爽感～本身叫左替玉劵（加麵底），但又叫左一客煎餃子怕最後麵係食唔曬，都係退左佢，好彩呢張替玉劵如果客人覺得飽，可以退左佢！超級有彈性！拉麵入面無筍，要食可以加配呢客自家製煎餃子好香口，煎得靚又大隻，一客5隻要2個人分享先得！另外，檯上面既調味料當中有醃菜同辣芽菜，辣芽菜好好味！我地喪食😂平食得黎又唔錯既選擇！食到最尾，飲曬D湯，就見到熊仔食住拉麵咁多謝你！非常隱藏😉…查看更多

好耐食返餐好，應該及時對自己好D！有朋友介紹呢間日本料理，暫時未去日本旅行都止住渴先！位置有D唔起眼，係海港城對面Apple Store旁邊有入口搭電梯，係一幢玩具公司既大廈裡面，上5樓仲要再轉電梯，轉𨋢前會見到好大隻忍者龜！男朋友表示好靚呀！坐低飲杯熱茶，就開始我地晚餐既前菜，係日本凍蕃茄，咪以為都係蕃茄啫，好平凡，但原來係錯既！一食之下，蕃茄超甜！原來蕃茄屬於水果類唔屬於蔬菜，不過除非放入沙律或三文治，否則都好少係咁生食蕃茄，呢個就唔同！完全無草腥味無丁點酸味，第一次感覺到係食緊生果既味道！好正呀！可唔可以食多份😂開完個胃，黎呢度梗係要食刺身！呢個特上雜錦刺身，7款刺身，每款都有3件，所以3個人食先唔會爭😂呢度既深海池魚刺身好出色，味道好鮮味之餘，魚質非常有彈性而無筋！牡丹蝦亦非一般貨色，入口非常重膠質，而且蝦味好濃！諗返又回味🤤當中吞拿魚腩超級肥美，肥油甘香令口腔徘徊不散！赤貝口感好爽，證明新鮮度高，而油甘魚都唔錯，海膽尚算甜只係唔及日本即時食到咁新鮮，但已經算係咁～牡丹蝦個頭超大，諗起去日本食壽司，師傅會炸起蝦頭不另收費，即刻變到好香口又唔浪費！如果蝦頭都係炸起變做一個小食就更好喇跟住有季節性既京都櫻花蝦蔬菜餅，食過先知呢度炸物做得幾唔錯，一份有4件，炸得輕盈完全唔油膩，唔同蔬菜有好多口感，仲見到有細細隻既櫻花蝦，沾上有蘿蔔泥既天婦羅汁，口感上好滿足！呢個新出品仲未係餐牌上，係炸鰻魚，對於鰻魚控既我表示非常厚切兼大件！旁邊少許既辣味蘿蔔泥改變左呢件鰻魚既調味，肉質軟身無骨，完全啖啖肉！調味清淡更突出佢既魚味，食慣鰻魚肥美多汁，呢個係新嘗試！緊接有呢碟好惹味既麵豉黑毛豬！睇賣相都見到燒得好香！首先用既部分帶少少肥，燒起黎好正，黑毛豬肉好嫩有肉甜味，加上表面應該搽左醬汁去燒，甜甜地，真係好好食！大大力推介！叫左梅酒梳打，梗係要叫日常送酒菜：炸雞！依日式炸雞既做法，有清爽既椰菜絲同沙律醬，椰菜絲再多D更好！炸雞好脆身！最後叫味噌湯拉麵作結，味噌湯底果然好濃，好濃味果位表示唔錯😂好大份呀，食到我地捧住個肚！埋單前送上抹茶味同荔枝味雪糕，味道唔差！應濃則濃，應清香則清香～由入座到走人都見到幾班日本上班族係榻榻米房飲酒傾計，餐廳既員工都好專業又友善，感覺真係似去左日本既餐廳食飯！😂…查看更多

呢間澳門仔本身食小菜既，不過都有打邊爐！見佢有個放題任食，價錢唔貴，所以一於試下佢！任食打邊爐有3個價位，最平$148有交易，叫$288有海鮮拼盤+安格斯牛！首先坐低食2款小食先，有涼拌青瓜同雲耳，呢度既招牌係花膠雞鍋，當然要試試啦！呢度既煲係用鑊上，睇黎小菜都係走有鑊氣路線😂等左一陣先上場，再等佢滾起就飲得！當然要飲頭啖湯，湯係濃濃既奶白色，面仲有少少黃色，而半隻雞係黃油雞。配上紅棗、杞子同埋主角花膠！頭啖湯果然非常之濃！膠質好重，雞湯味好濃！建議趁加湯前可狂飲補補佢！出面有雪糕、醬料同飲品任拎，飲品就係日式放題既選擇，仲有凍菊花蜜同柚子蜜，不過味道偏甜，反而啤酒值得飲，連韓國Hite都有仲任飲！唔係唔飲呀？食物方面，安格斯牛肉果然靚D，肉質幾滑唔錯，2人份量份量啱啱好～海鮮拼盤有8款，當中有蠔有鮑魚，好似係放題刺身咁！鮑魚細隻不過都幾彈！蜆又係太細粒，熟左之後係鍋裡面好難搵，其實無叫海鮮拼盤，一般任食都可以叫呢個蜆😅而拼盤中既海蝦比一般任食大隻好多同埋重蝦味好多！比較下就知！不過2款都好食！而其他任叫既配料都試左好多款，連鮮淮山、脆肉鯇、廣島蠔、牛坑腩、稻庭烏冬、花膠、鮮鵝腸、冰豆腐、墨魚滑蝦滑通通都係大部分任食無得叫既野！正喎！所以我都叫返份花膠狂補返先！配料都好味，蔬菜類都新鮮！最重要既係，我地發現呢度有得睇波！一班朋友烚下烚下，飲住啤酒咁睇波係咪好正先！有得睇波又係旺區任食配料又多～我即刻叫男朋友睇波可以再翻兜😂…查看更多

去過天后搵食，原來再行過D有呢間新既打邊爐，叫得‘’頭啖湯‘’應該飲得下，呢度格局似食小菜，有卡位，鋪位不算大。呢度湯底有4款：百菌鍋、椰子雞煲、重慶麻辣雞煲、麵包蟹鮮茄鍋，最吸引既係麵包蟹鮮茄鍋，話曬有隻蟹！不過我地只係兩個人，都係試椰子雞煲（半隻）好喇！呢個椰子雞煲好多料，湯呈奶白色，除左雜菌、雲耳之外，仲有半隻新鮮雞。等十分鐘唔使滾起食得雞喇！果然新鮮雞，無雪藏味肉質滑，係黃油雞！至於湯底，一舊椰子都搵唔到係煲入面，但係椰味十分香濃！呢種椰子香唔係屋企煲椰子雞湯既味，仲要更清甜更鮮甜！堅正！即使再加湯都絕對唔會溝淡個湯，椰子既味食到最後都咁濃！好正呀！👍🏻喪飲左好多碗先肯收手！火鍋料叫左白魚蛋、雙拼桂花蚌+珊瑚蚌、墨魚滑、西班牙黑豚肉片、水餃、羽衣甘藍。潮州白魚蛋好食，彈牙得黎無咁假，有魚味！而桂花蚌珊瑚蚌熟左之後縮到好細舊，今日突然想食下，勝在有雙拼可以試多樣！而墨魚滑就好好食，手打既有墨魚味，自己刮下刮下都有唔少！水餃唔係手包，係冷藏餃子，所以味道就好似灣仔碼頭果D咁樣，味道正常，如果人手包會更好食。而黑豚肉片就非常之得！肉質嫩滑無渣！非常清爽唔肥膩！唔係間間既黑豚肉片都有呢個水準！算係近期試過覺得肉味最甜最滑既！羽衣甘籃就好少地方有，自己都好少接觸，只係知佢有好高營養價值，係super food，口感都幾唔錯，容易入口唔會有草青味～可以一試！飲品叫左綜合水果茶，好大杯好抵飲！味道仲要好味！裡面有好多唔同款既水果，好清新，最啱打邊爐唔使叫咁多杯飲品！除左推介黑豚肉片、羽衣甘籃、白魚蛋同埋綜合水果茶之外，其實最重要果樣係椰子雞煲！嫩滑既雞肉配搭下，椰子湯底真係好好好好好味！忍唔住問左究竟點解無椰子肉係煲入面但咁香椰子味，原來師傅用左3種不同既椰子加豬骨熬幾粒鐘熬左個湯底先，唔怪得咁濃！就算之後不停加湯都保持咁濃味！因為加湯就係加椰子豬骨湯！所以絕對推介椰子雞煲！當然雞都好好食！兩者結合將味道昇華😍唔使上深圳試啦其實～…查看更多

今次又黎到觀塘搵食，有人成日話想食pizza但香港部分餐廳都做得唔夠好食或偏向港式口味，pizza連鎖店我已經有接近3年無食過，唯有搵下仲有無其他經濟少少又正宗既pizza啦！呢位Mario先生好易搵，就係駝駱漆大廈！裝飾係新式快餐店但間格幾chill，食下pizza飲下酒都幾正！晚餐時段有散叫意粉、沙律、小食或2人/ 4-6人 combo set，另外有自制印度咖哩及naan，除左一般汽水仲有好多唔同飲品、啤酒、紅酒白酒，環境都唔錯！Combo set包左一個14吋薄餅、一個小食（可揀各款沙律/ 意粉/ 雞翼）、2罐汽水，老實講，如果揀意粉既話，呢個set絕對夠3個人食！因為pizza幾大份架！套餐價錢係$188至$228之間，視乎揀邊款pizza，好抵食呀！3個人share都係平均$70左右咋！味道又如何呢？首先有Cesar Salad，裡面有烚蛋、煙肉，若煙肉脆既話會更正，生菜都幾大份，醬汁係分開既，上面刨左Parmesan cheese，作為健康既頭盤先。等左10分鐘主角Italian Sausage Pizza出場了！ 焗得外皮顏色好靚！配料有好多，有意式腸、燈籠椒、mozzarella cheese同埋4款菇！小心熱親，一拎起食已經燙親手指！咬落好好味！好食到少有地食左3大件！pizza皮有彈性而厚度唔過厚又唔係薄脆一陣風，種種配料既口感加上溶溶地既芝士會食到漏汁！呢度既pizza 好方便同朋友happy share，有個紙兜比你裝住，食得更方便！意式腸鋪滿每個角落，呢款腸唔係平時食開既香腸切開一片片，而係好似肉碎質地咁，用左好多超香既香料調味，食落好濃味，搵到有茴香籽，唔怪得咁重香料味！稍有偏鹹但好彩其他蔬菜中和返～4款菇我食到好似係秀珍菇、蘑菇、茶樹菇、杏鮑菇，原來除左磨菇，其他菇放係pizza都同樣咁夾！佢既pizza無用過分大量既蕃茄膏鋪底，檯面有芝士粉及辣椒粉自行添加，落左辣椒粉好惹味，都幾辣下！食辣既要試下加辣椒粉！為食既我地又點會就咁滿足？忍唔住再黎多個小食雞翼，$65有8隻好抵食！好入味又多肉，不過同我地想像中有D唔同，以為係煎/炸雞翼, 呢款煮雞翼偏向中式，如果外皮脆身相信會更吸引！相信食得雞翼就預左係邪惡🙈雖然位於觀塘係幾偏僻，不過佢既pizza確實令人幾回味！尤其佢焗得外皮脆脆地又真係用pizza麵粉，唔會偏向香港口味似食麵包或者加芝心批，相信大廚一定有多年做正宗薄餅既經驗，可以拿捏焗既火候剛剛好！比部分西餐廳做得正宗得多～即使網上外賣平台叫外賣值得試呢間既薄餅！呢度仲照顧埋附近上班人士有lunch set，仲要tea time既pizza買一送一會唔會太抵！？…查看更多

週末食左幾餐豐富既，search之下搵到呢個慢活好地方，原來位於尖沙咀既中心但似死城既首都廣場，只係上1層電梯就見到，呢間cafe大到佔左半層舖位！由於人流好少，感覺好舒服悠閒，有靚靚既咖啡工作高檯，又有豆豆梳化塌塌米，周圍有裝飾有黑板又有好多旅遊書慢慢睇！呢度採用自助服務，檯台有大屏幕出示menu，食物種類唔算多，輕食、意粉、甜品都有，我地叫左2款食物、1款飲品、1款甜品坐低慢慢嘆！唔坐塌塌米既話亦有4人座位，同樣有空間感，見大家似乎坐左好幾個鐘～坐塌塌米需要先除鞋，裡面有postcard-crossing既裝飾，即係牆上貼左來自不同國家既人寄黎既postcard，作為文化交流。睇到唔同國家特色景點及文字既postcard，感覺好親切好想去果D國家！食物準備好後出去拎，呢個係車打芝士火腿牛角包配乳酪沙律，因為鬆餅無曬，個牛角包焗得熱熱地，估唔到咁鬆脆！尤其個面真係好香脆，好有牛油香卻不油膩，而且口感輕盈！配上溶左既芝士及唔係火腿炒蛋既火腿而係西班牙火腿咁食，好香口！沙律菜好多，以為用左一般既vinegar原來唔係，呢個dressing係莓味既醋，少少酸又有果味，唔錯！乳酪比較酸，口感豐富有穀麥片及提子乾！呢個餐都幾多唔同口感！飲品smoothie叫小確幸，好清新既名，飲落都好清新，裡面混合左士多啤梨及香蕉，士多啤梨味唔算太突出，不過落左好少糖。味道好自然無落人工野，飲得更健康。而呢個係Carbonara，估唔到賣相咁靚！聞到好香，食落味道亦好濃芝士味，用既係扁意粉，份量適中！上面既配料亦炒得好好，食到蘑菇、洋蔥既口感，煙肉及芝士碎都比得好多！抵食之選！大家係呢度都好自律，用完餐自行清理放去手推車上，而且坐得好舒服，睇下旅遊書、彈下吉他，咁就坐左2個鐘！再食埋呢個心太軟配Movenpick雲呢拿雪糕，朱古力夠濃滑，仲要配上Movenpick好正！好少文青cafe咁注重食物味道，通常食物飲品都比一般餐廳爭少少，但呢度真係意想不到幾好食，仲要晚上8:30後只設低消一杯飲品，可以自帶食物坐幾耐都得！終於搵到好地方悠閒咁放空喇！最適合遲D plan去旅行既資料！建議若果背景音樂細聲DD就更舒服～呢度用既餐具全部都係塑膠即棄，若支持環保，杯、碟、刀叉都轉用再用既物料就更好了😊…查看更多

2年前我寫左一篇食評介紹小酒窩，事源朋友介紹我去食之後發現真係又抵食又好味，至今日同樣黎到佐敦搵到呢間佢既分身。老闆話佢不嬲係小酒窩做廚房，呢幾年開多一間叫Seasons Restaurant, 地方無小酒窩咁格攝，地方更寬敞更新淨更整潔。去過小酒窩既都知佢地安排長檯逼得好埋，同其他人搭檯之餘其他人行出行入都要起身讓位先得，呢點老實講我比較在意，所以每次提議呢間餐廳我都會提醒對方環境一般，Seasons似乎有改善呢個問題！一如以往，一坐低有胡椒薄脆配薄荷醬，打開menu發現比以前多左食物可以揀，特別係多左尼泊爾菜同印度菜！我地都鐘意試異國菜式，當然比呢D菜式吸引左！Tandoori Chicken雖然推薦不過對我地黎講唔夠特別，叫左Sekuwa 尼泊爾烤肉，黎左比想像中細碟，原來尼泊爾人當呢個只係小食，一般送啤酒既snacks, 果然唔夠特我地攝牙lar😂 只能作開胃菜！不過醬汁確實有尼泊爾色彩，係比較勁既辣椒醬汁，辣得好過癮！叫左杯Seasons Breeze，諗住睇個名應該係signature drink，價錢唔貴，飲落似smoothie，裡面有芒果及藍莓，可惜2款果味唔突出，唔太飲得出，而且顏色呈咖啡色，唔睇仲以為係朱古力奶昔。意粉果頁多左幾款口味，又多左risotto，口味似乎仲要幾特別！不過上次食佢既Aglio-oilo印象難忘，所以risotto都係留返下次試！呢款Aglio-oilo叫香蒜辣椒蝦油大蒜意粉，味道好清，有少少汁裡面有簡單既酒味、香蒜味、蝦味，但就唔覺有辣椒味，如果有少少咁多辣就更惹味，因為Aglio-oilo 本身係應該炒至少少乾身同惹味！蝦好大隻，都有好多，好爽口，不過同之前既感覺似乎爭少少！但係意粉仲係煮得好彈牙口感啱啱好！好欣賞佢地每次都好好控制意粉既軟硬度。當然有必叫既Barbecued Baby Back Ribs! 因為呢度既半份已經等於出面既一份都只係$148！依舊都係用心型碟，伴少少沙律菜同啱啱炸起既薯角，佢既薯角因爲好好食好香脆，得幾舊吊住癮先！半份豬助骨大約有8條骨，超大份，肉唔肥，自製燒烤醬幾濃又入味，簡直係抵食之選！留意到呢度不嬲飲水係買支裝水，而家細心左提供埋免費既一杯杯水！👍🏻送小食之餘仲要無加一服務費，服務都係咁細心又親切，呢度都仲係咁抵食！由於menu太多菜式，下次我地會食Salad同Pizza! 呢2樣都係大份抵食又好味！最後送上shooter cocktail作結，味道清新，今次係Malibu + 菠蘿汁～生果味既甜，正！…查看更多

之前都有講過去過呢間新泰既另一間分店撐檯腳，其實我好少再打多一篇食評，因為已經介紹過，但見手機有相係度，我唔介意同大家推介下呢間位於港島區、環境舒服唔趕急而價錢合理既泰菜。一如以往，我地2個人安排左卡位比我地，呢間係盧押道要上樓梯，地方好大檯亦好多，起碼坐得梳落舒服又無限時，呢樣好重要！menu唔多影喇，食既都係大家熟悉既食物，網上都搵到menu，我地叫左6串沙爹串燒、細既冬蔭公湯（每次食泰菜必叫）、生菜包、蝦醬炒飯。對於2個人份量都幾豐富！等左一陣首先黎既係沙爹串燒，有豬肉、牛肉、雞肉可以揀，或者各肉類2串又得，我唔食牛肉所以只揀豬肉及雞肉，啱啱燒起香噴噴，每串都啖啖肉配上濃濃花生味既沙爹汁黎食幾唔錯，沙爹汁偏少少甜，唔辣既。雞肉都不錯，但可惜豬肉廚師今次落得略多鬆肉粉，食落口感唔un但少左豬肉既香味同纖維質感。椰青夠大隻又清甜，比起上次去馬來西亞叫左椰青甜度差好遠，呢個有好天然既椰子甜味！生菜包有得揀豬肉或雞肉，我地揀雞肉，有得揀真係幾好，食過有D生菜包既豬肉唔夠碎又多肥膏，呢個又大份，又低脂肪，調味幾好，個人鐘意食到尾有少少青檸既酸，而且生菜夠新鮮夠多，大概有10片，雖然肉碎有好多，唯有包到爆餡！呢個係細既冬蔭公，比我之前飲既好似仲細份D，更適合1人享用，2個人分都不到大半碗，但勝在少辣油同埋夠曬酸辣！香料好足，比出面既稍為更酸而且有一大隻鮮蝦而唔係急凍蝦仁。呢個泰式蝦醬炒飯原來有泰式臘腸、肉鬆、腰果仁，同埋炒蛋放係面，都幾蛋多料又好大份！我地2個人好難先消滅到呢個飯，炒飯唔會好油，而且幾香口，泰式臘腸幾得意，食到同香港臘腸有D似但又無玫瑰露既酒味，不過臘腸配蝦醬炒飯就有D太濃味，個人感覺食多幾啖就鹹左D~我地好失敗，次次食都無辦法留肚食到芒果糯米飯，事關好大份，要留好多位先食到！2個人食飯想試多D野都唔得，唯有又留返下次😂…查看更多

呢幢大廈一向都多野食，事隔幾年有啲餐廳都轉左手，之前都食過呢幢既麻辣火鍋、海鮮火鍋，就留意到多左間四川麻辣菜，一睇就知啱口味！所以唔爭在擇日黎試埋呢間！呢度既格局好中式菜館，招牌用毛筆字題字、圓檯、瓷碟茶壺等等，連個名叫做四姐川菜！呢度劃一收費$340一位，按人頭而分配可以叫幾多款涼菜及熱菜，最後仲會炒一碟清菜，越多人就叫到越多菜，我地只得2個人，都可以叫到2款涼菜+3款熱菜，再加一碟清菜，都可以試到好多野！涼菜選擇當中都有好多辣既小食好似唔錯，例如口水雞、夫妻肺片、青椒皮蛋等等，D辣椒既味加紅油應該好正，不過佢好多野都唔食，我地就揀左蒜泥白肉仲有招牌四川涼麵，都好大份呀！見好多檯都叫左呢款四川涼麵，相信應該唔錯，頂部鋪左一堆辣調味醬，加左雪菜、好多蔥、醋等等，拌好後食落味道好開胃！麵屬於幼蛋麵咁既口感，唔會太淋，調味非常襯，麻辣得黎好香口，又有配料既咬口，好抵食！係比較辣既涼菜之一！呢度蒜泥白肉比其他食店用得更多紅油更少蒜泥，但咁樣更增添佢既香氣！白肉唔肥，切得好薄更加吸收到醬汁既味，咪睇佢呢個汁好紅，其實係最唔辣果碟，少少麻香又有D甜甜地，有蒜香亦令到白肉好香口。跟住到3款小菜，雲雲選擇當中揀左鮑菇炒片片鴨、招牌重慶水煮魚、重慶辣子蝦，其實仲有好多款都想試，事關食辣真係好正！杏鮑菇炒得好爽，而片片鴨就用左鴨胸走鴨皮，啖啖肉，肉質唔會乾唔會梅，最怕食到鴨胸食梅得太過份，呢個鴨胸你真係感覺食緊鴨肉，炒得少油清新！雖然見到有辣椒但其實唔辣的！呢個重慶辣子蝦，蝦用油爆過的，連殻都爆至脆身但未至於可以連殻食，非常香口，味亦好香，辣辣地又夠乾身！之後有主角水煮魚！一見到顏色好靚！似足平時係國內食京川菜既賣相！用既唔係一片片既新鮮魚而是魚柳，因為人地唔識食有骨既魚，魚柳絕對合佢口味！我就鐘意食新鮮魚！辣度相當不錯，麻得幾正，除左芽菜，底仲有寬粉條，索曬汁好夠味！呢個都幾大份！可以再多1-2人share！如果用新鮮草魚或桂花魚就完美喇！香港好少地方搵到咁正宗既水煮魚，辣椒感覺真係用四川黎既，煮出黎既味道都係麻、辣、香俱全！確實有實力！送既呢碟清菜其實都不可睇少，少油少鹽但吊出菜既清甜，亦顯出廚師根底功夫，呢餐晚飯食得好滿足，食到都係正宗四川小菜味道，如果最後有小小甜品就更好喇！…查看更多

個胃唔舒服左成個月，終於好返喇！終於急不及待可以打返個邊爐！呢間火鍋留意左一排，係鵝頸橋底好易搵，樓下門口有個閘，原來行左邊樓梯先啱！上到去有D似之前去過另一間係同樣係銅鑼灣既火鍋店格局，有好多檯有大房亦有卡位～呢度晚市打邊爐有2種價錢，有$288/$368，分別首先湯底既選擇已經好唔同，有卜卜蜆湯、牛坑腩干鍋、四川麻辣、海鮮鍋等等係貴啲既套餐先有，$288套餐主要係藥膳湯底，不過2款都係酒任飲！當然差$80有海鮮梗係毫不猶豫揀海鮮啦！想食清D，麻辣暫時忍一忍口，於是揀左花膠螺頭雞濃湯！食住前菜 - 拍青瓜 & 涼拌雲耳先！當全部食物陸續黎到既時候，都覺得幾豐富！海鮮拼盤大大盆咁上檯，呢度有4款海鮮，每人每款有一件，今日無生蠔，就多左一款貝類！當中有海蝦、扇貝、鮑魚、青口等等，最鐘意食既係其中既海蝦、扇貝、貴妃蚌同迷你象拔蚌，好新鮮好彈牙，係冰鎮上檯既添！跟住黎左手工丸類同埋釀冬菇、釀豆卜，水餃雲吞等等，賣相都好靚，雲吞細細粒，好滑，手工既墨魚丸同豬肉丸都好彈牙！肉類有2款可以揀，當然都係升級左既手切安格斯牛肉或者西班牙黑毛豬，十五十六都係揀牛肉，因為靚既牛肉肉質真係差好遠，至少唔會un同唔會有渣！當然黎到既牛肉部分脂肪分佈平均，唔會過肥，肉係鮮紅色即係代表新鮮，食落亦有肉味！2人份量黎講啱啱好！即炸響鈴出場！超級巨型！簡直有手臂咁大條！正呀！一放落鍋已經擋住成個鍋！又夠脆，呢個要試呀！呢度既蟹柳都唔係平時咬落粉粉又易爛既蟹柳，呢隻長蟹柳更好食、久煮不爛！其他一般既火鍋配件就同平時一樣，落單任點！我地都試左唔同既蔬菜，都幾新鮮～呢度幾特別既係有圍裙比你用，驚你彈到湯汁落件衫，試左佢既韓國啤酒Fitz、白酒紅酒都係口味比較清新順滑，容易入口，所以都飲左兩三杯，任飲確實係好抵！見今日係平日，個場又大，行下個圈望到都有好幾間大房細房包場用又睇埋電視，搞生日聚會都好似唔錯！想講下個湯底花膠螺頭煲雞濃湯，其實味道真係幾濃，好重雞味，愈煲得耐，雞湯味愈濃，花膠亦煲到淋先黎食就最正！花膠唔係一般任食火鍋店既花膠仔，比較厚身啲有口感啲，配埋紅棗好滋潤呀！我地都不禁飲左幾碗！除左成日食麻辣湯底以外既好選擇！食過好幾間既火鍋，呢個雞湯真係好濃，值得試！！最後食到好飽之際，居然又送埋甜品，應該唔會太大個掛？呢個心太軟雖然細細件，啱啱整起熱辣辣，打開仲有驚喜！呢個心太軟係超級流心！好好味呀！超濃朱古力又唔會好結實！即刻後悔點解唔叫一人一件😂最後攬住個肚飽飽的歸家😊…查看更多